Espuma (中環)

最近經常係網上見朋友post Espuma嘅冬日Cotton Candy Fondue tea set，無論賣相同材料都非常吸引，今日趁係假日，一於同朋友一齊試下。

朋友需要買新電話，所以我哋揀咗位於中環嘅分店。

一個tea set盛惠＄248，兩位用，有甜點、鹹點同埋飲品兩杯。如果喜歡的話，仲可以加錢upgrade杯飲品添。

先講火鍋湯底，平時朱古力火鍋我就食得多，用其他材料來做甜品湯底都係第一次試。呢度有伯爵茶或紫米露揀，十分喜愛紫米露嘅我，當然揀紫米露啦。

紫米露材料豐富，入口非常香濃，好好味，上面仲插住支棉花糖，隨著火鍋嘅熱力會慢慢熔，好似落雨咁，好可愛架。

我地先食鹹點：

炸雞格仔餅 :
厚身嘅格仔餅配上炸雞，入口鹹鹹甜甜，非常特別，如果可以大件d嘅話咁就好喇。

迷你炸魚薯條筒 :
做法具有創意，迷你雪糕筒內加入炸魚同薯條，配上黑松露沙律醬，入口香脆可口，味道非常夾。

八爪魚鮮芒莎莎 :
沙律菜加入芒果、八爪魚同沙律汁，再自己加入迷你炸魚薯條筒剩下嘅黑松露醬，入口酸酸地，味道清新，非常醒胃。

忌廉粟米肉碎脆卷 :
外面香脆嘅taco，配上香滑嘅忌廉粟米肉碎，配搭近乎完美。

牛油鬆餅配鮮忌廉及果醬 :
Scones係西式甜品中算係不可缺少嘅一樣食物，帶輕輕牛油味嘅鬆餅，配上鮮忌廉同果醬，充滿英式風味。

香脆窩夫 :
整得火喉剛剛好，點埋紫米露食就更加好味。

馬卡龍波板糖 :
平時馬卡龍就食得多，用波板糖形式上就第一次試，賣相真係好精緻，甜度亦都唔會過重，入口非常鬆化。

其他配料仲有三色粉團（香芋、甜薯、紫薯）同埋自家製藍白雲棉花糖，由於本身甜味就已經好夠，所以唔需要點紫米露就已經好好味。

鮮雜果 :
好戲永遠都在後頭，新鮮嘅雜果放入熱辣辣嘅紫米露裏面，味道非常特別，有別於一般嘅朱古力火鍋。

冬日飲品 :
我哋叫左蜂蜜梅子蘋果茶同埋泰式胡椒鮮奶咖啡。

蜂蜜梅子蘋果茶充滿水果味，入口香甜，帶輕輕嘅茶味，餐廳仲好細心地用火坐住我哋個茶壺，坐耐啲都唔怕d茶會變凍。

泰式胡椒鮮奶咖啡入口有香香嘅胡椒味，咖啡味相對較淡，味道新穎。

兩個人坐左成個下午，食咗咁多野，又嘆茶又嘆咖啡，每人都係＄150左右，真係可以消除一周嘅疲勞呀。

openrice link: https://www.openrice.com/zh/hongkong/r-espuma-%E4%B8%AD%E7%92%B0-%E5%A4%9A%E5%9C%8B%E8%8F%9C-%E7%94%9C%E5%93%81-%E7%B3%96%E6%B0%B4-r431970

地址: 中環威靈頓街2-8號威靈頓廣場M88 17樓

Bingo & Cook (銅鑼灣)

一向都喜歡食韓國菜嘅我，每個月至少會食兩次，自從上年黎過Bingo & Cook之後就對呢間餐廳念念不忘，貪佢食物質素高之餘仲好好坐，好適合朋友聚會。

位於銅鑼灣嘅Bingo & Cook，由地鐵站行去只需要幾分鐘，非常方便，傍晚七點鐘左右到，都仲未需要等位。

餐廳大部分都係韓國人，不過佢地d英文都好好，溝通絕對無問題。

由於已經黎過好幾次，加上一向都有最喜愛嘅韓式食品，真係唔多駛點睇餐牌就點到菜啦。

部隊鍋 :
自己都唔明白部隊鍋嘅吸引力何在，不竟佢都只不過係一個巨型公仔麵，但幾乎每次食韓國菜都要叫佢黎食。

呢度嘅部隊鍋真係好大煲，係客人面前以明火煮熟，煮熟後嘅鍋，顏色非常鮮艷，湯帶微辣，裡面有拉麵、年糕、腸仔、午餐肉同埋菜等等嘅配料，食材吸晒泡菜湯嘅精華後，味道酸酸辣辣，真係好好味呀，喜歡食辣嘅朋友，可以等個鍋收晒水後先食個拉麵，咁樣個麵嘅味道會更加濃，更加好味。

韓式炸雞甜辣醬全份 :
韓式炸雞可以揀全份或者係半份，亦都可以揀跟醬油、甜辣醬又或者係原味，每款都會跟粟米、新薯、柚子汁沙律同埋四種醬汁。呢四種醬汁分別係蜜糖芥末、辣醬、白沙拉醬同埋韓式醬油。

雖然話就話炸雞係好熱氣，但係配埋個甜辣醬，入口一d都唔乾身，醬汁酸酸地，帶微辣，食落都好開胃。

泡菜餅 :
泡菜餅上面舖左幾條炸魷魚，入口好香，魷魚味亦都幾濃。餅身表面煎得金黃香脆，尤其係條邊位置，放得耐都唔會變淋。至於餅身，內層柔軟，泡菜味適中，餡料豐富，入口酸酸辣辣。雖然本身配埋甜辣醬，但個人認為唔沾醬已經好夠味架喇。

三個人叫咗三樣嘢share食，平均每人都係$150左右，坐到成兩個鐘，店員仲不停為我地添水，服務周到，咁嘅價錢，算係幾超值。

openrice link: https://www.openrice.com/zh/hongkong/r-bingo-cook-%E9%8A%85%E9%91%BC%E7%81%A3-%E9%9F%93%E5%9C%8B%E8%8F%9C-%E9%9F%93%E5%BC%8F%E7%82%B8%E9%9B%9E-r465359

地址: 銅鑼灣駱克道487-489號駱克駅2樓

川府宴 (銅鑼灣)

鍾意食辣嘢嘅我成日四周圍搵各式各樣嘅川菜食，最近係開飯網搵到呢間開咗無耐嘅「川府宴」，除咗可以食小菜之外，仲有火鍋食添。不過我地因為怕熱氣嘅關係，所以都係選擇咗叫小菜。

餐廳位於銅鑼灣登龍街，地點相當方便，傍晚七點半左右到，都未要等位住，不過坐多陣就開始多人啦。

店舖裝修非常新淨，簡約舒適，燈光柔和，都幾有情調。

小菜嘅選擇都好多，有辣有唔辣嘅，適合唔同口味嘅朋友。

原盅足料燉湯 :
是日燉湯係藥膳湯，個湯好清，幾乎一滴油都無，而且真係好足料，值得一讚。

紅油抄手 :
紅油辣味唔重，雲吞餡料夠多，個皮仲好滑，入口好有鮮味，配埋四川辣油同芫茜等配料，真係無得頂呀。

大大粒辣子雞 :
辣子雞一上檯時已經好香，碟上佈滿辣椒，顏色相當吸引。雞丁炸得香脆得黎入口仲好juicy，味道辣中帶點麻，一粒一粒食真係會食到停唔到口，用黎送酒食都係唔錯嘅配搭。

麻婆豆腐 :
麻婆豆腐雖然唔辣，但係味道非常醒胃，最吸引嘅係d豆腐非常滑，用黎撈飯食就最好不過啦。

水煮石班魚 :
超級鍾意食水煮魚嘅我，難得食川菜又點可以唔叫呢？

水煮石班魚上菜時散發出陣陣麻香味，見到成煲辣椒都已經流哂口水。石班魚入口超滑，肉質鮮嫩，亦唔多骨，配料方面亦都有青瓜、菜同埋寬薯粉係底，寬薯粉口感煙靭又彈牙，亦都好滑，吸收晒d辣味，入口酸酸麻麻，真係食得超過癮。

擔擔麵 :
呢度嘅擔擔麵同出面有d唔同，呢度嘅係撈麵而唔係放湯，呢個食法都係第一次試。撈左肉碎同麻醬後嘅麵，入口彈牙，味道都幾濃郁。

紅糖冰粉 :
紅糖冰粉都係傳統四川甜品之一。冰粉加入咗用紅糖做嘅糖水之後，可以清清口裡嘅味，食完辣嘢食返碗真係好舒服。

總括黎講呢度嘅食物相當正宗，亦都可以揀唔同嘅辣度，適合唔同口味嘅朋友，睇得出係一間好用心經營既餐廳，如果想試多d唔同嘅菜式，真係要叫多d人黎一齊食呀。

openrice link: https://www.openrice.com/zh/hongkong/r-%E5%B7%9D%E5%BA%9C%E5%AE%B4-%E9%8A%85%E9%91%BC%E7%81%A3-%E5%B7%9D%E8%8F%9C-%E5%9B%9B%E5%B7%9D-%E7%81%AB%E9%8D%8B-r554271

地址: 銅鑼灣登龍街28號永光中心25樓

LAVA Bar & Restaurant (太子)

其實早幾年前我對西班牙菜一d都唔熟悉，不過自從一個公司飯局之後，我就四處搜尋各類型嘅西班牙菜餐廳，而最近我亦愛上咗酒吧類型嘅。

位於太子嘅LAVA Bar & Restaurant，正正係旺角警署對面，由地鐵站行過去都相當方便。

餐廳燈光較暗，同時間都比較開揚，頗有情調，絕對係同朋友情人傾計飲嘢嘅好地方。

食西班牙菜叫d餐前小食相信係常識吧，我地一行兩人，叫咗一份主菜同兩份小食。

西班牙式香蒜虎蝦 :
第一份小食我地叫咗「西班牙式香蒜虎蝦」。虎蝦加咗少少辣汁同香蒜，非常惹味，賣相唔單止大隻，而且肉質夠爽口彈牙添。除此之外，碟旁仲加左一d又黃又綠嘅顏色襯托住碟虎蝦，店員話呢d係加入左海藻分子精華嘅青檸汁同檸檬汁，可以用黎點蝦食嘅。

LAVA手工包，自製日式叉燒，千層腐皮 :
講明係LAVA手工包，唔駛問都知係呢度嘅招牌菜啦，咁我地又點可以唔試下呢？

手工包口感有啲似饅頭，唔同嘅係佢比較薄身，咬落夠鬆軟，味道甜甜地，加埋日式叉燒，脆得黎又唔油嘅千層腐皮同埋醬汁後，咬落去有多重口感，真係令人難忘。

西班牙海鮮飯加半隻龍蝦 :
食西班牙菜又點少得食西班牙海鮮飯呀。加入咗各式各樣海鮮同辣肉腸炒成嘅飯，上檯時香氣十足，意大利飯吸晒海鮮湯同茄汁濃郁既味道同精華後，賣相呈黃色，非常吸引，入口軟綿綿，軟硬適中，令人越食越開胃。海鮮除咗有虎蝦、八爪魚同蜆之外，仲混入咗半隻龍蝦嘅肉添，非常新鮮，入口鮮甜，最值得一讚嘅係虎蝦去了殼，淨係剩返蝦尾，方便客人進食，真係感謝店方咁貼心。

總括黎講呢度嘅食物相當正宗，服務唔錯，地點都幾就腳，絕對係適合同朋友們聚舊嘅地方。

openrice link: https://www.openrice.com/zh/hongkong/r-lava-bar-restaurant-%E5%A4%AA%E5%AD%90-%E8%A5%BF%E7%8F%AD%E7%89%99%E8%8F%9C-r486483

地址: 太子通菜街236號地舖

北海道爐端燒 (尖沙咀)

是日同朋友們去太空館睇戲，睇完之後剛好係晚飯時候，就一齊食飯啦。

我地大家都想食日本嘢，同行朋友就介紹呢間位於亞士厘道嘅「北海道爐端燒」，一間來自大阪難波嘅日本料理餐廳。

餐廳地點旺中帶靜，人流唔算多，可能我地到達嘅時間尚早，只係六點鬆d，仲未滿座，唔駛等位。

我地一行三人，叫咗一個飯、一個麵同埋三個小食share食。

明太子雞蛋卷 : 

日式雞蛋卷平時真係唔多機會試，呢份明太子份量十足嘅雞蛋卷由多層加入左上湯嘅蛋皮捲成，外表呈淺黃色，蛋皮層次分明，熟嘅程度剛剛好，所以口感軟綿綿，水份十足。

煎餃子 : 

餃子皮軟硬適中仲好彈牙，餃子煎到金黄色，外脆內軟，肉汁豐富，配埋微辣嘅餃子汁食，味道真係唔錯。

炸日本生蠔 : 

炸廣島蠔一向都係我嘅最愛，呢度嘅蠔即叫即炸，1份有5件，蠔身都算大隻，炸粉又唔算太厚，炸起上黎熱辣辣又多汁，吉列層好脆好好味，係呢個價錢黎講真係算幾抵食。

三文魚及三文魚籽飯 : 

三文魚非常新鮮，可能因為係腩嘅部位，所以油脂比較豐富，至於三文魚籽，佢嘅份量唔單止多而且粒粒色澤鮮明，入口卜卜聲，配埋蛋絲、酸薑同埋壽司飯一齊食，味道好夾。

地獄拉麵 : 

呢個地獄拉麵湯底相信係加左辣味嘅豬骨湯，辣味稍為輕，完全無蓋過豬骨湯嘅鮮香味，配料除左有紫菜之外，仲有厚身嘅日式叉燒同埋好流心嘅溏心蛋添。 

埋單每人都係$150到，價錢比起放題平，食物質素高d又坐得舒服d，更加唔駛為咗抵食而食到捧住個肚出門口咁辛苦，真係唔錯呢。

openrice link: https://www.openrice.com/zh/hongkong/r-%E5%8C%97%E6%B5%B7%E9%81%93%E7%88%90%E7%AB%AF%E7%87%92-%E5%B0%96%E6%B2%99%E5%92%80-%E6%97%A5%E6%9C%AC%E8%8F%9C-%E7%88%90%E7%AB%AF%E7%87%92-r535769

地址 : 尖沙咀亞士厘道27號捷利商業大廈3樓

Co-Dining Space(尖沙咀)

新一年當然有新嘅目標啦，今年嘅目標係繼續食好嘢。

最近喺網上見到呢間位於尖沙咀樓上舖嘅餐廳，有一味招牌黑松露菌麵包蟹蓋意大利飯，賣相非常吸引，所以打算放假時同朋友一齊嚟試吓。

餐廳地方唔算大，有30個位左右，除咗有梳化位之外，仲可以揀坐吧檯添，闊落嘅座位加埋餐廳嘅佈置，帶俾人好舒適嘅感覺。

我哋一行兩人，叫咗一個小食同埋兩個主菜。

白酒忌廉煮青口 :

青口份量都算幾多，而且全部都開晒殻，非常新鮮。

用白酒加入忌廉同蒜頭做湯底黎整，酒味剛剛好，亦唔會太鹹。

招牌黑松露菌麵包蟹蓋意大利飯 :

期待已久嘅佢終於上檯喇。呢味菜造型非常特別，因為意大利飯係用麵包蟹蓋盛載，下面以大量海鹽墊底做裝飾，只係賣相已經贏晒。

意大利飯有咬口，蟹肉鮮甜，上枱時熱辣辣，加埋香菇同埋黑松露香味，令人一啖一啖食過不停。

原隻美式燒春雞配燒汁 :

春雞燒得剛剛好，肉質香嫩幼滑，入口非常juicy，配埋燒汁食，非常惹味。

伴碟嘅除咗有沙律之外，仲有蔬菜同埋薯蓉。最值得一讚嘅係薯蓉整得非常幼滑得黎牛油味一啲都唔重，好好味。不過如果薯蓉同蔬菜可以放喺碟旁而唔係春雞下面，整體賣相會更加好。

呢度環境同食物都唔錯，絕對係假日同朋友食飯傾計嘅好地方。

openrice link: https://www.openrice.com/zh/hongkong/r-co-dining-space-%E5%B0%96%E6%B2%99%E5%92%80-%E8%A5%BF%E5%BC%8F-all-day-breakfast-r538154

地址: 尖沙咀廣東道82-84號流尚坊11樓