Mini Club (尖沙咀)

上年去完銅鑼灣Mini Club後對佢既生蠔念念不忘，今日趁住長假期前夕同2個朋友黎尖沙咀分店度一齊食飯飲野傾計。

Mini Club位於山林道，佐敦站行過去都係5分鐘左右。呢度嘅環境都幾清靜，唔會太嘈，傾計真係一流。店內裝修非常特別，有少少英倫風格，牆邊都掛左唔少英國景點既掛畫。

真係幾欣賞佢地用ipad 黎做menu，可能係因為環境比較暗睇紙餐牌比較難啦，如果可以好似某著名壽司店咁用埋黎落order就好啦。

我地一行3人，叫左2杯飲品，4隻生蠔，一個海鮮拼盤，一個海之幸福摩天輪，同埋一份三味炸雞，份量剛剛好，唯一美中不足既係D食物黎得太快，張檯擺唔晒咁多野食，食起上黎有D逼。

Strawberry Me (Rum, Tequila Rose, Milk, Strawberry Puree): 
呢杯cocktail飲得又睇得，酒精成份唔高，入口有D似Smoothie，綿綿地，飲落有清香既士多啤梨味。Garnish方面用左威化餅，百力枝同埋朱古力，再用左一支針筒黎裝住D紅糖水，想落幾多可以自己加，鍾意幾甜就幾甜。

What The Duck: (Rum, Midori melon, lychee, pineapple juice, Grenadine): 
坐低時見到隔黎檯飲緊呢杯好得意既飲品，攪到自己都貪得意叫黎飲下，呢款cocktail賣相別出心裁，非常吸引，佢係以一隻可愛鴨仔浸係浴缸到沖涼既造型，成份有 Rum、蜜瓜酒再加上荔枝、菠蘿汁及紅糖水製作，酒精濃度中中等等，飲落有好香甜既荔枝同菠蘿味，飲既時候仲可以隨意將旁邊粉紅色既爆炸糖加入飲品中，令到飲品有D 酸酸地既味道，口感更過癮又特別。 

係等候食物時可以食住花生飲住野傾住計等，感覺唔錯。

生蠔(4隻):
生蠔有多款選擇，Gillardeau同Fine de Claire 係我慣常既選擇。Gillardeau蠔味比較濃，入口後初頭先嘗到陣陣鮮甜，跟住就食到海水味，鹹度唔算重，肉質方面厚而有彈性，食落肥 美，口感爽脆鮮甜。至於Fine de Claire既海水味偏濃，海水鹹味充滿口腔。

海鮮拼盤:
海鮮拼盤好大盤，入面海鮮種類都非常之豐富同新鮮，有熟龍蝦(半隻)，睡蟹(半隻)，藍青口(3隻)，加拿大翡翠螺 (2隻)，法國翡翠螺(2隻)，鮑魚(2隻)，鑽石蜆 (3隻)，玫瑰蝦(2隻)，龍蝦多肉，蟹身唔多肉但多膏，蟹鉗鮮甜多汁，整體黎講D海鮮都無咩雪藏味，唔錯。

海之幸福摩天輪:之前係openrice都見到有blogger食過呢個幸福摩天輪，覺得好可愛，所以都叫左個黎試下。呢個摩天輪賣相真是好別緻突出，佢總共有5卡，每卡都盛載唔同既食物，亦都會因應每卡既重量而轉動，最重果卡係最底，好得意。摩天輪上面大部分都係炸物，分別有炸百花蟹鉗、炸墨魚餅、炸天婦羅、炸魷魚鬚、炸泰式魚餅同埋少許沙律菜。炸物熱辣辣又香脆，本人最鍾意食既係炸魚餅，炸漿夠薄身，咬下脆中帶些爽口，用來送酒真是不錯，只不過係比較熱氣同無益啫。

三味炸雞:
除左摩天輪之外我地仲叫左另一款特色小吃，三味炸雞。點解叫三味炸雞? 我相信係因為旁邊放著三支針筒形狀既物體，睇真D原來是醬汁，分別係蛋黃醬、茄汁同埋他他醬，用黎點雞真係幾夾。
薯條炸得好脆，雞件亦都炸得剛剛好，有好多肉汁，如果可以加少少調味粉咁就真係完美啦！

openrice link: http://www.openrice.com/zh/hongkong/r-mini-club-%E5%B0%96%E6%B2%99%E5%92%80-%E8%A5%BF%E5%BC%8F-%E9%85%92-%E9%9B%AA%E8%8C%84-r160011

地址:  尖沙咀山林道29-31號地下A舖

韓舍 (旺角)

一年前黎過韓舍之後對佢地既烤肉同埋甜品念念不忘，最近想再黎試下享受一番。

「韓舍」唔係一般既韓燒食店，佢地除左有烤肉，熟食，刺身，壽司，沙律之外，仲有好多好多甜品食，女仕們見到一定會好開心。

一行兩人黎到「韓舍」，估唔到佢地無咩2人位，大部分都係6人位，所以我地兩個既座位都相當寬敝，好舒適，坐得非常舒服，加上每個燒烤爐上都有獨立抽風爐，享受食物時唔會煙霧瀰漫。

我地坐低之後就出去攞野食啦。

水吧有各式各樣既飲品可以隨意選擇。

吧檯旁仲有刺身供應，我地每樣都要左少少，刺身切得都算厚，食落好新鮮清甜。

冷盤方面有青口，凍蝦， 冷烏冬，沙律，粟米粒，各款醬，開胃小食，醃青瓜等。

烤肉方面選擇都好多，都有十幾款，豬雞牛等等都係呢d，全部都醃得好入味。燒雞翼皮脆肉嫩，燒牛肉粒鬆軟，豬頸肉唔錯，味道濃郁，肉質結實，醬汁都同肉配搭得完美。

新鮮蔬菜方面既選擇都好多，值得推介既係燒椒，本人都試過燒粟米，但係燒完會好乾，味道同口感都好一般。

熟食方面除左有咖喱，炒菜，炆肉同龍脷柳之外，仲有唔少炸物，食落仲係熱辣辣同脆架，完全唔似翻炸。

食完「主菜」，又係時候食甜品啦，呢到既甜品選擇真係好多，分分鐘真係多過D酒店自助餐呀，好犀利呀。每一款仲要係細細件，一啖食晒，所以可以每樣都試下咁，食落又唔太甜， 味道仲唔錯。

個人最鍾意既當然係芒果布丁同埋啫喱。呢到既芒果布丁每一份都有芒果肉係裡面架。

雪糕方面真係唔知咩牌子，不過唔緊要，最緊要好味。味道方面有芝麻，綠茶，曲奇同埋雲呢拿，全部DIY，鍾意揀要雪糕筒或者用碗食都得。我揀左曲奇同綠茶味，綠茶相當好味，濃度剛剛好，值得推介。

係雪糕櫃隔黎有部雪條機，可惜唔係太識用，所以整得唔係太靚，唔緊要，下次再試過。

係雪條機隔黎仲有部格仔餅機，仲要係可以整紫薯味，出面食自助餐一般都係整原味架咋，所以真係幾吸引。可惜因為格仔餅太飽肚，為左留肚食其他野，唯有放棄佢啦。

棉花糖相信對好多人黎講都有童年回憶，我都唔例外，所以見到部棉花糖機都好開心想玩下，做法好似好簡單，只要放一匙更糖係棉花糖機到即成。哈哈，你整過你就知啦，

因為早入座，所以埋單都係一人$185左右，又有烤肉又有刺身壽司，仲有好多甜品食，真係幾抵食，淨係食甜品都有著數呀。

openrice link: http://www.openrice.com/zh/hongkong/r-%E9%9F%93%E8%88%8D-%E6%97%BA%E8%A7%92-%E9%9F%93%E5%9C%8B%E8%8F%9C-%E8%87%AA%E5%8A%A9%E9%A4%90-r117732

地址:  旺角彌敦道593-601號創興廣場9樓

Orange Elephant Thai Restaurant (九龍城)

九龍城出名食泰國野，本人耐唔耐都會走黎食下野，今次揀既係開左無耐既Orange Elephant。

餐廳正推出每日優惠，星期一至日都會有1款小食以$1 提供，星期一就有泰式明爐烏頭魚；星期二係泰式香茅炸豬扒；星期三係酸辣去骨鳳爪沙律；星期四係椰汁冰；星期五係泰式炸蝦餅；星期六係細支裝啤酒；而星期日就係飛天通菜。

椰青+芒果冰特飲:
飲品款式好多，包括傳統泰式珍多冰，椰汁冰，三色冰，龍眼冰之類。我地今次叫左既係椰青同芒果冰特飲，椰青水味道清甜解喝而且肉多厚厚，食辣時起左解辣作用。至於芒果冰特飲，芒果味好濃好解渴，相當唔錯。

馬拉盞炒通菜: 
通菜合時無根，炒煮時火候剛剛好，軟硬適中，馬拉盞味香，咸味無過火。

泰式炸蝦餅: 
炸蝦餅係我最欣賞既小食，一碟總共有六件，炸得剛剛好，外層金黃夠脆，入口爽口彈牙，口感十足，鮮蝦味道夠重，再配埋D泰式辣醬食，真係好好味。

泰式燒雞 (半):
燒雞用左秘製泰式香料醃製而成，燒得非常香口，雞皮都好香脆，雞肉都好嫩滑。

咖喱海鮮脆包盅: 
呢個脆包盅有D似農夫包，麵包烘得非常鬆脆，外脆內軟，個包裡面就放滿左唔同既海鮮，有斑腩，青口，魚柳，魷魚等等，再淋上了大量既黃咖喱汁，汁既濃度同辣度都好適中，食既時候先將農夫包用較剪分屍，再點上咖喱汁，再連裡面既配料一齊食，好好味，口感一流。

埋單每人$173 左右，雖然唔算好平，但坐得舒服都算唔錯 

openrice link: http://www.openrice.com/zh/hongkong/r-orange-elephant-thai-restaurant-%E4%B9%9D%E9%BE%8D%E5%9F%8E-%E6%B3%B0%E5%9C%8B%E8%8F%9C-r472450

地址:  九龍城啟德道31-33號地舖

小蟻人甜品西餐 (荃灣)

上openrice見到呢間餐廳有幸運轉盤玩，好彩既可以以一折享用餐廳既食物，一向鍾意為用優惠劵而去果間餐廳食野既我，就係因為呢個幸運轉盤，山長水遠黎食餐飯。

復活節假期晚上8點鐘黎到，好好彩唔駛等位，晚市套餐都有好多選擇，每個套餐都有一個湯，一杯飲品同埋主菜。

是日餐湯係青豆忌廉湯，湯底好滑仲好重青豆味，認真唔錯。

飲品雖然唔係平時西餐飲到既咖啡或茶，只係汽水，但係都算係咁啦，有coke zero，最適合怕肥既女仕們。

白汁芝士海鮮焗飯: 焗飯賣相唔錯，唔多好芝士既我地要求要少芝士，餐廳都好配合我地，我地眼前既白汁芝士海鮮焗飯既芝士味唔重，白汁好滑，海鮮份量仲好多，值得一讚。

煙三文魚蟹肉墨魚汁銅模意粉: 識食意粉既人都知銅模意粉貴過普通意粉好多，亦都有唔少人連佢係咩都唔知，其實銅模意粉特別之處係佢有坑紋，所以佢既surface area會大D，掛汁就容易D啦。呢到食到既意粉爽口彈牙，醬汁亦都好夠，每一啖都一定會食到意粉，海鮮同醬汁。

食完晚餐準備埋單時先係今晚既精粹，店方邀請我地like 左餐廳既Facebook，再係自己facebook到Share 晚餐既相，就可以去近門口既幸運轉盤度玩。我一轉，轉盤既針就停係「六折」果一格度，即係話呢餐晚餐會有全單六折，好開心呀。

埋完單之後估唔到餐廳仲會送macaron俾客人食，賣相好靚，可惜本人對macaron興趣不大。

食完呢餐飯之後真係開心左幾日，抽獎活動從未中過獎既我竟然抽到六折，真係好開心呀。如果餐廳可以將飲品由汽水轉做咖啡或茶，咁就真係完美無窮啦。

openrice link: http://www.openrice.com/zh/hongkong/r-%E5%B0%8F%E8%9F%BB%E4%BA%BA-%E7%94%9C%E5%93%81%E8%A5%BF%E9%A4%90-%E8%8D%83%E7%81%A3-%E8%A5%BF%E5%BC%8F-r482992

地址:  荃灣眾安街55號大鴻輝(荃灣)中心1樓103店