Made in HK Restaurant (旺角）

一年一度嘅聖誕假期好快就過啦，難得有個自製嘅長周末，同朋友相約去朗豪坊睇戲後就去左旁邊嘅餐廳食晚飯啦。

Made in HK Restaurant 係一間中西Fusion餐廳，以開放形式運作，感覺相當開揚。晚飯時間有得揀set dinner 或者a la carte，想試多d唔同菜式嘅我地選揀左a la carte。

龍蝦湯配迷你雲吞：
龍蝦湯顏色呈橙紅色，未飲都聞到好香嘅龍蝦味，飲落口感creamy，龍蝦味不但香濃而且夠熱，配埋中式迷你雲吞的確可以令整體口感大增，中西合璧嘅感覺亦都相當特別。

德國肉腸拼盤配薯條：
肉腸拼盤共有四款腸仔，包括黑椒腸同埋雞肉腸，入口唔太鹹，非常彈牙，味道亦都非常香，唔點伴碟嘅蜜糖芥茉醬或者燒烤醬都已經好好味。薯條以小桶子裝，好鬼有型，薯條切得比較幼身，炸得金黃香脆而唔油膩，熱辣辣，口感外脆內軟。拼盤除左配上香脆嘅薯條之外，仲有新鮮嘅沙律，食左咁多油膩嘅野之後食返d沙律，感覺非常清新。

金華火腿卡邦尼意粉：
平時食嘅卡邦尼一般都係用煙肉，而今日都係第一次食到用金華火腿整成。金華火腿碎份量十足，卡邦尼汁亦都好creamy，忌廉味好香濃，忌廉汁亦都整得好滑，加埋軟硬適中既意粉，真係完美既配搭。

焗紙包蒜香香草白酒蜆意粉：
見到餐牌上有呢味咁特別嘅菜式都忍唔住叫黎試下，上菜時成份意粉係用紙包住架，上檯後侍應先會係你面前打開，賣相相當有型。

用白酒加入蒜蓉同埋蜆焗成嘅意粉，帶淡淡嘅海水味，味道相對清淡，蜆肉不但新鮮而且味道鮮甜，值得一試。

整體黎講呢度嘅食物同服務質素都唔錯，平均每人都唔洗$200，絕對係性價比高。

地址：旺角朗豪坊8樓2-3號舖

openrice link: https://www.openrice.com/zh/hongkong/r-made-in-hk-restaurant-旺角-西式-r585686

Espuma (尖沙咀）

作為Espuma嘅常客，當然有留意佢地嘅facebook 啦。

臨近聖誕，知道佢地推出左聖誕tea set，賣相一流，又點可以唔試下呢？

Tea set主打Christmas fondue，除左可以揀朱古力香檳火鍋之外，仲可以揀濃香烏龍茶火鍋。

等左一陣， Christmas fondue 就上檯啦。以雪人同薑餅人為主題嘅甜品放係圓型嘅轉盤上，後面再加多棵聖誕樹，賣相非常精緻，相當充滿聖誕氣氛。

鹹點：

香煎海鮮薯餅：

薯蓉加入蟹柳絲，經炸過後整成嘅薯餅，賣相呈金黃色，入口外脆內軟。

牛油果雞肉沙律酥盒：

酥皮撻底內加入牛油果蓉，上面再放入溝左忌廉湯嘅雞肉粒整成嘅「牛油果雞肉沙律酥盒」，一切落去後入面嘅忌廉湯同牛油果蓉湧晒出黎，入口鹹鹹地之餘仲食到雞肉粒，好有口感，非常滿足。

巴馬風乾火腿蜜瓜紅菜頭撻：

用紅菜頭製成既威化撻，賣相似威化筒，顏色帶粉紅，入面再放入香甜嘅蜜瓜同埋鹹香嘅巴馬風乾火腿，咬落香脆，入口甜中帶鹹，非常特別。

黑魚子多士：

多士夾住煙燻吞拿魚，面頭加上黑魚子，入口微鹹，帶輕輕黑松露味。

甜點：

朱古力香檳火鍋 ＋鮮雜果：

朱古力火鍋以朱古力同忌廉整成，味道香濃，入口非常幼滑，用黎沾鮮雜果食簡直係人間美食。

值得一讚嘅係店方提供嘅香檳係可以因應需要自由添加，唔喜歡酒又或者有小朋友同行嘅話更加可以選擇唔加添，真係非常細心。

紅莓鬆餅配鮮忌廉及果醬：

鬆餅係西式下午茶中算係不可缺少嘅一樣食物，呢度嘅鬆餅紅莓味十足，帶輕輕嘅牛油味，上檯時仲係暖暖地，配上鮮忌廉同果醬食，真係相當有英式風味。

迷你抹茶泡芙：

濃濃抹茶香嘅泡芙，入口鬆軟，唔會太乾，將佢放入朱古力火鍋後，又係另一番風味。

薑餅人朱古力曲奇及布朗尼：

可能薑餅人加入左可可，所以薑味唔算重，除此之外，布朗尼朱古力味都相當香濃，入口都算軟身。

雪人棉花糖：

士多啤梨夾心棉花糖以雪人為造型，相當可愛，真係唔捨得食呀。

紅絲絨聖誕帽杯子蛋糕：

濕潤嘅士多啤梨蛋榚上加上吉士醬，用黎黏住士多啤梨，整體配搭唔錯，賣相都相當吸引。

飲品方面，除左可以揀附送嘅咖啡或茶之外，仲可以upgrade去最新推出嘅winter drinks。

我地揀左Novell有機花草茶同埋Creme brulee 燒棉花糖焦糖布丁咖啡。

Novell有機花草茶入口香甜，帶輕輕嘅水果味，餐廳仲好細心地用火坐住我哋個茶壺，坐耐啲都唔怕d茶會變凍。

至於Creme brulee 咖啡味香濃，入口有陣陣焦糖布丁嘅味道，入口唔會太甜，加埋面頭粒燒棉花糖，賣相相當吸引。

呢度嘅tea set除左味道唔錯之外，賣相仲非常精緻，喜歡影相嘅朋友真係值得到訪。

地址：尖沙咀厚福街8號H8 2樓

Openrice link: https://www.openrice.com/zh/hongkong/r-espuma-%E5%B0%96%E6%B2%99%E5%92%80-%E5%A4%9A%E5%9C%8B%E8%8F%9C-%E7%94%9C%E5%93%81-%E7%B3%96%E6%B0%B4-r175038

嵐山日本料理 (尖沙咀)

日本菜一向都係我喜愛嘅食物之一，而近年更加對居酒屋有興趣，貪佢環境唔會好嘈，可以同朋友慢慢傾計談心。

位於棉登徑嘅「嵐山日本料理」，由K11行去都只係幾分鐘時間，非常方便，餐廳以居酒屋形式經營，座位有分吧檯同普通座位。由於我地早黎到，所以可以揀坐吧檯，親眼見到師傅切魚生嘅情景。

坐低之後，經理逐一為我哋介紹各式各樣嗁菜式，我地好快就揀到我地想食嘅野啦。

刺身：

刺身方面點了四款，分別係池魚皇腩刺身，鰤魚刺身，赤鯥刺身，同埋伊佐木刺身。

刺身以串燒形式上檯，一串有四款刺身，插係一個放左冰粒嘅玻璃杯入面，賣相相當震撼，令到我地忍唔住「相機食先」。

刺身新鮮肥美，食落爽口，令我地相當有驚喜。

帆立貝壽司+蔥花吞拿魚茸壽司：

壽司飯採用珍珠米，由於廚師已經調配好味道，所以唔使點豉油已經好夠味

帆立貝厚身新鮮，加埋三文魚子，非常配合，至於蔥花吞拿魚茸壽司嘅紫菜亦都非常脆身。

燒芝麻雞翼：

芝麻雞翼即叫即燒，上檯時熱辣辣，雞皮入口脆卜卜，肉質香口嫩滑，仲有豐富既肉汁，可見火喉控制得剛剛好，唔會燒到好乾。

燒茄子：

茄子去皮燒過後入口軟綿綿，上面鋪上木魚碎，口感豐富，味道較為清淡，不過配上醬汁後味道剛剛好，值得一讚。

串燒豆腐：

豆腐加入麵豉醬燒過後味道甜甜地，入口外脆內軟，真係不愧係招牌菜！

黑豚石頭鍋飯:

黑豚石頭鍋飯有流心蛋同豚肉等等嘅配菜，顏色鮮艷，賣相相當吸引，上檯後我地將所有配料撈埋一齊，味道好夾。

總括黎講, 今日嘅晚餐令我地相當滿意，可以一邊同朋友傾計一邊品嚐高質既日本菜，真係以為自己飛左去日本添呀。

openrice link: https://www.openrice.com/zh/hongkong/r-嵐山日本料理-尖沙咀-日本菜-壽司-刺身-r187493

地址：尖沙咀棉登徑11號地舖

八幡屋涮涮鍋 (旺角）

今時今日食火鍋真係變得越黎越多元化，好多餐廳除左有火鍋之外，仲會有其他野食，好似日韓燒烤同埋提供其他日韓小食等等。

「八幡屋涮涮鍋」係香港共有兩間分店，分別係油塘同埋旺角。由於旺角分店位置方便大部分打工仔，今日就同朋友黎左呢間分店啦。

位於旺角瓊華中心嘅「八幡屋涮涮鍋」，除左有日式小食，刺身，燒物同埋壽司之外，仲有火鍋添。

同好多日式火鍋店一樣，呢度嘅收費係根據你地食咩質素嘅牛肉而定，由於同行朋友好鍾意食和牛, 我地就揀左價錢親民嘅「特選美國牛肉」餐，每位$228 加一嘅價錢，除左可以食到特選美國牛肉，美國進口牛肉，美國豚肩肉同各式各樣嘅火鍋配料之外，仲可以品嚐刺身，天婦羅，爐端燒，甜品同埋飲品添。

餐廳下單方式非常先進，客人可以用自己手機APPS落單，方便快捷。

湯底選擇非常多，我地今日揀嘅係海膽龍蝦湯底，每位要另加＄30。

火鍋個鍋好淺，所以個湯好快就滾， 加入左附上嘅龍蝦同埋海膽之後真係散發出陣陣香味，令到我地忍唔住試左一啖，味道真係非常香濃架。

火鍋配料選擇都算多，海鮮方面有生蠔，海蝦，墨魚滑，帆立貝，蟶子等等。海鮮好新鮮，以今日嘅價錢黎講算係性價比高。

肉方面，除左有一般牛肉同豬肉之外，仲有鮮雞片，午餐肉，醉雞，芝士腸，魚皮餃，蟹棒，豬皮等等。

今日食到嘅牛肉豬肉都算有驚喜，肉類切得薄身，肥膏偏少，色澤都唔錯，切得薄薄地嘅佢地，煮一煮就食得，入口一D都唔靭，仲好有咬口添。

蔬菜方面，有粟米，豆腐，菇，響鈴等等。吸收左香濃嘅湯後真係格外好味。

刺身選擇都好多，三文魚，劍魚腩，赤貝，甜蝦，希靈魚，吞拿魚，八爪魚等等。全部都好新鮮，無咩雪藏味。

小食方面有各式各樣嘅天婦羅，日式餃子，雞翼，雞肉串，沙律等等。天婦羅即叫即炸，炸得香脆，入口唔太油，值得一試！

燒物賣相相當吸引，雞翼同雞肉串都整得好入味。燒蝦鹹香度適中，口感唔錯。

除左食物之外, 呢度嘅飲品都係任飲架。有甜有唔甜，有汽無汽嘅都有，怕肥嘅女仔都唔洗怕無野啱飲啦。

食完咁多美食之後，仲有甜品添。好似啫喱，布甸，雪糕，蛋糕等等。連加一每人＄284，食到咁多高質食物，款式又多，都算唔錯架啦。

Openrice link: https://www.openrice.com/zh/hongkong/r-八幡屋涮涮鍋-旺角-日本菜-日式放題-r472499

地址：旺角彌敦道628號瓊華中心12樓全層