熱沙咖啡 (馬灣)

今年嘅時間實在過得太快，眨下眼已經九月啦，成年都無咩放過假，因為都無得去旅行，清假喎，唔通係屋企訓覺咩？ 咁就梗係睇下香港有咩特色餐廳去下啦。

 

都唔記得上一次去馬灣係幾時嘅事啦，好多人都覺得馬灣好似好遠，但其實要入黎都唔係太難嘅，由葵芳搭穿梭巴士入去都係15分鐘左右，都算幾方便。

入到黎就發覺呢度比起市區真係帶俾人另一番感受，風景真係好靚，空氣又清新。

餐廳外面嘅佈置好得意，好有外國風情，充滿度假感，裡面嘅裝潢都好有特色，聽店主講好多佈置同裝飾品都是來自於土耳其架，唔知真係以為自己去左外國旅行，我地又點可以唔打卡呢？

餐廳老闆娘好友善，不停介紹同推薦各種菜式俾我地，今晚在場仲有一位咖啡專家為我地深入淺出地分享佢對咖啡嘅研究同沖飲嘅心得，仲俾我地試過唔同沖法整出黎嘅咖啡添。

黎到呢度，又點可以唔試下土耳其菜式呢？

土耳其招牌烤雞半隻：

燒雞燒得唔錯，外皮香脆，雞肉嫩滑，入口相當juicy，白飯吸收左雞油後非常好味，伴碟仲有沙律菜，可以中和返當中嘅油份。

雞肉焗薯:

由於係即叫即整，所以製作需時，反正都係入黎度假，無咩所謂吧。

 

焗薯上加左已切條嘅雞肉同埋粟米粒，配上生菜絲同埋特製醬汁，入口相當嫩滑，味道非常夾。

開心果酥餅：

跟餐配甜品只需加＄25，呢個開心果酥餅係由多層薄酥皮整成，中間夾著開心果果蓉，味道好似蘋果批，加埋雲尼拿雪糕，味道非常夾。

跟餐有兩杯飲品，一杯叫左檸檬梳打，味道非常清新，另外一杯，當然唔少得呢度嘅招牌菜，coffee on the sand ，熱沙咖啡啦。

熱沙咖啡經過熱沙傳熱，達至溫度平衡，呢個咖啡可以俾客人自己煮架，用兩匙咖啡粉加入一匙糖及水，用銅壺係熱沙上烹調，分開3次倒入杯度，味道濃郁，無落奶都唔會覺得苦，咖啡配上土耳其糖果一齊飲，感覺非常特別，整緊咖啡果時老闆娘仲同我地講，係土耳其好多野都可以用黎占卜，而咖啡仲係常見嘅一樣野添。

openrice link: https://www.openrice.com/zh/hongkong/r-熱沙咖啡-馬灣-土耳其菜-r630869

地址：馬灣珀林路大街村東11號地舖

黑門水產すいさん (尖沙咀)

提起「黑門」二個字，即刻令我諗起，好耐無去過旅行啦，究竟幾時先可以衝出香港呢？

 

無得去旅行，唔代表我要日日係屋企抗疫架嗎，近黎疫情好轉，要趁機出去食下好野呀。

 

今日黎到位於棉登徑，超具日本風情嘅「黑門水產」，天花版上吊住好多貝殼，環境一流，餐牌上有各式各樣嘅美食，好似刺身、壽司、海鮮、沙律等等好多材料仲係日本直送過黎添!

 

黑門角切海鮮沙律：

海鮮沙律加入左好多刺身，有三文魚、金目鯛，赤蝦等等，非常足料，全部都切到細細粒，容易入口，粒粒都相當肥美。沙律份量都算多，配上清新嘅柚子汁，味道真係非常夾，食落好開胃。

 

刺身六盛：

刺身六盛分別有三文魚、油甘魚、赤身、真調、海膽同帆立貝，全部都係厚切，無腥味好鮮，又無筋，立下一個好印象。

 

三文魚肥美甘香，帆立貝富彈性，味道鮮甜，海膽入口一啲都唔腥，而且仲好甜，配紫菜食，簡直係一流。

 

 

黑門令蟹味噌甲羅燒：

甲羅燒有鵪鶉蛋、蟹肉、蟹膏同蟹子等等嘅材料，非常豐富，煮到開始變稀就可以食架啦。

 

蟹肉好新鮮，每啖蟹膏都好鮮甜，粒粒蟹子入口脆卜卜，非常有咬口，配上炸蒜同埋梳打餅食，又係一番風味。

 

黑門令龍蝦湯煮海鮮：

海鮮主要有魷魚、蝦同田螺。海鮮放左龍蝦湯燒後味道十足，入口相當有口感，芋絲同金菇吸晒龍蝦湯嘅精華後，非常好味。

 

黑門令帆立貝伴魚子醬 ：

帆立貝不但厚身，而且爽口彈牙，配上甘甜嘅魚子醬，入口非常juicy，口感相當豐富。

 

黑門令大漁魚子醬脆脆包 ：

香脆嘅法包上加上海膽、三文魚籽、吞拿魚蓉、魚子醬等材料後，只係賣相都非常吸引，一口咬落去，外脆內軟嘅口感，配上鮮甜嘅刺身味，簡直令我一試難忘。

 

清心產燒魚鮫：

魚鮫黏住唔少魚肉，加入少量鹽燒過後，入口肥美，魚油甘香，魚肉滑嫩，連平時少食魚嘅我都覺得非常好味。

 

柚子檸檬梳打/奇異果梳打：

夏日炎炎飲返杯酸酸甜甜嘅梳打解暑，雖然2020年唔可以去日本旅行，但都為我哋嘅午餐畫上完美句號。

openrice link: https://www.openrice.com/zh/hongkong/r-黑門水產すいさん-尖沙咀-日本菜-海鮮-r589167

地址：尖沙咀棉登徑8號地下3-4號舖