喜歡周圍試特色餐廳嘅我，最近喺面書發現呢間以飛機為主題嘅餐廳，覺得好特別，好想來試下。
自從十多年前電視播映過一套以飛機為主題嘅電視劇之後，我就非常熱愛任何同呢個行業有關嘅嘢。
呢間餐廳以飛機為主題，外面望落好似一架飛機咁樣，大門口仲好似登機閘口咁，有寫埋航班編號，目的地同埋時間，進入餐廳之後，感覺有啲似機場，有指示貴賓室，洗手間，離港大堂，商店等等地方嘅位置，近窗口嘅座位更同機艙嘅大同小異。
餐牌上可以單點，又或者叫二人餐。二人餐有分三款，分別係經濟艙，商務艙，同埋頭等艙。
我哋叫咗一個經濟艙二人餐，另加一份香腸拼盤。
經濟艙二人餐有一個頭盤，一個沙律，兩個湯，兩個主菜，兩個甜品同埋兩杯飲品。
燒免治雞肉圈配鳳梨：
雞肉同菠蘿表面燒到微微燶，香甜多汁嘅菠蘿配上雞肉一齊食，口感一流，點埋墨西哥辣椒醬，入口好惹味。
橄欖田園沙律：
新鮮嘅沙律菜配上清香嘅橄欖，爽脆嘅青瓜同埋車厘茄，味道非常清新。
廚師手工湯：
是日餐湯係番茄忌廉湯，既然餐牌寫明係廚師手工湯，就梗係餐廳自家製㗎啦。蕃茄加入其他配料打碎後加入忌廉煮成，入口相當creamy，好好味。
燒西班牙黑毛豬胺：
黑毛豬賣相有點兒似牛扒，表面燒到微脆得黎又唔會太乾，入口時肉質鮮嫩而且好淋，仲有豐富既肉汁，唔使點伴碟嘅燒烤醬已經好夠味，可見火喉控制得岩岩好。伴碟既有薯角同蔬菜，夠晒健康。
蒜片辣椒海蜆意粉：
加入左蒜片同辣椒炒嘅意粉，蒜味濃郁，帶微辣，仲有好多蜆肉添，至於意粉亦都爽口彈牙，完全做到al dente，整體味道同口感都唔錯。
燒香腸拼盤（大）：
我地另外點多咗份燒香腸拼盤，香腸燒得非常香，味道一d 都唔鹹，點埋伴碟嘅蜜糖芥末醬，味道好夾。
是日甜品及餐飲：
跟餐嘅甜品係朱古力蛋糕，朱古力味香濃，味道唔錯，配埋餐飲，為我哋今晚嘅「飛行旅程」作完美句號。
openrice link: https://www.openrice.com/zh/hongkong/r-the-747-galley-by-cafe-proud-wings-大角咀-多國菜-r563278
地址： 大角咀嘉善街39號地舖
自從港島線延伸到西環之後，多咗機會去到西營盤食飯，今日難得假日，約咗住喺西營盤站附近嘅朋友一齊共聚午餐。
「東鮨居酒屋」位於西營盤第二街，由港鐵站行過去都只係幾分鐘路程，非常方便。
店舖舖面唔大，大約可以坐20個人左右。由於餐廳新張優惠，暫時都係免加一。
黑咖喱吉列豬扒飯：
套餐包麵豉湯同埋沙律。沙律加入左柚子汁，wasabi 同埋飛魚子，食落好開胃。麵豉湯鹹度亦都適中，唔錯。
黑咖喱聽就聽過好多次，但係就從來未食過。經店員介紹後，知道黑咖喱其實係唔辣嘅，係咖喱汁加咗墨魚汁同埋龍蝦汁整成，賣相雖然係黑蚊蚊，但係加入咗火喉剛剛好嘅吉列豬扒後，都相當吸引。
Azuma 卷 ：
既然用得餐廳名黎命名嘅壽司，咁當然係招牌菜啦。賣相有少少似太卷，不過加入左牛油果同埋軟殼蟹，入口脆脆地，好有口感。
生蠔：
新張期內，生蠔只係每隻$10 ，價錢相當親民，品質非常出色，肉身飽滿，口感清脆，海水味適中，容易入口，配埋檸檬汁食，非常好味。
柚子雪糕 ：
食日本野又點少得試下佢哋嘅甜品呢？呢度嘅柚子雪糕，似係自家製，入口有少少似雪芭，柚子味相當香濃，非常出色，值得一讚。
埋單每人都係200蚊，可以係寧靜嘅環境下同朋友敘舊，慢慢品嚐各式各樣嘅日本菜式，都算非常超值。
Openrice link: https://www.openrice.com/zh/hongkong/r-東鮨居酒屋-西環-日本菜-壽司-刺身-r588675
地址: 西環西營盤第二街1-11號東祥大廈低層地下E號舖
Mad for Garlic 喺韓國開到成巷成市，近年係香港仲開咗成三間分店，咁究竟食garlic 又可以有幾Mad呢?
是日假日，約咗朋友去奧海城行街，順便試下呢間mad for garlic。
我哋一行兩人，叫咗一份沙律，一個小食同埋一個薄餅。
烤雞柳配牛油餡角及蒜香乳酪醬：
賣相似中東包食法，將烤過嘅雞肉同埋沙律菜放入空心嘅牛油餡角裏面，再加少量混入左蒜香嘅乳酪醬夾埋黎食。
沙律菜非常新鮮爽口，配埋嫩滑嘅雞肉同埋脆脆地嘅餡角一齊食，口感一流，非常惹味。
蒜頭蕃茄白酒汁炒八爪魚及蜆配法包片：
鮮味十足嘅八爪魚同蜆，配上辣椒、蒜頭、蕃茄同埋白酒炒香後，入口酸酸地，微辣，好開胃，令人一隻一隻咁食過不停。
剩返嘅汁仲可以用來點法包添，如果法包可以加入蒜蓉後再去焗，咁就完美喇。
雞肉南瓜辣忌廉汁意大利薄餅：
薄餅餅底非常薄，上面鋪左一層酸酸甜甜嘅忌廉汁，入口非常creamy，非常惹味。
上面嘅配料有雞肉粒同埋南瓜片，令到整體顏色非常鮮艷，賣相非常吸引，好好味。
用蒜頭黎做主題嘅餐廳真係非常之有創意，整體菜式同埋味道都好有驚喜，下次黎嘅時候真係要試其他唔同嘅配搭啊！
openrice link: https://www.openrice.com/zh/hongkong/r-mad-for-garlic-大角咀-韓國菜-薄餅-r546449
地址：大角咀海庭道18號奧海城二期1樓105A號舖
唔知從幾時開始，香港人再冇特別指定邊個季節先至可以打邊爐，早前係青山道等巴士時剛巧遇到呢間開張無耐嘅「六十六十」，$200左右有齊海鮮同埋肉類，覺得都算幾抵食，所以決定搵機會黎試下。
呢間餐廳只做晚市，火鍋有分三個時段，因為工作關係，只能夠揀8:30入座嘅時段，可以食足兩個半鐘頭。
湯底有分三款，分別係粥底，椰子文昌雞湯，同埋蕃茄濃湯，由於本人非常喜歡蕃茄薯仔，所以揀咗蕃茄濃湯。
每位$200 ，不設加一 ，除咗湯底之外，仲包八款海鮮，同埋六款配料，任君選擇。
坐低冇耐之後，店員就送上醬油配料俾我哋揀，選擇都非常多，唯一美中不足嘅係冇芝麻醬，如果有嘅就更加好啦。
海鮮我哋揀咗肉蟹、鮑魚、扇貝、貝類、蠔、鮮魷同埋貴妃蚌。
湯底煲滾左之後，我哋馬上就落海鮮啦，煲過海鮮嘅湯底，入口非常清甜，味道濃郁，非常好味。
海鮮亦都非常新鮮，份量亦都算多，最值得一讚嘅係肉蟹，啖啖肉，非常好味，至於蠔，入口亦都非常爽口，值得一讚。
食完海鮮之後，其他配料都陸續送上，我哋揀咗西班牙梅頭肉、鮮雞件、響鈴、豬肉丸、粟米同埋日本烏冬。
豬肉丸應該係自家製嘅，以新鮮豬肉手剁再加其他配料整成，肉質好嫩滑，肉丸味道濃而多層次，好好味。
呢度嘅響鈴即叫即炸，輕輕放入味道濃郁嘅湯內淥過後，外脆內軟。
肉類方面，西班牙梅頭肉唔算太肥，切得都算薄，唔使淥好耐就食得，至於鮮雞件，入口都非常嫩滑。
烏冬加入吸收晒各種肉類同海鮮精華嘅蕃茄薯仔湯淥過後，味道簡直一流。
食完之後，店方推介加入白飯整脆米泡飯，可惜我哋已經好飽，冇去試啦。
埋單每人齊頭$200 ，有肉類有海鮮又有烏冬，都算係非常超值。
openrice link: https://www.openrice.com/zh/hongkong/r-六十六十火鍋-長沙灣-港式-火鍋-r585982
地址：長沙灣青山道156-162號永基商業大廈地下A舖
是日重陽節前夕，早上港鐵又有故障，返到公司已經好攰，非常期待放工約朋友食飯。
我哋一行三人，約咗喺銅鑼灣食晚餐，我朋友介紹黎呢間位於登龍街嘅泰國餐廳，話呢度嘅廚師係泰國人，食物味道非常正宗。
晚上時段可以以$288一位嘅價錢任食串燒，又或者選擇a la carte。
難得嚟到咁正宗嘅泰式餐廳，我哋當然想試下各式各樣嘅菜式啦，所以最後揀咗a la carte 。
唔大食嘅我地叫咗一個沙律，一個湯，一個菜，同埋一個飯。
柚子大蝦沙律：
泰菜味道一般黎講都比較濃，叫個沙律食黎中和下就最好不過。
加入左柚子同大蝦嘅沙律，配上沙律汁，味道清新，令人越食越開胃。
脆肉乾炒椰菜苗：
椰菜苗炒煮時火候剛剛好，軟硬適中，加入脆肉乾炒，鹹味恰到好處，食落好有口感。
明爐鮮蝦冬蔭公湯：
食泰國嘢又點少得飲冬蔭公湯呢？鍾意食辣野既我，冬蔭公係我去到泰式餐廳必叫既菜式之一。冬蔭公其實係泰式酸辣湯，係由南薑、酸子、香茅、青蔥、酸檸檬、辣椒同魚露調製而成。
呢度既冬蔭公湯一客大約有六碗左右，以明爐送上，有明火保持溫度，只係賣相已經非常震撼。
呈橙紅色嘅冬蔭公湯，上菜時熱辣辣，香料十足，仲散發出陣陣香味，配料方面亦都好足，有菇、蕃茄同蝦等等，入口又酸又辣，好開胃。
原個椰青海鮮焗飯：
原個椰青海鮮焗飯雖然製作需時，但係無論賣相又或者味道都非常出色。
原個椰青加入青口、大蝦、魷魚、腰果、雜豆等材料連埋飯去焗，上枱時散發出陣陣椰子香味，味道亦都非常清香，唔會太濃或油膩，加埋椰青肉食更加增加整體嘅口感，非常美味。
食完飯後，店方為我地送上班蘭糕做甜品，味道清新，入口唔會太甜，非常滿足。
埋單每人都係$200左右，銅鑼灣繁榮嘅地區可以搵到個地方俾我哋慢慢傾計，真係算唔錯㗎啦。
Openrice link: https://www.openrice.com/zh/hongkong/r-焰淑泰國餐廳-銅鑼灣-泰國菜-r571308
地址：銅鑼灣登龍街18號V Point地下1號舖
Texas Burger 係天后都開左一段時間，好可惜一直都未有機會去，依加係旺角區，極多人來往嘅朗豪坊開左分店，我當然想黎試下啦。
位於朗豪坊12樓嘅Texas Burger，以開放形式經營，雖然座位唔多，但係我地都好好彩地坐到卡位。
既然餐廳叫Texas Burger,就梗係專門食Burger啦，只係Burger已經有好多選擇，不過由於我地想試多d唔同嘅野食，我地叫左一份Burger，再加一個小食同埋Taco share。
水牛城棒棒雞：
小食我地叫左「水牛城棒棒雞」，水牛城雞翼係美國菜黎講算係知名食物之一，咁究竟「水牛城」又係咩味道嘅呢？
帶有燒烤醬同Tabasco味道嘅雞件，味道濃郁，入口熱辣辣，皮脆肉嫩，唔洗點附送嘅醬汁已經好好味，認真唔錯。
墨西哥芝士夾餅：
香港地真係唔多地方食到Taco，所以今次係餐牌上見到真係非叫不可。
Taco 餡料有6個選擇，除左手撕雞，香草菇菌，燒烤手撕豚肉，脆魚柳，煎牛柳條，除此之外，亦都可以加＄6 要軟殼蟹。至於皮方面，可以揀軟皮同硬皮。
我地叫左兩件taco，揀左要軟皮，而餡方面，一件要煎牛柳條，而另一件要燒烤手撕豚肉。
Taco 一件都好大，賣相有少少似另類嘅三文治咁，以軟皮加入醃過嘅餡料，生菜，sour cream, 同牛油果醬整成。由於本人唔喜歡食芝士所以都request佢走芝士，餐廳都好樂意配合。
味道方面，餡料味道非常香濃，加入sour cream同埋牛油果醬之後亦都令整體味道提升。
墨西哥雞肉菠蘿漢堡：
由於我唔食牛肉，burger選擇真係唔多，我地最後揀左「墨西哥雞肉菠蘿漢堡」，再加＄66 配奶昔，酸瓜同埋薯條。
漢堡包塗左牛油再用焗爐輕輕烘過後加入雞肉，菠蘿，芝士同埋生菜，入口非常鬆軟，加埋特製醬汁，一口咬落散發出肉汁同菠蘿汁嘅味道同口感，令到整體味道好夾好有層次。
薯條方面更加係即叫即整，非常香脆，入口唔太油膩，值得一讚。
奶昔方面我地跟餐叫左一杯Berry Lover，另外再叫多左杯Ocean Love。
Berry Lover:
Berry Lover 以雜莓雪糕，木莓同忌廉整成，味道香甜，質感不但幼滑而且creamy，入口仲有少少果粒嘅質感。
Ocean Love:
至於Ocean Love, 佢係以香草雪糕，岩鹽，燕麥同整成。
初初知道呢杯奶昔加左岩鹽都有d擔心會唔會有鹹味，但係實際上一d鹹嘅味道都無，反而令雲尼拿嘅味道更加出。
埋單兩人夾埋都係三百幾蚊，坐左足足兩個鐘同朋友傾計relax，咁嘅價錢都算係超值啦。
Openrice link: https://www.openrice.com/zh/hongkong/r-texas-burger-旺角-西式-漢堡包-r593516
地址：旺角亞皆老街8號朗豪坊12樓1A號舖
