Amico 1890 (旺角)

平時一至五要返工 ，星期六日終於可以休息下，同朋友2個人出黎聚一聚。今日係星期日，同朋友黎開旺角行街，係晚飯時候經過洗衣街，又剛好落大雨，之前上網又介紹過呢間餐廳，就打算入黎試下啦。

呢間位於旺角洗衣街既AMICO 1890，門面以船木搭成，室內木牆掛上復古車牌同掛畫，加上鎢絲燈，營造懷舊 tone。

餐廳有2層，樓下有個OPEN KITCHEN，可以見到廚師煮野食既情況，可惜我地坐樓上，睇唔到，但有個好處就係樓上靜好多，傾計都方便D。

 晚餐有得叫套餐或者散叫，肚餓既我地最後都係打算散叫，想試多D野食。最後我地叫左2個主菜，3個小食同埋2杯野飲。

餐飲既名好得意，而 我地叫既就有「AMICO」 同埋「垃圾桶」。 「AMICO」 有「朋友」既意思，顏色帶奶黃色，有泡，入口鮮果味香，冰涼清新，香甜可口，有荔枝，檸檬，橙汁，同埋七喜混合一齊既味道。至於杯「垃圾桶」就係梳打水再 加芒果同檸檬。2杯之中我比較鍾意杯「垃圾桶」，可能係我極之喜歡芒果既關係啦，覺得呢杯MOCKTAIL好好飲，唯一美中不足既係杯飲品落得太多冰，飲 到最後時因為D 冰溶晒，杯飲品味道會變淡。 

小食方面我地叫左3個。有煙三文魚田園沙律，牛油炒什菌，同埋水牛城雞翼。

牛油炒什菌有意想不到零草青味，菇片有牛油香之餘仲帶有少少甜味。

水牛城雞翼賣相好得，顏色紅紅地，醬汁酸酸地辣辣地又夠多，食落都幾開胃。最重要既係D雞翼係焗而唔係炸，比較上健康D。一客有6隻，份量岩岩好，兩個人食既話，一人都有三隻。 

煙三文魚田園沙律用黑醋調味，酸度十足，一D都唔肥，加埋幾片煙三文魚真係令我地食得好開胃。 

食完小食之後，主菜就黎啦，分別有夏威夷薄餅，同埋黑松露意大利粉。

夏威夷薄餅焗得香脆又不唔會太乾，上菜時仲係熱辣辣，批上加左一層厚厚的芝士，菠蘿，辣肉腸同火腿，鍾意食芝士既人應該會好鍾意呢個薄餅。 

黑松露意大利粉: 意粉食落煙韌有口感，醬汁好足夠，每條意粉都掂到，黑松露又香又濃，加埋香菇和翠肉瓜粒，增加口感。 

總括黎講呢到環境一流，食物無論賣相同味道都一流，估唔到係旺角都可以搵到一間咁既餐廳，等佢遲D有新菜式出我再去多次先。  

openrice link: http://www.openrice.com/zh/hongkong/r-amico-1890-%E6%97%BA%E8%A7%92-%E8%A5%BF%E5%BC%8F-%E8%96%84%E9%A4%85-r445102

地址: 旺角洗衣街24號地舖

Pink Coffee (荔枝角)

自從D2 Place 係2013年開幕以黎，一直都唔係好多機會黎呢到行返轉，今日剛好要黎呢頭做野，就打算放工後同朋友黎呢到食飯。

D2 Place 有好幾間小型既咖啡店，行過Pink Coffee，真係俾佢既環境吸引到，所以就決定入去試下啦。餐廳裝潢真係不錯，燈光比較柔和。座位有得揀室外或室內，不過夏日炎炎，坐室外真係唔係太吸引。

呢到既食物選擇相當多元化！有好多酥皮甜點、鹹點、三文治等輕食提供，不過意粉就只有兩個選擇。聽職員講呢到既法式牛角酥係招牌菜，非試不何！除此之外，佢地既煙肉牛油果土耳其包，三式窩夫，同埋覆盆子荔枝玫瑰蛋糕，都好出名架。 

 

 

 

 

我地2個人TOTAL 叫左2個意粉，2個甜品同2杯野飲。係等候意粉既期間，我地2杯野飲已經到啦。

2杯野飲我地分別叫左一杯 Cappuccino 同埋一杯葡萄品果冰。其實本身我地諗住叫2杯咖啡架啦，但係係俾錢既時候剛好見到呢杯葡萄品果冰做緊優惠價$18，所以都想試下，試完之後覺得佢既冰粒磨 得夠細碎，口感又幼滑又綿綿，葡萄味道濃郁，完全無藥水味，入口香甜又清涼，真係值得推介。 

至於杯Cappuccino，我地只係叫左Tall Size，即係最細既SIZE，原來已經好大杯，味道又相當香濃，加埋一個靚靚既心型拉花都係收你$32，真係幾抵飲既。 

 歎左陣飲品無耐，我地點既意粉就到啦，分別有白汁黑椒牛肉意大利粉，同埋地中海式意粉。

 

白汁黑椒牛肉意大利粉: 其實呢個意粉係白汁意粉再加黑椒牛肉，個白汁整得好滑，一D 漿口既感覺都無。至於意粉既口感較有咬口，即係我喜歡的一類。

地中海式意粉: 呢個意粉有少少似海鮮蕃茄意粉，因為佢除左蕃茄意粉之外仲有蜆肉同蝦，海鮮份量一D都唔算少，蕃茄醬濃度適中，意粉亦都占滿醬汁，正呀。

以上2個意粉值得一讚既係佢地都有加唔少既沙律菜同車厘茄，夠晒健康啦。

雖然食完MAIN COURSE同埋飲完杯飲品之後都幾飽下，但見到D咁吸引既甜品，真係控制唔到自己，點都要叫D黎試下架啦。

呢到既乳酪雪榚真係夠晒冰凍，牛奶味夠濃，加埋曲奇碎一齊食真係好好味，唯一美中不足既係只可以揀一種配料，如果可以揀多幾樣就好啦。 

呢到既窩夫分別有單件，雙層同埋三份，而醬方面就有蜜桃，士多啤梨同埋藍莓。

如果講抵，當然叫個三份最抵啦，仲可以食齊3種味道添，但係已經飽飽地，只係想過下口癮，最後都係叫左個士多啤梨窩夫 (雙層)食算啦。窩夫口感鬆脆，上菜時亦能保持剛出爐熱騰騰既溫度，加埋忌廉同新鮮士多啤梨，真係覺得好滿足。 

呢間餐廳無論環境，食物質素同埋服務同幾好，真係一個非常適合傾計既好地方。

openrice link: http://www.openrice.com/zh/hongkong/r-pink-coffee-%E8%8D%94%E6%9E%9D%E8%A7%92-%E8%A5%BF%E5%BC%8F-%E7%84%A1%E8%82%89%E9%A4%90%E5%96%AE-r156943

地址:  荔枝角長義街9號D2 Place 3樓305號舖

kitchen J (紅磡)

平時間唔中都會過黎黃埔做野，經過呢間餐廳好多次，一直都無機會試，今日經過，見唔洗等位，就入黎試下啦。

2個人叫左2個餐，每個餐可以配沙律再加湯或者飲品一杯，而我地最後就選擇左飲品。 

一向好喜歡食沙律既我，覺得呢個沙律好吸引，D 菜好新鮮，個沙律汁都好好味，又唔會過多，感覺好清新。 

和風照燒雞 PIZZA可以揀8寸同11寸，唔大食既我地當然揀左8寸啦，呢個PIZZA係今次午飯之中我最喜歡既菜，紫菜+雞肉+薄餅配合得好好，加埋燒汁真係好惹味。唯一美中不足既就係雞肉比較少，加多少少就真係PERFECT啦。 

茄汁奄列飯其實就係蛋包飯再加D蕃茄汁，味道好香濃，茄汁香甜為主，食起黎真係幾開胃。蛋又無過熟，奄列多汁軟滑，整體上味道香而可口，好好味呀。

食完之後再配上一杯熱咖啡，真寫意。 

openrice link: http://www.openrice.com/zh/hongkong/r-kitchen-j-%E7%B4%85%E7%A3%A1-%E8%A5%BF%E5%BC%8F-%E6%B2%99%E5%BE%8B-r96187

地址:  紅磡德安街7號黃埔新天地黃埔花園8期黃埔美食坊1樓113號舖

泰出色泰國餐廳 (天后)

天后一帶有好多小店，平日夜晚黎到，見到成條街都好多野食，最後都係決定黎泰出色試一試。

2個人左半隻燒雞，半打串燒，紅咖哩豬，同埋2杯野飲。 

燒雞半隻: 味道OK，但唔夠特別，份量比想像中既少。 

串燒半打: 串燒好似係呢度既招牌菜，可以揀要一打或者半打，呢度好處係可以要雙拼，即係一半雞肉一半豬肉咁。雞同豬都整得好惹味。 

紅咖哩豬:豬肉口感唔錯，咖哩都算幾惹味，白飯要另叫，可惜食完先知原來佢地有蒜蓉包，早知叫蒜蓉包啦，可以用黎點咖哩汁呀嗎。  

 

青檸梳打+ 荔枝梳打: 青檸梳打好好味，好解暑。至於荔枝梳打，有得揀紅色或者白色，我地揀左紅色，有點兒失望，因為藥水味稍為濃左少少。

總括黎講呢到既食物都幾OK，特別係咖哩同串燒，真係整得好正宗。至於服務方面都相當唔錯，未試過既朋友真係值得一試。  

openrice link: http://www.openrice.com/zh/hongkong/r-%E6%B3%B0%E5%87%BA%E8%89%B2%E6%B3%B0%E5%9C%8B%E9%A4%90%E5%BB%B3-%E5%A4%A9%E5%90%8E-%E6%B3%B0%E5%9C%8B%E8%8F%9C-%E6%B5%B7%E9%AE%AE-r23046

地址: 天后電氣道86號地舖

HABITŪ table (銅鑼灣)

我一直都好喜歡呢間餐廳，因為好鍾意係書店旁邊飲咖啡既感覺，今日係星期日，同朋友行左陣書店就入左黎食午飯啦。 

全日早餐非常豐富，多士係啱啱烘好，暖暖地，仲有少少椰絲味，旁邊配上好嫩滑嘅蛋，一齊食既真係非常好味！豬肉腸外層脆脆地，唔太鹹，最好味既係果隻大大既磨菇，唯一美中不足既係無炸薯餅食，如果加埋就真係PERFECT啦。

今次呢碟意粉份量無上次咁少得驚人，起碼唔係兒童餐咁少呀，呢個意粉既蕃茄忌廉汁，好香濃好好味，下次都想再食呀。  

openrice link: http://www.openrice.com/zh/hongkong/r-habit-table-%E9%8A%85%E9%91%BC%E7%81%A3-%E6%84%8F%E5%A4%A7%E5%88%A9%E8%8F%9C-%E7%84%A1%E8%82%89%E9%A4%90%E5%96%AE-r122664

地址: 銅鑼灣軒尼詩道500號希慎廣場8樓L804號舖

丼丼屋食堂 (旺角)

一向都鍾意食日本野既我，不嬲都好鍾意黎呢到食野，貪佢多選擇，價錢又合理。

星期四放工後未到七點，呢到都唔洗等位，2個人叫左2個餐，再加多2個小食，似乎有少少過多。

吉列豬扒: 可以揀跟或者唔跟套餐，跟套餐既話就有埋白飯，味噌湯，日本蘿蔔同埋一些配菜。豬扒炸得又香又唔油，加埋秘製既汁真係好好味。

滑蛋雞肉丼: D蛋真係好嫩滑，加埋隻半生熟既蛋拌飯真係唔錯。呢個真係我既至愛，每次黎都一定會叫咁濟。跟餐既話除左有沙律，味噌湯，仲有日本蘿蔔同埋一些配菜。

松葉蟹肉沙律: 食起黎幾開胃，D菜都幾新鮮, 用左醒胃既酸沙律醋，蟹肉都好似少左d，但整體個味都幾好。

鐵板野菌露筍牛油燒: 食左咁多肉，就梗係要叫返D菜食下啦，熱辣辣既鐵板加上香噴噴既牛油味，真係好開胃，加上野菌份量都算多，真係幾吸引既。

2個人叫左呢4樣野，有點兒過多，唔轉套餐或者叫少一個小食會好少少。 

openrice link: http://www.openrice.com/zh/hongkong/r-%E4%B8%BC%E4%B8%BC%E5%B1%8B%E9%A3%9F%E5%A0%82-%E6%97%BA%E8%A7%92-%E6%97%A5%E6%9C%AC%E8%8F%9C-%E5%92%96%E5%96%B1-r55188

地址:  旺角花園街3-5號鴻威大厦1樓

風月堂 (佐敦)

已經好耐好耐無黎呢到食飯啦，一直以黎都好鍾意去日式西餐廳既我，當然好鍾意呢到既環境啦。

星期日中午時分到訪，都唔洗等位，真開心。

坐低後叫完野食，餐湯同麵包好快就送到。

餐湯揀左雜菜湯，好鍾意呢到既湯，蕃茄味濃得黎個湯又唔會太油，麵包又鬆軟，入口仲係暖暖地，口感一流。 

欖油鮮蝦野菜天使麵伴燒鴨胸: 天使麵唔太油，鴨胸一D都唔少，蝦又大大隻，炒得超香口，無得頂。

香煎豬扒伴龍利魚配黑椒汁: 龍利魚煎得夠香，豬扒都唔太肥，薯條仲要好香好脆，不過最吸引既反而係D菜，其實我唔介意將D薯條轉晒做菜架。 

日式海鮮野菜炒烏冬伴帆立貝: 炒烏冬一般都會係比較油，但係呢碟一D都唔油，唔太鹹，海鮮都算多，好好味。

食完咁多野之後仲有個雪榚伴窩夫做甜品，雪榚味道仲有好多選擇，再跟埋杯熱咖啡，真係一流。

呢到星期日LUNCH TIME 一個餐都係$98 至$108 左右，有湯有MAIN COURSE 有甜品仲有野飲，唔多人，環境好又靜靜地，幾適合傾計。  

openrice link: http://www.openrice.com/zh/hongkong/r-%E9%A2%A8%E6%9C%88%E5%A0%82-%E4%BD%90%E6%95%A6-%E6%97%A5%E6%9C%AC%E8%8F%9C-%E7%84%A1%E8%82%89%E9%A4%90%E5%96%AE-r184068

地址: 佐敦佐敦道14&16號嘉信樓地下A1舖

沙嗲王 (尖沙咀)

上網見到沙嗲王推出左用比卡超黎做主題既食物，覺得好新穎有趣，就諗住黎試下啦。

用呢個主題既食物有3款，我地就3款都叫晒。

咖哩豬扒飯: 你一定會問D 豬扒去左邊，哈哈，你只要切開比卡超塊面就見到架啦。佢塊面係用加左黃薑粉既飯整，而對耳仔就係用黑糯米整，至於醬汁就揀左蕃茄咖哩汁，不過可惜唔記得影相。

煙肉腸PIZZA: 迷李PIZZA，細細份，好得意，D 腸亦都唔係太鹹，但係除左支牙簽係印左比卡超之外真係無咩野同比卡超有關。

雪糕千層酥+ 布甸: 雪糕只係好一般既雪糕，至於千層酥，都幾好味，布甸一向都係我既至愛，我覺得幾好。

係呢到食到呢D咁得意既野真係開心，唔知第日會唔會出第2D 主題既食物呢?  

openrice link: http://www.openrice.com/zh/hongkong/r-%E6%B2%99%E5%97%B2%E7%8E%8B-%E5%B0%96%E6%B2%99%E5%92%80-%E5%A4%9A%E5%9C%8B%E8%8F%9C-r46911

地址: 尖沙咀加拿芬道20號加拿芬廣場5樓

明洞Express (尖沙咀)

第2次黎呢到食飯，自從第一次黎過之後就俾呢到吸引到，一直都想黎第2次。本身唔係食好多野既我，2個人黎，都係叫一個飯一個小食最安全。

辣炒年榚炒得煙韌，醬汁味辣得黎仲帶有少少番茄汁味，食落好開胃。

石頭雜錦飯就比較一般, 味道好多地方都差唔多咁。
份量夠, 熱辣辣,整個飯相當惹味，石窩內除左有自選既雞肉之外仲有好多菜，好美味 又健康 !

呢到D野真係幾好味，唯一唔好處就係快餐形式，無人SERVE你。 

openrice link: http://www.openrice.com/zh/hongkong/r-%E6%98%8E%E6%B4%9Eexpress-%E5%B0%96%E6%B2%99%E5%92%80-%E9%9F%93%E5%9C%8B%E8%8F%9C-r49493

地址:  尖沙咀金巴利道64-66A順輝大廈3號地舖