傷心酸辣粉 (尖沙咀)

「傷心酸辣粉」開左咁多年，本小姐都係幾個月前去過銅鑼灣間果間「友心私房菜」，果時都無機會食佢地既酸辣粉，所以其實今日係第一次食架。夜晚8點左右黎到，唔洗等位，真係好。

入到黎睇到餐牌，真係大開眼界呀，種類非常多，咩都有得食咁，連2人餐都有好幾個揀。我地最後揀左個「2人自選套餐」，有2碗酸辣粉，同埋3個小食，自己可以另外加飲品。

3個小食分別叫左涼拌海帶絲，皇牌口水雞同埋細油脆耳。3個都揀左要中辣。

涼拌海帶絲賣相好一般，無咩吸引到我，下次唔會再叫。

口水雞辣度適中，不過雞翼尖就比較多，雖然D雞俾大量辣油浸住，睇落有D恐怖，但係食落真係幾好味。

細油脆耳好惹味又彈牙，爽爽脆脆咁好快就食晒，值得一試。

呢碗酸辣粉先至係全晚既精粹，平時食雲南米線都食小辣中辣既我地呢碗酸辣粉我地叫左小辣既薯粉，真係越食越傷心。酸到流口水就無啦，不過就真係「辣到流眼淚，麻到無感覺」，小辣都算幾辣，比起平時食開既雲南米線既中辣仲要辣幾級，下次都係試BB辣好D。不過薯粉都幾煙韌同有口感，配料仲有芫茜、花生同炸菜，夠晒香。  

openrice link: http://www.openrice.com/zh/hongkong/r-%E5%82%B7%E5%BF%83%E9%85%B8%E8%BE%A3%E7%B2%89-%E5%B0%96%E6%B2%99%E5%92%80-%E5%B7%9D%E8%8F%9C-%E5%9B%9B%E5%B7%9D-%E7%B2%89%E9%BA%B5-%E7%B1%B3%E7%B7%9A-r108730

地址: 尖沙咀科學館道14號新文華中心1樓121至123舖

丼丼屋食堂 (沙田)

丼丼屋係沙田開左都有好幾年啦，對日本菜毫無抵抗力既我，星期六同屋企人去到丼丼屋度食午餐，3個人只係叫左2個飯同一個小食，而其中一個飯都加錢跟餐。

 

和風醬汁吉列豚丼: 呢個吉列豚丼係丼丼屋五週年既期間限定和風醬汁吉列豚丼，供應期由九月到十一月，感謝價格只售$68，而且每天限定30食，早起的鳥兒有丼吃，我地12點幾黎到，仲未賣晒。

吉列豚丼只有三塊豚肉，每塊豚肉炸完之後都沾上和風醬汁，味度有少少黑醋味，酸酸甜甜咁，豚肉底下仲有椰菜絲，飯量又夠多，$68 真係算唔錯。

鐵板咖喱豚肉餃子: 呢個配搭都幾特別，餃子皮比較厚, 入面既餡料係黑豚肉，加入左大量既咖喱汁後非常好味，可惜芝士份量比較多，唔多鍾意食芝士既我覺得落少D好更加好。不過值得一讚既係個餃子採用鐵板上碟，慢慢食都唔怕會好快凍晒。

 

滑蛋雞肉丼:親子丼(OYADON) = 滑蛋雞肉飯。日本料理中既「丼」，日文讀成「Don」，指係大碗中放有肉類等材料既意思，中文譯作「蓋飯」。親子丼材料有雞肉 ，洋葱同半生熟雞蛋，再配以日式醬汁整成。

呢個丼幾乎係我每次黎都一定會叫架，個飯食落好香滑，雞肉鮮嫩彈牙，混埋香甜軟滑既蛋漿，同埋日本靚米，味道真係唔錯。跟餐既話除左有沙律，味噌湯，仲有日本蘿蔔同埋一些配菜。 

openrice link: http://www.openrice.com/zh/hongkong/r-%E4%B8%BC%E4%B8%BC%E5%B1%8B%E9%A3%9F%E5%A0%82-%E6%B2%99%E7%94%B0-%E6%97%A5%E6%9C%AC%E8%8F%9C-%E5%92%96%E5%96%B1-r144459

地址:  沙田橫壆街2-16號沙田中心3樓27號舖

潮福蒸氣石鍋 (藍田)

自從幾個月前試過蒸氣石鍋後，一直都對呢個烹調方法念念不忘，覺得用呢頂「草帽」煮食好新奇有趣，今日放工後決定帶屋企人黎試一試。

 

以上呢頂草帽就係今晚既主角啦，每張枱都有一個草帽蓋，聽侍應講草帽可以鎖住蒸海鮮時蒸氣既水份。

 

坐低無耐，侍應就叫我地自己出去睇下有咩海鮮想食，即叫即磅。

 

花蛤皇: 其實呢度每個餸菜都會係餐牌上寫住要蒸幾耐既，呢個花蛤皇需時五分鐘，當計時器響起時，侍應就會走過黎serve 我地架啦，花蛤皇味道鮮甜，肉身夠厚又有咬口，只係海水味重左少少。

生猛龍蝦: 嘟、嘟、嘟，食得啦......龍蝦肉呈雪白色，仲有好香既蒜茸味同龍蝦的味道，輕輕一挾，就可以成塊肉夾起，肉質非常爽口彈牙，蝦汁又夠多，算係咁多海鮮中較為突出的。

 

象拔蚌仔: 象拔蚌切到一條條，好易熟，上面有蔥蒜，底部有粉絲，呢個配搭都唔錯，象拔蚌肉質幾爽口，幾好。

日本大元貝皇: 用蒜蓉蒸，元貝軟腍腍啖啖肉，加埋吸收左元貝鮮味既粉絲，好正。

南非鮮鮑8-10頭: 南非鮮鮑加左少少葱花去蒸，味道爽口鮮甜。

 

清蒸四寶丸: 四寶丸有蝦丸，牛肉丸，鯪魚球丸同墨魚丸， 全部都係手打即製，味道爽口彈牙，不過如果蝦丸既蝦味再重返少少，整體既味道會更加好。

 

蒜茸蒸勝瓜: 呢個勝瓜份量有點兒驚人，雖然餐牌話要蒸4分鐘，但係我地想蒸得再腍少少，所以都蒸左成6分鐘，呢個腍度適中， 蒜茸味都好入味， 清淡鮮甜。

 

 

新鮮排骨粥: 呢個粥底先係重頭戲，亦都係全餐飯我最期待既，個粥係經過多輪唔同海鮮同餸菜既蒸氣精華「蒸」成既，由本來既珍珠米，排骨同南瓜，過左1個鐘頭之後，終於變成好多粥水既排骨粥。粥呈米黃色，口感綿滑，吸晒排骨既味道，鹹鹹地，好入味。

新張期內晚餐食蒸氣石鍋有8折，除左某D特價海鮮之外，最後埋單$921，每人都要成$301，間唔中食下，咁既價錢都唔錯啦。  

openrice link: http://www.openrice.com/zh/hongkong/r-%E6%BD%AE%E7%A6%8F%E8%92%B8%E6%B0%A3%E7%9F%B3%E9%8D%8B-%E8%97%8D%E7%94%B0-%E7%B2%B5%E8%8F%9C-%E5%BB%A3%E6%9D%B1-%E7%81%AB%E9%8D%8B-r471485

地址: 藍田啟田道50號啟田商場4樓407舖

嚐越 (九龍灣)

今日難得早放工，就同2個朋友一齊黎九龍灣德福行街食飯，見咁耐無食越南野，都想黎試下呢間「嚐越」。

7點幾walk in 黎呢度都未滿座，餐廳環境唔錯，D檯都唔會放到好逼，唔洗怕同朋友既對話會被其他人聽到。

3個女仔都喜歡食小食多過正餐，所以都係叫左一個飯，一個沙律，三個小食，同埋兩個甜品一齊share。

檸汁鳳爪:怕骨既我最喜歡就係呢個檸汁鳳爪，唔洗吐骨之餘味道仲酸酸地咁，好開胃，令人食完一隻到一隻。

青木瓜雞絲沙律: 沙律材料非常豐富，木瓜同青瓜都切得夠幼，蔬菜既份量都好適中，可惜沙律口感好乾同味道比較淡，建議加配少少沙律汁，味道會更佳。

香草燒蝦餅: 燒蝦餅同平時食開既炸蝦餅不論口感同賣相都好大分別，呢到既燒蝦餅雖然肉質比較薄，但係無炸蝦餅食到帶彈牙既質感。

網絲蝦卷: 蝦卷外皮鬆脆，餡惹味，配埋甜酸醬，幾好味，可惜比較油。

 

原個菠蘿咖喱海鮮炒飯: 本小姐對食物賣相要求相當高，因為喜歡影相POST上網俾朋友睇，係諗緊食咩既時候見到好多人都叫呢個飯，所以我地都想叫黎試下，上菜後見到賣相非常好，原個菠蘿上檯真係加左唔少分，食落都幾香咖喱味，海鮮都算多，D蝦都好大隻，幾好味，份量夠多，3個女仔都食唔晒。

啦爺糕 (左) 及椰青糕 (右): 椰青糕呢個甜品都係第一次聽，佢椰味勁濃，而且好滑，至於啦爺糕，係暖食既，而且幾有咬口，可惜味道有點兒過甜，加上比較黏口，同朋友SHARE會有一定既困難。可能本人比較喜歡西式甜品，所以對呢2個甜品興趣不大。

晚餐時段無話限時坐幾耐，3個女仔坐左好耐傾左好耐計都無趕我地走，真係一個幾適合gathering既地方。

openrice link: http://www.openrice.com/zh/hongkong/r-%E5%9A%90%E8%B6%8A-%E4%B9%9D%E9%BE%8D%E7%81%A3-%E8%B6%8A%E5%8D%97%E8%8F%9C-r464706

地址:  九龍灣偉業街33號德福廣場二期4樓413 – 414號舖

Okapi (尖沙咀)

近排行經赫德道既次數都算多，好幾次夜晚經過Okapi 既時候都俾佢既環境吸引到，所以就搵晚放工同朋友一齊黎食飯啦。

餐廳裡面環境唔錯，安靜之餘又帶俾客人一種歐洲風格，配埋少少燭光，帶俾客人少少聖誕同浪漫氣氛，鍾意聖誕節既我真係幾鍾意呢度既環境。

晚餐方面可以揀一人餐，二人餐又或者係a la carte，由於二人餐有牛肉，唔食牛肉既我梗係揀一人餐啦。

每個一人餐都有餐包，餐湯，沙律，主菜同埋一杯飲品。

麵包係意式香草包，厚得黎仲好鬆軟，熱辣辣，味道唔錯。

餐湯係南瓜湯，個湯賣相好靚，好重瓜味，加埋忌廉之後飲落口好香滑，配埋跟香草包，真係完美既組合。

特選沙律配煙三文魚既菜又新鮮又爽口，加埋份量適中既沙律醋同埋煙三文魚，好醒胃，件三文魚仲整成花型咁，好靚呀。

香草炸兔仔腿配黑松露菌蘑菇意大利飯: 本人雖然對兔肉麻麻地，但係就非常鍾意食蘑菇意大利飯。呢個意大利飯軟硬適中，加入黑松露菌香令到個飯更加香口，至於兔仔腿本身味道唔錯，但係一向好鍾意兔仔既我真係唔忍心食佢條腿呀。

食完主菜後侍應就幫我地落埋餐飲，同時俾埋甜品餐牌我地，可惜我地都已經好飽，食唔落甜品啦，如果唔係都想試下佢地個麵包布丁呀。

openrice link: http://www.openrice.com/zh/hongkong/r-okapi-%E5%B0%96%E6%B2%99%E5%92%80-%E8%A5%BF%E5%BC%8F-r32229 

地址: 尖沙咀赫德道8號地下B舖

達人烤肉 (尖沙咀)

一向都喜歡食韓燒既我地，今日趁住舊同學聚會一行5人黎到「達人烤肉」一齊食晚餐。呢度地方都幾大，環境都算舒適。餐廳大部分職員都係韓國人，只可以用簡單既英文同佢地溝通。夜晚7點半左右到，餐廳都幾乎滿座，下次真係要早少少BOOK 檯至得。

同好多韓國餐廳一樣，坐低無耐未點菜時已經會有前菜送上，我地今日既前菜有好幾款: 醃洋蔥絲，泡菜，生菜沙律等等，全部都係可以免費refill架。而係呢個時候，侍應們都開始為我地預備配菜，就係爐邊既蛋同埋芝士粟米啦。

芝士粟米既芝士味唔太濃，最適合我地呢班唔多好芝士既朋友。至於爐邊蛋，雖然要煮成20分鐘，但係食落好香好滑，等都係值得既。

用黎放我地ORDER左既食物既餐車，咁樣既話我地張檯就唔會唔夠位放其他食物啦。

生五花腩肉: 

一大件五花腩肉放係烤板上燒，咁大件肉就梗係要慢慢燒架啦，係燒到一半既時候侍應仲過黎幫我地剪開一片片，方便我地繼續燒落去，燒好左既五花腩肉質相當鬆軟，有彈性而滲出油香，入味得黎又唔會太鹹，脂肪和瘦肉很均勻。

達人護心肉: 呢碟肉一樣要搵侍應幫忙，旨因護心肉切成長條狀，自己烤一定有難度。護心肉肉質扎實充滿嚼勁，食落好咬口同有彈性，醃得都幾入味，脂肪又比較少，食落仲無咩油膩既感覺。

特牛肋骨肉:

特牛肋骨肉放上烤版去煎兩煎已經熟啦，食落甜甜地脆脆地，咬落去好juicy，又唔會過油，正呀。

石頭鍋飯配雞肉:呢個飯可以揀雞肉 ，豬肉同牛肉，而我地揀左既係雞肉。石頭飯賣相相當吸引，雞肉出奇地滑，肉質鮮甜，好有口感，飯底夠軟，食落好香口美味。

棉花糖藍色檸檬蘇打同棉花糖西柚蘇打賣相得意有趣，味道酸酸甜甜，西柚蘇打仲有埋半個西柚係個杯裡面，係兩杯飲品上面仲加埋好大好軟既棉花糖，又可以飲又有棉花糖食，淨係睇到都開心呀，真係好欣賞餐廳咁有創意，加上呢2個飲品既係冰既份量唔太多，唔會飲到最後杯飲品會過稀，值得一讚。至於蜜瓜雞尾酒，酒味比較輕，蜜瓜味好濃，白雪雪既飲品賣相相當吸引，睇到都開心。

openrice link: http://www.openrice.com/zh/hongkong/r-%E9%81%94%E4%BA%BA%E7%83%A4%E8%82%89-%E5%B0%96%E6%B2%99%E5%92%80-%E9%9F%93%E5%9C%8B%E8%8F%9C-%E7%83%A4%E8%82%89-r174672

地址: 尖沙咀柯士甸路20號保發商業大廈地舖