The Captain's House (尖沙咀)

Shake Shake 薯條就食得多，Shake Shake 海鮮你又食過未呢？






The Captain's House有兩間分店，一間係尖沙咀，另一間係灣仔，而佢地最出名嘅，就係Shake Shake海鮮袋- Seafood Platter啦，既然一場黎到，又點可以唔試下呢?



Seafood Platter有分三款，分別可以揀3款、5款同埋8款海鮮，由於我地只有兩個人，所以就揀左最細嘅3款試下啦。

海鮮選擇多達九款，我地揀左海蝦，青口，同埋扇貝。

醬汁方面亦都有三個選擇，分別係檸檬牛油汁，卡薑蒜蓉汁同埋胡椒牛油汁。由於我地都喜歡酸酸地味道，所以就揀左味道較為清爽嘅檸檬牛油汁啦。

落單之後，店員就俾左圍裙同手套我地，咁樣就唔怕件衫同對手污糟晒啦。





海鮮以一個網袋上檯，裡面盛載住海鮮同醬汁，店員會係你面前即場shake shake後再解體。打開網袋時散發出陣陣鮮味，海鮮味道鮮甜，肉質清爽，份量算多，海蝦有10隻，青口10隻，扇貝有4件，除此之外，仲配有好幾件粟米，腸仔同埋薯仔，絕對可以當主菜黎食架，店員仲介紹我地加蒜蓉包點醬汁食，不過由於已經配有薯仔，為免食唔晒，我地最後都係無要。













小食我地叫左賣相非常別緻突出，可以俾我地「相機食先」嘅「船長摩天輪」。

摩天輪有5卡，每卡都盛載唔同既食物，亦都會因應每卡既重量而轉動，最重果卡係最底，好得意。摩天輪上面大部分都係炸物，分別有爆谷蝦、炸蠔、蟹肉薯波、鮮魷魚圈、魚手指、薯條同埋沙律。炸物熱辣辣又香脆，炸漿夠薄身，咬落脆中帶些爽口，只不過係比較熱氣同無益啫。




飲品方面我地試左熱果茶-apple cider，上菜時以一杯普通果茶上，旁邊配有蜜糖同檸檬，客人就可以根據自己嘅口味黎調味。

加左蜜糖同檸檬嘅apple cider有清香嘅蘋果味，入口酸酸地，非常開胃。

呢度無論食物，服務同環境都唔錯，下次可以約多幾個朋友黎，咁就可以試多D唔同嘅野食啦。

Openrice link: https://www.openrice.com/zh/hongkong/r-the-captains-house-%E5%B0%96%E6%B2%99%E5%92%80-%E8%A5%BF%E5%BC%8F-%E6%B5%B7%E9%AE%AE-r177602

地址: 尖沙咀厚福街8號H8 18樓

地中海休閒餐廳 (九龍塘）

講起大學校園餐廳，好多人都認為好食極有限，最近就經朋友介紹黎左呢間位於浸大嘅地中海餐廳Bistro Bon食晚飯。

小店位於九龍塘聯福道，地鐵站行過去都要15分鐘左右，店內燈光柔和，環境都算舒適，空間寬敞。

呢度雖然無set dinner，但係每款主菜都可以加$38升級要另配餐湯同餐飲，更可以加$68有齊前菜、餐湯同餐飲，選擇非常彈性。

我地一行四人，叫左4個main course，全部都upgrade要埋前菜，餐湯同餐飲。

是日餐湯：
是日餐湯係法式洋蔥湯，入口味道香濃，湯中間有塊法包，吸收晒湯嘅精華後非常好味。

餐湯仲配有餐包，每款都唔同，入口熱辣辣，食落外脆內軟。

飲完湯後，前菜好快就送上啦，四款當中我會推介以下兩款：

三文魚他他，藜麥，黑魚子，印度脆餅 :
呢個前菜賣相精緻高貴，非常吸睛，三文魚他他嘅鮮味配上鹹鹹地嘅黑魚子，味道好夾，藜麥清清淡淡，亦都有咬口，配上印度脆餅，作為頭盤實在完美嘅配搭。

魷魚配西班牙辣肉腸沙律：
微暖嘅魷魚加彈牙濃香嘅辣肉腸，配上爽脆嘅沙律菜，淋上黑醋後，入口清新，食落非常開胃。

食完前菜，當然就係輪到主角： 今晚嘅主角啦，值得一讚嘅有佢地嘅Pizza同埋意粉。

德薩斯州式BBQ烤雞薄餅： 
薄餅餅底整得唔錯，好脆口，用左BBQ醬做底醬，非常惹味，配上香脆嘅烤雞，簡直係完美嘅配搭。

紅蝦西班牙辣肉腸香蒜辣椒意粉：
呢味菜一上檯時真係令我地嘩一聲，紅蝦唔單止新鮮大隻，入口仲非常彈牙，啖啖肉，加入左香蒜炒嘅意粉都頗乾身，入口彈牙，味道微辣，好開胃，令人一啖一啖咁食到停唔到口。

Set Dinner包咖啡或茶，亦都可以以優惠價upgrade去佢地嘅特飲。

係餐牌上見到杯Ice butterfly pea latte，朋友話蝶豆花屬於芳香花朵，大部分花都有芳香油，令人放鬆鎮靜，有助安眠、醒腦提神，紓緩情緒，仲對紓緩眼睛疲勞有一些幫助添，咁我就即管試下啦。

加入左蝶豆花嘅latte，味道唔錯，賣相一流，真係令人忍唔住「相機食先」。

係九龍塘區咁舒適嘅環境下食到四度菜嘅西餐，每人都只係二百幾蚊，都算係非常超值啦。

Openrice link: https://www.openrice.com/zh/hongkong/r-地中海休閒餐廳-九龍塘-多國菜-r183639

地址：九龍塘聯福道32號吳多泰博士國際中心地下

辣吧 （尖沙咀）

諾士佛台除咗有酒吧之外，仲有好多唔同嘅餐廳，今日放工後去咗一間食川菜嘅餐廳，主打全港首創銅爐香鍋。

餐廳地方都算寬敞，無論裝修同埋擺設都好獨特，好有中國色彩，紙巾同濕紙巾都充滿玩味，門外亦都掛左好多明星合照相添。

既然呢度出名食銅爐香鍋，我地又點可以錯過呢? 

個鍋最多可以要四層, 最少就一層，第一層$288, 第二層開始就每層$200，可以揀牛、雞、豬、田雞、鮑魚、海中蝦、小龍蝦、海鱸魚、白鱔同埋花甲王，每層的煮法都可以揀，分別係老干媽爆炒、香濃麻辣、滋味蒜香、惹味京燒同埋懷舊紅燒。

我地三個人黎，擔心食唔晒，打算叫兩層，分別係雞同埋蝦，煮法就分別係香濃麻辣同滋味蒜香。

雞分別有鮮雞件、鮮雞雜同埋酥炸雞皮，而海中蝦就有接近24隻。

個鍋上檯時真係大開眼界，雖然食物係廚房已經煮熟，但係都以炭去保持溫度，亦都令到食物越黎越入味。

隨機配菜仲有雜菇、西蘭花、椰菜同白蘿蔔。

總括黎講，呢度嘅海鮮同埋肉類質素都唔錯，煮得都相當入味， 辣度亦都適中，啱晒好辣嘅我地。

台灣一口蜜汁腸/台灣一口黑椒腸:
香腸外皮燒得十分香脆，蜜糖同黑椒味都相當香濃，唔錯。

蟶子皇:
蟶子大大隻，燒得剛剛好，入口juicy，一d沙都無，好惹味。

救火玫瑰冰粉：
食完濃味嘢，食返啲冰粉，可以清清口裡嘅味，真係好舒服，亦都為我哋嘅晚餐畫上完美句號。

Openrice link: https://www.openrice.com/zh/hongkong/r-辣吧-尖沙咀-川菜-四川-酒-r575176 

地址：尖沙咀諾士佛臺1號1樓

十二味 (尖沙咀)

一向好喜歡食酸菜魚嘅我，近年轉向內地市場，選擇北上試內地嘅店鋪，一黎價錢更加親民，二黎味道更加正宗。

近月比較忙，唔係咁多時間北上，唯有係香港睇下邊度有好野食啦。

「十二味」目前係香港有三間分店，最近亦都係尖沙咀酒吧一帶嘅「赫德道」開左新分店。

旗艦店依然由米芝蓮大廚主理，川菜保持一貫水準之餘，更加入江浙菜元素，令你可以感受麻辣嘅酣暢淋漓，亦可被溫婉清甜嘅江南味道包圍。

餐廳面積算大，仲有一個小舞台，上面有齊晒咪，結他，電子琴等等，旁邊仲有個大螢幕播放住KTV，聽店員某d日子係會有live band表演架。

有別於一般餐廳，入座後店員無俾餐牌我地，仲同我地講叫我地scan QR code落單添，呢個方法除左較為環保，唔洗印咁多餐牌之外，仲可以節省人手，預留多d職員招呼客人。

呢度咁出名酸菜魚，又點可以唔試下呢？

人見人愛酸菜魚（配粉條）:

酸菜魚可以加配粉條，可以揀唔同辣度，想接受挑戰嘅我地揀左要中辣。個煲裡面有酸菜、魚、同埋好多粉條，兩個人食份量相當適中。新鮮嘅魚片入口好滑，無咩骨，整體味道唔錯，辣度剛剛好，食落都幾開胃。

既然一煲酸菜魚可以餵飽我地，其餘兩樣野就叫左d唔飽肚架啦。

川式口水雞：

啖啖肉嘅雞件，肉質非常嫩滑，亦都唔算多脂肪。秘製嘅麻辣醬汁紅油比例剛好，入口又麻又辣，聞落好香，辣度適中，雞肉吸收晒d醬汁後，非常入味。

燒椒伴鮮菌：

食左咁多辣野，都係時候食d無咁濃味嘅野啦。

豆角、窩筍絲、辣椒同鮮菌加入左秘製醬汁拌後味道非常好味，算係一道唔錯嘅涼拌菜。

埋單每人＄200都唔洗，可以食到咁正宗嘅川菜，算係性價比高。

openrice link: https://www.openrice.com/zh/hongkong/r-十二味-尖沙咀-川菜-四川-r637487

地址：尖沙咀赫德道1-3A號利威商業大廈地下6號舖及1樓