陸陸雞煲火鍋 (旺角)

仲記唔記得90年代有個電視節目叫六六無窮呢? 仲記唔記得講咩呢?

六六無窮就聽過啦，咁陸陸雞煲又試過未呢? 其實呢間餐廳早前係雜誌講過如果身份證號碼或者名有個陸/6字，黎光顧就有優惠，所以先對呢間餐廳有D印象。

今個星期日係父親節，為左廢事正日同人逼，我地決定提早係平日慶祝，因為爸爸鍾意食雞煲既關係，所以都揀左黎陸陸雞煲火鍋度食。

陸陸雞煲火鍋位於旺角白布街，地鐵站行過去只係5分鐘左右，我地六點幾就到，好彩都未係好多人，仲未要等位。

坐低左之後，店員就俾前菜我地，有車厘茄同埋螺肉，點解食雞煲會配呢D前菜既呢? 真係有點兒唔明白。

坐低後就開始點菜啦。雞煲有分大同埋例牌2個SIZE，我地一行4人，比較上細食，所以叫左個例牌算啦。仲諗緊要咩辣度既時候，店員就過黎問我地平時多唔多食辣，我地話間唔中，佢地就提議試個小辣啦。

點菜係好似酒樓咁用類似點心紙既形式咁劃，食物既選擇都好多，有D仲幾特別。

無幾耐，雞煲就黎到啦，煲咗一陣之後侍應就過來幫手攪拌一下，仲提醒我地小心燙到手。

雞肉靚就幾靚，不過都幾多骨，食落有D攰，辣度方面，一D都唔辣，只係有麻既感覺，下次可以試下中辣。

D 雞食到7788時，店員就幫我地加湯，我地可以揀清湯同辣湯，無辣不歡既我地當然揀辣湯啦，湯底慢慢滾下滾下，我地就可以開始加配料啦。

呢度既響鈴係自家製既，唔油之餘仲浸10秒就食得，吸收左辣湯底既味道後，真係幾好味。

四寶餃既四寶分別係雲吞，水餃， 白菜豬肉同埋魚皮餃。 皮薄之餘餡料仲幾豐富，浸完係辣湯底後食真係好好味。

至於日式叉燒，平時用黎送拉麵就多啦，今次浸住係辣湯到食，真係好過癮，值得提既係D叉燒烚完後仲保留到日式風味。

百花釀油條: 油條脆卜卜，釀入左豆腐，呢個食法都係第一次，真係夠晒創意，同響鈴一樣都係浸一浸湯就食得，味道好特別。

日式玉子燒: 玉子燒食落好香滑，不過浸係辣湯到食好似唔係太夾，如果配清湯可能會好D。

老人家鍾意食菜，所以菜係必叫既。陸陸鮮菜籃,，有生菜，油麥菜，粟米，金菇等等，非常豐富, 蔬菜係最容易吸收辣味，浸過辣湯既菜，真係食到好過癮。

初初食雞煲時真係只覺有微麻味，但係食落好似越來越麻咁，真係想知點解，不過就一D都唔辣，鍾意食辣而又食得辣既朋友真係可以第一次黎時已經挑戰佢個中辣啦。 

openrice link: http://www.openrice.com/zh/hongkong/r-%E9%99%B8%E9%99%B8%E9%9B%9E%E7%85%B2%E7%81%AB%E9%8D%8B-%E6%97%BA%E8%A7%92-%E6%B8%AF%E5%BC%8F-%E9%9B%9E%E7%85%B2-r174182

地址: 旺角白布街16號

Chibee Chicken and Beer (尖沙咀)

Chibee Chicken and Beer 係香港共有兩間分店，分別係銅鑼灣同尖沙咀，銅鑼灣分店開左都有大半年，至於尖沙咀，就大約一個月左右啦。

尖沙咀分店位於厚福街8號H8 23樓，環境乾淨企理，燈光暗暗地，感覺都幾高貴，播住D韓式音樂，好舒服。

經過上次係銅鑼灣分店叫得過多食物既關係，今日一於帶多個朋友黎一齊食，3個人可以試多D唔同既野食。

可能因為新開張既關係，餐牌只有英文同韓文，你聽落可能唔覺得唔係問題，但係少食韓國野既你，可能真係唔知Tteokbokgi  同 Budaejjigae 係咩，好彩因為科技既發達，所以我地好快就知道呢D韓式食品係咩黎架啦。

難得黎到韓國餐廳，飲下韓式飲品都係常識，其實Coco Palm (Peach) 同埋 Peach Juice 既味道都好似，桃味都幾重，只不過前者有D椰果係裡面，幾好飲。

Chibee noodle 似係拉麵微辣既湯底再加幾片午餐肉，拉麵幾有咬口，湯底香濃帶辣 ，食落有少少似辛辣麵，如果午餐肉可以俾多少少我地就好啦。

Spicy Sweet Chili Chicken: 炸雞係好多韓國餐廳黎講都算幾出名，分分鐘半個MENU都係炸雞。揀左好耐，我地最後都係揀左Spicy Sweet Chili Chicken。份量多到有點兒震撼，仲附上沙律配柚子汁同埋酸蘿蔔。雖然話係炸雞，但係一D都唔油膩，外皮咬落仲香脆可口，上面加埋D酸酸地辣辣地既汁 就真係非常開胃，真係令人一件接一件咁食。

Budaejjigae 其實係韓國人食既部隊鍋，呢款韓式大雜燴火鍋真係份量十足，除左有香腸，午餐肉，泡菜同韓式餃子之外仲有拉麵，真係估佢唔到，泡菜既份量仲多到鋪到成個鍋都係添，所以D湯先至完完全浸晒泡菜既味道，味道香辣惹味，非常正宗，真係好味到無得彈呀。

臨走果時店員話想同我地影張相掛係門口留念，呢個idea真係相當新穎，唔知下次再黎幫襯既時候搵唔搵得返今日影既相呢?

總括黎講，呢度食物好味又好坐。同好多韓式餐廳一樣，好多店員都係黎香港working holiday既，所以大部分都係韓國人既關係，全程有心理準備要「英語對白」！

openrice link: http://www.openrice.com/zh/hongkong/r-chibee-chicken-and-beer-%E5%B0%96%E6%B2%99%E5%92%80-%E9%9F%93%E5%9C%8B%E8%8F%9C-%E9%9F%93%E5%BC%8F%E7%82%B8%E9%9B%9E-r491191

地址:  尖沙咀厚福街8號H8 23樓

Layback Cafe & Bar (尖沙咀)

一向都喜歡去樓上cafe既我，今日黎到位於尖沙咀既Layback Cafe & Bar。

餐廳有分室外同室內，如果唔係食煙既話，坐室內會好D。

坐低之後我地叫左一個意粉，一個All Day Breakfast，一份小食，同埋一壺果茶。

蜜桃果茶: 呢度既果茶係用玻璃壺上，下面有蠟燭座熱保暖，確保你飲幾耐都仲係熱。不過D杯就細左少少，每杯兩啖就飲完，不過一壺茶都幾大，足夠兩個人飲。蜜桃果茶係紅茶加少少蜜桃味，飲落好清甜。

黑松露忌廉什菌扁意粉: 黑松露忌廉醬相當Creamy，黑松露都好香濃，加埋唔同種類既什菌後口感非常豐富。意粉方面軟硬度適中，整體味度唔錯，令人一啖一啖咁食。

All Day Breakfast: 全日早餐有多士，腸仔，西班牙火腿，蕃茄，蛋，茄汁豆，蘑菇，粟米同埋沙律。最值得一讚既腸仔，一D都唔油，好好味，好有口感。至於茄汁豆，真係整返熱俾你，係香港真係唔少地方凍冰冰俾你食架。沙律方面都幾新鮮，個柚子汁都幾好味。

小食拼盤: 拼盤既小食有咖哩角，脆皮腸，蝦同埋海鮮卷，配上wasabi 味既沙律醬，值得一讚既係炸蝦，粉漿入口一D都唔厚。好可惜小食大部分都係炸物，真係有D唔健康，同埋一次過食咁多炸野都好濟，建議加少少沙律，同埋將其中一款炸物改做其他野，例如串燒，雞翼，香葉包雞之類會更加好。

openrice link: http://www.openrice.com/zh/hongkong/r-layback-cafe-bar-%E5%B0%96%E6%B2%99%E5%92%80-%E8%A5%BF%E5%BC%8F-%E6%B2%99%E5%BE%8B-r472984

地址:  尖沙咀加連威老道41號C-D嘉威大厦4樓B室

炭火紫菜包飯 (紅磡)

早前係網上見到黃埔開左間新既韓國餐廳，仲有巨型既飯卷食，就趁住星期六放假同朋友過黎行街，順便試下呢間新餐廳啦。

唔知係咪因為係網上做過宣傳既緣故，未到7點已經有人等位，好在我地人少，所以好快就有位啦。

睇過餐牌之後，發現餐牌上大部分食物同係飯卷同飯囤，咁呢兩樣野都應該幾出名架啦，就叫左一份飯卷同一個冷麵試下啦。

落單後無耐，店員就俾左一小碟小食我地，似係醃蘿蔔加魚糕既野。

過左一陣，冷麵就到啦。

韓式泡菜冷麵: 
上菜時好冰凍，因為個麵都落左唔少冰，冷麵係用蕎麥麵，放係一個好重泡菜味既湯底到，加左隻蛋同埋少量紫菜整成。湯底好香口，食落好開胃又唔辣，唔錯。

食到一半，飯卷就到啦。其實由細到大我都一直以為韓式飯卷都係叫做壽司，原來呢種叫法係錯架。壽司(sushi) 同飯卷(gimbab) 主要分別在於飯既調味方面 ， 壽司飯用米醋調味，而紫菜飯卷既飯用麻油 + 鹽調味。

我地叫既飯卷係辣椒炭燒豬肉紫菜飯卷，點解呢? 原因係因為見到炭燒豬肉紫菜飯卷係Signature dish，但係因為喜歡食辣，想試下呢款加左辣椒既飯卷。

一份飯卷有足足十件，聽落唔係好多，但係原來一件既直徑都有成3個一蚊銀咁長架，裡面有日本蘿蔔，蛋，蟹柳，紅蘿蔔，燒豬肉同埋辣椒。

燒豬肉幾香炭火味，口感幾乾身，同其他材料一齊食口感好特別，起初同辣椒一齊食既時候完全唔覺得辣，但係越食會越辣架，可惜餐廳既水要另外加錢，咁唯有飲住免費提供既湯先啦。

D 湯飲落似係味噌湯，幾重葫椒同蘿蔔味，但係因為比較熱既關係，完全解唔到辣。

整體黎講呢度食物同環境都唔錯，如果清水可以唔另外Charge客人既話，感覺上會更加好。

openrice link: http://www.openrice.com/zh/hongkong/restaurant/%E7%B4%85%E7%A3%A1-%E7%82%AD%E7%81%AB%E7%B4%AB%E8%8F%9C%E5%8C%85%E9%A3%AF/493473?tc=MYOR&con=rvw

地址: 紅磡必嘉街92-112號紅磡灣中心地下20號舖

New York Diner (北角)

New York Diner 係荃灣都開左一段時間，一直都想試，但係因為地點唔方便，好難約朋友，不過最近係北角開左分店，所以就趁假期前夕同朋友黎呢度試下啦。

係北角地鐵站行過去只係需要幾分鐘時間，夜晚7點幾黎到都仲未要等位，真係好啦。
餐牌實在好多選擇，但係放工後好攰，唔想諗野，所以都係是但叫左個$328既2人餐算啦，呢個2人餐有2個湯/沙律，1個前菜，1個意粉/飯，1個main course同埋2杯飲品，仲可以加多28蚊要件芝士蛋糕。

是日餐湯係忌廉湯，飲落好Creamy，帶有少少洋蔥味，如果可以配埋麵包就好啦。

前菜叫左墨西哥脆片薯角配蕃茄沙沙，其實墨西哥脆片係歐洲同美國都非常受歡迎，係上面加埋牛油果醬同埋蕃茄沙沙，味道非常香濃，真係令人食唔停口，醬既份量亦都剛剛好，唔會過多，食起上黎唔會一塌糊塗。薯角方面整到熱辣辣，好香口夠脆，好好味。

意粉/飯方面揀左忌廉香草三文魚柳飯，三文魚柳煎得火喉剛剛好，金黃色，賣相好靚，配埋沙律同埋檸汁食都幾開胃，飯方面係用西式煮法，口感有少少似意大利飯，味道好特別。

主菜叫左美式醬燒豬肋骨 (半份):燒豬肋骨有另配醬汁，但係唔點都已經好香口，好有燒烤風味，亦都好夠淋身，容易切，配埋沙律同埋薯角，真係想食唔飽都難呀。

真係非常欣賞呢度既餐具，全部都印左餐廳名，真係好有心思。

食完飯就叫餐飲，再加埋一件芝士蛋糕。芝士蛋糕好軟滑，味道香濃，亦唔會過甜 ，真係好好味。

飲品方面，我地叫左熱啡同埋凍蜂蜜檸檬水，凍蜂蜜檸檬水都幾大杯，味道酸酸甜甜咁，幾好飲。

整體黎講食物質素甚高，又可以坐得耐，同朋友傾計都真係唔錯。⁠⁠⁠⁠

Openrice link: http://www.openrice.com/zh/hongkong/r-%E7%B4%90%E7%B4%84%E5%AE%A2-%E5%8C%97%E8%A7%92-%E7%BE%8E%E5%9C%8B%E8%8F%9C-%E6%BC%A2%E5%A0%A1%E5%8C%85-r486511

地址: 北角渣華道180號港濤軒地下1-2號舖

尚鮮日式燒肉漁市場 (銅鑼灣)

有外國朋友黎香港玩，我都趁呢個機會同佢聚下舊，佢好鍾意食日本野，剛好係OPENRICE 搵到呢間價錢合理，地點又適合既餐廳，就打算帶佢黎試下啦。

星期一至四晚市收費268，另收加一，食足2個鐘，真係算唔錯啦。

好少放題咁high tech唔係用紙落單，反而係用tab，真係適合同行呢個唔識中文既朋友，因為佢可以睇圖畫。

刺身頭盤: 當我地興奮地落單時，店員就同我地講會有刺身頭盤同燒肉拼盤送上，如果like + share facebook既話就可以以優惠價98蚊加一板海膽，外國朋友當然有興趣啦。

刺身實在好新鮮，甜蝦同三文魚都好鮮甜，賣相唔錯，顏色鮮艷，三文魚仲要切得好厚，甜蝦都啖啖肉，蟹棒亦都好爽口，完全唔似係平野，非常滿足。


海膽方面，水分很多，味道濃，亦都好甘甜，如果可以配埋少少紫菜，咁就更加好啦。

刺身實在太好味，我地最後食左3轉呀。

炸物:
炸物方面全部都炸得好香口，口感特別香脆。特別一提吉列蝦，金黃鬆脆，內裏釀滿左蝦肉，爽口彈牙。

魚生沙律:
魚生份量適中，沙律汁似係柚子味，食落好開胃，我一個人仲食左2份添呀。

螺肉，八爪魚，中華沙律
自己一向都好喜歡食日式前菜，所以黎到都叫左呢3樣食下，加上因為外國朋友未試過，所以每樣都叫左2份。2份既份量其實都幾多，全部既味道都適中，中華沙律食落好爽，非常開胃，八爪魚仲要好大隻，至於螺肉，如果可以辣多少少就更加好啦。

二人前海鮮和牛盛合:
呢個盛合有鮑魚，蝦，蠔同埋帆立貝，鮑魚有少少酒味，食落新鮮彈牙，蠔雖然唔係好大隻，但都好鮮甜，帆立貝大大隻，好新鮮肥美。和牛方面非常靚，係A5 和牛黎既，一D都唔騷。

燒肉頭盤:
呢個燒肉頭盤係落單既時候已經送上架啦，咩肉都有D咁，最好味係雞肉同埋雞翼，醃得非常之入味。

腸仔方面出奇地唔係用平價雞肉腸，呢隻腸好軟身，又唔鹹，仲有D蒜香味，值得一讚。

甜品有不同口味既日式大福，可惜我倆興趣都唔大，無試到。

埋單果時仲送上每人一杯MOVENPICK 雪糕，可以自己揀味道，真係好開心好滿足呀。

總括黎講呢到用料好好，抽風亦都唔錯，至少唔會成頭都一陣燒烤味，飲品仲要係任飲，紙包飲品，罐裝既咩都有，雖然某D貴價食物要另外加錢，但係都算合理，埋單2個人都係900蚊左右，都算唔錯架啦。

openrice link: http://www.openrice.com/zh/hongkong/r-%E5%B0%9A%E9%AE%AE%E6%97%A5%E5%BC%8F%E7%87%92%E8%82%89%E6%BC%81%E5%B8%82%E5%A0%B4-%E9%8A%85%E9%91%BC%E7%81%A3-%E6%97%A5%E6%9C%AC%E8%8F%9C-%E7%87%92%E7%83%A4-r490191

地址: 銅鑼灣謝斐道496號金利文廣場3樓