位於銅鑼灣謝斐道嘅「鉄人旨花」，大約一年前嚟過之後對佢念念不忘，是日慶祝情人節，就打算再次到訪啦。
為咗可以近距離邊欣賞廚師手藝邊享用晚餐，我地揀左食鐵板燒，咁就可以獲安排坐係半圓形嘅鐵板燒區。
鐵板餐共有四個選擇，全部都係二人用，價錢大約係二千幾蚊，我地揀嘅係較為性價比高嘅「蝦夷鮑魚鐵板燒」。
「蝦夷鮑魚鐵板燒」合共八道菜，而最先上檯嘅當然沙律啦。
沙律菜加入柚子汁同芥辣食，味道出奇地夾，入口非常醒神，真係非常開胃。
紅酒煎鵝肝：
大大塊嘅鵝肝，肥潤得黎又夠厚身，外脆內軟滑，煎得非常甘香，入口即溶，放係脆脆嘅法包上食，好有層次感，真係完美配搭。
日本蝦夷鮑魚：
期待已久嘅鮑魚終於到啦，大廚係鐵板上面煎完之後再切片，再配上自家製嘅忌廉海藻汁，非常美味。
特色菜品：
一直都係度諗究竟今晚嘅特色菜品會係啲乜嘢，食完鮑魚之後，大廚就為我地烹調呢一味「奶油白蘆筍」。
蘆筍加入奶油煮過之後，入口不但新鮮，而且清爽，奶油方面亦都香滑，呢味獨特嘅菜真係令我地相當回味。
熊本縣產A5和王牛：
平時唔食牛嘅我，遇到有特色嘅牛，點都會試下嘅。今日試嘅和牛來自熊本縣，花紋豐富，七成熟嘅佢，肉質鮮嫩唔多筋，入口多汁。伴碟有喜瑪拉雅山海鹽、芥末同埋酸汁作調味，配菜方面有南瓜，大啡菇，茄子同獨子蒜，整體賣相及色澤都非常吸引。
和牛炒飯（日本產米）：
廚師煎香和牛後再用佢嘅油份黎炒飯，稍後再加入雞蛋同埋蔥，色澤豐富嘅炒飯，賣相就變得非常吸引。值得一讚嘅係炒飯罕有地用左日本米，入口煙韌，非常爽口。
清酒雞湯：
食完和牛炒飯飲返碗加入左帶子嘅清酒雞湯，湯散發出淡淡嘅清酒香味，入口極度鮮甜。
甜品：
是日甜品係芝麻雪糕同埋雜果杯，雪糕十分幼滑，味道非常香濃，雜果亦都非常新鮮，為我地今晚嘅晚餐劃上完美句號。
是日晚餐前後食左兩個鐘，一邊食一邊傾計，每度菜品嚐少少已經好滿足。
五星級嘅環境，高質嘅服務同埋食物以及用餐過程嘅享受，雖然價錢唔係平，但係如果係慶祝生日或紀念日嘅話都算合理吧！
地址：銅鑼灣謝斐道477-481號肇明大廈2樓
