The Pantry(尖沙咀)

位於九龍站圓方既The Pantry，呢個地方有D遙遠，放工搭車去既車程都幾長，不過勝在附近有個大既巴士站，搭車返屋企真係好方便。

傍晚7點幾黎到，唔駛等位，真係好喇。我地獲安排坐望到溜冰場既座位，可以望到學生們玩ice hockey，真開心。

餐廳非常先進，係用tablet點菜，非常efficient，大部分菜式都附有圖片一張，客人又可以睇返自己幾點落單同叫左D咩野。

Siracha honey chicken pizza 真係幾大個下，有成8件咁多，個Pizza底整得幾脆下，Pizza上面有雞，彩椒同埋一種特別既醬汁，整體顏色鮮艷，賣相幾靚。

Tom yum gong risotto 呢個組合真係第一次試，味道真係出奇地好味，risotto煮得意式得黎帶有一D冬蔭公既味道，相信係將risotto米放入冬蔭公湯度煮。配菜有一隻超大既蝦，好味就好味，不過好難拆肉，但係一路食一路點旁邊既泰式醬汁，真係令人越食越開胃。

The pantry's pancake 係呢度既招牌菜，除左呢個選擇之外其實仲有好幾款揀，但係因為呢隻係原味，所以都係想試呢款。呢隻pancake係用ricotta cheese整既，加埋大量既蛋白同其他材料整成，所以切落去唔似係一般甜品店食到果D，碟旁放左mixed berries 同埋一小兜糖漿，大家鍾意落幾多就落幾多。不過話時話，食落真係無咩芝士味，蛋味較多，連唔係點食芝士既我都食到，不過整體黎講我都係鍾意食普通pancake多D。

我地由7點幾坐到成9點幾，足足兩個鐘，餐廳唔太嘈又唔會催人埋單走人，真係一個同朋友食飯傾計既好地方。

openrice link: https://www.openrice.com/zh/hongkong/r-the-pantry-%E5%B0%96%E6%B2%99%E5%92%80-%E5%A4%9A%E5%9C%8B%E8%8F%9C-all-day-breakfast-r497217

地址: 尖沙咀柯士甸道西1號圓方(Elements) 2樓2133號舖

Izumi Curry(尖沙咀)

我一向都係小丸子迷，係超級鍾意小丸子架，早前黎過位於尖沙咀既小丸子CAFE，連位都唔俾等，因為太多人截左龍，今日終於有機會試。

黎得呢度既人，都唔係為左食架啦，所以係餐廳周圍影相都唔係D咩奇怪事。

餐廳所有佈置，由backdrop到餐桌到到碟都係以小丸子為主題架。

食物方面我地叫左2個SET，分別係奄列吉列豬扒咖喱飯同埋明太子海鮮意粉，各包一杯餐飲，小食我地叫左餃子雞翼。

都係果句，呢度唔係俾你食野既，所以唔好對食物要求咁高，不過咁講，味道又真係唔差，都算中上，但係每一碟都用小丸子黎做主題，想唔相機食先都唔得啦。

隻碟仲要係印左小丸子滴汗個樣，真係好鬼CUTE。

餐飲方面係包汽水一罐，如果想轉咖啡既係要加錢，為左影相既我地，最後都要左個咖啡。

呢度真係好好玩，坐左成2個鐘仲要不停影相，有少少返老還童既感覺。

openrice link: https://www.openrice.com/zh/hongkong/r-izumi-curry-%E5%B0%96%E6%B2%99%E5%92%80-%E6%97%A5%E6%9C%AC%E8%8F%9C-%E5%92%96%E5%96%B1-r123856

地址:尖沙咀彌敦道118號Mira Mall 1樓110號舖

鍋心(太子)

是日星期五，放工後約左2個好姊妹去打邊爐。位於太子既鍋心，出左名有新派任食火鍋，每位都係$168，見幾抵咁，所以都想黎試下。

火鍋店位於萬年大廈既一樓，上去要行一條長樓梯，如果有老人家既可能就唔係咁方便喇。上樓上途中見到唔少中國既特色擺設，真係幾特別。

坐低後第一件事係揀左湯底先，湯底共有 6 款，四川蕃茄鍋、正宗麻辣鍋、川式酸菜鍋、粟米豬骨鍋、皮蛋芫茜鍋同豆腐清湯鍋，我地揀左粟米豬骨鍋，清清地，可以配合大家既口味。

呢度既飲品仲要係任飲，仲有好多款，有韓式特飲啦，汽水啦，無糖茶啦，但係就無COKE ZERO，怕肥既我只可以飲無糖既茶，咁都好好呀。

火鍋既配料有好多，有部份食物好似墨魚滑呀墨魚丸呀仲要係自家製，所以一定要試。

真係有好大舊豬骨架。

炸魚皮亦都好脆

豬皮非常爽口，肥牛脂肪分佈平均，海蝦又爽脆又鮮甜，所以都叫左好幾次，豬肉方面，可能因為我煮得太耐，所以有D 韌。

包心魚卷同埋腐皮蝦卷都好少機會有得食，估唔到係度試到。

蟹柳都幾好味，但係因為上菜時已經defrost左，所以真係煮一煮就食得架喇，至於墨魚丸同墨丸滑，食落幾彈牙，但係兩者有咩分別就唔太分到啦。

呢到既雪糕都係任食架，不過可惜只係得牛奶公司，無我鍾意既haagen-daz，不過百幾蚊有咁多野食，可以食足兩個鐘，真係算唔錯架啦。

openrice link: https://www.openrice.com/zh/hongkong/r-%E9%8D%8B%E5%BF%83-%E6%97%BA%E8%A7%92-%E6%B8%AF%E5%BC%8F-%E7%81%AB%E9%8D%8B-r514919

地址: 旺角太子道西96-100號萬年大廈地下A舖及1樓