Victorian Rose Tea Room

相機食先同打卡都已經成為香港人不可底缺嘅一部分，最近於尖沙咀新開幕嘅Victorian Rose Tea Room，裝潢設計以維多利亞建築風格為藍本，配以典雅的復古家具同水晶吊燈，令人感到置身昔日古典優雅嘅貴族生活。

一入門口就有皇冠、禮帽等頭飾免費借戴，影相都即時充滿英倫貴氣，店員都好主動地幫我地影相。

三層嘅英式下午茶係Victorian Rose 招牌菜式，根據英式傳統，由下至上放上唔同嘅鹹點同甜點。由於食物全部即叫即製，所以等候需時，想食好野想打卡，就真係要耐心等候啦。

鹹點有：
鵝肝配烘多士、蜜瓜帕馬火腿、香煎蟹肉餅。

甜點有：
伯爵茶戚風蛋榚、歌聲院蛋榚、焦糖燉蛋、拿破崙，軟芝士草莓撻、意式奶凍、軟心慕士朱古力撻、英式鬆餅配玫瑰紅桑子 （玫瑰紅莓果醬及濃厚鮮奶油）。

咁多樣食物裡面，最值得一讚嘅係「伯爵茶戚風蛋糕」。根據網上嘅資料，佢係用英國名茶Fortnum & Mason 伯爵茶整嘅，仲要係上碟前先脫模，入口唔單止鬆軟，仲帶有柑橘嘅香氣，好特別添呀。

飲品方面，既然黎得Victorian Rose Tea Room，又點可以唔試下佢地嘅Victorian Rose Tea同埋Victorian Rose Latte 呢？

Victorian Rose Latte 以玫瑰拉花送上，只係賣相已經俾佢100分。除左口感濃厚之外，咖啡味道仲香濃悠長。

至於Victorian Rose Tea更加係用到英國皇室御用品牌Fortnum & Mason嘅有機乾玫瑰花茶，玻璃茶壺下面有火座熱，店員仲幫我地加熱水，令我地可以一路傾計一路飲熱花茶，真係細心。

雖然呢度嘅英式下午茶價錢拍得住酒店，但係環境好，又可以影到好多相打卡呃LIKE，都總算值回票價啦。

地址：尖沙咀山林道38號銀座38 17樓

Openrice link: https://www.openrice.com/zh/hongkong/r-victorian-rose-tea-room-尖沙咀-英國菜-r611147

HeSheEat (銅鑼灣)

HeSheEat 呢間餐廳成日經過，有好幾次仲見到佢地甜品款式好多，仲好精緻添，所以今日趁早放工，就想黎試下啦。

傍晚六點幾黎到，都仲未需要等位。餐廳座位為開放式，令人感覺相當開揚。

除左可以係主餐牌選擇之外，我地仲可以從「晚餐餐牌」揀，更可以以優惠價享用小食，甜品或飲品添。

我地叫左兩個主菜。

焗龍蝦仔黑魚子牛角包:

牛角包大約有一隻手掌咁長，上面堆滿黑魚子，下面仲有龍蝦仔，份量都唔少架。

牛角包入口鬆軟，牛油味重，非常適合喜歡牛油味嘅朋友。旁邊嘅薯條都炸得非常香脆，配埋沙律食，感覺好清新。

意式肉丸意粉 :

肉丸用豬肉整成，入口軟滑多汁，配埋茄味濃郁嘅蕃茄醬汁，入口酸酸地幾開胃。

雜果拿破崙:

雜果拿破崙足足有二人份量，上面有芒果，藍莓同士多啤梨，非常鬆脆嘅酥皮之間夾上吉士醬，好有口感，入口亦唔會太甜，令我地非常滿足。

跟餐飲品我地叫左有機伯爵茶同埋柑橘菊花茶，以壺送上, 一壺都有成三至四杯，令我地可以一邊飲茶一邊傾計，渡過左一個平靜嘅晚上。

地址: 銅鑼灣記利佐治街2-10號銅鑼灣地帶2樓201號舖

openrice link: https://www.openrice.com/zh/hongkong/r-hesheeat-%E9%8A%85%E9%91%BC%E7%81%A3-%E8%A5%BF%E5%BC%8F-all-day-breakfast-r193159

二一八火鍋餐館 (佐敦）

呢幾日落雨濕濕，有幾分寒意，忽然有打邊爐嘅念頭。

係開飯網見到呢間位於佐敦新開張嘅「二一八火鍋餐館」，非常近地鐵站，落雨濕濕都唔洗怕啦。

坐低之後當然係揀左湯底先啦，由於我地又想食芫荽皮蛋鍋又想食沙嗲鍋，所以一於叫左個鴛鴦鍋，咁就可以試晒兩個湯底啦。

係等湯底嘅時候，餐廳先送上兩盅燉湯，是日燉湯係蟲草花燉雞湯，開蓋時傳黎濃郁香氣，燉湯入口鮮甜，飲落無味精，湯入面嘅雞件嫩滑，非常好味。

餐廳有大量醬油配料供應：辣椒、炸蒜、蒜蓉、芝麻醬、芫荽、蔥等等真係講得出既都有架。

火鍋配料選擇好多，不過由於我地只有兩個人，不能叫太多。

鮮冬菇／粟米／凍豆腐：
打邊爐當然唔可以只係食肉，點都要叫d蔬菜嘅，我地選擇左粟米，凍豆腐同埋鮮冬菇。鮮冬菇同凍豆腐吸收左未有肉類污染過嘅湯底會較少油，亦都比較健康。至於粟米煲過接近一小時後，吸收左香濃嘅湯真係格外好味。

鮮蝦雲吞：
鮮蝦雲吞比一般火鍋店食到嘅大隻，裡面包住大大小小嘅鮮蝦，非常飽滿，餃皮夠薄之餘質感仲好紮實，味道唔錯。

廣島生蠔：
廣島蠔賣相精美，份量算多，非常新鮮，亦都相當爽口，好好味。

刀切鮮豬肉片：
肉質顏色鮮艷，切得薄薄嘅豬肉片，無乜肥肉，放入湯淥一陣就食得，入口爽口彈牙，值得一讚。

稻庭烏冬／豬皮／手打蝦丸：
蝦丸以蝦滑形式送上，用原隻鮮蝦整成，重蝦味之餘食落仲好爽口，如果想令賣相更靚，可以考慮係上面加上蟹籽。 

烏冬份量都幾多，放落湯度煮一陣就食得喇，配埋兩款口味嘅湯底食，味道簡直係一流。


食完之後店員為我地送上水果盤，食完火鍋再食返d水果，可以幫助消化，亦都為我地今晚嘅晚餐劃上完美句號。

店員唔講我都唔知呢間火鍋店仲有小菜食，下次真係要試下啦。

地址：佐敦德興街4-6號富麗閣地舖

openrice link: https://www.openrice.com/zh/hongkong/r-二一八火鍋餐館-佐敦-港式-火鍋-r615789