首爾 (旺角)

一向都鍾意食韓國野既我，係一個星期六既晚上朋友帶左我黎「首爾」一試。6點半鐘左右黎到，仲未要等位，入到去我地被安排坐係全餐廳最角落既地方，果度燈光比較暗，附近又無咩人，都幾有情調。
我地叫左3樣野，2個小食同一個主菜，小食有海鮮炒韓國年榚同埋炒韓式粉絲，而主菜叫左泡菜餃子烤肉豆腐鍋。 

落單之後侍應們就送上前菜，有2款，青瓜同埋泡菜，2款都唔係太辣。

小食: 海鮮炒韓國年榚
海鮮有原隻連殼的蝦同青口，D 蝦食得比較辛苦，建議佢地下次脫左殼先至炒。醬汁就杰左少少，加返少少水會好D，不過OVERALL 味道都算唔錯。

小食: 炒韓式粉絲
呢個所謂既小食份量真係有點兒驚人，同主菜既SIZE 真係差唔多，味道唔算喊，幾好。

主菜: 泡菜餃子烤肉豆腐鍋烏冬
用料足，湯底有少少辣，烏冬吸收哂湯既精華，餃子仲唔會爛哂而食唔到，值得推介。

openrice link: http://www.openrice.com/zh/hongkong/r-%E9%A6%96%E7%88%BE-%E6%97%BA%E8%A7%92-%E9%9F%93%E5%9C%8B%E8%8F%9C-r45159

地址:  旺角通菜街21號地舖

越興園越南菜館 (旺角)

星期六黎到旺角，想食D特別D既野就梗係黎女人街啦，呢到好少連鎖既餐廳，夠晒有特色啦。

八點幾黎到，好多都唔係咁多人，唔洗點等位，坐低之後見到餐牌有個2人餐，但係都係覺得散叫豐富D都抵D，因為可以食到自己鍾意食既野。

天氣咁熱，就梗係叫返2杯凍飲啦，我自己就好鍾意飲鹹檸七，覺得佢味道好特別又可以消暑。

之後叫左香茅豬扒撈檬，賣相一流, D 汁酸酸地噓都幾好食, 豬扒仲一D都不少添。

之後上菜既就係咖哩雞配法包，雞肉同汁都好多，所以4片麵包點完汁之後仲有好多淨。

其實食到呢到已經幾飽下，偏偏呢個時候個蝦餅先到，不過佢整得熱辣辣，炸得好脆，幾好味，值得推介。

openrice link: http://www.openrice.com/zh/hongkong/r-%E8%B6%8A%E8%88%88%E5%9C%92%E8%B6%8A%E5%8D%97%E8%8F%9C%E9%A4%A8-%E6%97%BA%E8%A7%92-%E8%B6%8A%E5%8D%97%E8%8F%9C-r4188

地址: 旺角通菜街17號地下

貴花甜糖水甜品專門店 (油麻地)

係附近食完印度野，味道比較濃，就緊係想搵D甜野沖沖個口啦，一諗就諗到黎呢間貴花甜啦，其中一個原因係因為我係佢地VIP, 有九折。

叫左個芒果涼粉雪榚同埋個朱古力心太軟。芒果涼粉雪榚好快就到，好清涼又消暑，真係好味。心太軟要焗所以會等比較耐，大約１０分鐘後上。熱辣辣既朱古力蛋糕切開後有好多漿流出黎，味道有點兒過濃同埋有少少苦，但係配埋雪糕就好似剛剛好咁。 

 

openrice link: http://www.openrice.com/zh/hongkong/r-%E8%B2%B4%E8%8A%B1%E7%94%9C%E7%B3%96%E6%B0%B4%E7%94%9C%E5%93%81%E5%B0%88%E9%96%80%E5%BA%97-%E6%B2%B9%E9%BA%BB%E5%9C%B0-%E6%B8%AF%E5%BC%8F-%E7%94%9C%E5%93%81-%E7%B3%96%E6%B0%B4-r42526

地址: 油麻地砵蘭街6號地下

沙拉姆咖喱屋 (油麻地)

黎到油麻地街市一帶，知道附近有間好正宗既印度菜，就打算入黎試下。7點幾入到去都唔算多人, 環境都幾舒適，無咩壓迫感。入到去仲見到全部職員都係印度人，心諗，食物一定好正宗啦。

坐低點菜無耐，侍應就攞左D 餐前小食俾我地, 係一D 薄薄地脆脆地既餅，有少少辣味，喜歡既仲可以點下旁邊既醬汁，不過個人認為唔點會好味D。

因為唔係好肚餓既關係，同埋想之後去食甜品，所以都唔敢叫咁多野食，叫左一個小食，一個MAIN COURSE 就算。

小食叫左個咖哩角，一份有3件，大大件同埋都好多陷，唔會只係得個皮，旁邊都有醬汁可以點既，不過唔點好似好味D。

之後食既就係咖哩雞，落單之後先發現原來可以揀小辣中辣大辣，但係奇怪係點解落單時無人問過我地既? 咁我地食既又係咩辣呢? 真係一個迷。本身個咖哩係唔包薄餅架，要另外加。薄餅有好多俾你揀，我地當然叫個PLAIN 既黎試啦，咁先試到佢D野食有幾正宗，一份有3件，用黎點咖哩汁真係一流啦。

呢到D野食真係幾好味，又正宗，又唔洗去尖沙咀某大廈樓下俾人說你去邊間食，有機會真係會再去多次，試埋其他野食。 

openrice link: http://www.openrice.com/zh/hongkong/r-%E6%B2%99%E6%8B%89%E5%A7%86%E5%92%96%E5%96%B1%E5%B1%8B-%E6%B2%B9%E9%BA%BB%E5%9C%B0-%E5%8D%B0%E5%BA%A6%E8%8F%9C-%E5%92%96%E5%96%B1-r121311

地址: 油麻地廣東道847-965號永發大廈地下6號舖

紅辣椒 (旺角)

係女人街轉角既橫街到，往往都會有驚喜發現，位於通菜街呢間由泰國人主理既「紅辣椒」，風味非常地道 ，最出名既應該係咖哩同沙嗲，全部都好有特色。

咖喱海鮮飯一D都唔辣, 但係就有泰式風味，裡面有幾隻青口同蝦，咖哩汁勁多，送飯真係岩晒呀。

無骨豬手什菜炒米粉雖然有少少油，但係真係炒得幾入味，D餸都幾多下。

餐飲叫左青檸梳打，我既至愛，食完咁重味既野飲返杯真係一流呀。 

openrice link: http://www.openrice.com/zh/hongkong/r-%E7%B4%85%E8%BE%A3%E6%A4%92-%E6%97%BA%E8%A7%92-%E6%98%9F%E9%A6%AC%E8%8F%9C-%E5%92%96%E5%96%B1-r14430

地址: 旺角通菜街1號威達大廈地下N舖

茶木‧台式休閒餐廳 (銅鑼灣)

係一個星期五既晚上，同朋友去完一個好特別既地方之後就係時間搵地方食晚餐啦，最後我地選擇去左銅鑼灣。

黎到銅鑼灣，第一時間就諗起銅鑼灣廣場一帶既食肆，見到樓下既指示牌，就決定上黎茶木食飯。

8點幾先黎到銅鑼灣，以為唔洗等位啦，點知原來一樣咁多人，都等左一陣先入到去。

黎到茶木點都一定要叫佢個甜品，為左食得落呢個甜品，點都要好好計畫下，所以就決定叫1個麵同1個小食2 個人SHARE，再加埋個甜品，就真係PERFECT 啦。

醬燒豬軟骨麵豬湯底太咸，豬軟骨味道剛剛好但係有D 過肥。

香煎餃子味道好, 但真係超級油，提議佢用隔油紙印晒成隻餃子先上菜會更加好。

芒果香草蜜糖磚塊 - 呢個先至係「主菜」，賣相簡直係無得頂，由落ORDER 到上菜要成15分鐘架。外型非常漂亮，上面係超級有水準既芒果味雪糕, 加左少少蜜糖同好好味既棉花糖，下層的多士中間係空心既, 但係裡面有好多細細粒既小多士。D 多士整又厚又脆，暖暖既多士配上冰凍既雪糕食，冷熱交替，一個字，正，我自己食完都開心左足足一晚呀。

openrice link: http://www.openrice.com/zh/hongkong/r-%E8%8C%B6%E6%9C%A8-%E5%8F%B0%E5%BC%8F%E4%BC%91%E9%96%92%E9%A4%90%E5%BB%B3-%E9%8A%85%E9%91%BC%E7%81%A3-%E5%8F%B0%E7%81%A3%E8%8F%9C-%E7%94%9C%E5%93%81-%E7%B3%96%E6%B0%B4-r145187

地址: 銅鑼灣軒尼詩道489號銅鑼灣廣場一期6樓A舖 

Feast (Food by East)

因為公司聚會，首次黎到港島東既EAST Hotel，試下佢地既半自助午餐。一入黎餐廳，就見到一字排開既前菜和甜品吧，果到有好多蝦，煙三文魚，肉腸，各款沙律，凍PIZZA同QUICHE揀。呢到既煙三文魚好好味，每一塊都好厚好大塊, 又唔太咸。

攞完沙律返埋位後，侍應就上前問我地想叫咩主菜。餐牌有4個主菜揀，有牛扒啦，炸雞啦，意粉同埋魚配印度牛油薄餅。 4款賣相都唔差，薯條炸得好香脆，至於魚就整得濃左少少，同埋D 牛油薄餅太油啦。

食完MAIN COURSE之後，就到左食甜品既時間啦，我第一時間就梗係食我最喜愛既雪糕啦，係可以揀要cone 同用碗之間，我當然揀左用碗，等我可以留肚食其他野，今日雪糕有ROCKY ROAD 同埋VANILLA 揀，食落似係DREYERS黎既。

食完雪糕之後係食其他甜品既時間啦。以下呢碟甜品，講真，真係有D失望，好可能係因為放在係冷氣唔夠既某個角落度，個DAILY CAKE 已經係處於半熔狀態。至於其他甜品就真係好一般，唯一值得讚既就係個蘋果tart，成個tart唔會太鬆泡泡，亦都唔會太heavy。

食飽飽之後就叫埋杯熱啡，夠香夠熱，唔錯唔錯。

openrice link: http://www.openrice.com/zh/hongkong/r-feast-food-by-east-%E5%A4%AA%E5%8F%A4-%E5%A4%9A%E5%9C%8B%E8%8F%9C-%E6%B5%B7%E9%AE%AE-r42063

地址: 太古太古城道29號東隅1樓