一起果醬 (尖沙咀)

今個星期有兩日公眾假期，要返工果三日真係特別無mood 做野，一放工就同朋友一齊黎食飯啦，上次就係黎下午茶食吐司飲花茶，今次想試下佢地既晚餐。

位於松山道既「一起果醬」，佐敦站行過去都係5分鐘左右，餐廳用湖水藍為色調，帶俾人好舒服既感覺，同朋友坐低傾計真係唔錯。 

Apple Pie: 呢杯cocktail 似係蘋果汁加少少酒，再加少少肉桂粉咁，所以飲落有D似蘋果pie 同apple crumble 既味道，可能因為咁所以杯飲品叫Apple Pie，鍾意食蘋果pie 既我當然覺得呢杯飲品唔錯。

White Sangria: 味道似係白酒再加入雜果咁，個feel 有D似fruit punch 咁，D 雜果仲要係有牙簽穿住咁，好骨子，1 Jar 大約有4-5杯。 

Berry Toffee 個feel 有D 似smoothie 加少少酒咁。 

頭盤既沙律用既dressing唔係一般既黑醋，而係帶有少少柚子肉既汁，酸酸地，好開胃。 

野菌忌廉湯，好多菇，好好味。 

香煎海虎蝦伴龍蝦汁意粉: 隻蝦大大隻，肉質亦夠鮮嫩，龍蝦汁方面味道濃郁，整體味道很合襯。 

香煎帶子南瓜意大利燴飯: 意大利飯濕濕地，湯汁都幾creamy，加埋帶子同南瓜，口感唔錯。 

慢煮極黑毛豬扒配肉桂蘋果汁: 肉質鮮嫩，肉汁都夠多，賣相唔差，不過如果多返d配菜既話會健康D，如果可以加少少紅蘿蔔片既話仲可以令到客人影既相更加靚添。 

慢煮三文魚配熱情果牛油汁: 三文魚用慢煮方式煮，煮得夠淋同滑，加埋自家製既熱情果醬和牛油煮成既醬汁，酸酸地，幾開胃。 

果醬九宮格多士: 烘脆左既多士分開九小格，就好似我地細個寫毛筆字既九宮格咁，每格都有一款自家製既果醬，每種果醬裡面都有D果肉粒，香脆既多士配上甜 甜既果醬，口感唔錯，色彩繽紛，賣相都好吸引。唯一美中不足既就係唔知果九種果醬分別係咩味，尤其係係燈光比較暗既環境下，如果可以用張牛油紙托住塊多 士，上面寫住各種果醬既種類，就真係完美啦。。 

果醬雪糕窩夫餅係窩夫上面配搭自選既果醬，再係酸酸甜甜窩夫上加個雪榚糕球，旁邊再加D鮮果襯托，一酸一甜，一熱一冷，真係好好味。

openrice link: http://www.openrice.com/zh/hongkong/r-%E4%B8%80%E8%B5%B7%E6%9E%9C%E9%86%AC-%E5%B0%96%E6%B2%99%E5%92%80-%E8%A5%BF%E5%BC%8F-all-day-breakfast-r452856

地址:  尖沙咀松山道15-17號地下D舖

薩莉亞意式餐廳 (荔枝角)

我一向都好喜歡呢間餐廳，對於我黎講，呢間餐廳真係平靚正，可惜即使全港有成22間分店，我平時都無咩機會經過，旨因無一間係油尖旺同銅鑼灣區。今日係中秋節，飯後去附近賞月，所以就黎左美孚呢間分店食晚飯。

可能好多人一家大細食中餐做節，所以夜晚7點幾黎到都唔洗點等位，仲記得上一次去到九龍灣分店見到咁多人排隊之後都即刻走左。

兩個人叫左一個意粉，一個意大利飯，一個PIZZA，一個小食同兩個湯，對於餓到7彩既我地，有少少眼闊肚窄，好彩最後食得晒。

個湯分別係粟米忌廉湯同周打海鮮湯，個粟米忌廉湯我每次黎都會叫，因為覺得佢好香好滑，同行既朋友就比較喜歡個周打海鮮湯，覺得比較有口感。不過個湯只係微暖，唔似係煲滾再上碟。 

辣味雞翼: 辣辣地, 煎得夠金黃，咬落去都幾JUICY，作為餐前小吃非常開胃。可惜上菜時當然無餐牌既圖片擺得咁精緻。 

地中海海鮮焗飯: 都幾多海鮮，有魷魚，蝦，蜆，同埋青口，D蕃茄汁都幾好味，D飯吸哂D海鮮汁，都算唔錯。 

青醬邦哥尼意大利粉:醬汁味道唔錯，蜆也有鮮味，而且意粉軟硬適中，好吃呀！ 

香辣腸PIZZA: 麵包底鬆軟, 上面舖了芝士同香辣腸。芝士份量比一般出面食到既PIZZA 少, 對於唔太好芝士既我當然係一件好事。 

飲品吧成人每位都係12蚊，有汽水，檸茶，咖啡，美綠等等既飲品，咩都有咁，係無健兒百事，所以最後都係揀飲水算。 

openrice link: http://www.openrice.com/zh/hongkong/r-%E8%96%A9%E8%8E%89%E4%BA%9E%E6%84%8F%E5%BC%8F%E9%A4%90%E5%BB%B3-%E8%8D%94%E6%9E%9D%E8%A7%92-%E6%84%8F%E5%A4%A7%E5%88%A9%E8%8F%9C-%E8%96%84%E9%A4%85-r186870

地址:  荔枝角寶輪街9號5樓5A舖

日之食放題館 (旺角)

今日第一次黎到日之食，其中一個原因係見到除左一般放題食到既野之外，仲有燒物同鍋物食。

燒物除左牛肉，豚肉，羊肉，雞同海鮮之外，仲有菇同瓜等等既蔬菜，個人認為最好味既都係雞肉，醃得好入味又新鮮，可惜我胃口唔大，有太多野想試，所以無ENCORE。 

刺身方面總共有12款，全部都好新鮮又厚切，我既最愛當然都係三文魚，甜蝦同埋八爪片，實在好好味，所以我地叫左好幾轉。 

天婦羅方面我地叫左蕃薯，茄子同埋蝦。幾樣都炸得好香脆，蝦肉都好新鮮！ 

芝麻醬素麵其實好好味，特別係個麻醬，可惜份量有點兒過多，同行既朋友又唔食，細食既我如果成份食晒既話真係可以唔洗食其他野架啦。 

醬汁茄子有點兒過硬，有改進既空間。

蟹子沙律，八爪魚粒，螺肉，芝麻八爪魚仔，芝麻海帶絲，呢5樣都好好味。 

蟹籽壽司+花之戀: 蟹籽壽司非常好味，紫菜一D都無淋到，至於花之戀就好特別，上面加左一D芒果蓉，同一般既有少少唔同。 

泡菜炒年糕: 份量唔算多，剛剛好，2個人食唔會過飽。 

 

有咁多野食，亦都有好多野未試，特別係鍋物，下一次黎一定要試下佢個沙律巴同埋味噌蟹鍋呀。 

openrice link: http://www.openrice.com/zh/hongkong/r-%E6%97%A5%E4%B9%8B%E9%A3%9F%E6%94%BE%E9%A1%8C%E9%A4%A8-%E6%97%BA%E8%A7%92-%E6%97%A5%E6%9C%AC%E8%8F%9C-%E6%97%A5%E5%BC%8F%E6%94%BE%E9%A1%8C-r15840

地址:  旺角彌敦道613號飛達商業中心3樓

高麗軒韓國料理 (尖沙咀)

一向都喜歡食韓國野既我，今日同朋友兩個人放工之後就黎食飯。

晚市時段收費每位$208，有烤肉同埋1 D熟食，包括湯，年榚，飯等等，汽水都係任飲既，如果另加$38仲可以額外點選「特別推薦」餐牌上面既食物，有肉眼扒，排骨，帶子，帆立貝，雜錦海鮮拼盤，烤牛肉拼盤等等既食物。

坐低之後侍應就馬上俾左D前菜我地，有泡菜，青瓜，豆角等等，本人最鍾意既就係泡菜，貪佢夠辣又爽口，其次就係拍青瓜，可以係炎夏中帶黎清新既口感。

 

熟食我地叫左泡菜煎餅同埋人蔘雞湯。

人蔘雞湯都幾大碗下，應該都有成4碗咁多，味唔太濃，裡面有人蔘片，紅棗，葱同雞。上菜既時候仲係熱騰騰。

   

泡菜煎餅夠香脆，外脆內軟，辣味夠濃郁，有令人一件接一件吃的衝動，可惜煎餅比較飽肚，唔敢食太多，怕食唔落其他野。

至於要燒既食物，我地叫左個海鮮拼盤，有蝦, 帶子, 青口, 魚，魷魚，帆立貝等等。咁多樣海鮮當中我自己最欣賞既係帆立貝，夠大隻之餘仲好鮮甜。

除此之外我地仲叫左五花腩，牛脷，豬肉同雞肉。

五花腩唔算太肥，但都幾好味，脆口又香口。

雞肉算幾滑同醃得幾入味。豬肉肉質同調味都好好。

牛脷我自己就唔食既，但朋友食過就覺得佢爽脆，快熟得黎又軟又多汁。

 下次黎要試埋個湯同年糕。

openrice link: http://www.openrice.com/zh/hongkong/r-%E9%AB%98%E9%BA%97%E8%BB%92%E9%9F%93%E5%9C%8B%E6%96%99%E7%90%86-%E5%B0%96%E6%B2%99%E5%92%80-%E9%9F%93%E5%9C%8B%E8%8F%9C-%E7%87%92%E7%83%A4-r74018

地址:  尖沙咀金巴利道46-48號地庫

Mini Club (銅鑼灣)

最近係FACEBOOK 見到呢間新開既BAR，仲有個桃紅色的巴黎鐵塔倒轉裝飾，真係好想黎見識下同影下相，所以就約左好朋友黎HAPPY HOUR啦。

上到黎，覺得環境真係唔錯，都幾適合朋友們放工傾計既地方。

坐低之後侍應遞來Ipad Menu，我地叫左2杯cocktail，分別係Apple Summer 同埋 Jim Jim。Apple Summer 係蘋果同桃汁再加Vodka，至於杯Jim Jim就係荔枝加綠茶再加Vodka，2杯cocktail酒味都唔太重，女仔飲都幾適合。 

之後我地叫左4隻生蠔同埋個小食拼盤。唔講都唔知原來生蠔都有咁多品種，望住個MENU真係唔識揀，最後係職員介紹下揀左2隻來至澳洲既 Tasmanian同埋2隻來至法國既Gillardeau，2款都好新鮮，Tasmanian比較重海水味，一入口會比較咸，肉質帶爽脆。至於 Gillardeau，口感比較爽，海水味較輕。雖然D 蠔都有茄汁配，但係個人認為唔點醬先至可以食到佢真正既鮮味。 

小食拼盤有3個選擇，我地最後揀左個德國腸拼盤。個拼盤有6條腸，分別有慕尼黑白腸，香草肉腸，煙辣椒腸，原味紐倫堡肉腸，煙莎樂滋米腸。當中香草肉腸最 好味，而煙辣椒腸就最惹味，但都幾辣下，鍾意食辣既人一定覺得好刺激，可惜佢既辣度未必真係人人可以接受到。除左腸仔之外，仲有酸瓜同沙律菜。 

之後黎既係小食: 炸魚柳伴薯條配沙律菜。魚柳炸得夠香，可惜炸漿並非是傳統英式的厚身炸漿，但又食唔出用D咩整，食落有D熱氣既感覺，至於薯條炸得比較香脆。呢個所謂既小食，其實份量真係有MAIN COURSE咁大。 

食完之後仲有個龍蝦汁海鮮意大利飯，飯質地適中唔算太硬，都幾易入口，可惜龍蝦汁味道偏淡，海鮮都比較少，如果有多D海鮮會更加好。

 

依家happy hour仲會有８折優惠，今餐埋單最後連加一TOTAL $763，有咁既環境咁既野食仲可以坐咁耐，算唔錯架啦。

openrice link: http://www.openrice.com/zh/hongkong/r-mini-club-%E9%8A%85%E9%91%BC%E7%81%A3-%E8%A5%BF%E5%BC%8F-%E9%85%92-%E9%9B%AA%E8%8C%84-r456843

地址:  銅鑼灣駱克道487-489號駱克駅1樓

時新快餐店 (紅磡)

呢間快餐店係OPENRICE黎講都算幾出名，可惜平時無咩機會黎到，今日剛好要黎黃埔做野，LUNCH TIME就一個人過黎試下。

唔係講笑，上一次黎呢到幫襯已經係2009年既事，果時仲要係夜晚黎。今次係平日既LUNCH TIME，12點9到黎到已經見到好多人，入到去拿拿臨落ORDER，可惜只係叫左一個魚柳包同一杯凍啡，其實都好想食佢個薯條，不過自己一個又食唔晒，所以無叫到。

魚柳包係用嘉頓最傳統果隻有芝麻係面既漢堡包，裡面夾左塊新鮮炸又夠香既魚柳，又有魚味又淋滑，醬汁係可以自選既，除左有最CLASSIC 既沙律醬之外，仲可以揀茄汁，咖哩汁同埋黑椒汁，魚柳同包大小相約，醬汁份量適中。

本人唔食牛肉，所以無咩包可以揀，可次黎可能試下佢D飲或意粉。

Openrice link: http://www.openrice.com/zh/hongkong/r-%E6%99%82%E6%96%B0%E5%BF%AB%E9%A4%90%E5%BA%97-%E7%B4%85%E7%A3%A1-%E6%B8%AF%E5%BC%8F-%E6%BC%A2%E5%A0%A1%E5%8C%85-r18220

地址: 紅磡黃埔街1A地下

Goobne Chicken (尖沙咀)

一直都好喜歡食韓式炸雞既我想黎呢間餐廳試好耐架啦，但係知道呢到電話訂座比較困難，所以決定傍晚5點幾黎碰下運氣。

5點10到黎到，餐廳已經唔係好多位淨啦。坐低後我地首先叫左2杯野飲: 1杯Blue Orangeade同埋1 杯Somersby Apple cider Rita。

Somersby Apple cider Rita 應該係呢到既招牌飲品，因為見到幾乎每檯都有人叫。呢杯特飲只係賣相已經夠吸引，有型到平時好少飲有酒精既飲品既我都要叫黎試下同影下相。

呢個特飲底層有D類似梳打水+檸檬沙冰咁，再插入一枝原裝既APPLE CIDER，酸酸甜甜咁，酒味很輕，大大杯，1個人未必飲得晒，用黎送炸雞都幾解渴同下火。

至於Blue Orangeade，呢杯係一杯藍色狀既沙冰，似係濃縮橙汁，但同時帶有少少檸檬味，用黎送炸雞既感覺簡直一流。

海鮮鍋巴湯: 海鮮湯係微辣既，裡面有大量青口，蝦，雜菌同菜，相當豐富。鍋巴睇落有少少似童年時食既暴暴飯焦咁，但浸左係湯到一段時間後都變腍了。如果可以用碟另上就會更加好啦。

香酥烤雞: 落單果時都唔知原來一份雞係咁大份，上菜時見到有成十幾件真係有少少震驚，2個女仔食真係淨低好多食唔晒。呢個烤雞係用焗既方法，所以唔會太油，雞肉亦都好嫩滑同香口，裡面都幾JUICY，除左配上醃蘿蔔，仲配上辣同唔辣既醬汁各一。

值得一讚既係餐桌上有食用夾， 叉同骨筒，非常方便食客，唯一唔好既就係餐桌唔夠大，放左食物同飲品之後空間比較少。

Openrice link: http://www.openrice.com/zh/hongkong/r-goobne-chicken-%E5%B0%96%E6%B2%99%E5%92%80-%E9%9F%93%E5%9C%8B%E8%8F%9C-r188593

地址:  尖沙咀赫德道4號The Hart 2樓