食泰國菜又點會諗唔到去九龍城呀，位於南角道嘅「小曼谷泰國美食」係正「宋皇臺站」出口，沙中線開通後就非常方便啦。
餐廳門口設計非常特別，除左有架泰國tuk tuk之外，仲有個卡通廚師公仔，好得意架。
泰皇咖喱法包軟殼蟹：
呢個脆包盅有D似農夫包，麵包烘得非常鬆脆，包裡面淋上了大量既黃咖喱汁，汁既濃度好適中，旁邊放左好多嘅外脆內軟嘅炸軟殼蟹，食嘅時候先將農夫包用刀叉切開，再點上咖喱汁，連裡面嘅配料一齊食，好好味，口感一流。
泰式黃金蝦：
黃金蝦加左鹹蛋炸過後，食落唔單至香脆，仲好惹味。配埋旁邊嘅蝦片食，味道非常夾，值得一讚。
冬陰公：
食泰國嘢又點少得飲冬陰公湯呢？鍾意食辣野既我，冬陰公係我去到泰式餐廳必叫既菜式之一。冬陰公其實係泰式酸辣湯，係由南薑、酸子、香茅、青蔥、酸檸檬、辣椒同魚露調製而成。
呢度既冬陰公湯選用原隻澳洲蝦，有分大同細兩個size，一客大嘅約有六碗左右，以明爐送上，有明火保持溫度，只係賣相已經非常震撼。
呈橙紅色嘅冬蔭公湯，上菜時熱辣辣，香料十足，仲散發出陣陣香味，配料方面亦都好足，有菇、蕃茄同蝦等等，入口又酸又辣，好開胃。
泰式青檸梳打＋椰青：
飲品我哋叫咗椰青同青檸梳打，青檸梳打甜度亦都非常適中，椰青水不但味道清甜解喝而且肉多厚厚，食辣時起左解辣作用，可以清一下熱氣，亦都為我哋嘅晚餐劃上完美句號。
地址：九龍城南角道8-10號
openrice link: https://www.openrice.com/zh/hongkong/r-小曼谷泰國美食-九龍城-泰國菜-r10154
是日慶祝家人生日，我地一早就book左位於尖沙咀新開嘅私房菜。
呢度地方雖然細，但係環境寧靜，係傾計嘅好地方。
招牌石岐乳鴿:
店員非常細心，為我們每人送上一對手套，等我地可以用手撕黎食，非常滿足。
乳鴿新鮮炸起，入口熱辣辣，外皮又薄又脆，肉汁豐富，好入味，唔洗沾椒鹽都得，作為前菜真係無得頂呀。
柚子鴨胸:
鴨胸平時就食得多，配柚子食都係第一次。肉質粉嫩綿滑嘅鴨胸上加入柚子醬，味道相當清新。
咸菜胡椒豬肚:
豬肚爽口彈牙，胡椒味剛剛好，入口唔會太辣，加入咸菜後，味道濃郁，口感豐富。
咕嚕豬頸肉:
豬頸肉本身已經高脂肪，本身覺得經油炸後應該會好油，但係用黎整咕嚕肉嘅話，可能因為加入左醬汁，彩椒同新鮮菠蘿後，所以感覺唔算太油膩，賣相亦都色彩繽紛，非常吸引。
食咕嚕肉又點可以無飯送呀，由於我地唔想太寡，所以無揀白飯，而係揀左XO醬鮑魚粒炒飯。
XO醬鮑魚粒炒飯:
加入左xo醬嘅炒飯賣相較深色，鮑魚粒相當爽脆，加埋脆肉瓜粒後相當有口感，一邊食炒飯一邊食咕嚕肉，真係完美嘅配搭呀。
今晚嘅菜式，無論味道同賣相都唔錯，睇得出廚師好有心機為我地預備，除此之外店員都好好招呼我地，令我地渡過左一個難忘嘅晚上。
地址：尖沙咀柯士甸路4號柯士甸商業中心17樓
Openrice link: https://www.openrice.com/zh/hongkong/r-皇軒私房菜-尖沙咀-粵菜-廣東-r612194
