Casa Pennington(銅鑼灣)

朋友生日, 約好左今日同佢慶祝食好野，餐廳位於隆堡柏寧頓酒店， 地鐵站行過去都只係五分鐘到， 餐廳燈光偏暗，環境都幾浪漫。

雖然生蠔買一送一就真係幾抵食，但係朋友剛剛腸胃炎好返，都唔敢叫生蠔，所以都係叫熱野食算啦。

既然無得食生蠔，就飲返個生蠔湯啦，個湯應該係用生蠔打碎左煲既， 味道鮮甜，生蠔湯都係第一次飲，感覺好新奇。

Scallop angel hair 有成3隻帶子，天使麵因為幼既關係所以吸晒意粉香濃既汁味， 雖然食得出落左唔少油， 但相信只係橄欖油。

期待已久既french spring chicken 等左30分鐘終於等到，雞入面釀左d 栗子，燒得好夠火喉，旁邊仲有唔少配菜，唔怕蒜頭既話仲有成舊烤過既等住你試。

兩個人埋單都要成700 蚊，貴就貴d, 不過野食都幾好味，紀念日呀生日黎慶祝都唔錯。

openrice link: http://www.openrice.com/zh/hongkong/r-casa-pennington-%E9%8A%85%E9%91%BC%E7%81%A3-%E8%A5%BF%E5%BC%8F-%E9%85%92-%E9%9B%AA%E8%8C%84-r153908

地址: 銅鑼灣邊寧頓街13-15號隆堡柏寧頓酒店三樓

Schnee German Restaurant(銅鑼灣)

放工後約左好姊妹食好野，佢揀左黎呢間德國餐廳。

 

坐低之後我地叫左飲品先，好欣賞店方咁俾心機改飲品既名，可惜冰落得過多，飲到最後味道有D淡。

Schnee 係用荔枝同埋蘋果整成既果汁。

Cinderella落左士多啤梨同埋菠蘿。

德國風乾煙肉碟:
風乾煙肉碟有多款德國風乾煙肉，雖然味道有點鹹，但係賣相幾靚下，食落一D都唔漏，作為餐前小食都唔錯呢！

德國經典薯仔湯+海鮮蕃茄清湯:

德國經典薯仔湯都幾杰，味道較濃，係用薯仔黎煲，再加少少紅蘿蔔粒。

海鮮蕃茄清湯真係幾清下，感覺一D都唔似西湯，湯入面仲有帶子同蝦，2款湯之中我比較鍾意呢款。

燒德國豬腩仔配炸薯條:

上菜時見到咁大份，都驚食唔晒，豬腩仔D皮好脆，不過肥膏都幾多，我地都要切左呢part，唔敢食。

薯條方面好熱好脆，上面加左D BBQ味既粉，咁樣食都係第一次試。

黑松露意大利介子雲吞伴輕怡菠菜忌廉汁:
意大利雲吞比想像中無咁重芝士味，菠菜忌廉汁亦都唔漏，不過份量比想像中少。

德國蘋果卷伴雲呢拿汁:

呢個甜品其實先係今晚既主菜，蘋果酸酸地，crumble 又夠脆，加埋雲呢拿汁真係令到我地食到停唔到口。

openrice link: http://www.openrice.com/zh/hongkong/r-schnee-german-restaurant-%E9%8A%85%E9%91%BC%E7%81%A3-%E5%BE%B7%E5%9C%8B%E8%8F%9C-r481941

地址:  銅鑼灣駱克道447-449號中威商業大廈1樓

公主(銅鑼灣)

邊個話無王子就做唔到公主架? 呢間以公主為主題既餐廳，位於銅鑼灣信和廣場，地鐵站行過去都只係需要幾分鐘。

餐廳門口好靚，好有童話既感覺，而裡面既佈置都有少少似西式婚禮咁。

 

 

坐低之後，店員俾左D曲奇餅我地試，全部都係自家製既，細細塊，可以一次過試五六種味道之餘又唔會怕食唔落飯。

餐牌方面有分 a la carte同埋set dinner，有選擇困難症既我地唔想揀，所以決定叫set dinner。

Welcome Drink: 點完菜之後，店員就俾左2杯飲品我地，佢地話凡係叫set dinner既客人都有既，呢兩杯酒配合埋個氣氛，感覺非常浪漫。

每份Set dinner有starter, appetizer, sorbet, main course同埋甜品。  

Starter - 茴香沙律配帕馬巨芝士
用生菜同洋蔥切絲後加入芝士整成既沙律，呢個組合都係第一次試，不過個人認為芝士落得太多，蓋過左菜既鮮味，落少D會好少少。 

Starter-蕃茄沙律配水牛芝士，松子仁，羅勒
呢個沙律係用唔同顏色既蕃茄加沙律汁同埋水牛芝士整成既，色彩繽紛，芝士味道唔太重，形狀有D似鵪鶉蛋。

Appetizer-自制果醬，香脆包條
上菜時以為落錯單，因為呢個appetizer 既主角其實係芝士，不過唔緊要，朋友係芝士迷，好快就成碟食清光。煙燻芝士味道相當香濃，配埋麵包條食都好夾，不過份量既比例有改進既空間，建議少一點芝士而多一點麵包條。

Appetizer- 生牛肉他他，黑松露，蛋黃
牛肉係全生既，味道香濃， 旁邊配上蛋黃醬，牛肉上面配有迷你麵包，食起黎無咩腥味，味道唔錯。

是日餐湯，絲瓜湯
其實絲瓜湯都係第一次飲，從來唔知絲瓜係可以用黎整湯。湯係用咖啡杯裝住送上既，咖啡杯非常之靚，飲到底仲見到杯底有pattern。湯方面軟棉幼滑，加埋上面既火腿碎，真係有點兒似latte。

食完咁多野之後，係食main course 之前先食返個雪葩，酸酸地，可以清一清個口味。

Main Course: 燒龍蝦闊條麵配西班牙蕃茄醬
意粉係用原隻龍蝦，仲拆埋肉，食起黎相當方便，女生們又唔駛驚食到無儀態，肉質亦都好彈牙，味道亦都好鮮甜。醬汁方面係用簡單既蕃茄醬，真係令人越食越開胃，不過意粉份量比較少，多少少會更加好。

Main Course-慢煮乳鴿配粟米蓉，煎鵝肝，芝士脆片

乳鴿好多時都係係中餐食到，西餐食都係第一次，味道本身都幾中式，不過點埋D粟米蓉食之後成件事變得好西式。呢個菜建議店方可以配返少少澱粉質既野，例如薯蓉咁，咁靚得黎又會飽肚少少。

甜品: 草莓仙子+ 自選精美蛋糕

草莓仙子係一隻賣相為粉紅高跟鞋既草莓口味雪糕，外型十分精緻，倒模整之餘仲要繡埋花，大廚真係好有心機，見到都唔捨得食。鞋下面仲加埋青檸雪芭，旁邊配上雜莓，賣相我俾佢100分，真係忍唔住upload張相上社交網站等人like。
自選精美蛋糕方面，賣相非常精緻，放係一個玻璃器皿入面，好有酒店式既感覺，蛋糕係流心架，不過如果一個人食可能會比較漏，2個人share會更加好。

咖啡或茶，茉莉花茶
餐飲叫左一壺花茶，用既係玻璃茶壺，下面用火保溫，咁就坐幾耐都唔怕D茶會凍啦。旁邊配埋有碎花既茶杯，真係又忍唔住影相放上網等人like。一壺茶係2人份量既，不過唔駛驚唔夠飲，因為中間店員係會幫你地加熱水架。

成餐飯食左2個幾鐘，講真，呢度環境同餐具真係好靚，好適合鍾意影相既女生，最重要係，放D相上社交網站既話一定好快好多人Like。

openrice link: http://www.openrice.com/zh/hongkong/r-%E5%85%AC%E4%B8%BB-%E9%8A%85%E9%91%BC%E7%81%A3-%E6%B3%95%E5%9C%8B%E8%8F%9C-%E9%BA%B5%E5%8C%85%E5%BA%97-r463491

地址: 銅鑼灣告士打道255-257號信和廣場上層7號舖

屋子生活(馬鞍山)

是日去左好姊妹屋企玩，大家化下妝扮下靚，玩到唔知時間，到傍晚六點幾鐘黎左附近既「屋子生活」食晚飯。

餐廳其實係近烏溪沙站多D，不過由新港城行過去都係10分鐘左右，餐廳入口俾人感覺好舒服，裡面既座位有分普通座位同埋塔塔米，我地貪得意揀左塔塔米。

餐牌方面好特別，係用細個用既「街簿」黎做主題，不過食物同飲品既選擇都唔係好多。

我地揀左2個定食，每個定食都會配麵豉湯，飲品，前菜同埋主菜。唯一美中不足既係飲品係有指定某幾款，鍾意飲咖啡既我想轉第二樣飲品都唔得。

飲品我揀左抹茶牛奶，朋友揀左蘋果茶，抹茶牛奶好好飲，好香奶味，不過係唔夠熱唧。

定食方面我揀左吉列豬扒，炸得好香好脆，好好味，值得一讚。

朋友揀左鯖魚，因為本人唔多鍾意食有骨既魚，所以都無試過，無得俾comment。

總括黎講呢到食物一般，但係環境幾好，又夠靜，又有雜誌睇，見你食完野又唔會趕你走，係一個幾適合傾計既地方。

Openrice link: http://www.openrice.com/zh/hongkong/r-%E5%B1%8B%E5%AD%90%E7%94%9F%E6%B4%BB-%E9%A6%AC%E9%9E%8D%E5%B1%B1-%E6%97%A5%E6%9C%AC%E8%8F%9C-r444701 

地址: 馬鞍山烏溪沙路8號迎海薈地下4A舖

好時沙嗲(尖沙咀)

由細到大聽就聽過好時沙嗲好多次，但就真係從來無試過，直到前排有傳結業時一直想試，但係實在太多人所以未能試到。今日剛好要黎尖東，仲要因為晚上有節目所以要早食飯，先有幸唔駛點等位就可以入座。

兩個人唔係太肚餓，所以都係叫左一個麵同兩個小食。

串燒有分牛，雞，同埋豬，一份有6串，可以隨意揀要咩肉，我地揀左3串雞3串豬。點串燒既汁都幾好，可惜肉方面有點兒over-cooked，絕對有改進既空間。

辣通菜方面炒得唔錯，入味之餘又唔會太鹹。

喇沙係今晚既主菜，湯底好香好濃郁，椰奶味都算重，米粉完全吸收晒香濃椰汁咖喱湯底裏面既精華，可惜配料比較少，俾多少少會更加好。

下次要試下佢既蘿蔔糕同埋海南雞飯呀。  

openrice link: http://www.openrice.com/zh/hongkong/r-%E5%A5%BD%E6%99%82%E6%B2%99%E5%97%B2-%E5%B0%96%E6%B2%99%E5%92%80-%E6%96%B0%E5%8A%A0%E5%9D%A1%E8%8F%9C-r11321

地址: 尖沙咀麼地道63號好時中心144-148號舖