西塘花記 (灣仔）

近年好多大陸食店登陸香港，繼「喜茶」之外，「西塘花記」係另一間。

「西塘花記」位於銅鑼灣同灣仔交界，鋪面裝修同出品都跟大陸店一樣，主打七彩手工餃皮，店家仲承諾餃皮100%以天然蔬菜汁製作，不加任何色素，大陸官網更聲言「如有不實，賠償十萬」。

講到咁，我又點可以唔試下呢?

招牌五福水餃（10隻）:
五福水餃分別係剁椒魚水餃，蕃茄牛肉餃，冬菇豬肉餃，海三鮮水餃同翡翠三鮮水餃。

剁椒魚水餃:
剁椒魚用左秘製辣椒醬，入面有一粒粒辣椒，食落辣辣地，魚肉鮮甜彈牙，味道相當特別，鍾意食辣嘅朋友們應該會鍾意。

蕃茄牛肉餃:
紅色嘅水餃皮係來自火龍果，雖然果味唔係太出，但係蕃茄味相當香濃，牛肉咬落去亦都好多汁。

冬菇豬肉餃:
黃色皮用南瓜汁做，冬菇豬肉食落幾多汁，咬落非常爽口。

海三鮮水餃:
海三鮮水餃味道有D似龍蝦丸，入面有蟹肉，元貝同蝦仁，鮮味好突出。

翡翠三鮮水餃:
翡翠三鮮水餃咬開後見到入面除左有韭菜粒之外，仲有少少金黃色嘅雞蛋同埋蝦仁，聞落好香，食落仲非常爽口添。

每份餃子仲配自家製蒜蓉辣汁，入口有少少芥末味，不過個人認為唔點醬汁會較好味，因為咁先食到餃子原有嘅味道嗎。

一份餃子仲會包紅棗雪耳燉雞湯，入口陣陣紅棗味，味道相當清甜，無咩味精，幾好飲。

泡菜豬肉煎餃（辣）（6隻）:
泡菜豬肉煎餃整得得好脆乾身，唔會太油，餃皮算薄，餡料夠多，泡菜辣度適中，好香。

雞絲拌粉皮 :
碟底舖上白色嘅粉皮，上面再放上雞絲，青瓜同埋花生碎，配埋酸辣醬汁，食落有層次，好有口感，非常惹味！

口水雞（辣）:
雞嘅份量都算多，都有成四分一隻雞，雞肉嫩滑，辣汁亦都相當惹味，雞肉吸收晒秘製麻辣醬汁後，聞落好香，入口又麻又辣，非常好味，令人一件接一件咁食。

紅油豬耳（辣）:
切至幼身嘅豬耳，入口非常爽，麻辣並重，食落好刺激，口感同味道都非常豐富。

豆漿:
自家製豆漿點同工廠製嘅比呀? 呢度嘅豆漿味道唔會好甜，豆味重，係我喜歡嘅味度。

呢度無論餃子抑或小食味道都非常出色，埋單每人都係100蚊多D，咁嘅價錢，都算係性價比高。

Openrice link: https://www.openrice.com/zh/hongkong/r-西塘花記-灣仔-粵菜-廣東-雲吞-餃子-r612781 

地址：灣仔天樂里3-5A號僑康大廈地下C號舖

亞蘇爾 (沙田）

自從港珠澳大橋開通後，都未有機會過澳門，距離上一次去澳門都有一段時間，都對嗰度食到嘅葡國菜念念不忘。「亞蘇爾」喺沙田都開咗一段時間，今日終於可以試下啦。

兩個人食飯想試多啲嘢，但係又唔想太飽，所以都係叫咗一個主菜，兩個小食，同埋一個甜品。

椰香葡國雞配飯或蒜蓉包:
加左椰汁同椰絲整成嘅葡國雞真係份外香，配料除左有雞肉之外仲有薯仔，車厘茄同埋辣肉腸，份量亦都好多，伴碟可以揀跟蒜茸包或飯，唔想食得太飽嘅我哋揀咗要蒜蓉包，咁樣嘅話仲可以用剩餘嘅葡汁點包食、簡直一流呀。

葡式辣肉腸炒雜菜：
雜菜炒煮時火喉剛剛好，軟硬適中，加入葡式辣肉腸乾炒，鹹味恰到好處，食落好有口感。

葡式香蒜蕃茄芫荽煮海蜆：
呢個煮蜆真係非常好味，蜆肉大隻飽滿，D殼煮起後全部都開晒，好新鮮，用香蒜、蕃茄同芫荽煮過後，入口酸酸甜甜，非常開胃。

經典木糠布甸：
食葡國菜又點少得食木糠布甸做甜品呢？木糠布甸做法雖然簡單，但係要整得靚，真係好考功夫。

煉奶加過忌廉打成後，再一層餅碎，一層忌廉放入杯內，賣相非常精緻，加埋餅乾條同埋士多啤梨作裝飾後，真係非常吸引，亦都為我哋嘅晚餐畫上完美句號。

Openrice link: https://www.openrice.com/zh/hongkong/r-亞蘇爾-沙田-葡國菜-r570121

地址：沙田沙田正街18號新城市廣場1期1樓107號舖

The Salted Pig (沙田)

好朋友剛剛生左BB，今日相約好友探完佢之後就黎到新城市廣場搵野食啦。

The Salted Pig係新城市廣場都開左一段時間，但係都未曾試過，今日趁人多，就一於黎試下啦。

我地一行四人，叫左兩個主菜，兩個小食同一個甜品share食。

香脆豬肋骨：

豬肋骨炸過後呈金黃色，入口帶輕輕嘅蒜香味，既juicy又有口感，食落相當香脆，點埋伴碟嘅maple dip，非常開胃，算係一味幾好嘅小食。

太平洋蟹餅、青瓜粒、青檸蒜香蛋黃醬：

蟹餅即叫即炸，上檯時熱辣辣，蟹肉加入青瓜粒炸成嘅蟹餅，蟹味香濃，入口鬆脆，配埋青檸蒜香蛋黃醬食真係完美嘅配搭。

烤比目魚柳、藏紅花燉飯:

無骨嘅比目魚柳烤過後表面相當香脆，食落啖啖肉，魚下面鋪左用藏紅花，紅椒，脆玉瓜，青豆同粟米燉成嘅飯，成落較腍，有少少似Risotto，相當好味。

招牌德國鹹豬手 （1公斤，2人份量）：

呢度嘅德國鹹豬手係招牌菜，又點可以唔試下呢？ 二人份量嘅豬手有成一公斤重，餐廳真係知我地年青人心意，首先係攞左原隻未切嘅豬手俾我地影相，影完之後再拎入廚房切完之後再次上菜，等我地可以放係社交網站俾朋友們「讚好」。

係餐牌上見到，呢度嘅豬手係經過三日三夜鹽水沉漬、低溫慢煮以及高溫油炸嘅千錘百煉，才能成為外皮金黃酥脆、內裏今腴豐香，鶴立「豬」群嘅招牌鹹豬手。

招牌菜果然真係無得頂，豬皮燒得好香脆肉嫩，香滑得黎又唔太油膩，顏色呈嫩紅，配埋芥末食，味道相當吸引。配菜嘅酸菜入口非常清新，令整體油膩感減低。除此之外，用烤薯同紅蘿蔔伴碟亦都令整體顏色更加鮮豔吸引。

香蕉雪糕新地：

食完咁多濃味嘅野，點都想食少少甜野中和下。見到隔離檯個小朋友係到食雪榚新地，真係有點兒妒忌，忍唔住叫一個黎大家share食。

一杯新地好大杯，食完飯後一個人無可能食到一整杯。新地內有香蕉，窩夫，棉花糖，朱古力同埋雲尼拿雪榚，整體配搭無論賣相抑或味道都相當吸引。

呢度食物款式多，味道好，雖然份量比較多，但係如果約埋三五知己黎，一齊share 各式各樣嘅小食，主菜同甜品，坐足全晚聚舊傾計，相信係一個唔錯嘅地方。

openrice link: https://www.openrice.com/zh/hongkong/r-the-salted-pig-沙田-西式-r578455

地址：沙田沙田正街18號新城市廣場一期7樓702號舖

泰妹餐廳（黃埔）

是日同男朋友同另一對情侶double date，揀咗呢間位於黃埔嘅泰國餐館，早前朋友試過佢哋位於觀塘嘅分店，覺得非常好味，就介紹我哋嚟呢度食啦。

一行四人，可以叫各式各樣嘅嘢食，部份仲令我哋回味無窮。

冬蔭海鮮湯（大）：
食泰國嘢又點少得飲冬蔭公湯呢？鍾意食辣野既我，冬蔭公係我去到泰式餐廳必叫既菜式之一。

呢度嘅冬蔭公有兩個size，我地四個人叫左個大嘅，一客大約有六碗左右，以明爐送上，有明火保持溫度，只係賣相已經非常震撼。

呈橙紅色嘅冬蔭公湯，上菜時熱辣辣，香料十足，仲散發出陣陣香味，配料方面亦都好足，有菇、蕃茄同蝦等等，入口又酸又辣，好開胃。

泰式燒烤拼盤：
燒烤拼盤有雞肉、豬肉同埋牛肉，肉類醃過後再去燒，非常入味。除此之外，每件都切到細細粒，一啖一件，非常方便。點埋沙嗲汁食，味道更吸引。

原隻菠蘿海鮮炒飯：
呢個菠蘿炒飯，只係賣相已經非常吸引，真係令我忍唔住「相機食先」。

加入左蟹柳，蝦，青口同魷魚炒嘅菠蘿炒飯，配料都算多，D蝦都好大隻，上菜時散發出陣陣香味，味道亦都唔錯，份量亦好足，值得一讚。

紅咖喱豬頸肉：
加左椰汁整成嘅咖喱真係份外香，入口唔會太辣，配料有爽口嘅豬頸肉，蔬菜同菠蘿，份量剛剛好。如果配埋蒜蓉包食嘅話，就真係完美嘅配搭啦。

埋單每人都唔使$200 ，可以坐成兩個鐘，食物好味，服務又唔錯，都算係性價比高。

Openrice link: https://www.openrice.com/zh/hongkong/r-泰妹餐廳-紅磡-泰國菜-r610268

地址：紅磡黃埔天地時尚坊(第二期)地下6B號舖

鮨玥 (西灣河)

西灣河海傍果頭都有好多美食，除左對住海景果d餐廳之外，其實再行過少少都有好多特別嘅餐廳，而今日機緣巧合試到嘅就係「鮨玥」啦。

餐廳面積唔大，座位有分卡位，普通座位同埋吧檯。坐吧檯可以睇住師傅為我地預備食物，又點可以錯過呢？

兩個女仔食唔得多，又唔係太肚餓，所以都係叫左一份定食，一份壽司同埋一d小食share。

溫泉玉子吉列三元豚丼:

吉列豬扒份量算多，一大塊可以切開六舊，炸得香脆，咬落去外皮半硬半軟，肉質又鬆化又有口感。溫泉玉子同飯撈埋之後食好易入口，完全係天衣無縫嘅配合，令人一口一口咁食過不停。

呢個定食除左有頗重海帶味嘅麵豉湯之外，仲有加左麻醬嘅沙律，非常豐富。

本鮪壽司盛 ：

本鮪壽司盛有三款吞拿魚，每款有2件。三款吞拿魚分別係赤身吞拿魚，中吞拿魚同埋大吞拿魚，唔同就在於各者嘅脂肪比例。每件魚生都厚實油潤，好有質感。

中華沙律+味付螺肉:

自己一向都好喜歡食日式前菜，所以黎到都想試下。中華沙律食落好爽，非常開胃。螺肉方面帶微辣，味度唔錯。

呢度食物雖然唔平，但係服務同埋食物質素都非常之高，間唔中黎食下，都算係一種享受。

Openrice link: https://www.openrice.com/zh/hongkong/r-鮨玥-西灣河-日本菜-烏冬-r591282

地址：西灣河鯉景灣蘇豪東A期太康街55號地下GA10B號舖