名館 (銅鑼灣)

朋友最近工作唔係太順利，難得星期五又準時放工，一於大家約出黎食飯輕鬆下。

放工後七點半左右黎到餐廳都仲有少量座位，好彩算早到，因為坐低無耐都已經要等位喇。

蜂蜜柚子蝦球:
柚子蜂蜜味既炸蝦球帶微酸，爽口彈牙，個皮又唔會太厚，食落真係幾醒神開胃。

小籠包:

小籠包一籠有5粒，皮薄餡多，湯汁亦都夠足，一口咬落去就食到肉既鮮甜味。

大澳蝦干豚肉蒸飯:

呢個蒸飯份量比想像中少，賣相亦都唔多吸引，飯亦都非常之硬，有改進既空間。

鵪鶉蛋燒賣:

鍾意食燒賣既我，幾乎次次飲茶都會叫，但係始終都怕膽固醇過高，鵪鶉蛋燒賣都唔敢食。難得今日同行既朋友想試，一人又只分到一粒，就一於試下啦。每粒燒賣上都有一粒鵪鶉蛋，自問我就唔多喜歡佢既質感，不過燒賣本身都好好味，唔覺落左好多肥肉。

古罈酸菜活生魚:
全晚最精彩既餸就係呢個古罈酸菜生魚喇，賣相好似水煮魚既佢，原本係微辣既，但係因為同行既朋友唔食辣，所以叫佢走辣。

個煲裡面有酸菜、芽菜、同埋好多胡椒粒伴着新鮮既魚片。魚片好新鮮亦都好滑，骨唔算多，味道方面，雖然走左辣，但係入口都帶點麻，食落都幾開胃。

生煎菜肉包:

生煎菜肉包煎得好夠火喉，裡面既湯汁又熱又多，咬落會爆汁，食果時要小心d。

雖然茶錢要成15 蚊位，但店方真係提供好好味既蕎麥茶，咁計落都唔算太貴。

埋單每人都要二百幾蚊，但係環境舒適又唔太嘈，happy friday 黎食個飯都係唔錯既選擇。

openrice link: https://www.openrice.com/zh/hongkong/r-%E5%90%8D%E9%A4%A8-%E9%8A%85%E9%91%BC%E7%81%A3-%E5%A4%9A%E5%9C%8B%E8%8F%9C-%E9%BB%9E%E5%BF%83-r478614

地址: 銅鑼灣軒尼詩道500號希慎廣場14樓1401號舖

FireBird (銅鑼灣)

星期一至五工作既我，日日坐係辦公室裡面，假日點都要出去行下玩下同朋友聚下舊。 是日星期六，當然又係同朋友約會既日子，見最近食得韓國野多，都想轉下口味，試下其他野食，上網睇過之後，發現原來呢間位於銅鑼灣邊寧頓街既Firebird係相當出名既。 

餐廳地點旺中帶靜，由地鐵站行去大約要五分鐘，都算幾方便。餐廳裡面既裝潢時尚簡約，好有日式風格。中央位置為開放式串燒廚房，配黑白磚牆，俾到客人一種清新簡約既感覺。 

鍾意食沙律既我見到餐牌上呢味「日本產蕃茄沙律」就俾佢吸引住。日本直送既蕃茄入口鮮甜，一口蕃茄一口沙律菜，帶俾人一種好清新既感覺。 

炸蕃薯條 : 由宮崎蕃薯炸成既薯條，上檯時熱辣辣，好香好甜，入口外脆內軟，配合埋蜜糖醬一齊食，一d油膩既感覺都無，十幾條既蕃薯條好快就食晒。 

火山熔岩鮭魚卷 : 賣相一流既佢，上檯時我地都忍唔住「相機食先」。炸過既鮭魚卷上面加入蘿蔔絲、洋蔥絲同芝士醬，入口有別於一般既壽司，感覺好特別，值得一讚既係芝士味唔算好濃，適合唔多好芝士既我。 

FireBird雞肉串燒盛合 : 以$128 呢個價錢有齊雞肉串、雞肉大蒜同免治雞肉串，都算幾超值。醃過既雞肉燒成既雞肉串，配埋流心蛋漿，非常惹味。 

海膽帆立貝殼燒 : 大大隻既帆立貝上面加上海膽，只係賣相就已經非常吸引，海膽入口鮮甜而且唔腥，食落幼嫩香口，實在令人難以抗拒。 

Fire Bird名物 火焰雞 : 日本人食雞，追求既並唔係肥嫩油多，而係果種結實彈牙既口感同埋鮮甜既雞味。Firebird主打既係阿波尾雞，亦即係日本走地雞中既名牌，肉質結實彈牙而且雞味濃郁鮮甜。 

呢隻火焰雞係今晚既重頭菜，店員首先會將燒好既雞拎俾客人，再係上面淋上酒然後點火，製造出火焰既形態，經火燒過既雞皮非常香脆，雞肉亦都好多汁，配埋沙嗲醬同其他特色醬料，真係令到我地食到停唔到口。鍾意影相拍片放上社交網站既朋友，記住快手木d拎定電話出黎影相拍片喇。 

鹿兒島和牛釜飯 : 和牛釜飯係日本黎講都算係一種傳統菜式，呢個飯以日本珍珠米、和牛、洋蔥等等既配料整成，上菜時係以原個釜飯上，打開飯蓋已經聞到一浸香氣， d飯吸晒肉汁之後，味道香濃，入口軟綿綿，連平時唔係點食牛既我都忍唔住要試下。 

飲品方面，我地叫左Suntory the Premium Malt’s 同埋Mango-bar de Mocktail。同行既朋友認為去日本居酒屋食燒肉串燒，應該「以食伴酒」，唔飲啤酒就真係有d格格不入。 

唔多飲酒既我叫既Mocktail，係一杯冰凍既芒果汁內插左一支芒果同橙味既自家製雪條，夏日炎炎食完濃味既野飲返杯清涼既飲品就最好不過啦。

同朋友好耐無見，雖然價錢唔平，但係食材新鮮而且食物有水準，服務又一流，最重要既係可以係到坐成兩個鐘等我地可以慢慢傾計，咁樣計落都算超值呀。

openrice link: https://www.openrice.com/zh/hongkong/r-firebird-%E9%8A%85%E9%91%BC%E7%81%A3-%E6%97%A5%E6%9C%AC%E8%8F%9C-%E4%B8%B2%E7%87%92-r487196

地址: 銅鑼灣邊寧頓街13號集貴中心地下

浦井韓食居酒屋 (尖沙咀)

睇開我openrice既網民都應該知道我係幾喜歡食韓國菜既，平時韓式炸雞、部隊鍋呀等等呢d典型既菜式就食得多，所以我都一直係到發掘緊d新奇既菜式。 

位於尖沙咀iSquare既浦井，個名聽落似係食日本菜，上黎openrice睇過，原來係一間韓食居酒屋黎既。不過講真，韓式居酒屋我真係第一次聽架咋，平時都係去日式居酒屋多。今日既然可以準時放工，一於同好友兩個黎呢度食飯聚舊啦。 

呢間韓食居酒屋，除左提供大家都喜愛既韓式炸雞同小食之外，仲有烤、鍋、鐵板等等既菜式。餐廳好大而且幾光猛，抽風系統都唔錯，空氣都算流通，旁人食烤肉都唔怕離開時d衫會一陣味。 

韓國菜既特色就係埋位坐低無耐，未落單既時候店員已經為你送上各式各樣既小食。今日食到既分別係酸蘿蔔，泡菜同芽菜，酸蘿蔔酸酸甜甜，食落好香口，應該係加左麻油，至於泡菜，比想像中唔辣，可以再辣多少少。 

首先上檯既係麻醬凍豆腐。呢個豆腐往往都係百吃不厭，非常嫩滑，加入麻醬之後入口仲好香，係熱辣辣既夏天食返個凍冰冰既麻醬凍豆腐黎做前菜，真係好開胃好舒服。 

至於今晚既主角，就係呢度既招牌菜「巨人併」啦。今次黎係因為俾呢個菜式吸引到。所謂既「巨人併」，其實係一個分為4 part既鐵板，每part都有唔同既自選食物。我地揀左海鮮泡菜年糕，原味炸雞同浦井炸薯堡，而配菜我地就揀左車厘茄，粟米同埋菠蘿。呢個配搭，可以令我地一次過有齊4種唔同享受，令我地非常滿足。  

味道方面，海鮮泡菜年糕辣度適中，非常適合香港人口味，年糕吸收晒泡菜汁既精華後真係格外好味。韓式炸雞總係人見人愛，但係食得多又會好滯，所以叫個「巨人併」食少少已經好夠喉。原味炸雞入口相當香脆而且唔油，配埋外型可愛既炸薯堡一齊食，真係令我地諗返起細個默書一百分爸爸媽媽帶我地去美式快餐店既情景。作為配菜既車厘茄，粟米同埋菠蘿，燒過之後依然仲有好多汁，入口好舒服，令人口感清新。 

其實食左咁多野之後都飽飽地，不過女仔食甜品總會有第二個胃。喜愛甜品既我地一於叫個甜品share食，不過可惜既係選擇只有三個，而我地對全部都好有興趣，好彩最後我地都決定到叫紅莓雪糕牛角酥。 

平時係遍佈港九新界既著名台式餐廳食吐司配雪糕既甜品就食得多，以牛角酥為主題既甜品我地都係第一次試。呢個紅莓雪糕牛角酥，其實係牛角酥係中間切開後加入雪糕同果醬，再以雜莓伴碟，賣相相當吸引，令我地都忍唔住「相機食先」。 牛角酥入口鬆脆而且帶有牛油香味，中間夾住既雪糕係綠茶味，入口香滑，食完濃味既「巨人併」再食呢個甜品真係最好不過啦。如果可以自選雪糕既味道，咁就perfect喇。 

呢度既食物，環境同服務都唔錯，唯一comment既係食物比較大份，建議多D人一齊黎，咁就可以試到多d唔同既野食啦。

openrice link: https://www.openrice.com/zh/hongkong/r-%E6%B5%A6%E4%BA%95%E9%9F%93%E9%A3%9F%E5%B1%85%E9%85%92%E5%B1%8B-%E5%B0%96%E6%B2%99%E5%92%80-%E9%9F%93%E5%9C%8B%E8%8F%9C-%E9%9F%93%E5%BC%8F%E7%82%B8%E9%9B%9E-r526425

地址: 尖沙咀彌敦道63號iSQUARE國際廣場7樓705號舖

Bingo & Cook (銅鑼灣)

自從幾個月前黎過Bingo & Cook之後對佢真係念念不忘，貪佢呢度環境同食物都唔錯，坐得舒服得黎價錢仲非常合理。 

有別於上一次，今次我地只有兩個人，唔大食既我地，叫野食方面真係有一定既難度，不竟韓國菜好多野都係易飽肚既。 

食韓國野叫雞相信都係指定動作，呢度提供既有有骨同無骨，既然上次食過炸雞，今次就試下個烤雞啦，味道方面有三種款式，分別係原味、甜辣醬及醬油。上次食過甜辣味，今次就試下佢既原味啦。雞件烤起後送黎時仲冒煙架，好明顯係剛剛出爐啦。除此之外，每份雞仲配埋粟米和薯仔添。雖然店員有俾4款唔同既醬料我地點雞，包括醬油、芥辣、忌廉芝士同甜酸醬，但係我地都係鍾意唔點醬多d，一黎唔點醬已經好夠味，二黎咁樣先至真正食到烤雞既原汁原味呀嘛。 

另一樣菜就係部隊鍋喇。所謂既部隊鍋，其實只係一個巨型既雜錦辛辣麵。主要既材料有泡菜、魚糕、腸仔、煙肉、年糕、魚蛋，同埋辛辣麵等等既配菜。 

呢度既部隊鍋好大個，以明火滾住，咁客人食既時候仲係熱騰騰，唔駛趕住要好快食晒，亦唔怕年糕同麵凍左之後會黏埋一齊，真係好欣賞店方咁貼心。

賣相方面，顏色非常鮮艷，色香味俱全。湯既辣度帶微辣，非常適合香港人口味，拉麵同年糕索左泡菜湯之後，入口真係好有韓式風味。份量兩個人食真係岩岩好呀。 

韓國菜味道普遍都比較濃，所以叫返杯清涼解渴既飲品就最好不過啦。我地分別叫左青提子同西柚碳酸水，兩者味道清甜，好重水果味，仲飲到打碎左既果肉，食完辣野飲返啖，真係格外清新。 

呢度既食物相當地道，好味之餘環境仲唔錯，價錢又合理，係約埋三五知己聚舊既好地方。不過如果想試多d唔同既菜式，當然係叫多d人一齊黎就最好不過啦。

openrice link: https://www.openrice.com/zh/hongkong/r-bingo-cook-%E9%8A%85%E9%91%BC%E7%81%A3-%E9%9F%93%E5%9C%8B%E8%8F%9C-r465359

地址:銅鑼灣駱克道487-489號駱克駅2樓

CHEF STAGE de Eddy Chu(尖沙咀)

今晚同好友相聚，朋友介紹黎位於尖沙咀亞士厘道17-19號19樓既Chef Stage，由地鐵站行過黎都只係幾分鐘，非常方便。

Chef Stage de Eddy Chu ，顧名思義，就梗係由老闆兼總廚既Eddy Chu坐鎮主理架啦。係Openrice度睇到，佢係酒店業界被喻為「西餐浪子」，入行超過三十年，仲曾任職多間星級酒店及高級會所添。

餐廳環境唔錯，晚飯時間亦都唔會好嘈，服務又好，如果想揾地方坐耐d，同朋友傾下計，呢度會係唔錯既選擇。

餐酒選擇都好多，不過我地今日揀既係Sweet Red Wine 同埋Mystery Mocktail。

Sweet Red Wine: 加左蘋果粒既紅酒甜甜地，有輕微既水果甜香，但又唔會蓋過紅酒味，喜歡飲紅酒既朋友真係可以試下。

Mocktail方面係以有汽提子汁加入雜果整成，入口非常清新。

艾迪乳鴿 : 西餐有乳鴿食都係第一次，所以點都要試下。呢度既乳鴿鹵得好入味，有別於一般中式乳鴿咁，呢度既西式乳鴿無咁脆，餐廳用上BB鴿，所以肉質非常細嫩而且充滿肉汁，亦都唔算多油。最值得一讚既係餐廳非常貼心，提供濕紙巾俾客人，等客人可以用手食乳鴿。

松露煮法國原粒蘑菇 : 用小鍋上菜既原粒蘑菇，帶有香濃既黑松露味，非常有咬口，加埋鹹鹹地辣辣地既香腸，特別刺激味蕾，令人越食越開胃。

大大隻蝦多士 : 平時食開蝦多士都係細細塊，一啖一件，今次咁大件蝦多士我真係第一次見，麵包上面加入蝦之後沾上炸粉炸成既蝦多士，上檯時熱辣辣，入口外酥內軟，啖啖都會食到蝦肉，好彈牙，沾埋帶有少少冬蔭公味既醬汁，整體配合同口感真係有別於平時食到既蝦多士呀。另外，伴碟有少量既沙律，食完油膩既蝦多士食返少少沙律，真係份外清新。

燒西班牙黑毛豬肉眼蓋 : 黑毛豬表面燒到微脆，厚身得黎又唔會好肥，入口時肉質鮮嫩，仲有豐富既肉汁，可見火喉控制得岩岩好，唔會燒到好乾。伴碟既有蕃薯蓉、燒蕃茄、蘆筍、菠蘿同埋basil。廚師仲教我地先食菠蘿同埋basil，咁樣就可以清除上一道菜剩餘係口腔內既味道，專心咁慢慢品嚐呢味黑毛豬肉眼蓋啦。

香蒜辣味鮮蝦肉意粉 : 另一份主菜我地揀左意粉，除左蝦之外，仲有車厘茄同蘑菇做配料。用小鍋上菜既意粉，煮得剛剛好，唔會太淋太硬。意粉汁帶開胃蒜香味，入口帶微辣，醬汁做到包得住每一條意粉，而且唔會過油，簡單得黎仲令人食得開胃。唯一美中不足既係蝦肉份量比較少，落多少少會更加好。

總括來說，呢度無論環境、食物同服務都非常好，最值得一讚既係店員知道我地d食物係share食，會係適當既時候同我地換碟，方便客人之餘仲唔會騷擾到佢地。雖然呢度唔係酒店餐廳，但係不論食物同服務，都令我感到自己係五星級酒店食飯一樣。

openrice link: https://www.openrice.com/zh/hongkong/r-chef-stage-de-eddy-chu-%E5%B0%96%E6%B2%99%E5%92%80-%E8%A5%BF%E5%BC%8F-%E9%85%92-r434117

地址: 尖沙咀亞士厘道17-19號19樓

Food & Taste 自煮教室

聽到Food & Taste呢個名，大家估到D咩呢？似唔似係朋友之間既「美女廚房」活動呢?

其實講起烹飪，除左識買材料之外，仲要識烹調先得既，如果唔係分分鐘會浪費食材。

位於觀塘成業街怡生工業中心既Food & Taste，除左有冷凍既肉類同海鮮賣之外，仲會定期開辦烹飪班，等客人可以跟大廚一齊學整野食。

今日黎到Food & Taste有緣相聚星期四既「自煮教室」跟大廚Luca學整野食。話明係有緣相聚，即係話除左整野食之外，仲可以俾大家做networking, 認識下各行各業既朋友。

是日既主題係「和牛晚宴」，顧名思義，即係和牛係今晚既主角啦。

大家到齊後，今晚既活動就正式開始喇。首先職員就問各位想飲咩，有白酒啦，汽水啦，仲有意想不到既益力多添。揀完飲品後就開始試一隻台式香腸做小食。

香腸出奇地唔鹹，入口仲好香甜添，其實煮每一樣食物時候，廚師都會搵個助手出黎幫手，亦都會教大家唔同既秘訣。

平時意大利雲吞大家就食得多，但係正宗煮法就真係唔係個個都知。今日我地有來自意大利既Luca教我地，真係獲益良多。

其實新鮮既意大利雲吞，水滾後只需要煮3-4分鐘，時間真係同整個杯麵差唔多，不過要煮得好味，重點係個汁。

首先，我地用白松露油加牛油炒起d車厘茄，加入truffle cream後再加胡椒，稍後再加黑松露鹽，最後加入煮好左既意大利雲吞即成。唔好見個汁好似好油好無益，其實全部都係健康既油，大家唔駛驚。

食完意大利雲吞後，我地就學整紐西蘭羊架啦。

羊架用意大利香料醃過後再用有坑紋既煎pan煎成，意大利人既煮法係用刀叉去吉舊羊架，咁d汁先容易入味，煎既過程中真係散發出陣陣香味架。雖然我唔食羊，但係女仔點都要學識煮返幾味架嘛。

食完羊架後，終於到今晚主角出場，就係A4和牛啦。 講起牛肉，其實唔同產地既牛肉都有唔同分級標準，以香港人成日食既日本牛肉為例，大致可以分為A、B、C三級，再按肉質細分為5個等級，1為最低，5為最高，所以A5就係所謂的「極品和牛」，而今日學煮既A4一d都唔差架。

今晚既和牛就係由我呢個小助手協助煮成既，唔講都唔知咁大塊牛扒，原來每邊都只係需要整一分鐘，秘訣反而係用夾夾起塊扒去煎側邊既位置，真係唔講都唔知呀。除此之外，用有坑紋既煎pan整，煎出黎既和牛會有pattern，賣相會更加吸引添。

最後終於輪到我一直期待既越南大蝦配意大利飯，平時好鍾意食意大利飯既我，通常都係出街食既多，原因一黎係貪方便，二黎係自己煮唔夠出面既好味。可能小妹真係見識少，今日黎「有緣相聚自煮教室」先至第一次見呢部半自動既煮食器。只要跟住recipe 既材料同埋機上instructions 既steps同份量，要整出大師級既意大利飯，真係易如反掌，請朋友返屋企食飯，一定唔會失禮。

不過，雖然話係半自動，d虎蝦當然係要自己煎啦。要煮得好味，可以試下用牛油煮熔後加入虎蝦，咁先會香味十足，係煎到差唔多熟既時候再加入白蘭地再煮，咁味道就會更香濃。

煎蝦既tips 係記住剪左佢對眼，如果唔係d油一爆開就會彈到周圍都係，容易受傷。

今日真係學到唔少煮西餐既心得，落堂仲可以用優惠價買材料，第日真係要得閒黎學下烹飪，學多d唔同既菜式，咁請朋友返屋企食飯都方便d呀嘛。