咖啡弄(銅鑼灣)

是日係boxing day，已經連續幾日係咁食野，今日唔想再食咁多野，但係正正因為係聖誕佳節，又唔甘心去茶餐廳食個頹飯，所以就決定黎咖啡弄食野，呢度light得黎又幾特別，又飽肚。

上一次去咖啡弄都差唔多一年前喇，果次係去尖沙咀分店，今次因為去完會展冬季購物節，所以就黎左銅鑼灣分店。咖啡弄雖然開業已有一段時間，但係依然要大排長龍，同以往一樣，每人都一定要叫一杯飲品，話知你食物叫左幾多樣都好啦，呢個感覺真係麻麻，因為餐飲呢家野，除非真係個餐包埋，否則要另外叫，真係覺得好唔抵，仲要飲完野又食唔到咁多野。

雖然係好無益，不過不得不讚呢到既鹽酥雞真係整得好好味呀。

BBQ 豬排三文治都算幾大份，豬排仲要係厚切，食落好有口感，配埋蛋沙律，真係幾開胃。

雖然「咖啡弄」呢間餐廳規矩係要令人叫一杯飲品，但係正正因為咁我先有機會品嚐呢杯有好多棉花糖既熱朱古力，真係好有童年回憶，飲完真係好鬼飽。同行朋友叫左特調手工咖啡，混合曼特寧與巴西咖啡豆，搭配特製鮮奶油，味道相當香濃，可惜配咖啡既曲奇餅牛油味過重，換D牛油味輕少少既會更加好。

openrice link: https://www.openrice.com/zh/hongkong/r-%E5%92%96%E5%95%A1%E5%BC%84-%E9%8A%85%E9%91%BC%E7%81%A3-%E8%A5%BF%E5%BC%8F-r120973

地址: 銅鑼灣邊寧頓街9-11號登龍閣1樓B1-B3室

Chroma Cafe + Kitchen (觀塘)

個幾星期前係果籽見到有間新開既西餐廳係以美術用品黎做主題，好奇之下想黎試下。

餐廳位於觀塘工業區，位置唔係咁易搵，上到去之後見到裝潢都比預期既靚，而且好光猛，座位都好寬敞唔會好有壓迫感。可能因為就快聖誕節，所以餐廳都有好多裝飾，相當有聖誕氣氛。

餐廳大至上可分為兩PART，一PART係賣美術用品，有埋地方俾你試，另一邊就係餐廳，咁食野時就衛生D又唔駛驚會好大陣油漆味啦。

我地一行3人，叫左一個意粉，一個risotto同埋一個小食。

小食我地叫左fish n chips，份量比想像中既「小食」大得多，D魚同薯條都炸得好香脆，上菜時仲好夠熱，食落唔會太油，賣相同味道都非常英式，雖然有他他醬同埋茄汁俾我地點，但係都係唔點好味D。建議店方可以係呢個小食加D沙律，青豆之類既配菜將佢轉成main course。

意粉叫左黑松露卡邦尼，上面有隻流心蛋，賣相好靚，口感creamy得黎仲帶有小小黑松露味，卡邦尼食就食得多啦，但係加埋黑松露都係第一次，感覺都好新奇，真係食到停唔到口。

巧合地意大利飯我地都係叫左黑松露，D飯有少少硬，所以覺得佢整得都幾正宗，蘑菇份量都落得夠多，仲有唔同種類，不過邊D打邊D，我就真係唔係好知，我只係識食架咋。

埋單每人都要130蚊，可以坐好耐，又唔駛俾人催埋單，鍾意畫畫既朋友真係要上黎睇下呀。

openrice link: https://www.openrice.com/zh/hongkong/r-chroma-cafe-kitchen-%E8%A7%80%E5%A1%98-%E5%A4%9A%E5%9C%8B%E8%8F%9C-%E8%A5%BF%E5%BC%8F%E7%B3%95%E9%BB%9E-r509608

地址: 觀塘興業街19號明生工業大廈8樓

Cafe Paradise (長沙灣)

荔枝角平日都係工業區，但係到左周末，就多左好多野行，近年好興既周末市集，係荔枝角既D2 PLACE都成日會有，近日因為將近聖誕，係D2 PLACE都有個Christmas Market，除此之外，天台仲有「雪」同埋「極光」睇添。

因為「雪」同埋「極光」都要夜晚6點之後先有得睇，所以都係去食完飯之後先慢慢去排隊，亦都係因為果頭係工業區既關係，有D茶餐廳星期日都唔開，好彩openrice search 到呢間西餐廳，一個餐都係120 蚊到，有湯，沙律，主菜，甜品同埋餐飲，晚餐黎講都算幾抵食。

可能因為就快聖誕既關係，餐廳既佈置都好有聖誕氣氛。

我地一人叫左一個SET，呢間餐廳既好處係，如果SET DINNER 真係唔合口味既話，可以係a la carte menu度叫個主菜再加錢轉SET，計落價錢其實無咩分別。

是日餐湯係南瓜湯，南瓜味好重，好香濃，亦都好creamy。

田園沙律D菜好新鮮，沙律汁份量適中。

墨魚餅係我地另加既小食，上菜時仲係熱辣辣，唔會太油，但係失望既係一份得兩塊，想食多D都無。

香辣海鮮意大利飯: 鍾意食辣既我平時真係無辣不歡，某著名雲南米線店我食中辣都無問題。呢個意大利飯食落真係有辣味，唔係太食得辣既朋友真係要小心。除此之外，D飯蕃茄汁好香濃，賣相相當吸引。

蟹籽蟹棒意大利寬條麵: 兩者比較其實我PREFER食意大利飯多D，呢個蟹籽蟹棒意大利寬條麵係用白汁整，食落有D漏，不宜食太多，用蟹籽整意粉我都係第一次試，感覺好新奇，蟹棒亦都係全條上，亦都無散，幾好。

是日甜品-雲呢拿雪糕: 套餐係可以加$25 將甜品升級去心太軟，其實抵係幾抵，不過真係食唔落，所以無upgrade到，不過雲呢拿雪糕都幾好味，但係唔知係咩牌子，總之就一定唔係牛奶公司啦，以我既經驗我估可能係movenpick。

Hazelnut latte + mocha: 餐飲我地叫左咖啡，味道好香濃，個拉花整得好靚，不過唔知係咪咖啡因過重所以晚餐飲完後我到夜晚2點都訓唔著呢? 上班族lunch time 真係不妨試下呢，下午工作會更加精神。 

openrice link: https://www.openrice.com/zh/hongkong/r-cafe-paradise-%E9%95%B7%E6%B2%99%E7%81%A3-%E8%A5%BF%E5%BC%8F-%E6%B2%99%E5%BE%8B-r492431

地址: 長沙灣長沙灣道638號地舖

La Paloma(西環)

同同事慶祝聖誕節，當然梗係搵個地方食下好野傾下計架啦，無啦啦被點名做攪手，好好睇睇都要攪好佢，最後揀左為於西營盤既La Paloma。

西營盤個站都相當新，雖然話就話地鐵站行去餐廳既building都唔需要20秒，但係如果係計由地鐵站出閘果下行過去，都需要5分鐘左右。

因為人數比較多，我地事前已經order好，group dinner如果唔係 a la carte既話大致上黎講都係有兩個選擇，分別係sexy menu同埋sexier menu，因為budget所限，我地都係揀左sexy menu，食物相當豐富，由頭盤到主菜及甜品不等，每人都係300零蚊到。飲品方面要另叫，平均一杯都係幾十蚊到，如果自己帶酒去，當然梗係要收corkage fee啦。

食西班牙菜當然唔少得有parma ham 啦，parma ham切得好薄，味道唔會太鹹，用黎送酒都唔錯。其他小食都唔錯，好處係細細件，咁每人每款都可以食少少，唔駛驚過飽食唔到其他野。

 

以下呢樣叫beef tartare，本人唔食牛所以無食到，同事們見到係全生既牛肉後本身都有D驚，但係試左一啖之後竟然話好好味，真係有D驚喜呀。

薯仔上面加左一D黃黃地色既汁，本身都以為係芝士醬架，食落先知原來係D酸酸地辣辣地既汁，可惜本人唔係太識欣賞，建議店方可以考慮D汁分開上，咁就可以迎合唔同客人既口味，尤其係一大group人黎既時候。

D蝦整得非常好味，真係要俾個like，炒得好好味，味道辣辣地，值得一讚。

炒雜菜既賣相雖然有改進既空間，但係味道真係唔錯。

豬頸肉賣相幾靚，但可惜個汁用左紅菜頭黎整，唔多合本人既口味。

主菜終於到啦，係我地都期待已久既西班牙海鮮飯。因為一行十幾人，所以份量都好多，店方都特登係廚房拎左呢個巨型份量出黎俾我地觀賞，仲任我地影相，之後先至分開幾小碟我地再share。

海鮮飯既海鮮真係好多，D飯整得好黃，相信係因為落得夠多turmeric。

係店方拎完碟巨型西班牙海鮮飯俾我地睇之後，佢地就將佢分成好幾碟大約係4人份量既飯俾我地再share。

食完咁多野之後，都差唔多黎到呢餐飯既尾聲，是晚既甜品為churros，其實即係西班牙式既油炸鬼，churros上面灑再D icing sugar，食既時候可以點D雲呢拿雪糕或者朱古力醬，不過呢個甜品記住要趁熱食，凍左之後無咁好味架。

openrice link: https://www.openrice.com/zh/hongkong/r-la-paloma-%E8%A5%BF%E7%92%B0-%E5%9C%B0%E4%B8%AD%E6%B5%B7%E8%8F%9C-%E6%B5%B7%E9%AE%AE-r445172

地址: 西環皇后大道西189號西浦1樓

Chibee Chicken and Beer (尖沙咀)

之前都黎過呢間餐廳好幾次，都好鍾意呢度既食物，今次見到Groupon 有coupon 買，2人套餐都係$166，剛好有我最鍾意既炸雞同埋年糕，仲包埋野飲添。

年糕有得揀卡邦尼同埋辣味年糕，其實兩款我都試過架喇，但係今日無啦啦想食辣野，所以叫左辣味年糕，唔知點解今次好似特別辣咁，辣到流晒眼淚呀。

炸雞方面我地叫左鄉村風味炸雞 ，有別於其他雞，呢款雞係有骨既，要吐骨，食得多都有D累。不過D雞炸得好脆，又唔會太油，雖然有2款唔同既汁伴碟，但係我都係覺得唔點D汁仲好味。

飲品方面我地叫左一jar fruit punch，今次都係多得呢jar fruit punch先至食到D辣味年糕，唔係太食得辣既朋友都係叫卡邦尼好啦。

openrice link: https://www.openrice.com/zh/hongkong/r-chibee-chicken-and-beer-%E5%B0%96%E6%B2%99%E5%92%80-%E9%9F%93%E5%9C%8B%E8%8F%9C-%E9%9F%93%E5%BC%8F%E7%82%B8%E9%9B%9E-r491191

地址: 尖沙咀厚福街8號H8 23樓