朋友升職,為左慶祝,邀請我嚟位於尖沙咀嘅「鐵板超」食飯。
「鐵板超」喺香港屹立有20年,最初由太子搬去佐敦,再搬來尖沙咀,主打鐵板燒,店舖裏面有好多鹹蛋超人嘅公仔同玩具,相當澎湃。座位方面全部都係鐵板位,每個客人都可以見到廚師烹調嘅過程,人多嘅話,仲可以包房添!餐牌上面有得揀單點或者套餐,午市時間仲可以有七折優惠添!
由於我哋唔想比套餐局限左選擇,我哋揀左單點。
廚師喺開始烹調之前會問我哋有咩食材唔食,要唔要加蔥之類,係適當嘅時候亦都會叫我哋準備相機,例如佢準備喺酒上面點火烹調,等我哋可以放上網打卡,相當貼心。
海花蝦:
海花蝦好大隻,平時真係好少見到咁大隻嘅蝦。
廚師喺我哋面前表演拆蝦,喺鐵板上用工具將蝦身同埋個蝦頭分開,以及取出蝦腸,技術相當熟練精彩。
海花蝦用蒜蓉牛油燒過後淋上蝦膏,食落非常惹味,肉質爽口,賣相簡直一流。
廚師等我哋影完相之後,再將蝦頭加以烹調,咁大個女都係第一次食蝦頭㗎咋,從來都唔知係可以食嘅添。
燒廣島生蠔:
生蠔加入櫻花蝦,白飯魚同煙肉嘅配料燒過後味道豐富,肉質肥美,簡直無得頂呀。
鐵板酒煮帶子皇:
帶子好大粒,用蒜蓉牛油燒過後放上海苔,外面燒香,入口非常嫩滑,食落非常juicy,一d都唔乾身,口感相當豐富。
鐵板三文魚鮫:
魚鮫黏住唔少魚肉,燒過後入口相當肥美,魚油甘香,魚肉滑嫩,連平時少食魚嘅我都覺得非常好味。
澳洲野生鮑魚:
期待已久嘅鮑魚終於到啦,鮑魚拎到上枱時仲識郁㗎! 大廚係鐵板上面煎完之後再切片,肉質相當軟滑爽口,非常美味。
A5和牛薄燒:
平時唔多食牛嘅我,遇到有特色嘅牛,點都會試下嘅。今日試嘅A5和牛薄燒,花紋豐富,廚師提議一半要黎生食,另一半整七成熟。
整體賣相及色澤都非常吸引,個人鐘意七成熟嘅多d,入口多汁,肉質鮮嫩唔多筋。
𩶘魚龍蝦湯:
𩶘魚湯賣相呈奶白色,入口有香濃嘅龍蝦味,味道清甜,除咗有海帶之外,仲有好多豆腐添。
煙肉蝦乾炒飯:
食過鐵板燒嘅人都知道炒飯係鐵板嘅精髓,廚師利用食材唔同嘅顏色,去畫唔同嘅圖畫,情侶好多時藉住呢個機會比驚喜大家。
由於廚師知道我朋友好鍾意小丸子,今日就特登畫小丸子俾佢,真係非常窩心。
炒飯粒粒分明,加入左煙肉同蝦乾嘅蛋炒飯,相當惹味,值得一讚。
全餐飯無論食材,環境同埋服務都一流,埋單平均每人都係$1000左右,咁嘅價錢,都算係性價比高。
Openrice link: https://www.openrice.com/zh/hongkong/r-鐵板超-尖沙咀-日本菜-鐵板燒-r619361
地址:尖沙咀麼地道61號冠華中心地下1號舖