CHEF STAGE de Eddy Chu (尖沙咀)

早前同朋友去過CHEF STAGE de Eddy Chu同埋西餐大排檔，都對呢兩間餐廳既食物念念不忘，最近見到呢度晚上八點半後入座可享全單85折優惠，就趁住去完大型百貨公司大減價購物後同朋友黎食飯啦。

呢間餐廳叫CHEF STAGE de Eddy Chu，顧名思義，就梗係由老闆兼總廚既Eddy Chu坐鎮主理架啦。

晚上八點半左右黎到，餐廳都唔算太多人，唔會好嘈。

乳酪鮮蝦芒果雜菜沙律 :

沙律菜非常新鮮，鮮蝦肉質彈牙，加埋芒果同入口即爆又帶少少荔枝味嘅珍珠真係相當有口感。有別於一般嘅沙律，呢度冇用到沙律醬，反而用咗乳酪，咁嘅做法味道會差唔多，但係脂肪含量肯定低啲。

大大隻蝦多士 :

有別於其他地方食到既迷你蝦多士，呢度既蝦多士真係超級巨型，麵包上面加入蝦之後沾上炸粉炸成既蝦多士，上檯時熱辣辣，入口外酥內軟，啖啖都食到蝦肉，好彈牙，沾埋帶有少少冬蔭公味既醬汁，感覺非常新奇。伴碟有少量既沙律，食完油膩既蝦多士食返少少沙律，真係份外清新。

白酒煮活蜆 :

白酒加左蒜頭做湯底，再加入大大粒既蜆肉去煮。湯底雖然偏鹹，唔建議大家飲，但係蜆肉並無脫殻，唔需要係湯底度搵蜆肉食。

黑松露蘑菇湯 :

蘑菇打碎後加入黑松露煲成嘅湯，香氣撲鼻，味道相當濃郁，入口時食到細細粒嘅蘑菇碎，非常有咬口。

忌廉鮑魚冬蔭海鮮湯 :

估唔到係西餐廳都會試到冬蔭公海鮮湯，呢個湯雖然係泰式，但係加入咗cream之後都有少少西式風味。最大驚喜係配料方面有鮑魚、帶子同埋蝦，鮑魚唔單止大隻，而且仲好爽口添。

雜菜薯仔煙豬腩燴法國鴨髀 :

鴨髀入口軟身，醃得都算幾入味，配菜有大量雜菜、紅蘿蔔、蘑菇同埋車厘茄等等，令到成個主菜顏色非常鮮艷，相當吸引。

紐西蘭蟶子配米酒白汁扁意粉 :

米酒加埋白汁整成嘅意粉，入口相當creamy，配料有車厘茄、蘑菇同埋蟶子。可能因為碟意粉顏色比較單調，所以廚師用咗蟹籽喺面頭做裝飾，令到碟意粉顏色更加鮮艷，賣相更吸引。

呢間餐廳非常之有情調，食物同服務質素都唔錯，都幾適合情侶黎食飯談心。

openrice link: https://www.openrice.com/zh/hongkong/r-chef-stage-de-eddy-chu-%E5%B0%96%E6%B2%99%E5%92%80-%E8%A5%BF%E5%BC%8F-%E9%85%92-r434117

地址: 尖沙咀亞士厘道17-19號19樓

Mee...Lemongrass (銅鑼灣)

成日放工後去銅鑼灣既我，經過呢間餐廳已經好幾次，難得今日早放工，就打算黎試下。

傍晚七點左右黎到，餐廳仲未係太多人，呢度環境相當開揚，視野唔局限於餐廳裡面，枱同枱之間既距離，係今時今日既香港黎講都唔算太少架喇。

我地一行兩人，唔太大食，叫左兩個小食，一個主菜同埋一個甜品。

無骨酸辣鳳爪沙律 :

無骨既鳳爪最適合懶吐骨既我地，酸度剛剛好，非常開胃。鳳爪份量亦都唔少，入口不但夠凍而且仲爽口彈牙，令人越食越開胃。

軟殼蟹米紙卷6件 :

好喜歡軟殼蟹既我，見到呢味小食就好想叫喇。米紙除左包著軟殼蟹之外，仲有牛油果、芒果同埋三色椒，顏色非常鮮艷，賣相好吸引，配埋伴碟既酸甜汁，口感相當清爽。

喇沙 - 大蝦,蜆肉,蟹柳,魚蛋,豆卜,雞蛋,魷魚 :

喇沙係呢度既招牌菜，湯底極度香濃既佢，椰奶味頗重，賣相呈橙黃色，入口微微既咖喱辣味，材料有大蝦、蜆肉、蟹柳、魚蛋、豆卜、雞蛋同埋魷魚。麵條索晒湯底既味度後，非常爽口，好好味。

馬來脆雪山 :

見隔離檯叫左呢個「馬來脆雪山」，賣相相當震撼，攪到我都忍唔住叫黎放上網呃like。

「馬來脆雪山」整個製作過程客人都可以隔住玻璃見到，做法亦都好簡單，只係係脆餅上加入煉奶同花生碎整成，味道有d似龍鬚糖，入口香脆，係一味幾特別既甜品。

openrice link: https://www.openrice.com/zh/hongkong/r-mee-lemongrass-%E9%8A%85%E9%91%BC%E7%81%A3-%E9%A6%AC%E4%BE%86%E8%A5%BF%E4%BA%9E%E8%8F%9C-%E6%B2%99%E5%BE%8B-r532850

地址: 銅鑼灣告士打道311號皇室堡地庫B11號鋪

麥田廚房 (銅鑼灣)

一年一度既生日又到喇，是日假日，去主題公園玩完之後，晚上朋友就帶左我黎呢度食飯。

餐廳位於銅鑼灣邊寧頓街隆堡柏寧頓酒店2樓，地點旺中帶靜，雖然適逢某大型百貨公司大減價，但係附近都唔見得特別嘈吵。

餐廳大約可以容納到40人左右，環境尚算寧靜，燈光柔和，非常適合情侶約會或者三五知己相聚。

若果有家庭聚會又或者商業會議，餐廳都可以改變間隔，安排到高私隱度既VIP房俾客人。

玻璃櫃內放滿俄羅斯既套娃公仔，令成間餐廳充滿左俄羅斯風味。

除左佈置之外，餐紙都印有俄羅斯公仔，事不宜遲，依加就同大家講下今晚既食物啦。

上海派招牌羅宋湯 :
羅宋湯係呢度既招牌菜，我地又點可以唔叫呢?

呢度既羅宋湯有紅菜頭、甘筍、薯仔同椰菜等等既蔬菜，除此之外仲用左放過夜既牛坑腩，可能因為咁，味道特別濃郁，入口微辣，配埋脆口既蒜蓉包，真係完美既配搭！

傳統迷你蝦多士(6件) :
用鮮蝦同蔬菜打成膠再炸成既蝦多士，火喉剛剛好，咬落都幾彈牙，點埋沙律醬食，真係格外好味，唯一美中不足既係比較油，建議店方可以先用隔油紙印走表面既油先上菜，令怕肥既客人心理上好過d。

扒大蝦茄汁炒意粉 :
蕃茄味相當香濃既意粉，入口酸酸甜甜，相當開胃，意粉亦都爽口彈牙，完全做到al dente，加埋大大隻同啖啖肉既扒大蝦真係極有口感。

基輔炸雞卷, 牛油薯蓉 :
人手剁碎既免治雞肉加入牛油搓勻，再醮上燕麥同麵包糠炸熟既基輔炸雞卷，表皮酥脆，切開後噴出陣陣香氣，令人急不及待一件一件咁放入口中。

人手剁碎既雞肉果然唔同d。入口非常彈牙，好有口感。切開雞卷後肉汁慢慢滲落墊底既薯蓉度，真係好好味。

除此之外伴碟仲有清爽既沙律，可以將整體既油膩感減低。

朱古力布朗尼 :
十一月份生日既壽星仔女，只要係晚市惠顧以及面書打卡，就可獲贈朱古力布朗尼一份。

係呢度真係不得不讚店員醒目同合作，事關朋友事前並唔知有呢個優惠，訂檯時已向店方要求自動送上呢個甜品，當店方同我地講係面書打卡有「特別優惠」而又被問到係咩優惠時都可以保持神秘，唔會破壞左朋友當初想俾我既驚喜，真係心思細密。

呢度無論食物、環境同埋服務都非常好，真係帶俾我一個難忘既晚上。


openrice link: https://www.openrice.com/zh/hongkong/r-%E9%BA%A5%E7%94%B0%E5%BB%9A%E6%88%BF-%E9%8A%85%E9%91%BC%E7%81%A3-%E5%A4%9A%E5%9C%8B%E8%8F%9C-r161765

地址: 銅鑼灣邊寧頓街13-15號2樓

阿來泰式地道風味 (長沙灣)

朋友因病入院，趁住今日星期六，打算去探佢。喺去探佢之前，就梗係睇吓附近有咩好嘢食啦。

位於東沙島街嘅阿來泰式地道風味，由長沙灣地鐵站行過去都只係幾分鐘，午市除咗可以揀精選套餐之外，仲可以揀二人餐同四人餐添。

我哋一行三人，想食得豐富啲，所以就叫咗個二人餐再散叫個串燒同沙律share食啦。

二人餐相當豐富，仲有三個選擇，好想試冬蔭公湯既我哋，揀咗個C餐。

鮮蝦冬蔭公湯 :

鍾意食辣野既我，冬蔭公係我去到泰式餐廳必叫既菜式之一。冬蔭公其實係泰式酸辣湯，係由南薑、酸子、香茅、青蔥、酸檸檬、辣椒同魚露調製而成。呢度既冬蔭公湯，賣相呈橙紅色，上菜時熱辣辣，仲散發出陣陣香味，配料方面亦都好足，有菇、蕃茄同蝦等等，入口又酸又辣，好開胃。

泰式海南雞配油飯 :

平時星馬海南雞飯就食得多，泰式海南雞都係第一次試。嫩滑既雞配埋泰式醬汁，加埋油飯，風味十足。

泰式炸蝦餅 :

炸蝦餅係我最欣賞既小食，一碟總共有六件，炸得好夠火喉，外層金黃夠脆，入口香脆，鮮蝦味道夠重，口感十足，點埋汁食，真係好好味。

青咖喱雞配蒜蓉包 :

加左椰汁整成既青咖喱雞真係份外香，入口一d都唔辣，鍾意食辣既我認為可以再辣少少，配料方面，除左有雞肉之外仲有矮瓜，份量亦都好多。本身個咖喱係配飯，加$10可以轉蒜茸包。用剩餘既咖喱汁點蒜蓉包簡直係一流呀。

飛天通菜 :

通菜合時無根，炒煮時火候剛剛好，軟硬適中，加入豆醬炒，鹹味恰到好處。

串燒沙嗲 :

雞肉同豬肉醃過後再燒，火喉剛剛好，雞肉入口夠嫩滑，點埋沙嗲醬食，味道一流。

金柚子鮮蝦沙律 :

泰菜味道普遍偏濃，叫返個沙律食就最好不過。加入左柚子同蝦既沙律，配埋泰式沙律汁，味道清新，令人越食越開胃。

三色冰 + 青檸梳打 :

餐飲揀左三色冰同青檸梳打，食完濃味既食物後飲返杯，清清個口，為豐富既午餐劃上完美既句號。

openrice link: https://www.openrice.com/zh/hongkong/r-%E9%98%BF%E4%BE%86%E6%B3%B0%E5%BC%8F%E5%9C%B0%E9%81%93%E9%A2%A8%E5%91%B3-%E9%95%B7%E6%B2%99%E7%81%A3-%E6%B3%B0%E5%9C%8B%E8%8F%9C-r545873

地址: 長沙灣東沙島街162號地下

鮨豊 (天后)

平日返工咁辛苦，放工就梗係搵d好野食，同朋友傾下計啦。

位於天后琉璃街既「鮨豊」，開業都有半年，地鐵站行過去都係五分鐘左右，店內有大約20個座位，環境寬敞，位同位之間都有好多空間，私隱度極高，坐得都算舒服。

餐廳所使用既日本材料一星期六天由日本築地空運來港，確保品質新鮮，除此之外，仲會供應日本鮪魚（MAGURO）唔同既部位，好似大拖羅、中拖羅咁，當然都唔少得刁鑽既部分，好似全條魚最肥美既鮪魚頸拖羅，香味超重的筋拖羅，一條鮪魚只有2片既腦天等等。

難得黎到就梗係食好嘢啦，我哋叫咗一個壽司套餐同埋omakase course share食，所謂omakase即係廚師發板嘅意思，由廚師挑選新鮮時令嘅食材比客人食用，並着重氣氛同埋同客人交流。

Omakase course有冷盤、前菜、壽司10件、手卷、湯同埋甜品。

至於壽司套餐，就有前菜、黑鮪壽司三款、烏魚子海膽蝦丸、海鮮丼三款、湯同埋甜品。

鮟鱇魚肝係香港真係唔多地方食到，口感同鵝肝相若，香濃之餘都帶點油膩，同時間都有鮮魚既鹹香。加埋伴碟嘅蕃茄同埋冰菜，入口非常清新。

10件壽司分別有金目鯛、秋刀魚、鯛魚、花竹蝦、赤貝、喜之次、鰤、海膽等等既款色，魚多飯少，食完十件都唔會太飽。上菜時店方仲好細心同我地介紹盤上既每款壽司添。

所有刺身不但厚切而且非常新鮮，最值得一讚嘅係金目鯛，微微灸燒過後上面再加上香脆口感既七味粉，好好味。

至於伴碟既甜蛋，口感鬆軟而且帶有甜味，唔知仲以為食緊蛋糕添。

吞拿魚腩卷充滿油香，質感柔軟，鮮甜得來仲好香滑。

海鮮丼三款分別係海膽、三文魚籽、同埋黑鮪魚腩蓉。

海膽入口一啲都唔腥，而且仲好甜，加埋少少海草，入口非常清新。

至於三文魚籽，份量超多，加入左少少柚子汁，入口唔腥。

最精彩嘅係黑鮪魚腩蓉，黑鮪腩蓉加入蔥同柚子後味道好香，入口非常清甜。

黑鮪壽司共有三款，分別係赤身、中拖羅同埋大拖羅，全部都啖啖油脂，入口即溶。

𩶘魚湯賣相奶白色，入口有香濃既魚味，味道清甜，除咗有魚肉之外，仲有好多菇同埋豆腐添。

烏魚子海膽蝦丸 :

包住海膽蓉嘅蝦丸，做法極具創意，味道不但唔腥而且仲好香甜，值得一讚。

牡丹蝦 :

配合海膽魚子醬一齊食嘅牡丹蝦，入口鮮甜，賣相亦都相當吸引。

甜品分別有豆腐雪糕、綠茶布甸同埋蜜瓜。豆腐雪糕味道香濃，綠茶布甸都整得相當香滑。除此之外，蜜瓜又甜又多汁，入口軟綿綿，為我哋嘅晚餐劃上一個完美嘅句號。

總括黎講，今次用餐體驗唔錯，店員有禮貌之餘仲好細心，雖然價錢偏貴，但係食物同服務都有如五星級酒店，都算值回票價。

Openrice link: https://www.openrice.com/zh/hongkong/r-%E9%AE%A8%E8%B1%8A-%E5%A4%A9%E5%90%8E-%E6%97%A5%E6%9C%AC%E8%8F%9C-%E5%BB%9A%E5%B8%AB%E7%99%BC%E8%BE%A6-r524898 

地址: 天后琉璃街4號地下

巧得鍋 (觀塘)

做開攪手既朋友，有無試過係籌備活動時遇到阿A打邊爐，B話要食刺身，C話想吃韓燒，D又話咩都無所謂其實係有所謂呢?

位於觀塘成運工業大廈既「巧得鍋」，距離港鐵站只有五分鐘時間，一d都唔難搵，仲可以同時間食到火鍋、刺身同埋烤肉添。

餐廳設計不但開揚，而且座位都相當寬敞，帶俾客人好舒適既感覺。

餐廳有大量醬油配料供應：辣椒、炸蒜、蒜蓉、芝麻、芫荽、蔥、沙茶醬、花生醬、麻油、XO醬，真係講得出既都有架。

餐牌上有好幾款火鍋底，對於我黎講，湯底都算係火鍋既主角，一個靚既湯底，淥出黎既野食都好味d。

我地叫左蕃茄三文魚頭腩鍋，清清地，有三文魚味之餘仲帶輕輕既蕃茄味。

手打蝦丸 :

用原隻鮮蝦整成既手打蝦丸，粒粒大細平均，入口新鮮好味而且彈牙。

響鈴 :

即叫即炸既響鈴，輕輕放入湯內淥過後，外軟內脆，吸收左湯底既精華後真係格外好味。

鮮蝦水餃 :

鮮蝦水餃內包住大大小小既蝦仁，皮薄餡靚，非常飽滿，放入蕃茄三文魚頭腩鍋度吸入湯既精華後，味道唔錯。

淥左咁多野食之後，湯底已經好入味，係呢個時候落蔬菜就最適合不過啦。

煎烤物方面，除左散叫之外，仲有四個set 可以揀。因為我地部分人唔食海鮮同牛肉，所以我地揀左「巧得三」，可以試到豬頸肉、豬腩肉、黑豚肉、同埋午餐肉。

肉類黎講都算醃得入味，配合埋鍋上既隔油紙，入口普遍唔太油。肉類加埋生菜，配埋秘製醬汁，好有風味。

甜品叫左紫心蕃薯丸、3.6牛乳布丁同埋芒果奶凍千層蛋糕。紫心蕃薯丸入口外脆內軟，芒果奶凍千層蛋糕每層都佈滿忌廉，入口香滑。牛乳布丁奶味亦都好香濃。

呢度又有火鍋，又有刺身，又有得燒烤，一次過可以滿足晒大家三個願望，約朋友聚舊唔駛再煩去邊度食，呢個地方真係一個唔錯既選擇。

openrice link: https://www.openrice.com/zh/hongkong/r-%E5%B7%A7%E5%BE%97%E9%8D%8B-%E8%A7%80%E5%A1%98-%E6%B8%AF%E5%BC%8F-%E9%9B%9E%E7%85%B2-r525912

地址: 觀塘成業街15-17號成運工業大廈1樓12-14舖