坐低之後店員比餐牌我地，同時間亦都送上一碗薯片，呢啲薯片仲係無限量添加嘅添，係等候食物上檯期間可以慢慢食。
原只招牌德國燒豬手：
食德國菜有點少得叫鹹豬手呀，見到差唔多台台都有叫，我就知道味道一定唔會差。
鹹豬手採用燒既方式炮製，豬皮燒得好香脆，肉嫩而香滑得黎又唔太油膩，顏色呈嫩紅，配埋芥末食，味道相當吸引。配菜嘅酸菜入口非常清新，令整體油膩感減低。
燒汁炆燴豬手：
有別於燒豬手，用燒汁炆過嘅豬手味道一d都唔鹹，入口好淋，亦都唔乾身，同燒豬手簡直係兩種唔同嘅風味。配菜仲有甘筍、青豆同埋小椰菜，令到整體顏色鮮艷，賣相非常吸引。
比亞荷夫烤腸拼：
德國菜餐牌上有香腸拼盤係理所當然嘅事，拼盤有分大同細，我哋人數少，要咗個細嘅，一共有四條，分別係牛肉腸、芝士腸同埋兩條墨魚腸，配酸菜、酸瓜、蒜香沙律醬同埋蜜糖芥茉醬。
三款腸中，我最喜歡嘅都係墨魚腸，味道非常香， 入口好似墨魚丸，非常彈牙。
芝士腸咬開後有大量芝士流出，非常適合喜愛芝士嘅朋友。
至於牛肉腸，肉身軟滑又唔騷，味道香濃有咬口，配埋自家製嘅酸菜食，仲可以消除油膩感。
德國傳統焗薯批：
焗薯仔批從來未試過，喺餐牌上見到覺得非常新奇，店員同我講，係德國菜裏面，焗薯仔批就好似東方人食白飯咁樣。
經店員介紹之後，知道原來焗薯仔批係用兩種生熟薯仔整成，加入煙肉同埋忌廉焗成，最後再淋上用豬牛骨敖成嘅燒汁， 個人認為呢個批口感有少少似薯蓉同埋蛋糕，味道非常新穎。
喺酒吧呢啲環境食嘢，又點少得叫杯飲品啊，唔飲酒嘅我哋叫咗fruit punch, 亦都為我哋今晚嘅晚餐畫上完美句號。
openrice link: https://www.openrice.com/zh/hongkong/r-bierhof-太子-德國菜-r163470
地址：太子界限街44號地下
香煎黑毛豬配蘋果汁: 黑毛豬肉質鮮美，入口夠爽，又唔太硬，味道一D都唔騷，配埋自家製蘋果蓉呢個配搭真係非常襯，味道夾得黎仲帶出肉嘅鮮味。
