Amici (中環)

中環區係午飯時間往往都人來人往，但係到咗夜晚就自然變得冷清，亦都唔多餐廳需要等位，位於士丹利街嘅Amici，主打意大利fine dining，設計優雅，餐廳面積唔大，大約只有幾十個位，晚飯時間唔多人，真係適合情人約會傾計嘅地方。

Winter set一位$468，有前菜、湯、主菜、甜品同埋飲品。

係落咗單之後，店員好快就為我地送上麵包喇。

麵包共有兩款，入口微暖，配有黑醋橄欖油。

食完無幾耐，前菜就到喇。

蕃茄牛油果蝦沙律 :

呢個前菜嘅份量雖然比預期少，但係賣相相當精緻，有別於其他沙律，佢嘅主角唔係沙律菜，而係蕃茄同埋大蝦，味道清新嘅蕃茄加埋軟棉棉嘅牛油果蓉，配合埋彈牙嘅蝦，感覺又開胃又健康。

自家製橙味三文魚配忌廉芝士 :

薄薄嘅煙三文魚上面唧咗少量橙汁後再鋪上忌廉芝士同沙律菜，入口散發出淡淡嘅橙香味，整體味道相當豐富，感覺非常清新。

椰菜花忌廉湯 :

是日餐湯係「椰菜花忌廉湯」。平時唔多喜歡食椰菜花嘅我，本身對呢個湯都無咩期望，估唔到最後居然有驚喜。椰菜花加入忌廉打碎整成嘅湯，入口不但creamy，而且有淡淡嘅椰菜花味，值得一讚。

期待已久嘅主菜終於到喇。

香煎虎蝦配乾茄汁扁意粉 :

茄汁意粉永遠都係我嘅最愛，呢味香煎虎蝦配乾茄汁扁意粉，只係賣相已經非常吸引，虎蝦煎過後非常惹味，加入香濃嘅蕃茄汁同埋肉粒後，每條意粉都掛到醬汁，入口酸酸地，非常開胃。

慢煮西班牙黑毛豬鞍配松露燒汁 :

黑毛豬鞍用慢煮方式烹調完再煎過後，切開後有少量肉汁流出，入口外脆內軟，口感唔錯，雖然味道偏淡，但係配合埋黑松露燒汁食，味道剛剛好。伴碟有微烤過嘅薯仔、甘筍及珍珠筍，可以消除食完豬鞍嘅飽膩感。

伯爵茶曲奇妙趣芝士餅 :

平時芝士餅就食得多，但係伯爵茶曲奇妙趣芝士餅都係第一次試。用oreo整成嘅餅底上面放咗加入伯爵茶嘅cream cheese，散發出輕輕嘅茶香味，入口非常香滑，唔會太甜，味道一流。

餐飲我地叫咗熱檸茶同埋mocha，mocha嘅味道非常香濃，配合芝士蛋糕食真係非常夾。

加一後每人五百蚊左右，可以享受到優質嘅服務同埋高水準嘅美食，同情人慶祝紀念日就最好不過啦。

openrice link: https://www.openrice.com/zh/hongkong/r-amici-%E4%B8%AD%E7%92%B0-%E8%A5%BF%E5%BC%8F-fine-dining-r533988

地址: 中環士丹利街11號Stanley 11 8樓

FLIPPER'S (銅鑼灣)

梳乎厘厚班戟一直係香港嘅熱潮，但係唔係度度地方都整得好食，而每一次經過FLIPPER'S嘅我，都見到餐廳外大排長龍，每份甜品都要$99起，真係想黎試下見識下。

是日星期日，晚上八點鐘到黎到，人龍已經排到去洗手間，我地最後等咗足足30分鐘，先至可以入座。

餐牌上甜品嘅選擇唔多，只有四款甜同兩款鹹嘅梳乎厘。我地點咗原味同埋榛子朱古力焦糖香蕉班戟。

等咗足足二十分鐘，期待已久嘅梳乎厘終於到喇。

原味同榛子朱古力比較，個人比較喜歡原味，一來感覺無咁膩，二來點鮮忌廉食味道較為夾。

一份梳乎厘有三件，上檯時有好香嘅蛋白味，入口非常鬆軟，真係令人一口一口咁食過不停。

openrice link: https://www.openrice.com/zh/hongkong/r-flippers-%E9%8A%85%E9%91%BC%E7%81%A3-%E6%97%A5%E6%9C%AC%E8%8F%9C-%E7%94%9C%E5%93%81-%E7%B3%96%E6%B0%B4-r535965

地址: 銅鑼灣軒尼斯道500號希慎廣場6樓i.t blue block

Sabor Spanish Touch Private Kitchen (上環)

平時西班牙菜就食得多，但係專門做私房菜嘅餐廳就真係未試過。今次趁住朋友生日，一於同呢個咁為食嘅佢黎慶祝順便試下菜啦。

因為係私房菜嘅關係，餐單全部都係tailor-made，所以我地係訂位時已經揀咗食d咩。店員會首先俾以上個basic menu你過目，你可以隨意更改上面任何嘢，如有需要，只需補返個差額就可以喇。

由於我地對個sherbet興趣唔大，店方提議我地每人加$30將個sherbet轉去extra 嘅tapas。咁我地total就有4個tapas、兩個湯、一個main course同埋兩個甜品。

Tomato Garlic Toast :
蕃茄醬同埋多士係分開用玻璃樽上嘅，賣相好精緻，入口凍凍地，放係熱辣辣嘅脆多士上，味道酸酸甜甜，好開胃。

Grilled cuttlefish with cream allioli Espuma :
上菜嘅時候，墨魚粒放係一個吉嘅玻璃兜外面，稍後店員先至係兜入面唧入綠色cream狀泡沫，賣相好似wasabi，其實係蕃茜蒜蓉醬黎，做法好新穎，墨魚粒點過呢d泡沫後，入口有輕輕嘅蒜香味，相當滋味。

Garlic Shrimp :
用橄欖油加入蒜片炒起嘅蝦，上菜時散發出陣陣香氣，蝦肉入口亦都爽口彈牙，整體感覺唔錯。

Pork Belly with Scallop :
豬腩肉嘅皮非常香脆，一層皮一層肥膏一層肉，肉質嫩滑，雖然油份較多，但係配埋帶子同埋蘆筍食可以中和返油份。

Portobello Mushroom Benedict :
呢個係咁多個tapas之中我最喜歡嘅一個。

煎香嘅大啡菇上配上我最喜愛嘅egg benedict，切開後蛋汁慢慢流出，配埋火箭菜一齊食，味道好夾。

Wild Mushroom Soup :
蘑菇打碎後加入忌廉整食湯後，再係上面加少許蛋白泡沫，賣相有d似意大利咖啡，好得意。味道方面，蘑菇味香濃，入口有蘑菇粒，好有口感。

Chorizo Soup :
以西班牙香腸加入蕃茄等等蔬菜整成嘅湯都係第一次試，入口有好濃嘅肉味，鹹度適中。

Seafood Paella :
食西班牙菜又點少得食西班牙海鮮飯呀。加入咗各式各樣海鮮炒成嘅飯，上檯時香氣十足，意大利飯吸晒湯同茄汁嘅精華後，味道濃郁，加埋檸檬汁食，味道更豐富。唯一美中不足嘅係賣相比預期有差別，建議店方可以從蝦嘅擺位入手，咁會更加吸引。

甜品方面我地揀咗Crema Catalana同埋Tiramisu。

Crema Catalana :
係一d帶檸檬味而軟棉棉嘅東西上加入糖漿，再用火槍燒過整成嘅糖漿脆片，賣相同crème brulee真係非常相似。不過，當用匙更舀落去時，感覺就完全唔同喇。

Tiramisu foam with home-made mixed berries and orange gelato :
Tiramisu foam打得非常輕身，入口好滑，加入蛋糕同脆粒後，味道非常夾，配埋酸酸甜甜嘅gelato食，感覺好清新，亦都為我地嘅晚餐作一個完美總結。

openrice link：https://www.openrice.com/zh/hongkong/r-sabor-spanish-touch-private-kitchen-上環-西班牙菜-r82264

地址： 上環永樂街1-3號世瑛大廈6樓601室