十和田總本店 (尖沙咀)

今晚同男朋友去尖沙咀行街食飯，咁啱見到一直都好想試嘅十和田，就一於黎試下啦。

呢度主打日本壽司同刺身，餐廳嘅裝修相當有日本風格，燈光光猛，環境簡潔舒適，令人感覺舒服。

餐廳非常時尚，每枱都有一部平板電腦用黎點菜，更加可以睇到自己點左D咩野同埋食左幾多錢，非常方便。
我地叫左各式各樣嘅沙律，小食，飯同埋壽司。

刺身沙律:
刺身沙律真係唔係好多機會食到，呢份沙律份量都算多，刺身都算足料，有三文魚、蟹籽、鯛魚、油甘魚同埋八爪魚，全部都切到細細粒，容易入口，粒粒都相當肥美，加埋新鮮爽脆嘅沙律菜，配上加左少少wasabi嘅沙律汁，味道真係非常夾，食落好開胃。

燒明太子雞翼 :
去左骨既雞翼脹卜卜，裡面仲塞滿明太子。雞翼煎得香口，外皮香脆金黃，雞肉入口多汁幼嫩，味道微辣，非常惹味。

吉列生蠔 :
吉列生蠔一向都係我嘅最愛，呢度嘅蠔即叫即炸，一份有四件，蠔身都算大隻，炸粉唔算厚，入口熱辣辣仲好多汁，吉列層好脆好好味。

蒸蛋 :
究竟中式蒸水蛋同日式茶碗蒸有咩唔同呢？中式蒸水蛋一般用清水混合蛋液，以碟子蒸，食用時倒上醬油調味。日式茶碗蒸好多時都係將鰹魚高湯與蛋液拌勻，放係杯或碗仔內蒸，材料包括海鮮同蔬菜等等，蛋汁混合高湯同食材嘅後精華，食起來份外鮮甜，所以都唔需要添加調味。

呢度嘅日式茶碗蒸呈淺黃，入口清甜嫩滑，加入高湯後味道濃郁，配料有彈牙嘅獅子狗, 爽甜嘅香菇同埋鳴門卷，整體配搭好夾，好好味。

三文魚親子丼:
三文魚親子丼面頭放滿油脂分佈平均嘅三文魚同三文魚籽，只係賣相已經俾佢100分。三文魚非常新鮮，入口鮮甜肥美，配埋子薑，三文魚籽同Wasabi，口感一流。

海鰻卷+飛魚子壽司 :
海鰻卷上嘅鰻魚夠大件，好新鮮，燒汁亦都夠惹味。大大塊淋左燒鰻魚汁嘅鰻魚包上青瓜，蛋，同埋加入左少少醬油嘅飯，唔洗左點豉油已經好夠味。

飛魚子壽司嘅飛魚子比較大粒，食落粒粒分明，紫菜一D都無淋到。 

食完主菜就梗係要食甜品架啦，係日式餐廳又點可以唔試下佢地嘅雪榚呢? 我地就叫左兩款試下。

黑芝麻雪糕+ 豆腐雪糕 :
每款雪榚味道香濃，如果兩款都想試嘅話，建議先試味道無咁濃嘅豆腐，然後先試黑芝麻，咁樣就唔洗驚味道會被蓋過啦。最值得一讚嘅係呢度嘅雪榚係以椰果襯托，係夏日炎炎呢D日子，真係完美嘅組合呀。

埋單價錢同一般日式放題差唔多，但係呢度嘅食物質素都性價比高啦。

Openrice link: https://www.openrice.com/zh/hongkong/r-%E5%8D%81%E5%92%8C%E7%94%B0%E7%B8%BD%E6%9C%AC%E5%BA%97-%E5%B0%96%E6%B2%99%E5%92%80-%E6%97%A5%E6%9C%AC%E8%8F%9C-%E5%A3%BD%E5%8F%B8-%E5%88%BA%E8%BA%AB-r535762

地址: 尖沙咀金馬倫道42號華懋金馬倫中心地下

The Stadium (銅鑼灣）

The Stadium係一間以美式運動為主題嘅西餐廳，係銅鑼灣同觀塘都有分店，除左有得食之外，仲有各式各樣嘅玩樂設施，非常適合一大班朋友黎食飯玩下傾下計。

我地一行三人，叫左一個小食，兩個main course 同埋一個甜品share食。

烤雞塊拼粟米斑塊：

烤雞塊及粟米斑塊，拼上芥末及辣醬，作為餐前小食，份量剛剛好，差唔多食完嘅時候，店員就為我地送上主菜啦。

蘑菇雞肉闊條麵：

意粉採用左闊條麵，口感彈牙，配料有雜菇同雞肉，意粉汁加入cream同芝士，個汁亦都整得好滑，忌廉味好香濃，有輕輕嘅芝士味，非常適合喜歡芝士嘅朋友。

原隻焗春雞：

加入rosemary 後焗過嘅春雞，雖然製作需時，但係賣相真係相當吸引。除左有大大隻嘅雞之外，仲有蕃茄同薯仔做配菜，整體顏色配搭唔錯。

春雞焗得剛剛好，帶輕輕香草味，肉質香嫩幼滑，入口非常juicy，唔洗額外點啲咩醬都已經好好味，認真唔錯。

朱古力布朗尼: 

布朗尼較硬身，朱古力味好濃，不過加埋冰凍既雲呢拿雪糕之後味道就剛剛好，加埋面頭嘅威化一齊食，真係好滿足。

呢度又有得食，又有得玩，又有得傾計，真係一次過滿足晒我地三個願望呀。

地址：銅鑼灣波斯富街48號軒尼詩大廈2樓

Openrice link: https://www.openrice.com/zh/hongkong/r-the-stadium-銅鑼灣-美國菜-薄餅-r564889

登堂 (觀塘)

難得long weekend，當然係約好友聚舊啦。近年觀塘區開始重建後，多左好多翻新工廈，亦都多左好多食肆。

位於觀塘興業街嘅The Wave 有好多餐廳，上網見到佢係M1 Group 旗下嘅餐廳，裝修相當時尚，價錢又合理，就打算黎試下啦。

可能係假日，所以無set dinner ，不過a la carte價錢都唔係太貴。

坐低後我地先叫左兩杯飲品。Drink list 裏面有各式各樣嘅飲品，有酒精無酒精冷熱樣樣都有。我地就叫左一杯巨峰梳打同埋Grapeson 。

較為特別嘅飲品相信都係Grapeson，餐廳話係由Kyoho syrup, yoghurt,Pineapple juice, 同home-made honey cordial調成，入口甜度剛剛好，好好味，不過如果可以整大杯少少咁就完美啦。

由於無set dinner，我地只係叫左兩個湯，一個小食同兩個main course share食。

湯有四個選擇，我地揀左牛肝菌惹菌濃湯同法式干邑龍蝦湯。

牛肝菌野菌濃湯：
牛肝菌同野菌打碎後煲成嘅湯，香氣撲鼻，入口時食到細細粒嘅蘑菇碎，稀稠度剛剛好，不過個人認為味道可以再濃啲。如果想賣相更加吸引，可以係湯上面加幾片蘑菇，咁就更加靚啦。

法式干邑龍蝦湯：
龍蝦湯顏色呈橙紅色，未飲都聞到好香既龍蝦味，飲落好creamy，味道濃而不過鹹，仲有爽口彈牙的龍蝦肉在內，好好味。

香烤雞中翼-泰式羅望子醬：
雞中翼雖然烤得比較燶，但係食落相當香脆，配埋泰式羅望子醬入口帶微辣，相當醒神開胃。

燒西班牙黑毛豬肋骨（半份）：
豬肋骨有全份或半份揀，由於我地只有兩個人，所以叫左半份。

用美式煙燻醬醃過後嘅豬肋骨，醬汁完全融入黑毛豬肋骨，入口不但肉味濃，而且唔乾，雖然得候需時，但係都非常值得。配菜有香甜嘅烤粟米，熱辣辣嘅薯條同埋捲心菜沙律，真係相當豐富。

煙三文魚pizza：
Pizza火喉剛剛好，材料有煙三文魚、芝士、蕃茄、水瓜榴同俄勒岡，配料好多，薄批嘅佢餅底整得好脆，整體配搭唔錯。

呢度座位舒適，食物同服務質素都相當唔錯，相當適合一大班朋友或者家庭聚會，咁就可以叫唔同嘅菜式share食啦。

地址：觀塘興業街4號The Wave2樓

openrice link: https://www.openrice.com/zh/hongkong/r-登堂-觀塘-多國菜-all-day-breakfast-r605512

The Oyster House (灣仔)

是晚約左男朋友食飯，越來越懂得浪漫嘅佢竟然book左灣仔嘅The Oyster House。

餐廳位於灣仔謝斐道，面積唔大，約有幾十個座位，不過晚上嘅氣氛相當唔錯，幾有情調。

坐低之後我地先叫野飲，叫左一杯紅酒同一杯fruit punch。

黎到The Oyster House，係咁有情調嘅氣氛底下，又點可以唔試下佢D 生蠔呀!

我地叫左4隻生蠔，分別係2隻Lambert 同埋2隻Pacific oyster。

生蠔海水味偏重，不過肉質creamy肥美，加入檸檬汁亦見到蠔肉會收縮，裙邊會郁動，咁證明左生蠔真係鮮度十足。

西班牙蒜片炒蝦:

大蝦加左少少辣汁同香蒜炒過後入口帶微辣，非常惹味，肉質爽口彈牙，非常開胃。

焗日本帶子配野菌木魚絲:

日本帶子下面加左用牛油炒過嘅菇，上面再鋪上木魚絲，焗過後帶出帶子鮮甜嘅味道之餘食落仲好爽口，好有層次感。

黑松露野菌忌廉湯:

上檯時已噴出陣陣黑松露香味既忌廉湯，入口香滑而且濃郁，稀稠度剛剛好，入口有少量蘑菇碎，幾有口感，配埋麵包食，令人非常滿足。

鮮蠔濃湯:
用蠔黎整湯都係第一次試，個湯好重蠔味，不過入口唔會太鹹，配合埋湯內嘅蠔，真係勁有口感。

白酒煮鮮蜆扁意大利粉:

鮮蜆加入白酒煮過後入口清甜，份量出其地多，醬汁配埋扁意大利粉食，味道剛剛好，唔會太淡。

炭燒紐西蘭羊鞍扒:

用炭燒方式烹調嘅羊鞍整得好靚，上檯時散發出陣陣香味，咬落有大量肉汁，入口非常鬆化，一D都唔鞋，，配上什菜同薯仔粒，整體配搭唔錯。

香蕉拖肥批:
Banoffee pie其實係banana + toffee pie。個餅底係用焦糖整，上面再加一層香蕉，一層幼滑嘅cream，面頭再加上水果做裝飾，賣相非常吸引，味道比想像中唔甜，不過都幾膩下，一個人食一件會太多，兩個人share食就差唔多啦。

呢度環境唔錯，坐得都算舒服，由頭盤到主菜到甜品都相當有驚喜，真係適合情人朋友相聚嘅好地方。

地址: 灣仔謝斐道154號地下C號舖

Openrice link : https://www.openrice.com/zh/hongkong/r-the-oyster-house-%E7%81%A3%E4%BB%94-%E6%84%8F%E5%A4%A7%E5%88%A9%E8%8F%9C-%E6%B5%B7%E9%AE%AE-r455085

冬蔭Noodles (尖沙咀)

想食泰菜唔一定要去九龍城，尖沙咀都有好野食架。位於尖沙咀加連威老道嘅「冬蔭noodles」，交通非常方便，餐廳內裝潢相當新穎，光線柔和，帶俾人舒適嘅感覺。

冬蔭湯底（扎肉+ 豬肉丸+金邊粉)：
餐廳叫冬蔭noodles，我地又點可以唔叫用冬蔭湯底嘅金邊粉黎食呢？

冬蔭公其實係泰式酸辣湯，係由南薑、酸子、香茅、青蔥、酸檸檬、辣椒同魚露調製而成。

呈橙紅色嘅冬蔭公湯加左扎肉、豬肉丸同埋金邊粉後散發出陣陣香味，入口又酸又辣，好開胃。

青木瓜海鮮沙律：
沙律材料非常豐富，木瓜，青瓜同埋紅蘿蔔都切得夠幼，蔬菜嘅份量都好適中，
入口相當爽甜，配合埋泰式辣汁後酸得黎仲帶微辣，帶俾我地清新既感覺，真係一個幾開胃既前菜。  

串燒沙嗲：
一客串燒只有兩串，以＄36呢個價錢黎講未算係好超值。肉方面可以揀牛、豬、或者雞，我地揀左雞。加入左沙嗲去燒嘅雞串香氣十足，火喉亦都控制得好好，雖然入口較乾身，但係肉質都算淋，非常好味。

泰式鳳爪:
泰式鳳爪係泰國菜裡面算係不可缺少嘅小食之一，呢度嘅鳳爪係無骨，咁就唔駛吐骨啦，好方便。辣度方面對於喜歡食辣嘅我黎講都算幾辣，不過食落都算幾過癮。

青檸梳打+椰汁冰:
飲品我地叫左青檸梳打同椰汁冰，食左咁多重口味嘅食物飲返杯凍飲，真係非常滿足。

地址：尖沙咀加連威老道12-16號加連威大廈地下12號舖 

openrice link: https://www.openrice.com/zh/hongkong/r-冬蔭noodle-尖沙咀-泰國菜-r608093