位於尖沙咀海港城嘅「Blue Elephant 藍象餐廳」，屬曼谷米芝蓮三星餐廳，分店遍佈世界各地，亦被選為「曼谷50家最頂級餐廳之一」，創辦女廚更有皇家御廚之稱，泰皇都撑。
餐廳鋪面走低調路線，唔係咁容易搵到。內裡環境以深藍色為主調，裝潢充滿心思，既有古典亦有現代風格，幸運的話更加可被安排窗口位置，望到無際嘅維港，若果夜晚黎嘅話應該會幾浪漫。
一向喜歡食小食同沙律多過澱粉質嘅我，半自助餐就最適合我啦。「藍象」最近係星期六日推出半自助午餐，任食頭盤同甜品，價錢方面就會因應客人揀邊個主菜，價錢由$188至$288 不等，另外再包一杯飲品。
頭盤雖然選擇唔多，但係勝在賣相精緻，有兩款泰式沙律，分別係金柚芒果沙律伴蝦乾甜梅子汁同埋泰國青木瓜蝦乾沙律，湯有泰式椰子雞湯，除此之外仲有春卷、蝦餅、魚餅、炸雞球、餃子、馬可慢煮花生軟糖配菠蘿等等嘅小食。
當中必食嘅食物當然唔少得「馬可慢煮花生軟糖配菠蘿
」，餐廳用左泰國皇室菜特色小食「馬可」，加入香軟嘅花生軟糖再搭上菠蘿，做法相當特別，酸酸甜甜嘅感覺真係相當開胃。
泰式餃子造型特別，成隻雀仔咁放係雀籠裡面，餡料方面用到雞肉同蝦肉做，比例剛剛好，外皮亦唔會太厚，配上少少冬蔭公汁，集合鹹甜酸辣，夠晒惹味。
泰式沙律辣度適中，入口酸酸地，非常開胃。
蝦餅亦都好大件，皮薄之餘仲帶輕輕香茅香味，入口更係爽口彈牙，配上甜酸汁，味道唔錯。
比利時炸蝦熱辣辣，炸粉夠薄之餘咬落去啖啖蝦肉，值得一讚。
椰子雞湯一路都有滾住，入口時仲熱辣辣，質地比較杰身，味道濃郁，雞肉嫩滑，整體黎講算唔錯。
主菜有多達八款選擇，有飯、意粉、肉眼扒同油鬆餅不等，個人認為較為特別嘅係泰式青胡椒鴨肉配泰國有機黑米同埋扒珍寶河蝦配油鬆餅。
泰式青胡椒鴨肉配泰國有機黑米：
加入青胡椒鴨烹調後嘅鴨肉入口帶微辣，配埋煙韌嘅黑米，好有口感，不論賣相同味道都非常特別！
扒珍寶河蝦配油鬆餅：
喜歡食海鮮嘅話，呢個主菜真係非試不可。珍寶河蝦有手臂咁大，啖啖肉，配油鬆餅食嘅話比起飯無咁飽，唔洗驚食唔落出面自助吧嘅任食小食同埋甜品。
甜品方面有芒果糯米飯、薑味布朗尼、班蘭撻、泰式甜品拼盤、榴槤撻、泡芙同埋水果拼盤等等。
芒果糯米飯以白糯米整成，賣相誘人，糯米飯軟熟帶微溫，配上椰漿同芒果，味道相當豐富，有嚼口，甜度剛剛好。
斑蘭撻鬆脆可口，奶味重，味道唔太甜，入口時散發清新獨特嘅班蘭香味。
是日人均消費＄250，以餐廳環境，服務同食物黎講都算唔錯。既然我咁喜歡佢地嘅小食，相信下次可以試下佢地嘅下午茶啦。
地址：尖沙咀廣東道3-27號海港城港威商場3樓3303號舖
