忠記咖啡屋－私房菜 (銅鑼灣）

近年私房菜係香港越黎越流行，無論日本菜，韓國菜，中菜都可以有私房菜。

是日屋企有老人家生日，我地打算帶佢去食私房菜慶祝。

私房菜嘅好處係自己定budget，想食咩就食咩，唔需要擔心套餐上有咩唔啱食。

是日我地試左各式各樣嘅菜式，由小食，小菜，到甜品不等。

江南五小碟：
江南五小碟賣相真係好吸引，五款小食分別放係五個唔同嘅小碗裡面。

五款小食分別有蒜蓉牛脷，大豆芽，雞軟骨，車厘茄同埋鴨舌。

車厘茄配上和風芥末汁，入口有微微嘅wasabi 味，味道清新，好開胃。

鴨舌食落有好香花雕杞子香味，入口爽口彈牙，味道唔錯。

炸雞軟骨炸粉唔會過厚，食落唔油膩，入口脆卜卜，令人一口一口咁食過不停。

金杯美酒配和風芥末汁海膽桶蠔：
桶蠔每隻大約好似手掌咁大，非常新鮮，肉質creamy肥美，加入和風芥末汁後味道非常清新，配埋蘋果酒真係完美配搭。

北海道帶子和風汁稻庭烏冬：
大大粒又厚肉嘅北海道帶子加入青瓜絲，蟹柳絲，爽滑彈牙嘅稻庭烏冬同埋和風汁後，味道酸酸地，帶輕輕嘅辣味，感覺清新醒胃。

至尊佛跳牆：
鮑魚，翅，花膠，冬菇，螺頭，瘦肉同雞肉等等嘅食材煲過後， 味道非常出，入口鮮甜，無咩味精，感覺相當健康。

鐵板茄汁大虎蝦：
呢味菜真係非常之有驚喜，大大隻虎蝦用鐵板上，感覺非常之有新意。上檯後店員再將茄汁倒入鐵板，吱吱聲嘅感覺真係非常過癮。

蝦肉爽口彈牙，蝦頭帶蝦膏，配埋香濃得黎又唔酸嘅茄汁，整體配搭真係令人回味。

口水雞：
口水雞辣味適中，雞肉好嫩，聞落好香，最重要係無骨架，令人一件接一件咁食。

生磨蛋白杏仁茶湯圓：
杏仁味濃，入口好滑，唔會太甜，加入埋我最喜愛嘅湯丸後，真係非常滋潤養顏，好好味。

你的鮮果樂園：
呢個生果拼盤真係好靚，睇得出廚師真係好用心為我地預備，所以都令到我地忍唔住「相機食先」。

Openrice link: https://www.openrice.com/zh/hongkong/r-忠記咖啡屋-私房菜-銅鑼灣-港式-r546099

地址：銅鑼灣渣甸街50號渣甸中心1樓

本佐日本燒肉料理 (尖沙咀）

近日天氣漸涼，又係燒烤同打邊爐嘅季節，碰啱今日朋友聚會，就提議食日式燒肉啦。

「本佐日本燒肉料理」位於尖沙咀赫德道，近日先至開張，喜歡試新野嘅我當然想去試下啦。

晚飯時段每位$298,包刺身拼盤，海鮮頭盤同埋燒肉拼盤。之後可以無限量叫指定燒物，蔬菜，小食，沙律，炸物等等。

餐廳嘅通風系統做得都幾好，入到去唔會話好大煙咁，間格方面都唔錯，令客人有一定程度嘅私隱。

坐低後，店員就好快送上刺身拼盤，海鮮頭盤同埋燒肉拼盤。

刺身拼盤：

魚生都算新鮮，有玉子、甜蝦、赤蝦、八爪魚、海膽、北寄貝、三文魚、蟹棒同埋帶子。咁多種類入面，甜蝦同三文魚最鮮甜，賣相亦都好靚，顏色鮮艷，三文魚切得好厚，甜蝦都啖啖肉，蟹棒亦都好爽口，完全唔似係平野，非常滿足。

海鮮頭盤：

海鮮頭盤最出色嘅係虎蝦,大隻得嚟仲好爽甜。至於青口，上檯時已經加左芝士，鍾意食芝士嘅朋友一定會喜歡。

燒肉拼盤：

至於燒肉拼盤，最值得我欣賞嘅係雞翼，醃得相當入味，除此之外係單骨嘅，食起黎都相當方便。

其他食物，好似螺肉，八爪魚，沙律，糖心菠蘿等等都整得相當出色，最特別嘅係佢地嘅腸仔，有別於一般燒肉店，呢度除左有普通脆皮腸之外，仲有蒜香腸、黑豚腸同埋黑椒腸，入口唔會好鹹，非常好味。

甜品每人一小盒movenpick雪榚，味道仲可以自己揀，美味嘅晚餐配上高級嘅雪榚，簡直係完美嘅組合呀。

openrice link: https://www.openrice.com/zh/hongkong/r-本佐日本燒肉料理-尖沙咀-日本菜-日式放題-r603677

地址：尖沙咀赫德道4號The Hart 3/F

Add Some Thai (觀塘）

今時今日香港租金昂貴，越黎越多餐廳開係樓上鋪，而近幾年仲多左好多開係工廈添。

相信觀塘駱駝漆大廈大家都好熟識，今日約左知己放工後去apm 行街，明知果到放工後間間餐廳都要等位，所以就睇下附近工廈有咩隱世美食啦。

Add Some Thai呢間餐廳個名都幾特別，所以見到後都有係網上睇下關於佢嘅報導，先至知道原來佢係一間Fusion 餐廳，用西餐嘅角度再Add Some Thai，成為一間泰式及西式嘅Fusion 餐廳。

唔好以為工廈食飯會唔乾淨同埋環境唔好，其實不論內在外在都相當整潔，進入餐廳之後更加唔知原來自己身處係工廈添。

我地一行兩人，喜歡食小食多過正餐，所以只係叫左一樣主菜同幾樣配菜小食。

泰國金柚燒海蝦雜菜沙律:

呢份沙律上菜時真係令我到「哇」一聲，有別於一般餐廳，呢份沙律唔係成碗上，而係分開兩個小碗，真係方便二人同行嘅我地呀。

香燒沙嗲雞肉串+香燒沙嗲豬肉串:

一份串燒只有兩條，兩個人share又點夠喉呢，所以我地叫左一份豬一份雞黎食。

呢度嘅串燒係用燒嘅方法整嘅，香氣十足，火喉亦都控制得好好，雖然入口較乾身，但係肉質都算淋，點左沙嗲汁後味道真係與別不同，非常好味。

黃咖喱鹹蛋軟殻蟹（三隻）配法式蒜蓉包：

鮮甜多肉的軟殼蟹經脆炸後，達至外脆內軟。配上加入左鹹蛋嘅黃咖喱就更加惹味，加埋香脆嘅法式蒜蓉包真係令口感更加豐富。最特別嘅係廚師已經幫你份好晒6小份，咁樣就方便你同朋友share啦！

馬拉盞炒通菜:

通菜合時無根，炒煮時火候剛剛好，軟硬適中，馬拉盞味香，咸味無過火。

清邁瀑布+龍眼冰：

泰國菜味道一般都比較濃，飲返杯泰式特飲就最好不過啦。

清邁瀑布由鮮清檸，薄荷葉同埋泰式梳打水整成,味道相當清新，而龍眼冰味道濃郁，甜度適中，為我地呢餐雖然無甜品但都好飽好滿足嘅晚餐劃上完美句號。

openrice link: 

https://www.openrice.com/zh/hongkong/r-add-some-thai-restaurant-觀塘-泰國菜-r531808

地址: 觀塘開源道62號駱駝漆大廈一座9樓D室

Cosmos Restaurant & Bar (尖沙咀)

11月係生日月份，交遊廣闊嘅我當然生日飯食過不停，是日約咗一個多年嘅好友嚟到呢間充滿浪漫氣氛嘅酒吧餐廳食飯。

餐廳位於尖沙咀寶勒巷，由地鐵站行過去只需要幾分鐘時間，相當方便。



餐廳內環境較為黑暗，以酒吧餐廳形式經營，三部電視更加可以做直播，相信係要睇波嘅朋友好去處之一。

如果預先係openrice book 檯可以有88折優惠，至於每日下午3-9點happy hour 時段更加可以七折價錢品嚐各式各樣嘅飲品。



Pussy foot /Virgin colada:
由於我地兩位都唔太喜歡有酒精嘅飲品，所以都係叫左兩杯mocktail。 Pussy foot 係由橙汁，菠蘿汁，紅石榴糖漿，梳打水同埋牛奶溝成。而Virgin Colada就係由菠蘿汁，椰奶同埋糖漿整成，兩者賣相非常吸引，呈奶白色，Pussy foot 味道有少少似fruit punch，牛奶味輕，入口酸酸甜甜，非常開胃。至於Virgin colada椰奶味重，中間帶輕輕嗁果汁味，入口好香，好好味。



沙律:
煙三文魚肥美鹹香，沙律清新爽脆，加入香甜爆汁的芒果珍珠同埋酸酸地嘅沙律汁，配搭好清新，食落都幾開胃。



加拿大生蠔:
勁鍾意食生蠔嘅我地見到是日生蠔推廣，加拿大生蠔Galiano Bay Oyster做緊$10/隻，所以我地都叫左4隻黎share。

生蠔海水味偏淡，不過肉質creamy肥美，加入檸檬汁亦見到蠔肉會收縮，裙邊會郁動，咁證明左生蠔真係非常新鮮。



黑松露蘑菇忌廉湯:
食過生蠔後，餐湯都送到啦。

蘑菇打碎後加入黑松露煲成嘅湯，上檯時香氣撲鼻，稀稠度剛剛好，入口香滑而且濃郁，有少量蘑菇碎，幾有口感，配埋微溫嘅麵包食，真係令人非常滿足。



爐燒德國鹹豬手配芥茉籽燒汁:
份量驚人既燒鹹豬手，上檯時真係令我地嘩一聲。皮厚香脆嘅豬手，肥瘦均勻，肉嫩而香滑彈牙又唔太油膩，上菜時仲已經切好晒，食起黎都好方便，配埋芥茉籽燒汁食，真係非常惹味呀! 豬手下面嘅配菜吸收左豬手嘅油脂後，真係格外好味，值得一讚。



爐燒美國安格斯肉眼扒配紅酒燒汁:
安格斯選材唔錯，表面色澤比較沉，用爐燒嘅方法煮到medium嘅生熟程度後外層焦香十足，食起黎唔會太乾，咬落去裡面D肉汁仲流出黎，喜歡紅酒嘅朋友更可以點埋廚師精心調配嘅紅酒燒汁。除此之外，配菜都幾多，質素都非常高，真係值得推介。



埃塞俄比亞咖啡:
Set dinner 包咖啡或茶一杯，店員向我地推介佢地嘅咖啡，皆因係咖啡豆係埃塞俄比亞生產嘅，所以質素非常高。

雖然咖啡等候雖時，但係試過後真係同一般嘅意大利咖啡唔同，味道較為清香，值得一試。



Tiramisu:
是日甜品係Tiramisu，口感幼滑，甜而不膩，為我地今晚豐富嘅晚餐作完美句號。

埋單每人四百幾蚊, 有頭盤，生蠔，湯，主菜，甜品，mocktail同埋咖啡，係咁好嘅環境下享受晚餐，都算係性價比高啦。

Openrice link: https://www.openrice.com/zh/hongkong/r-cosmos-restaurant-bar-%E5%B0%96%E6%B2%99%E5%92%80-%E8%A5%BF%E5%BC%8F-%E6%B5%B7%E9%AE%AE-r513644

地址: 尖沙咀寶勒巷27號東滙商業大厦地舖

丸十日本食堂 (葵芳)

「丸十」係葵芳最近新開嘅日式餐廳，上網得知佢地係香港首家「當店精米」嘅餐廳，今日趁放工後約左朋友去葵涌廣場，決定要黎試下。





放工黎到大約七點半，已經有好多人係店外排隊，好唔容易終於入到餐廳，餐廳座位有分吧檯同埋卡位，鍾意食鐵板嘅朋友可以選擇吧檯，咁就可以望住廚師為客人烹調嘅過程啦。



由於等位等左一段時間，入座時實在太肚餓，所以就馬上叫野食啦。餐牌上嘅選擇都算多，有各式各樣嘅串燒，丼，壽司，同埋多款小食，而比較有特色嘅相信都係「三文魚牛油果壽司漢堡」, 「壽司冬甩」,「 丸十海鮮丼」,「 極上鮪魚丼」, 「吉列蠔忌廉芝士牛油果卷」同埋「草莓日式刨冰」，因為賣相精緻，所以可以放上社交網站等人like。



海鮮刺身沙律：
刺身沙律真係好少食到，呢份沙律份量都算多，刺身都算足料，有甜蝦、三文魚、吞拿魚等等，沙律菜同刺身配上柚子汁食，味道真係非常夾，酸酸甜甜咁相當開胃。



日式茶碗蒸／黑松露海膽茶碗蒸：
究竟中式蒸水蛋同日式茶碗蒸有咩唔同呢？中式蒸水蛋一般用清水混合蛋液，以碟子蒸，食用時倒上醬油調味。日式茶碗蒸好多時都係將鰹魚高湯與蛋液拌勻，放係杯或碗仔內蒸，材料包括海鮮同蔬菜等等，蛋汁混合高湯同食材嘅後精華，食起來份外鮮甜，所以都唔需要添加調味。

呢度嘅茶碗蒸共有兩款，原味同埋黑松露海膽，兩者只係相差20蚊，蛋味都相當香濃而且夠滑身，配料都好足，整體黎講都相當唔錯。



燒日本地雞爆丼：
呢度係香港首家「當店精米」，所謂「精米」其實係指將玄米（糙米）打磨成白米嘅過程。玄米表面嘅米糠被完全磨走後，就係我們平日常見嘅白米。為左節省工序同時間，唔少日本或香港食店都會直接經米商購入打磨好嘅白米，但係部分高級日本餐廳就會向米商訂購指定精米程度嘅白米，精米度愈高，白米被磨去嘅部分愈多，愈接近米心，甜度就愈高，口感會更細更軟。

知道精米係咩之後，又點可以唔試佢d爆丼呢？我地揀左「燒日本地雞爆丼」，日本地雞燒得剛剛好，外皮薄脆，又香又好味，份量連埋飯亦都多到足足有一隻手掌咁高，真係無論賣相定係味道都相當唔錯。



雜錦天婦羅：
雜錦天婦羅共有5件，有蝦，矮瓜，南瓜，蕃薯同青椒，炸粉唔會太厚，炸得香脆而唔油膩，賣相呈金黃色，非常吸引。



海鮮之盒：
見到呢度串燒有咁多選擇，都知道應該都幾出名，所以都叫左一份「海鮮之盒」試下。

「海鮮之盒」即叫即製，雖然等候多時，但係上檯時真係散發出一陣陣香噴噴嘅味道。一份共有五條，分別有大蝦，生蠔，鯖魚，活鰻同埋帆立貝，簡單調味後嘅海鮮烤過後不但入味，而且仲係好juicy，濟上檸檬汁後更加帶出海鮮嘅鮮味，值得一讚。

食左咁多野, 埋單每人都係$300左右，雖然等位耐，但係坐得舒服，食物質素絕對係性價比高，真係值得一試。

Openrice link: https://www.openrice.com/zh/hongkong/r-%E4%B8%B8%E5%8D%81%E6%97%A5%E6%9C%AC%E9%A3%9F%E5%A0%82-%E8%91%B5%E8%8A%B3-%E6%97%A5%E6%9C%AC%E8%8F%9C-%E9%90%B5%E6%9D%BF%E7%87%92-r600683

地址: 葵芳興芳路223號新都會廣場4樓484-487號舖