尋找香港美食手冊: February 2018

Sunday 25 February 2018

喜歡食特色嘢嘅我，最近發掘咗呢間位於灣仔主打撈麵嘅餐廳，今日難得準時放工，所以決定同朋友黎試下。

可能因為係商業區嘅關係，晚飯時候唔算多人，我地七點幾到餐廳都未需要等位。

雖然餐牌上有唔少套餐，但係為咗選擇更加多元化，我地揀咗單點。

餐廳嘅餐具都算幾新淨，最吸引我嘅當然係有公雞圖案嘅碗碟啦。

漂爽海蜇皮伴香辣順風耳小青瓜 :

呢碟前菜非常精緻，賣相相當吸引，有海蜇、豬耳同埋青瓜。海蜇拌左麻油之後非常香，豬耳亦都整到好似肴肉咁，一塊一塊咁令人食過不停。至於青瓜，味道微辣，入口清爽。

炸醬雲吞撈麵 :

由於餐廳有名叫「薈麵館」，咁當然出名食麵架啦。眼見餐牌內有各式各樣嘅撈麵，令我覺得我點都要叫返碟黎食。由於自己好鍾意食炸醬同埋雲吞，所以一於叫呢個雙拼組合。撈麵上檯時會配上清湯，幼麵撈入炸醬，拌上湯食，唔會扭作一團，好容易同朋友分享。味道方面亦都非常惹味，配埋皮薄餡多嘅雲吞食，好有口感，非常好味。

五柳醬酥炸雲吞 :

有別於一般嘅錦鹵雲吞，五柳醬酥炸雲吞係用春卷皮整成，所以用油炸過後都唔會起氣泡，亦都炸得非常鬆脆，餡料雖然唔多，但恰到好處，點埋極之惹味嘅五柳醬，入口酸酸甜甜，非常開胃。

香軟懷舊馬拉糕 :

馬拉糕熱辣辣，入口層層鬆化柔軟，亦帶香濃嘅蛋味。

流汁叉燒包 :

比係一般酒樓，呢度嘅叉燒包包皮夠薄，餡料好足，輕輕搣開叉燒包，餡料就會慢慢流出，的而且確係「流汁」。

晶瑩鮮蝦餃 :

蝦餃一籠四隻，皮都算薄而且帶點黏性，鮮蝦爽口彈牙而且多汁，每一粒都非常飽滿，以$9一隻黎講真係性價比高。

食咗咁多野，埋單都唔駛300蚊，仲可以慢慢坐去品嚐美食，咁嘅價錢，算係性價比高。

地址: 灣仔皇后大道東183號合和中心7樓709號舖

泰聚呢間餐廳有兩間分店，一間係天水圍一間係太子，住元朗嘅朋友向我多番推薦話好好味，咁成日去開油尖旺嘅我，當然選擇去太子分店試下啦。雖然餐廳出名泰式火鍋，但係本人始終都係對傳統泰菜比較有興趣，所以都係選擇叫小菜。雖然二人套餐算幾抵食，但係選擇會有所限制，所以都係揀a la carte。

肉碎粉絲湯(2位) : 肉碎粉絲湯帶清清嘅魚湯味，入口清甜，無咩味精，加埋肉碎、蔬菜同埋粉絲後，口感非常豐富。

泰式小食拼盤(小) :

泰式小食拼盤算係食泰菜必叫嘅菜式之一，食物有雞翼、春卷、蝦餅、魚餅同香葉包雞，雖然全部都係即叫即炸，但係入口唔會太乾，最吸引嘅當然係蝦餅，入口夠彈牙，點埋醬汁食真係風味十足。

青咖哩雞(小)配白飯 :

主菜我地叫咗青咖喱雞，叫咗白飯黎送。雞肉份量都算多，除左雞之外仲有唔少蔬菜，青咖喱汁有香濃嘅椰奶味，辣度剛剛好，用黎撈飯食真係令人越食越開胃。

青檸梳打＋三色冰 :

泰菜味道偏濃，飲返d泰式飲品可以中和返個味道清清個口。我地揀左三色冰同青檸梳打，味道唔算太甜，幾好味。

椰汁西米糕 :

甜品以椰汁西米糕作總結。一份共五件嘅椰汁西米糕，味道剛剛好，唔太甜，好好味。呢度食物唔錯，環境都算乾淨企理，可以慢慢坐唔駛好似旺角鬧市中嘅餐廳咁食到趕頭趕命，雖然價錢唔算平，但總算值回票價。

地址: 太子花園街239號嘉慶苑地下

特別日子總要搵個特別地方食餐好嘅。我地預先訂座，確保晚飯時間有位，可惜因為工作關係未能如時到達，好彩打咗電話同店方講將訂座時間推遲。

到達餐廳後，我周圍望，但搵極都搵唔到用餐地方嘅位置，直到店員係雨傘桶度抽起其中一把傘，之前我以為係一幅牆嘅門就打開咗喇，十足十KINGSMAN電影咁。

餐廳入面嘅裝潢相當華麗，灰色嘅大理石吧檯，以及用皮革造嘅梳化椅，絕對帶俾人舒適嘅感覺。

餐廳嘅另一邊有個表演台，聽聞幾乎每晚都會有歌手駐場表演，可能今晚到訪時間尚早，未能欣賞。

食物方面，可能因為係酒吧餐廳，所以選擇唔多。

落單之後，店方先為我地送上麵包。

對於兩個人黎講，麵包份量都算幾多，入口軟熟，幾好味。

Fish and Chips :
Fish and Chips嘅魚用咗Chilean sea bass，即叫即炸，所以等候需時，不過粉漿整得唔錯，入口亦都唔油，幾好味。

Kinkawooka Mussel Bucatini :
用蒜蓉炒過嘅青口，配埋意粉，入口充滿蒜香味，青口份量都算多。

最值得一提嘅係餐廳嘅洗手間，睇落好似d 遊輪船艙咁，好特別，真係不得不來參觀。

雖然呢度嘅食物款式唔多，但係裝潢真係非常特別，真係值得黎參觀下。