Mela Italian & Spanish Cuisine (觀塘)

是日一田大減價，都唔知係咪因為咁所以APM 間間餐廳都咁多人，無辦法啦，唯有去第二到搵飯食，上開飯網睇，見到有呢間西班牙/意大利餐廳，又唔駛等位，就打算試下啦。

餐廳雖然位於工廈，但係環境相當乾淨企理，裝潢仲好靚添。

西班牙黑毛豬火腿(24個月) 配哈蜜瓜
西班牙火腿黑白分明，即黑毛豬和白毛豬，但係講到幾多個月，我就真係唔識分，亦都唔識食。呢度既黑毛豬火腿用左24個月既，食落好香，切得好薄，仲配埋香甜既哈蜜瓜同埋加左少少醋簡直是一流。

西班牙式黑毛豬火腿，白菌，芝士，炸薯球
薯仔加入左黑毛豬火腿，白菌同芝士去炸，咬落好香脆，入口好creamy，食落鹹鹹地，幾好味，旁邊仲有芝士醬，鍾意食芝士仲可以點黎食。

海鮮西班牙飯 (細)
海鮮西班牙飯有分大同細兩個size，細既係一人份量，大既3-4個人食都得，我地因為想試多D野，所以試左個細既。西班牙飯有好多海鮮，有蝦，魷魚同蜆，都算幾足料，飯既味道剛剛好，唯一美中不足既係D飯濕左少少，炒得乾D會更加好。

西班牙式烤焗乳豬配蘋果醬
乳豬賣相唔錯，上檯時已經切到細細塊方便我地食，外皮烤得好脆，但又無燶。乳豬咬落好多汁，肉質嫩滑，點埋蘋果醬一齊食，感覺上無咁肥膩。

西班牙玉桂油條配朱古力汁
自從早前係一間墨西哥餐廳試過玉桂油條之後就對佢一試難忘，今日黎到見到餐牌上有呢味甜品之後就決定要試。

其實西班牙玉桂油條可以話係鬼佬油炸鬼，同朋友一路傾計一路食就適合不過，上菜時仲係熱辣辣既「油炸鬼」，外脆內軟，帶有淡淡既玉桂味，點埋D好滑既朱古力醬食，好好味，真係令人食到停唔到口呀。

openrice link: http://www.openrice.com/zh/hongkong/r-mela-italian-spanish-cuisine-%E8%A7%80%E5%A1%98-%E8%A5%BF%E7%8F%AD%E7%89%99%E8%8F%9C-r479880

地址: 觀塘駿業街66號巧運工業大廈11樓C室

Candy Shake (旺角)

登打士街一帶既街頭小食選擇好多，仲成日有新野試，最近行過發現開左間Candy Shake，即時諗起Candy Crush既遊戲。

Candy Shake主打糖果奶昔同埋芝士撻，今日趁天氣熱，同朋友入黎試下。

入到門口時，各種味道既半熟芝士撻已經放左店舖門前，香氣真係吸引途人去望下。

店鋪唔算大，座位都唔算多，好彩我地入去時仲有位，我地叫左一個朱古力撻，一個日本蘑菇批，同埋一杯麥提莎奶昔。

奶昔方面選擇好多，佢地既賣點係以不同糖果混入奶昔到，呢種做法相當新穎，夏天飲就最適合不過架啦。

麥提莎奶昔: 
奶昔質地濃稠，仲好香滑，好重麥提莎既味道，感覺好新奇，從來無諗過麥提莎可以用黎整奶昔。

朱古力撻: 
朱古力好突出，可惜加左唔少芝士，唔多好芝士既我真係興趣唔大，但係朋友俾佢既流心芝士吸引住，覺得芝士好軟滑。

日本蘑菇批: 唔食芝士既我真係無咩野可以揀，因為幾乎所有撻都有芝士，好彩佢地最近新出左個日本蘑菇批，蘑菇批好重白汁味，蘑菇份量都唔少，撻皮都夠香脆，唔錯。

openrice link: http://www.openrice.com/zh/hongkong/r-candy-shake-%E6%97%BA%E8%A7%92-%E8%A5%BF%E5%BC%8F-%E7%94%9C%E5%93%81-%E7%B3%96%E6%B0%B4-r465415

地址: 旺角登打士街55號

魂燒 (太子)

朋友早前睇雜誌見到呢度既蟹黃飯好出名，今日趁係假期，兩個人一齊去shopping加食好野，最後揀左黎位於太子既「魂燒」，話就話太子地鐵站行去2分鐘，其實都唔易搵，我地都搵左一段時間先搵到呀。

餐廳地方唔大，座位有分室外同室內，天氣都開始熱啦，我地最後揀左坐裡面。

特製蟹黃拉麵: 
雖然當初黎呢到都係想試佢既蟹黃飯，但係對飯興趣唔大既我都係揀左個特製蟹黃拉麵，呢個麵係以蟹膏加豬骨湯整成，再配上松葉蟹腳肉，紫菜同粟米，如果想再加其他配料就要加錢架啦。

蟹皇拉麵一上枱就聞到好香濃既蟹黃香味，湯底好夠味，有好多蟹糕，麵既軟硬度適中，蟹腳雖然睇落好似蟹柳，但係一食就食到好濃既蟹香味，唔錯。

三文魚燒飯團:
呢個飯團既賣相同我想像中既有少少唔同，當初仲以為係普通日式飯團再拎去烘一烘咁，之後先發現原來佢係好似水泡餅咁，食落有D似細個食既暴暴飯焦咁，唯一美中不足既係三文魚味比較淡，濃少少會更加好。

燒餃子雞翼: 
餃子雞翼係用肉同菜釀係雞翼裡面，燒得好香脆，不過一隻要成23蚊，真係有D貴。

雞肉串(汁燒/海鹽):雞肉串咬落好多肉汁，表面燒得夠乾身，食落好有口感，值得一讚。

炸餃子三件:上菜時仲係熱辣辣，食落好香脆，餡料又夠多，唔錯。

整體黎講食物OK，如果冷氣可以調返凍D就更加好啦。  

openrice link: http://www.openrice.com/zh/hongkong/r-%E9%AD%82%E7%87%92-%E5%A4%AA%E5%AD%90-%E6%97%A5%E6%9C%AC%E8%8F%9C-%E6%8B%89%E9%BA%B5-r481857

地址: 太子太子道西106號地下D舖

Picoso (荔枝角)

最近工作忙碌，都無咩時間同朋友見面，今日難得得閒，放工之後都朋友去到荔枝角既Picoso。

Picoso位於荔枝角既億利工業中心，呢棟工廈有好多野食，有好多都好出名架。

餐廳雖然座位唔多，但係勝在環境舒適，可以坐好耐，同朋友傾計真係一流。

坐低之後就開始揀野食啦，好多野揀，都唔知揀咩好，最後店員都有介紹下墨西哥菜既特色俾我地。

墨西哥薄餅配烤雞肉絲:
墨西哥薄餅係以麵粉皮包上芝士，同埋自選餡料，再加上唔同既醬，包括牛油果醬，碎蕃茄粒同埋酸忌廉。餡料方面可以揀素蔥碎，烤牛肉，烤雞肉絲，手撕豬肉同埋蘑菇，我地揀左雞肉絲。烤餅本身係乾身既，但係配埋芝士同埋唔同既醬去食，口感一D都唔乾身，食落仲幾開胃添。

大西洋三文魚鐵板燒配墨式西班牙炒飯:鐵板燒同好多其他菜式一樣，可以配唔同既肉類，有三文魚啦，雞肉啦，大蝦同埋牛扒。本身鐵板係跟薄餅既，但係店員話可以轉墨式西班牙炒飯，問我地有無興趣，咁鍾意試新野既我地梗係想試下啦。

個炒飯炒得好香，酸酸地幾開胃，三文魚方面就比較乾身，但係加埋伴碟既醬，好似雜椒同牛油果醬之後就剛剛好啦，唯一美中不足既地方就係鐵板伴碟既洋蔥過多，落少D會更加好。












烤玉米餅皮配煙燻手撕豬肉:烤玉米餅皮可以揀配牛肉，豬肉，雞肉或者蘑菇，我地今次揀左豬肉，烤餅方面可以揀硬穀同埋普通殼，未試過硬穀既我地揀左硬穀。

烤玉米餅皮係以餅皮包上生菜，玉米粒，洋蔥，雜椒，碎芝士，蕃茄同豬肉整成既，上既再加多少少牛油果醬整成，碟旁仲配埋唔同既醬汁俾客人自由加上。

餅皮整得相當之脆，豬肉都醃得好入味，洋蔥份量唔算多，整體味道好夾，唯一美中不足既係牛油果醬過多，拎起手食時攪到隻手污糟晒，建議可以落少D，又或者好似其他醬咁放係碟旁等客人自己加。

玉米餅湯:上菜時以為呢個係蕃茄湯，差D同店員講黎錯左。原來墨西哥既玉米餅湯既上湯係用嫩雞餚製，玉米，蕃茄，新墨西哥辣椒，牛油果，青檸，撒上香脆玉米薄脆及碎芫菜整成。飲落好重蕃茄味，但係飲唔出有玉米。

香炸墨西哥辣椒:呢味菜係墨西哥辣椒以車打芝士同埋牛油果醬釀成，再用脆漿原條炸熟，伴碟既有牛油果醬同埋沙律，食完炸野再食沙律感覺無咁滯，辣椒方面食落出奇地唔辣，不過芝士味太濃，唔多合我口味。

朱古力布朗尼: 布朗尼既朱古力味好濃，但係加埋冰凍既雲呢拿雪糕之後味道就剛剛好，加埋伴碟既士多啤梨同埋藍莓一齊食，真係好滿足。

玉桂蘋果薄餅: 
呢個甜品係以烘麵粉薄餅加埋煮過既蘋果，配埋雲尼拿雪糕，士多啤梨同藍莓整成，蘋果醃得好好味，用薄餅包住再配埋雪糕一齊食真係好好味，可惜蘋果份量比較少，部分薄餅沾唔到D蘋果，如果可以加多少少蘋果就更加好啦。

整體黎講味道唔錯，服務都幾好，可以坐好耐都唔會趕客人走，適合幾個朋友黎食飯聚舊。

openrice link: http://www.openrice.com/zh/hongkong/r-picoso-%E8%8D%94%E6%9E%9D%E8%A7%92-%E5%A2%A8%E8%A5%BF%E5%93%A5%E8%8F%9C-r474429

地址: 荔枝角長沙灣道883號億利工業中心1樓101室

屋喔 (旺角)

「屋喔」你會諗起咩呢? 對於七八十後黎講，應該會諗起當年好興既ICQ。

「屋喔」呢間台風餐廳，位於旺角朗晴坊，係正朗豪坊隔黎，除左台灣菜外，仲有台式西餐，座位方面，有室內同室外，室外地方仲係半露天，但係有冷氣既。

是日星期日，同朋友睇完戲之後黎食個late lunch，下午兩點鐘黎到，餐廳都唔算太多人，唔駛等位，真係好。

我地2個每人叫左一個餐，再叫多左個甜品share。套餐包一杯飲品，可以揀柳丁綠茶或者蘋果雪梨烏龍茶，如果要配其他飲品就要加錢。

蜂蜜桂圓紅棗玫瑰:
花茶口味款式多，有透明既茶壺煲住，可以慢慢嘆，蜂蜜桂圓紅棗玫瑰花茶好香玫瑰味，加埋紅棗，味道清新又香甜，開胃醒神！

榛子咖啡:榛子咖啡等候需時，上檯時熱辣辣，咖啡味香濃，值得一讚。

台式湯麵配豬軟骨:
湯麵湯底好濃，豬軟骨食落好咬口，麵係用闊條麵，好彈牙 ，好有口感，好有地道台灣風味。

台式肉燥飯(雞排):
肉燥飯用一個細鐵桶裝住，好有舊時工廠女工午餐飯盒既feel，飯量都幾多下，配埋味道濃香惹味既肉燥同溏心蛋撈匀一齊食真係非常好食。

屋喔窩夫:
呢度既窩夫唔係格餅，而係用自家製既模整成既，呈茶壺形狀咁， 好厚食落軟綿綿，切開中間仲有D吉士醬，好特別，配埋伴碟既曲奇味雪糕真係好好味。除此之外，仲有一個士多啤梨味既迷你冬甩，入面仲有少少士多啤梨果醬， 不過有果醬既甜品我真係麻麻地。

非常欣賞呢到既飯同湯麵都會配清菜，係香港唔多地方做到。最後埋單每人100蚊左右，2個人食飯傾計又唔駛俾人催住埋單走人，算唔錯架啦。

openrice link: http://www.openrice.com/zh/hongkong/r-%E5%B1%8B%E5%96%94-%E6%97%BA%E8%A7%92-%E5%8F%B0%E7%81%A3%E8%8F%9C-r462278

地址: 旺角砵蘭街215號朗晴坊4樓

RBTea (銅鑼灣)

難得Long weekend，同朋友黎港島行下，想係銅鑼灣搵個坐得耐既地方食飯，竟然俾我地係openrice搵到呢間台式餐廳。

我地7點幾黎到，都有唔少人食緊飯啦，但好好彩唔駛等位，呢度環境唔錯，都算靜，幾適合傾計，裝潢走綠色青幽森林路線，感覺柔和。

餐牌裡面既選擇都幾多，有甜品，主菜，小食，飲品等等。

水果果茶: 水果果茶係熱既，用個玻璃茶壺裝住，好精緻，味道有少少似微甜既利賓納咁，份量一D都唔少，2個人飲都夠飲。

甘菊荔枝烏龍: 茶味清甜，而且有少許jelly，口感幾特別，我地坐左成個幾鐘，就算D冰溶左後味道仍保持水準。

香濃忌廉蜆意粉: 意粉落左唔少芝士，唔多好芝士既我地唯有撥開佢，除此之外味道好香濃，口感都好creamy，蜆既份量都唔少，唔錯。

綜合菌菇芝士薄脆: 薄脆一份有 6 件，賣相有D似切開咗既 Pizza，食落口感好香脆，菇菌既量都很多，價錢合理，值得一試！

RB Tea 小食拼盤: 小食拼盤有香草腸，薯角，炸雞粒，雞翼同埋蝦片。雞翼焗得幾香口，配埋芥末沙律醬，感覺幾特別，香草腸好幼身，脆脆地幾好味。

芒果輕食鬆餅: 甜品對於女生黎講先係主菜，Waffle 有分2個size，正常size同埋輕食，已經食左咁多野既我地梗係揀輕食啦。其實輕食既份量都唔少，都有2-3片waffle架，賣相相當吸 引，Waffle口感外脆內軟，上面放左D芒果粒同淋上D芒果醬同埋雪榚，雪糕味道好特別，似係海鹽同雲呢拿味既混合體，食落鹹鹹地甜甜地咁，唔錯。 

openrice link: http://www.openrice.com/zh/hongkong/r-rbtea-%E9%8A%85%E9%91%BC%E7%81%A3-%E8%A5%BF%E5%BC%8F-%E7%94%9C%E5%93%81-%E7%B3%96%E6%B0%B4-r485518

地址: 銅鑼灣記利佐治街1號金百利廣場3樓323-327號舖