咖啡弄 (尖沙咀)

呢間「咖啡弄」出名多人排隊仍然有好多人黎，一直都想試，所以就決定係除夕夜黎試下啦。

等位等左15分鐘到已經有位，不過就要搭檯，不過唔緊要啦，唔係有排等呀。

兩個女仔唔食得好多野，決定叫一份三文治同一個甜品share食，最後點左總匯三文治同埋黃金拿破崙千層派。

總匯三文治: 總匯三文治就係我地俗稱既club sandwich，賣相一流，麵包香脆鬆軟仲被烘過，塗左少少牛油，三文治裡面有煙肉，燻牛肉，火腿，生菜，蕃茄等等既材料，配搭得不錯，份量相當多。

伴菜方面有我至愛既蛋沙律，青瓜，生菜同埋脆片。蛋沙律蛋味濃郁，蛋黃醬汁更令人食到停唔到口。

黃金拿破崙千層派:  睇落有少少似檸檬夾心餅，派皮香脆鬆化，帶有少少檸檬既酸甜，中間仲夾住Cream，但係都唔係太漏，焗得都算鬆脆。

熱抹茶歐蕾: 係落完Order之後侍應同我地講，先知道原來呢到每人最低消費一杯飲品，餐點金額恕不併入計算，即係話不論你食物叫左幾多幾錢都好，都要每人叫一杯飲品，咁既限制我真係第一次聽。無辦法啦，唯有叫啦，最後叫左杯抹茶歐蕾。

抹茶歐蕾賣相非常吸引，抹茶味好香濃，不過就係甜左少少，如果加返少D糖，可能會更加好味更加健康。

openrice link: http://www.openrice.com/zh/hongkong/r-%E5%92%96%E5%95%A1%E5%BC%84-%E5%B0%96%E6%B2%99%E5%92%80-%E8%A5%BF%E5%BC%8F-r166483

地址:  尖沙咀漢口道38號漢興大廈1樓

深宵食堂 (尖沙咀)

有唔少香港人都鍾意放左工之後同一班朋友一齊飲野傾計，今日趁長假期完結後既第一個工作日，放工之後同朋友一齊黎到有2間分店既「深宵食堂」。

「深宵食堂」同日本漫畫「深夜食堂」名稱幾相似，其實餐廳係由漫畫所啟發而成，所以漫畫中大部份食物都會係餐廳搵到，例如玉子燒、貓飯等等，好得意架。

餐廳有分室外同室內兩個部分，平日放工後7點鐘左右黎到，已經有唔少人係度食緊飯啦，所以只能獲安排室外既位置，10幾度既溫度，都唔算好凍。

煙三文魚沙律: 沙律菜淋上左醋汁後, 再以切成條狀既煙三文魚整成，煙三文魚綿綿地帶有少少煙香同鹹味，由於同行既朋友唔食沙律菜，本人一個人就食晒成份沙律啦。

日式炒手打烏冬(雞肉): 烏冬炒得相當煙韌彈牙，有好多蔬菜做配料，雞肉仲好嫩滑添。至於醬汁方面，味道甜甜地，味道唔錯，而且幾飽肚。

吉列廣島蠔: 1份蠔有4隻，蠔身都算大隻， 炸粉又唔算太厚，炸起上黎熱辣辣又多汁，吉列層好脆好好味，係呢個價錢黎講真係算幾抵食。

一口牛(2串):上菜時已經覺得呢味菜好有型，牛肉串插左係薯仔上，令我地忍唔住即刻影相。牛肉串肉質結實，燒得恰到好處，唔錯，不過係諗唔明點解要插係個薯仔上面呢，點解唔整D 薯條算呢?

日式煎餃子 (4隻): 餃子皮軟硬適中仲好彈牙，配埋餃子汁味道真係唔錯。

深宵薄餅:其實就係日式燒餅。薄餅既底層係用類似童星點心麵既東西整既，上面再加上柴魚絲，燒餅同醬汁整成，上面再放上椰菜同淋上沙律醬整成。薄餅外層香脆, 味道相當香口。份量比較多，有4-5件，建議至少有3-4人先至好揀，如果唔係食唔到其他野。

 

川式茄子: 呢個燒茄子等左好耐，以上既菜黎齊再食完後先至到。條茄子係原條燒，但係食起上黎啖啖茄肉，可惜蒜香味有點兒過濃，有改進既空間。

整體黎講呢間食店創意十足，食物種類又夠多，下次黎要帶多幾個朋友一齊黎，等我可以試埋個「貓飯」。

openrice link: http://www.openrice.com/zh/hongkong/r-%E6%B7%B1%E5%AE%B5%E9%A3%9F%E5%A0%82-%E5%B0%96%E6%B2%99%E5%92%80-%E6%97%A5%E6%9C%AC%E8%8F%9C-%E7%87%92%E7%83%A4-r454099

地址:  尖沙咀厚福街12號藍馬商業大廈5樓

COCOMO (沙田)

是日係聖誕節，一家人黎到Cocomo食餐好既，正正因為係聖誕節，平時有既平價食物今日都無，只有聖誕MENU，不過都唔係貴過平時好多啫。

今日每個餐都有南瓜忌廉湯，麵包，沙律，主菜同埋飲品。

 

南瓜忌廉湯好creamy，用料恰當，麵包每人仲有3款，設計有創意，熱辣辣咁上碟，最好食係個牛角包，又香又鬆軟。

燒汁香蔥雞肉蛋包飯: 蛋包飯賣相都幾好，但係味道比較淡，汁亦都唔太夠，

焗海鮮飯(忌廉汁): 飯既海鮮好足料，有蝦，青口，魷魚等等，用忌廉汁亦都非常配合，加左少少芝士，味道淡淡地唔太濃亦唔太膩，整體來說, 份量好足，整體配搭唔錯。廣島蠔肉蕃茄意粉: 意粉口感彈牙,  蠔肉細細粒，份量唔多，混左係意粉裡面，無咩雪藏味，醬汁仲好重蕃茄味，好好味。食完主菜之後仲有咖啡或茶，之前試過呢到D咖啡，覺得唔錯，所以今次都係揀返咖啡。

openrice link: http://www.openrice.com/zh/hongkong/r-cocomo-%E6%B2%99%E7%94%B0-%E8%A5%BF%E5%BC%8F-r51112

地址:  沙田沙田正街18號新城市廣場三期3-003 & 3-013舖

Little Vegas (銅鑼灣)

見到朋友FACEBOOK UPLOAD 左唔少係呢間樓上西餐廳影既相，今日趁住早放工，就試吓啦。

出左升降機後，一開門就見到一幅好有藝術感覺畫既牆壁，見到幅牆就可以肯定自己無去錯地方啦。

餐廳既裝修同環境好有美式風情，枱面上仲有好多糖，俾客人等野食既時候可以食，仲有好多擺設俾客人影相，有少少童話既景像。

我地2個人都只係叫左一個小食同埋一個主菜，已經好足夠啦。

賭城小食拼盤 (半份): 呢個小食有分一份同半份，我地得2個人，叫半份比較適合。上菜後發現，原來半份已經好大份啦，有薯角，洋蔥圈，雞翼，珍寶腸同埋燒大蘑菇，真係3個女仔食都得呀。味道又真係幾好味，可惜全部都係炸/煎/烤野，好無益呀，建議餐廳可以係碟旁加少少沙律菜，咁會健康D。

 

賭城至尊辣比薩: 比薩好夠熱，厚度介乎薄批同厚批之間，唔多好芝士既我會覺得佢既芝士份量有點兒過多，配料方面有菠蘿、辣肉腸、肉碎、燈籠椒等等，可惜唔係太夠，可以落返多少少。另外可能個比薩焗得過脆，切起上黎唔係太容易，不過整體味道幾好，辣味適中。

本人非常鍾意呢間餐廳既環境同裝修，下次黎要試埋其他野食先。 

openrice link: http://www.openrice.com/zh/hongkong/r-little-vegas-%E9%8A%85%E9%91%BC%E7%81%A3-%E8%A5%BF%E5%BC%8F-all-day-breakfast-r186385

地址:  銅鑼灣耀華街3號百樂中心25樓

Gochiso (沙田)

去完旅行之後約一名好朋友出黎派返D手信，順便當聚下舊，選擇左係大家屋企附近位於新城市廣場既Gochiso。放工後大約7點幾黎到，都未需要等位。

餐牌上好幾樣食物都有大同細兩個Size 揀，雖然叫大既係抵好多，但係為左可以叫多D唔同種類既野食，有得揀既我地都揀個細Size既。

西班牙風海鮮飯(半份): 海鮮飯用左日本珍珠米，材料相當豐富，包括有沙蜆、魷魚、青口同蝦，配埋少少西班牙風味既飯汁，擠上檸檬汁，再拌一下，味道青甜，幾好味，唯一美中不足既係鑊底既飯有少少飯焦，如果少返DD會更加好。

黃金四色芝士披薩(8寸): 等呢個pizza等左好耐，追過order，但侍應們叫我地耐心等候，因為每個Pizza都係即叫即做既。

Pizza無肉，只係以四色芝士整成，四色芝士包括藍芝士、水牛芝士、巴馬臣芝士和忌廉芝士，另外都有附上蜜糖，可自由調校分量，味道鹹中帶甜，芝士味亦都唔係太濃。上菜時pizza係仲未切架，侍應會即場問你想切幾多份，再係你面前為你切。

香烤安格斯T骨牛扒配薯條: 餐廳依加有個優惠，點一份扒可以跟一杯紅／白酒，又或者係＄50現金券，唔飲酒既我地當然揀左要現金劵啦。

牛扒都幾大份，有成隻碟咁大，平時食開五成熟既牛扒，但係侍應話7成熟口感會更加好，咁就試下啦。牛扒肉質好軟，輕易就可以切開，脂肪分佈都好均勻，T骨兩則係菲力牛柳，一邊係西冷，又可以食到牛柳既鮮嫩軟腍，又可以試到西冷既彈牙肉質，肉質細嫩而多汁，雖配有黑醋醬，但單食已經很味美。

伴碟既薯角，焗得好香脆，上碟時仲係熱辣辣，唯一唔好既就係由餐牌寫既薯條變左做薯角，令一向好鍾意食薯條既我有點兒失望。

2個人食完咁多野都幾飽下，再食唔落甜品，唯有下次黎用張$50 現金券時順便試下啦。  

openrice link: http://www.openrice.com/zh/hongkong/r-gochiso-%E6%B2%99%E7%94%B0-%E6%97%A5%E6%9C%AC%E8%8F%9C-%E6%B5%B7%E9%AE%AE-r472865

地址: 沙田沙田正街18號新城市廣場一期1樓112號舖

達人包車 (尖沙咀)

香港真係越黎越多韓食店鋪，特別係尖沙咀，單單係金巴利道就至少有10間，經過呢間餐廳都有好幾次，每次見到幾乎個個都食既長長串燒，都好想黎試下。

今日趁住朋友生日，一於同佢一齊黎慶祝，因為早幾日已經訂左檯，所以黎到都唔洗等位。

餐廳有分室外同室內兩個部分，我地揀左坐室外，天氣涼，又通風，又唔會怕太大陣油煙味。

睇左餐牌一段時間，發現佢同之前openrice見到既有一點兒出入，問起侍應們先知原來佢地剛剛轉左餐牌。

餐前小食非常開胃醒神，有粟米沙律，酸瓜同埋泡菜，值得一讚既係D 泡菜整得好入味。

 

超大串燒: 到屋頂既燒肉串，真係幾乎每一檯都叫咁，串燒到左之後，店員就會幫你掛上去天花上既吊環，雖然呢個串燒外觀上非常吸引，但其實食落同平時一般韓燒既分別唔多大，只係有人幫你燒，一路燒一路剪細塊肉，可惜呢個待遇只限於第一輪。

串燒上既食物真係一D都唔少，有燈籠椒、大蝦、香腸、豬頸肉、菠蘿、五花肉同車厘茄等等，全部都係由串燒最底層開始食起既。

肉類非常juicy又唔太油膩，最值得讚既係香腸外表香脆，都好惹味。蔬菜方面，燈籠椒同蘑菇都相當唔錯。

用黎點肉既醬汁有3款，蜜糖芥末醬、黑椒海鹽和泰式酸辣醬，味道相當唔錯。

年糕鍋: 年糕鍋同一般食到既部隊鍋分別唔多大，都係一個鍋裡面有菜有肉有麵咁，總之就係咩都放係個鍋到食啦。而呢個年糕鍋既配料就有餃子，魚糕，拉麵，年糕，大蔥，蜆同青口。湯底可以揀辣或者唔辣，而我地就覺得，既然係食韓國野，叫辣好似襯D喎。

湯既辣度適中，配料都幾入味，鍋物仲好似越滾越辣咁，年糕入口帶嚼勁，煙韌夠飽肚，最好味既係魚糕，因為佢吸收晒湯底既香辣味，一片一片咁食真係令人食上癮呀。最值得讚既係佢既餃子，完全無雪藏既味道，浸係辣辣既湯度食，味道真係一流，可惜得2隻，真係唔多夠喉呀。

呢到既食物真係好特別，下次真係要叫多幾個朋友一齊黎，咁先可以叫多D野同埋影多D相架嘛。  

openrice link: http://www.openrice.com/zh/hongkong/r-%E9%81%94%E4%BA%BA%E5%8C%85%E8%BB%8A-%E5%B0%96%E6%B2%99%E5%92%80-%E9%9F%93%E5%9C%8B%E8%8F%9C-%E9%9F%93%E5%BC%8F%E7%82%B8%E9%9B%9E-r448018

地址: 尖沙咀金巴利道79-81號

Espuma (灣仔)

難得今日唔駛OT，就約左2個朋友黎到公司附近比較受歡迎既西班牙餐廳食飯。我地3個人叫左一份咸豬手，一份雞翼，一個薄餅，同埋一份甜品。

 

香脆咸豬手: 見好多檯都有叫呢個咸豬手，應該都幾出名下，燒得亦都相當出色，上菜時仲已經切好晒，食起黎都好方便，豬手皮超香脆，肉嫩而香滑彈牙又唔太油膩，再配少少酸菜，非常可口開胃，份量係絕對夠3個人享用既。

焦糖單骨雞翼:  呢個真係小食既首選，把雞中翼切半並用焦糖醃製而成，好方便食，一條骨放入口， 好容易就食到D肉，味道香口，雞翼外脆內嫩，亦都唔會炸得過乾，可惜焦糖有點兒過多，建議可以將焦糖同雞翼分開，咁客人可隨意沾點焦糖既份量。

西班牙薄餅: 雖然細細個，但係個餅底好夠脆，肉既份量又適中，仲係薄餅上加埋沙律，幾好食，幾足料，亦都唔會好似平時食開既意式pizza咁漏。

 

紫薯火鍋: 呢個紫薯火鍋係最近新出既，除左紫薯之外仲可以揀抹茶，但係因為同行既朋友唔食抹茶，所以最後揀左紫薯。呢個火鍋同一般既朱古力火鍋分別唔大，有一碗用火座暖既紫薯醬，再配唔同既配料一齊食既，配料有竹炭芝麻泡芙，棉花糖，日式福餅，窩夫，鮮雜果，個人認為紫薯火鍋呢個idea幾特別，唔係好多地方食到，味道亦都唔錯，只不過配料比較上heavy，建議可以減少泡芙同福餅既份量，而多加鮮雜果。

總括而言，呢間鋪食物質素好好，而且唔貴，裝修都幾好幾有格調，下次gathering都可以再黎食。  

openrice link: http://www.openrice.com/zh/hongkong/r-espuma-%E7%81%A3%E4%BB%94-%E5%A4%9A%E5%9C%8B%E8%8F%9C-%E7%94%9C%E5%93%81-%E7%B3%96%E6%B0%B4-r448363

地址: 灣仔皇后大道東202號QRE Plaza 25樓