A La Umai (天后)

早前係朋友既面書見到佢upload 左呢間餐廳的醉人美景同好吸引既美食，令到我都想黎試下，今日難得朋友生日，就打算同佢黎試下。

位於天后電氣道的「樓上舖」，A la umai 主打法日Fusion菜，我地坐低之後就俾佢浪漫舒適既氣氛吸引到，忍唔住影左好多相。

女生們點都有少少選擇困難症，叫set dinner應該都係明智既決擇，set dinner 係5 course dinner，分別係烤美國安格斯300日肉眼 (200g)配紅酒汁 ($528)同埋1/2 波士頓龍蝦黑鱈魚配蟹肉忌廉汁 ($538)。

落左order之後，首先上菜既係頭盤，頭盤係18個月黑毛豬風乾火腿伴哈密瓜。Parma Ham入口感覺非常清新，咸香度不算高，食得出風乾味。哈密瓜香甜多汁，同Parma Ham一齊食絕對夾到痺。

之後送上黎既係前菜，前菜每日都唔同，而今日既係三文魚配青菜沙律，三文魚既整法好特別，似係磨過咁，口感同一般食到既唔同。

之後上既係湯同麵包，湯我地2個都叫左鮮蟹肉龍蝦忌廉湯，龍蝦湯味道相對濃而不過鹹，麵包方面，外脆內軟，仲有D麥香味，其實唔錯既，但係如果可以整返熱少少，咁就更加好啦。
只係食完以上既野就已經半飽啦，之後就到主菜啦。

烤美國安格斯300日肉眼 (200g)配紅酒汁: 安格斯選材唔錯，表面色澤比較沉，牛扒雖然用左大量黑椒粗粒猛火燒，外層焦香十足，但表面無咩網紋，肥瘦比例剛剛好，medium的生熟程度，肉味濃郁，裡面D肉汁仲流出黎，配埋芥辣同埋蒜蓉汁，賣相好靚，真係好好味。

1/2 波士頓龍蝦黑鱈魚配蟹肉忌廉汁: 一上菜就聞到很香的龍蝦味，入口啖啖肉又彈牙，仲好惹味，只不過挑D肉出黎比較難。鱈魚方面整得好滑，沾上蟹肉忌廉汁， 有香濃既海鮮味，伴碟既有大量蔬菜，感覺好有日式風味，亦都充滿營養及纖維。

食完之後，甜品就送上啦，係我最喜歡既士多啤梨撻，細細件，士多啤梨好新鮮，下面有少量既custard，撻皮又夠脆，好好味，值得一讚。

openrice link: http://www.openrice.com/zh/hongkong/r-a-la-umai-%E5%A4%A9%E5%90%8E-%E6%B3%95%E5%9C%8B%E8%8F%9C-%E9%85%92-%E9%9B%AA%E8%8C%84-r21003

地址: 天后電氣道108號冠貿商業大廈25樓

老二公社 (旺角)

早幾日係openrice無意中發意呢間餐廳，覺得好得意，環境又幾好，就打算星期日同朋友一齊黎傾下計啦。

Cafe位於旺角唐樓四樓，行上去比較攰，不過好彩上到去就有位坐，一坐低仲有水飲，每杯水裡面仲會有粒冰，冰裡面仲有粒士多啤梨或桃，好精緻，值得加分。

野食方面算係普普通通，都係一般cafe食到既野，我地叫左2個餐，一份雞翼薯條，一份肉丸薯角，每個餐都有配飲品一杯。薯條同薯角都熱騰騰既，非常美味，好有火候，最重要既係唔太油。蜜糖雞翼幾香囗，蜜糖味都幾重，好滿足。至於肉丸方面，係豬肉丸，真係適合唔食牛肉既我，肉丸仲清清地，無咩肥豬肉，個肉汁仲好好味，有D似某大型傢俱店食到果D。

飲品方面，我地叫左2杯唔同既咖啡，下圖細杯既唔記得左係咩啦，味道OK，加上細細杯，唔係好抵，大杯既係hazelnut 咖啡，雖然大杯，但係有點兒過甜，有改進空間。

食飽之後就梗係參觀下間Cafe啦，呢到好多野睇，仲可以周圍影相，最得意既係有架兒童車，裡面仲有個BB係度，好可愛，攪到我都忍唔住同佢影左D相。

老二公社真係幾好坐，下次一定要帶多幾個朋友試埋其他食物。 

openrice link: http://www.openrice.com/zh/hongkong/r-%E8%80%81%E4%BA%8C%E5%85%AC%E7%A4%BE-%E6%97%BA%E8%A7%92-%E6%84%8F%E5%A4%A7%E5%88%A9%E8%8F%9C-r436922

地址:  旺角豉油街65號4樓

大阪李朝園 (銅鑼灣)

朋友好鍾意食章魚燒，知道呢間餐廳有得自己DIY 時就叫我陪佢黎，起初聽到餐廳名時仲以為係一間日式居酒屋，黎到見到menu後先知原來係一間日韓餐廳。

呢間餐廳位於駱克道，介乎兩個地鐵站之間，銅鑼灣站行過去都只不過係5分鐘左右。

我地叫左一個DIY 小丸子，一個石鍋豬肉泡菜飯同埋一份韓式炸雞。

DIY 小丸子: 叫完DIY 小丸子之後，店方會提供所有道具同材料，材料包括泡菜，洋蔥碎，紅蘿蔔粒，同埋章魚粒，鐘意幾多落幾多。做法好簡單，店員首先會係個模上塗上油，油滾後， 落麵粉漿，再落食材，等麵粉漿定型後再落多少少漿，等佢慢慢轉至顏色金黃即成。成個過程中，店員都會好用心示範，到我地落手時真係玩開心過食，真係滿足到貪玩既我地，整得靚仲好有成功感添。

一粒一粒圓碌碌既小丸子就成形啦，上碟後再加上木魚絲同其他醬汁即成。小丸子外脆內熱，味道相當不錯，粉漿又唔會過厚，好味道。

石鍋豬肉泡菜飯: 鍋好熱，加上我地花左大量時間係D小丸子到，所以D飯都變成飯焦，不過石鍋飯既材料好多，有芽菜，菠菜，豬肉同泡菜，D 飯細細粒，香口既芝麻再加上韓式辣醬，撈埋一齊食真係好好味，仲香氣十足，店員見我地忙緊整小丸子仲幫我地撈埋，真係好，唯一美中不足既係豬肉份量太少， 仲好似唔多覺眼。

韓式炸雞: 落單果時以為係炸雞件，上菜時先知係炸雞扒，炸得尚算香脆，值得一讚既係佢地切埋件俾你地，方便進食，上面仲放左大量沙律醬，裡面仲有少少薯仔粒，不過我會建議餐廳將醬汁分開上，咁就可以配合到唔同口味既客人。最可惜既係我地真係顧住玩個小丸子，攪到D炸雞凍晒先食到。

openrice link: http://www.openrice.com/zh/hongkong/r-%E5%A4%A7%E9%98%AA%E6%9D%8E%E6%9C%9D%E5%9C%92-%E9%8A%85%E9%91%BC%E7%81%A3-%E6%97%A5%E6%9C%AC%E8%8F%9C-%E7%81%AB%E9%8D%8B-r169930

地址:  銅鑼灣駱克道447-449號中威商業大廈地舖

麻布茶房 (將軍澳)

曾經有段時間麻布茶房差唔多全線結業，之後又再出現返，自此之後我就無黎過麻布茶房啦，印象中呢到既食物同服務都幾好，特別係甜品。今日黎開將軍澳，見呢度開左間，就黎試下啦。

我地每人叫左一個套餐，套餐包一個主菜，一個味噌湯(湯麵除外)，同埋一杯咖啡或茶。

味噌湯味道較淡，無咩料到，不過味道都唔差。

 

辣味豬軟骨烏龍麵: 賣相好精緻，個湯底非常濃，烏冬夠彈牙，食得出唔係cheap 野 ，仲有豬軟骨做配料，肉質都幾嫩，所有的骨都係軟骨，好好味。

雜錦海鮮丼定食: 睇落好靚好吸引，刺身好嫩，質感和味道都好好，種類多，新鮮度都好高，亦都無雪藏凍氣，刺身下面既飯係用珍珠米，加左少少豉油同wasabi之後真係令人食到停唔到口。

蒲燒鰻魚飯定食: 味道好濃既鰻魚汁，送飯一流，鰻魚軟軟又無骨，易入口，好快就食哂。

餐飲方面無咩特別，都係咖啡或茶，不過如果可以揀抹茶牛奶之類而又唔洗加錢，你話幾好呢?

 openrice link: http://www.openrice.com/zh/hongkong/r-%E9%BA%BB%E5%B8%83%E8%8C%B6%E6%88%BF-%E5%B0%87%E8%BB%8D%E6%BE%B3-%E6%97%A5%E6%9C%AC%E8%8F%9C-%E7%83%8F%E5%86%AC-r436346

地址:  將軍澳唐賢街9號PopCorn商場2樓PopFood 5號舖

盛記盆菜&盛記麵家 (沙田)

第一次黎到盛記打邊爐，呢度好特別，日頭係食麵，晚市先做火鍋。

位於沙田瀝源邨既盛記，係瀝源邨圖書館附近，唔係好容易搵，入到盛記之後，就俾佢好有特色既佈置吸引住。

 

湯底我地揀左胡椒豬軟骨湯，湯底比較清淡，豬軟骨嫩滑得黎仲軟軟地辣辣地，幾好味，幾特別，其他火鍋料好似響鈴呀菇呀豚肉呀都好好，響鈴放湯後即腍，可以吸盡湯汁既精華，菇既種類好多，咩都有D咁，口感都好爽，最適合我呢D咩都想食D既人。可惜因為比較遲食飯有部分料已經售罄，下次要早D黎至得。

其實本身仲想叫碟菜添架，但係見好多碟餸都有菜，兩個人又叫唔到咁多野，所以都係淥熟墊底既菜算啦。

openrice link: http://www.openrice.com/zh/hongkong/r-%E7%9B%9B%E8%A8%98%E7%9B%86%E8%8F%9C-%E7%9B%9B%E8%A8%98%E9%BA%B5%E5%AE%B6-%E6%B2%99%E7%94%B0-%E7%B2%B5%E8%8F%9C-%E5%BB%A3%E6%9D%B1-%E7%81%AB%E9%8D%8B-r14802

地址:  沙田瀝源熟食中心5號舖