滬點 (灣仔)

「滬點」係六月中旬開張，主打上海菜，位於銅鑼灣及灣仔地鐵站之間，非常方便，非常喜歡食上海菜嘅我，又點會唔試吓？

我哋一行三人，女士們食量唔多，叫咗一碗麵，一個湯，一條魚，同埋三個小食share食。

雞絲粉皮 :

碟底舖上白色嘅粉皮，上面再放上雞絲，青瓜同埋花生碎，配埋香濃嘅麻醬，食落有層次，好有口感，非常惹味！

紅油抄手 :
紅油辣味唔重，雲吞餡料夠多，個皮仲好滑，入口好有鮮味，配埋四川辣油同芫茜等配料，真係無得頂呀。

招牌小籠包: 
小籠包既皮都幾薄，唔會咁易穿，入面粒肉亦都好多湯汁，味道亦都好鮮甜。

酸辣湯：
酸辣湯有分一碗同埋例牌，我地有朋友唔太好，所以只係叫左一碗share。酸辣湯入口酸酸地，配料都好足，味道相當正宗。

嫩雞煨麵：
煨麵同普通湯麵嘅分別係個湯底，而湯底嘅做法唔太難，只係功夫同時間要花多少少。

呢度嘅雞湯質感比一般的湯麵濃郁，配料除咗有雞之外，仲有菇，配上嫩滑嘅上海麵，真係非常好味。

松子魚：
松子魚係一種京川滬嘅烹調方法，並非魚嘅名。魚肉切開後，炸到好似松子咁嘅形狀而得名。之後再將煮好嘅甜酸汁淋在係魚上。

炸好嘅魚塊淋上甜酸汁後賣相非常吸引，入口酥脆甘香，肉質滑溜，食落酸酸甜甜，非常醒胃。

埋單每人都係百零蚊，都算係性價比高。

Openrice link: https://www.openrice.com/zh/hongkong/r-滬點-灣仔-滬菜-上海-r668154
地址：灣仔軒尼詩道385-391號軒寧大廈地下1-2號

Bamboo Thai (旺角)

雖然最近少左出街，但係印象中上一次去朗豪坊都只不過係不久之前嘅事，疫情下係戲院隔離開左一間新嘅泰國餐廳，又點可以唔試下呢？

火山排骨:

餐牌上極力promote 呢個菜式，招牌菜我地又點可以唔試下呀？ 「火山排骨」有分大同細兩個size，我地人數唔多，所以叫左個細。

呢味「火山排骨」採用荷蘭豬頸骨，特色係肉質嫩滑又無筋。豬頸骨先用香茅、南薑、芫茜、青檸葉等煮個半鐘，再淋上用泰國香草、辣椒調配嘅秘製醬汁，酸酸辣辣咁零舍醒胃，芫茜味唔重，味道亦都唔會過辣，令人越食越開胃。

最值得一讚嘅係餐廳好貼心地為我地準備左膠手套，方便客人可以拎起排骨用手食，真係非常貼心呀。

泰式大蝦炒金邊粉：

上菜已經聞到好香，金邊粉比較乾身，唔太油，配料有蛋、芽菜同埋大大隻嘅鮮蝦，炒得好入味，配上旁邊嘅青檸, 花生同埋辣椒，撈埋一齊食真係好香，食落有多重口感!

香茅雞肉炒飯：

雞肉鮮嫩夠滑，加入左香茅炒過嘅飯色澤豐富，亦都相當惹味，上菜時散發出陣陣香味，

入口煙韌，非常爽口。

洛神花黑糖薑茶：

賣相有少少似利賓納嘅「洛神花黑糖薑茶」, 其實擁有著極高食療功效, 洛神花茶係用其可食用嘅花萼黎泡茶, 其所含嘅檸檬酸同蘋果酸可増進食慾, 加入黑糖後中和酸味, 就成為一款既美味可口又清涼退火、治喉嚨痛嘅花茶。

呢杯加左薑嘅「洛神花黑糖薑茶」，薑味清新，入口香甜微酸而不膩，為我地嘅晚餐劃上完美句號。

openrice link: https://www.openrice.com/zh/hongkong/r-bamboo-thai-旺角-泰國菜-r667648

地址：旺角亞皆老街8號朗豪坊8樓02-03號舖 

福岡漢堡扒 (尖沙咀)

在抗疫時期，位於尖沙咀厚福街嘅韓國過江龍人氣餐廳「福岡漢堡扒」仍然坐無虛席，每次路過都大排長龍，今日趁黎開尖沙咀，早係傍晚六點黎呢度食個early dinner ，希望唔洗等咁耐先可以食到。

「福岡漢堡扒 」 主打用韓牛製嘅漢堡扒， 可以原汁原味地享用，亦可加入蛋、蒜片、芝士等，同石燒牛扒相似，全生嘅漢堡扒上枱，食客要自己將漢堡扒分成一口份量後，移至燒紅石板上燒熟，最後蘸上燒肉醬、辣醬，價錢親民又可以玩。

呢度每一款漢堡扒都有大中細size選擇，細嘅有130g，中嘅160g，大嘅190g。

我地叫左一份漢堡扒同一個丼share食。

雞蛋和牛漢堡扒：

和牛份量我地揀左中size，一個餐包麵豉湯、沙律同埋白飯。

蛋上菜時其實已經係係熟架啦, 而個牛就係生嘅，食法係將漢堡扒每次一小塊咁放上圓形熱石頭上面燒。漢堡扒肉質幼滑鬆軟，由於本身已經醃過，所以唔需要點附有嘅醬汁已經好好味，配上伴碟嘅蛋，一啖飯一啖蛋一啖牛，味道非常之有層次感。

芝士泡豚丼：

芝士同泡菜永遠都係perfect match。嫩滑嘅豚肉片加上微辣爽脆嘅泡菜，上面鋪一層濃郁的芝士，非常好味。

巨峰提子特飲：

食咁多濃味野又點可以唔叫飲品呢？

呢度嘅飲品都算大杯，但因為怕飲太多甜野會肥，所以只係兩份share一杯。

我地叫左「巨峰提子特飲」，特飲呈透明，突顯內裡巨峰提子嘅深紫色，入口酸酸甜甜，冰涼清爽，同今晚嘅漢堡同丼簡直係絕配。

呢度雖然空間唔夠寬敞, 但係抽風系統唔錯，有抽煙管即時抽走晒D油煙，咁食完就唔怕一大陣油煙味啦。

Openrice link: https://www.openrice.com/zh/hongkong/r-福岡漢堡扒-尖沙咀-日本菜-韓燒-r658832/reviews?page=1 

地址：尖沙咀厚福街11號地下A號舖

Curator By Lex Art Cafe (尖沙咀)

前排疫情比較嚴重，少左出街，最近見有點兒緩和，係時候約返d朋友出黎見下面啦。

K11 Musea 開左一段時間，有好多新餐廳，即管試下新野啦。

位於B樓層嘅Curator By Lex Art Café，座位寬敞，燈光鮮明，餐廳仲放滿村上隆嘅作品，非常有藝術氣氛，環境好舒服，可以同朋友一齊慢慢坐，嘆返杯咖啡食餐飯。

招牌莎樂美腸薄餅：

呢款薄餅雖然屬於「小食」類別，但係份量都比想像中嘅多。

莎樂美腸Pizza果然係招牌菜，莎樂美腸有咬口，配上脆脆嘅餅底以及簡單嘅蕃茄醬，真係好好食。

酥脆雞錘配水牛芝士醬：

雞皮炸到香脆，炸粉唔算厚，雞肉鮮嫩多汁，配上輕輕嘅水牛芝士醬，感覺非常夾。

卡邦尼培根意粉：

呢個係傳統意式卡邦尼意粉，利用意粉嘅熱力再加入芝士同蛋整成，上面再加培根碎，入口惹味香滑，芝士味唔會太重，入口唔太膩，口感十足！

短笛咖啡：

短笛咖啡係近年比較興起嘅咖啡之一，piccolo 源自於意大利文，意思係樂器中短笛咁解，想像下如果Cappuccino 係長笛，咁短笛嘅容量就係佢嘅一半，但係兩者嘅espresso 量係一樣，換句話講，短笛嘅咖啡濃度係比較高，咖啡味濃，配上精美嘅拉花，入口相當香滑。

海鹽朱古力香蕉冰雪世界：

香蕉配朱古力永遠係最佳配搭，呢杯「海鹽朱古力香蕉冰雪世界」，朱古力奶加入香蕉蓉，朱古力味香濃，配上輕輕嘅香蕉味，味道非常夾。朱古力奶上面仲鋪上厚厚嘅泡沫，灑上海鹽，及放上小小嘅棉花糖，賣相非常精緻。

Openrice link: https://www.openrice.com/zh/hongkong/r-curator-by-lex-art-cafe-尖沙咀-西式-r642524

地址：尖沙咀梳士巴利道18號Victoria Dockside K11 Musea B1樓B113C號舖