御膳(觀塘)

私房菜既特色係為客人設計獨一無二既餐單，客人只需要係訂位時向餐廳提出各樣既要求，廚師就會為佢地設計菜單，而位於觀塘敬運工業大廈既「御膳」，離地鐵站只有五分鐘路程，事前只要係Whatsapp同店方溝通，就可以無限次改餐單，改到你滿意為止，最特別之處係收費係按人頭計，換句話講係唔需要十個八個人先可以起行，一對情侶兩個人去都得架。

餐廳雖然位於工廈裡面，但係環境乾淨寬敞，裝潢以木為主，檯同檯之間亦都有足夠既空間，無咩壓迫感，私隱度極高，令客人好似係屋企食飯一樣。

我地一行三人，叫左各式各樣既小菜同一個麵，當然仲唔少得甜品啦。

麻辣手撕雞一份手撕雞係連皮撕，但係因為份量唔多所以都唔會好肥，不過肉質香滑，加入麻辣醬後非常惹味，配埋青瓜食，有咬口得黎感覺非常清新。

什菌豆腐大蜆湯大大隻既蜆好鮮味，加埋嫩滑既豆腐同埋什菌，入口非常清甜，無咩味精。

菊子魚，東星12兩，養魚

菊子魚其實即係東星班，做法係將條魚肉割開後拎去炸，之後係上面淋柚子汁，入口酸酸甜甜，可以中和左油膩感，呢味咁多功夫既菜式，睇怕我永遠唔會係屋企自己整。

大肉蟹一只

大肉蟹有五種烹調既方式選擇: 花雕雞油蛋白蒸，避風塘炒，薑沖炒，胡椒炒，又或者四川香辣炒，而我地今日食既係避風塘炒。

上檯時大家都哇左一聲，因為真係幾大隻，同時間亦都散發出陣陣蒜香味，蟹肉多之餘入口仲非常鮮嫩，香脆可口既蒜蓉沾滿成隻炒蟹，微辣既蒜香味真係令到我地食到停唔到口。值得一讚既係店員非常細心，一早俾埋箝我地，方便我地箝爛蟹殼食。

金絲翡翠鳳尾蝦3只

呢碟菜賣相非常精緻，鳳尾蝦放係翠肉瓜上面，入口不但新鮮而且爽口彈牙。上面仲加左少少魚翅，令到佢好有口感。下層既翠玉瓜吸收晒海鮮既精華之後味道真係無得頂呀。

蒜蓉粉絲蒸蟶子皇3只

蟶子大條而且好多肉，肉質爽口彈牙，味道鮮甜，用我最愛既蒜蓉加埋粉絲去蒸簡直係絕配。粉絲吸收晒精華後，雖然有D鹹，但係都好好味。

士多啤梨骨

賣相呈鮮紅色既一字排骨真係非常吸引，排骨炸香後再加入店方自家製既士多啤梨醬汁，入口無咩油膩感，士多啤梨味香濃，食落酸酸甜甜，仲食到有少少果肉添。份量方面亦都唔少，食得多都幾攰。

蟹油銀芽炒麵

賣相有點兒似「豉油皇炒麵」，不過真係香氣十足，配料有洋蔥，芽菜，香蔥，韭黄等等，麵條炒到微脆，好夠鑊氣，雖然係用蟹油炒，但係都夠乾身，亦都唔會太油膩。

甜品

雖然到呢一刻都已經食到好飽，但係係女仕黎講，甜品點都會食得落既。是日甜品係芒果布丁，芒果肉算幾多，不過如果芒果味道可以整得再濃少少咁就更加好啦。

食左咁多野，飽到上心口，又小菜又麵又甜品，仲有用玻璃樽裝既可樂，雖然埋單每人都要$473，價格並非太吸引，但係有廚師細心嘅安排，貼心嘅服務同埋超水準既菜式，一家人食得咁開心，都算值得既。

openrice link: https://www.openrice.com/zh/hongkong/r-%E5%BE%A1%E8%86%B3-%E8%A7%80%E5%A1%98-%E7%B2%B5%E8%8F%9C-%E5%BB%A3%E6%9D%B1-%E6%B5%B7%E9%AE%AE-r136302

地址: 觀塘敬業街65-67號敬運工業大廈12樓F室

億饍 (旺角)

「億饍」呢個名聽起黎似係中餐廳，原來係有齊中/泰/越菜既餐廳黎既，可能因為咁，佢叫做「億饍-Multi Taste」，代表住有各式各樣既菜式供應，正正因為咁既緣故，呢間餐廳就非常適合有選擇困難症，咩都想試d既我地啦。

位於譽發廣場4樓既「億饍」，係油麻地地鐵站行過去只係幾分鐘，非常方便。座位有分室外同室內揀，由於天氣熱，加上唔想吸二手煙，我地當然揀坐室內啦。

泰式冬蔭公 :
鍾意食辣野既我，冬蔭公係我去到泰式餐廳必叫既菜式之一。冬蔭公其實係泰式酸辣湯，係由南薑、酸子、香茅、青蔥、酸檸檬、辣椒同魚露調製而成，呢度既辣度有分小辣，中辣同大辣。因為要就怕辣既朋友，所以唯有揀左個小辣。

上菜既時候真係有點兒嚇親，因為非常大鍋，足足有4碗份量，鍋底仲點住火，等我地可以慢慢食又唔駛怕個湯會好快凍，個湯滾起時仲散發出陣陣香味，真係令人食慾大增。配料方面亦都好足，有菇、蕃茄同蝦等等，入口酸而微辣，好好味。

咖喱雞肉煲/蒜蓉包 :
加左椰汁整成既咖喱雞肉煲真係份外香，入口微辣，鍾意食辣既我認為可以再辣少少，此外，雞肉同薯仔份量亦都好多，咖喱汁用黎配蒜蓉包簡直係一流呀。

泰式炒金邊粉 :
金邊粉份量對於兩個人黎講都算好多，配料有扎肉、韭菜、芽菜、蝦同埋蛋，入口唔算油膩，不過個人認為味道可以整得更加濃，多加醬汁去炒 ，會令賣相更加吸引。

串燒雞/豬 :
雞肉同豬肉醃過後再燒，火喉剛剛好，入口唔會太乾身，雞肉入口都幾嫩滑，點埋沙嗲醬食，味道一流。

芒果椰汁黑糯米 :
黏軟質感而又充滿椰香既糯米飯淋上香濃既椰汁，再加埋又新鮮又香甜既芒果肉，一啖糯米飯一啖芒果食，就算真係幾飽都會食得落呢味甜品。

今次只係試左泰國野，下次黎既時候要試埋佢地既中式同越式菜呀。

Openrice link: https://www.openrice.com/zh/hongkong/r-%E5%84%84%E9%A5%8D-%E6%97%BA%E8%A7%92-%E6%B3%B0%E5%9C%8B%E8%8F%9C-%E6%B9%AF%E5%93%81-r522432

地址: 旺角彌敦道558-560號譽發廣場4樓

EAT ME Bar & Restaurant (旺角)

年頭既時候同朋友黎過呢度食晚飯，覺得非常超值，今日趁有舊同學聚會，一於一行四人黎再食過啦。

今次既餐牌係以Movenpick雪糕黎做主題，可能因為咁，餐廳多達八成都係年輕女仕。

有選擇困難症既我地，費事諗食咩，一於叫個四人餐，有湯有主菜有甜品有飲品，加$48仲有個小食拼盤添。

是日餐湯係西蘭花忌廉湯，西蘭花味好重，入口香滑，稀稠度剛剛好。

4 人小食拼盤 :  

小食拼盤有腸仔、雞翼、魚柳、薯角同炸蝦，炸得非常好脆，不過雖然話係四人拼盤，但唔係每一樣食物都有四件，唔係咁易分。

澳洲 T 骨牛扒配蒜蓉汁 : 

T骨扒好大塊，份量十足得黎肉質亦都鬆化美味。五成熟既牛扒，切開後肉質呈嫩紅，入口有肉汁，帶少少油脂，食落好香口。伴碟既薯角亦都整得非常香脆。

香草海鮮忌廉汁天使麵 :
天使麵唔太油，口感較軟，海鮮份量亦都算足料，天使麵亦都因為幼既關係所以吸晒香草海鮮忌廉汁既味度，非常香口，令人食到停唔到口。

蒜泥白酒大蜆煮扁意粉 :
意粉同白酒大蜆係分開上，由於意粉本身無咩汁，分開上賣相睇落比較清淡。不過用蒜蓉同白酒煮成既大蜆，入口清甜，用醬汁淋上意粉上面食，味道剛剛好。

香煎挪威三文魚配龍蝦忌廉汁 :

厚切既三文魚灑上粗鹽煎過後，賣相呈金黃色，入口外脆內滑，配埋龍蝦忌廉汁食真係好好味。至於伴碟既薯蓉亦都非常香滑，牛油味又唔重，值得一讚。

餐飲方面可以選擇餐牌上22蚊或以下既飲品，叫其他飲品只需要俾返差價就得。我地分別叫左玫瑰蘋果醋、茉莉蜜糖梳打、藍糖奇異果梳打同埋抹茶鮮奶。

茉莉蜜糖梳打 :

茉莉花茶加入蜜糖同梳打水打過後，入口非常清新，甜甜地，亦都帶輕輕既花香味，夏日炎炎飲真係可以消暑。

抹茶鮮奶雖然無漂亮既拉花，但係入口非常香滑，抹茶味好重，非常香濃，如果想吸引客人影相，建議整個拉花，咁相信好多人會即時「相機食先」。

飲品飲到一半既同時，我地期待已久既Movenpick雪糕終於到喇，共有四種味道，分別係士多啤梨，朱古力，雲呢拿同埋奶凍味，真係帶俾我地女仕們難忘既晚上。

openrice link: https://www.openrice.com/zh/hongkong/r-eat-me-bar-restaurant-%E6%97%BA%E8%A7%92-%E5%A4%9A%E5%9C%8B%E8%8F%9C-r520332

地址: 旺角彌敦道560號譽發廣場5樓全層

阿麥廚房 (銅鑼灣)

相識多年嘅好姊妹生日，想搵個環境好嘅地方同佢慶祝，平時放工已經成日同佢來銅鑼灣，今次特登book左位於加路連山道嘅阿麥廚房。

由銅鑼灣站F1出口行過去都要大約10分鐘，雖然地點旺中帶靜，但係都好好生意，好彩事前有訂枱。

餐廳門口裝修得好靚，入面燈光柔和，幾有格調，帶俾人好舒服嘅感覺。

Set dinner包頭盤、湯、主菜同飲品，大家可以按個人口味upgrade湯同頭盤 。

香煎法國鵝肝配焦糖酒醋草莓 :
鵝肝煎得甘香, 放係薄脆既麵包上食，好有層次感，配埋加左草莓既酒醋，味道相當夾，做法都好有創意。唯一美中不足既係伴碟既沙律唔夠汁，建議可以用柚子汁，味道出之餘仲好開胃。

大蝦占米多 :

起左蝦肉切粒後既蝦身釀入蝦醬，洋蔥同蘑菇等等既調味料，非常惹味，蝦肉亦都爽口彈牙。

黑松露菌忌廉湯 :

上檯時已噴出陣陣黑松露香味既忌廉湯，入口香滑而且濃郁，稀稠度剛剛好，入口有少量蘑菇碎，幾有口感，配埋又熱又脆既法包食，令人非常滿足。

蟹肉南瓜忌廉湯 :
南瓜湯味道濃郁，入口好滑，加埋蟹肉，口感豐富，海鮮味相當鮮甜。

帶子黑松露野菌意大利飯 :

意大利飯軟硬適中，吸收晒黑松露醬汁之後真係好香滑，令人食到停唔到口，帶子熟度亦都剛剛好，爽口彈牙，口感一流。

德國式燒鹹豬手 :
份量驚人既燒鹹豬手，上檯時真係令我地嘩一聲，因為除左巨型豬手之外仲有大量薯條同沙律。

鹹豬手採用燒既方式炮製，豬皮燒得好香脆，內裡既肉有咬口得黎都好鮮嫩，顏色呈嫩紅，配埋香濃既燒烤汁，味道相當吸引。


伴碟既薯條亦都炸得香脆，沙律都好新鮮，不過個人認為可以轉做新薯同炒雜菜，一黎唔會同頭盤重覆，二黎感覺會健康d。

食完晚餐後我地飲返杯檸茶同杏仁露，為我地既晚餐劃上句號。

呢度食物同環境都唔錯，平均消費300 蚊鬆d，地點旺中帶靜，適合約會中既男女，食飽過後可以慢慢散步返去地鐵站。

Openrice link: https://www.openrice.com/zh/hongkong/r-%E9%98%BF%E9%BA%A5%E5%BB%9A%E6%88%BF-%E9%8A%85%E9%91%BC%E7%81%A3-%E8%A5%BF%E5%BC%8F-r21180


地址: 銅鑼灣加路連山道9號地舖

The Right Place (尖沙咀)

尖沙咀一帶近年開多左唔少酒吧餐廳，除左酒之外仲會提供各式各樣既西餐小食，位於寶勒巷既The Right Place，環境同氣氛都唔錯，具有中西合璧既感覺。

好姊妹難得既聚舊，梗係想食好野，我地一行四人，唔大食既我地唔叫得多，所以都係叫左3個主菜同一個沙律。

凱薩沙律配煙三文魚 : 

凱薩沙律伴有大量芝士，唔好芝士既我認為可以落少d，不過三文魚份量亦都唔少，沙律菜新鮮之餘醬汁份量亦都剛剛好，配埋麵包粒，入口好有口感，令人食得好開胃。

日式照燒茄子美國安格斯牛肉芝士漢堡 :

漢堡賣相非常吸引，有別於平時食到既漢堡，呢度食到既係用竹炭包整成，入口熱辣辣而且脆身，夾住木魚、茄子同安格斯牛肉，做法好有創意。茄子加入左照燒汁烹調過後好有日式風味，而安格斯牛肉入口亦都非常juicy，配埋即叫即整，又熱又脆既薯條簡直係無得輸。

西班牙辣肉腸茄子半乾車厘茄羅勒蕃茄汁扭捲粉配水牛芝士 :

扭捲粉平時唔多地方食到，感覺非常新奇，醬汁既做法係用蕃茄同茄子打成蓉，再加入西班牙辣肉腸，入口非常惹味，而且好有口感，值得一讚。

低溫慢煮烤西班牙黑毛豬鞍伴黑毛豬辣肉腸繪白腰豆及燒新薯:

低溫慢煮烤至7成熟既黑毛豬鞍，唔單止肉嫩無渣，而且仲好淋，入口亦都好juicy，點埋伴碟既醬汁，口感同味道都相當唔錯。

呢度無論食物、環境同服務都唔錯，係放工後或者星期六日同朋友黎食飯飲野既好去處。

openrice link: https://www.openrice.com/zh/hongkong/r-the-right-place-%E5%B0%96%E6%B2%99%E5%92%80-%E5%A4%9A%E5%9C%8B%E8%8F%9C-%E4%B8%B2%E7%87%92-r499592

地址: 尖沙咀寶勒巷17-19號地下

越南麵包 (九龍城)

九龍城有咩好野食？好多人一諗就諗起泰國野。其實邊個話呢度只係有泰國野食架？除左泰國野，九龍城仲有好多出名既小店添。

位於九龍城龍崗道既越南麵包，主打越式三文治，可能因為天雨關係，星期五晚飯時段都唔算好多人，未需要等位。

餐牌上有各式各樣既越式三文治同埋小食。我地一行二人，揀左兩款唔同既三文治同埋一個小食。

烤豬肉紙卷 : 

米紙卷入面包左炸豬肉、青瓜、蘿蔔絲同粉絲，材料新鮮，入口相當清爽，點埋d汁一齊食，入口酸酸甜甜咁都幾開胃。可惜包得唔夠實，食起上黎有d狼狽。

咖哩雞麵包 :

法包烘過之後外脆內軟，切開後加入咖哩雞，上面加少少洋蔥整成，做法似係好簡單，利潤都算幾深。

咖哩既辣度可以自行選擇，我地今次揀左小辣，咖哩味非常香濃，辣度剛剛好，落單既時候仲可以要求店員切開幾多件，真係服侍周到呀。

法式油封鴨脾麵包(低溫慢煮十小時) : 

鴨脾慢煮十個鐘之後肉質鮮美嫩滑，放入烘好既麵包入面，加埋洋蔥、生菜同埋沙律醬，賣相相當吸引，入口一d都唔油膩，值得一讚。 

呢度環境同服務都唔錯，食完都唔會趕人走，係同朋友傾計既好地方。

Openrice link: https://www.openrice.com/zh/hongkong/r-%E8%B6%8A%E5%8D%97%E9%BA%B5%E5%8C%85-%E4%B9%9D%E9%BE%8D%E5%9F%8E-%E8%B6%8A%E5%8D%97%E8%8F%9C-%E9%BA%B5%E5%8C%85%E5%BA%97-r432842

地址: 九龍城龍崗道49號地下