BEL CIBO Seafood Bar & Restaurant(尖沙咀)

朋友同我慶祝生日，帶左我黎呢間餐廳，佢地個二人餐做緊優惠， like facebook 就會有六五折。

鮮果釀酥盒伴煙三文魚配香芒汁
煙三文魚好新鮮，酥皮亦都好香脆， 配埋香芒汁食落幾開胃。

鮑魚就比想像中細粒， 兩口就食完。

鵝肝同菠蘿一齊食就真係第一次， 感覺非常新奇。

南瓜湯好重南瓜味， 亦都好香滑，仲俾埋我最喜愛既麵包條我送添。

主菜方面有四個選擇，牛，豬同兩個魚， 我地揀左兩款魚。

三文魚雖然有少少過熟， 但係仍然保持到鮮味，伴碟既薯蓉都唔會好重牛油味。

鱈魚柳外皮好脆，內裡亦都好滑。

意大利飯上面鋪左好多海膽， 唔喜歡海膽既我真係唔識欣賞， 但係朋友就好鐘意。飯方面軟硬適中，幾有質感，不過個汁有d漏。

甜品方面雖然唔知叫咩名， 但係就應該係雪糕類既， 切開黎係固體狀， 凍冰冰好好味、全晚最好味係佢啦。

飲品方面我地叫左特飲，杯到果杯係有氣果汁， 針筒內係糖水， 我就試左lime and green apple, 感覺有點兒過甜，下次都係試第二d 算。

openrice link: http://www.openrice.com/zh/hongkong/r-bel-cibo-seafood-bar-restaurant-%E5%B0%96%E6%B2%99%E5%92%80-%E5%A4%9A%E5%9C%8B%E8%8F%9C-r179619

地址: 尖沙咀厚福街8號H8 12樓

Coffee Jobs(旺角)

第二次黎呢間餐廳，食物同飲品都同上一次差唔多。我地一行二人，叫左兩個餐，每個餐除左主菜之外仲有湯/沙律同飲品。

雖然我係鍾意食沙律，但係如果有湯揀我會鍾意飲湯多D，今日既湯係南瓜湯，好大碗，南瓜味好濃，唯一美中不足既係入面既麵包粒過冧，似係放埋係入面滾咁，如果可以臨上檯先落就完美喇。

係上主菜既時候店方俾左兩隻碟仔我地方便share食物，每隻碟仔上面都印有唔同既動物圖案，真係忍唔住相機「食」先。

為左方便起見我地一早已經叫埋飲品，朋友叫左熱朱古力，玻璃杯既設計好特別，有兩層，所以拎上手唔會熱，咁既設計真係相當聰明。

呢杯咖啡真係唔記得係咩咖啡，可惜味道一般，有改進空間。

識我既朋友都應該知carbonara都算係我既最愛，尤其係無落芝士果D，呢個carbonara賣相真係好正，最鍾意係佢中間有隻半生熟蛋，熱騰騰既蛋真係好吸引，拮穿佢果野真係好過癮，意粉裡面仲有好多煙肉粒，碟既旁邊用左少少辣椒粉伴碟，真係好好味呀。

黑松露蘑菇意大利飯軟硬適中，幾有質感，個汁好creamy ，黑松露既味道都好香濃，值得一試。

openrice link: http://www.openrice.com/zh/hongkong/r-coffee-jobs-%E6%97%BA%E8%A7%92-%E8%A5%BF%E5%BC%8F-r465886

地址: 旺角廣華街3號百利達廣場地下3號舖

Dacha Restaurant & Bar(中環)

今年生日都唔知點解咁多餐飯食，anyway，另一個朋友帶左我黎位於荷李活道既 Dacha Restaurant & Bar，由地鐵站行去都要成10分鐘。

餐廳環境幾好，唔太嘈，店員仲留返個特別通風既位置俾我地。

餐廳既佈置好有東歐既風格，真係忍唔住影下相。

坐低無耐後店員就拎左D麵包俾我地，但係睇落麵包又唔似蛋糕又唔似，賣相黑黑地咁，真係唔知其實係咩黎，不過食落似係黑糖麵包，本人唔識欣賞，唔太喜歡食。

本人真係幾鍾意食腸，Homemade Kielbasa 賣相呈一餅腸咁，食落唔太鹹，點埋mustard就更加好味。

Chicken Pelmeni 係雞肉雲吞，味道同做法都相當中式，湯底係雞湯，真係唔講都唔知原來係東歐菜黎呀。

Chicken Kiev 係有流心餡料既雞肉，再拎去炸，食果時要小心D，因為真係有好多汁流出黎架。配菜既薯角亦都焗得好夠火喉，沙律既配汁亦都好好味，令人越食越開胃。

驚喜時刻到喇，朋友「去洗手間時」為我order左一件本餐廳幾出名既千層蜂蜜蛋糕 Medovik，仲插埋蠟燭，隻碟仲要好靚咁，蛋糕食落好鬆軟好重蜂蜜味，可惜有點兒過甜，所以食少少已經夠啦。

呢度既店員非常friendly，服務超好，好多謝大家俾左一個難忘既晚上我。

openrice link: http://www.openrice.com/zh/hongkong/r-dacha-restaurant-bar-%E4%B8%AD%E7%92%B0-%E4%BF%84%E5%9C%8B%E8%8F%9C-r485532

地址: 中環蘇豪荷李活道38-40號地舖

Dan Ryan's Chicago Grill(尖沙咀)

小妹生日，屋企人帶左佢黎呢度慶祝，是日係星期五，好多人放工後都會出去happy friday，所以我地梗係book定位啦，如果唔係就真係等餐飽飽架喇。

落單後無耐店員就拎左兩籃麵包俾我地，平均每人都有成兩個咁多，真係食麵包都食飽啦。麵包仲要有幾款，全部都熱辣辣，牛油仲要放軟，非常細心。

我地一行五人，叫左4款主菜，其實真係差唔多啦，因為份量都幾多。

第一款係牛扒，正式既菜名唔記得左喇，因為佢地有好幾款牛扒，不過本人唔食牛，所以對塊扒無咩comment，不過配菜都好多，有蕃茄，粟米同埋新薯，新薯好好味，不過粟米就好難切，最後我地要批D粟米粒出黎先至share到。

第二個菜我地叫左手製餡餅，佢有雞肉同牛肉揀，我唔食牛，就梗係揀左雞啦，塊酥皮整得好香，落左幾多牛油豬油我就真係唔想知，好味就得啦，一次半次又唔係成日食。至於個餡，D雞整得好creamy，裡面除左肉之外仲有好多蘑菇同菜，不過因為有酥皮同cream，都幾滯下，每人食少少已經夠晒啦。配菜方面有沙律，令到個賣相更加靚。

海鮮濃湯燴意大利飯，賣相橙橙地色，幾吸引，裡面仲有唔少海鮮，飯量都幾多，食落都好香口，不過做得唔夠正宗，無咩意大利風味，因為平時食開既正宗意大利飯真係有D似BB食既糊仔咁，呢碟似係外國人整既中式炒飯多D。

最後一個主菜係傳統燒烤美國豬排骨，有分半份同一份，我地一行5人，所以叫左一份，份量都幾多，每人都食到2條，醃得都幾入味，附加既燒烤醬都可以唔駛點。配菜方面，有薯條同埋椰菜沙律，食咁多肉，無返D沙律真係唔得，所以都覺得設計餐牌果個真係幾有心思。

因為訂檯果時講左會有壽星女在場，所以佢地特登留左件蛋糕免費送俾我地，不過款式就無得揀，只有carrot cake。可惜本人對呢款蛋糕興趣不大，不過都好多謝餐廳既一番心意。

總括黎講呢度食物同服務幾好，環境方面，坐得幾舒服既，不過可惜餐廳播住音樂去營造美式餐廳既氣氛，但係我地剛剛就坐正係個speaker下面，所以感覺有D嘈，下次黎果時叫佢俾張遠離speaker既檯先。

openrice link: http://www.openrice.com/zh/hongkong/r-dan-ryans-chicago-grill-%E5%B0%96%E6%B2%99%E5%92%80-%E7%BE%8E%E5%9C%8B%E8%8F%9C-%E6%B2%99%E5%BE%8B-r575

地址: 尖沙咀廣東道17號海港城海運大廈3樓OT315號舖

Chor Bazare Indian Cuisine(大坑)

一向都非常鍾意食印度咖哩，平時都只會去重慶大廈，但係今日為左就一個住港島既朋友，最後黎左佢介紹為於大坑既餐廳。

 

餐廳係由印度人打理既，佢地既英文真係有限公司，所以黎呢度幫襯既話要俾D耐性，不過正正因為係印度人開，食物味道非常正宗，餐廳既佈置好有印度既風格，可惜座位唔係好多，都係10幾個左右，舊同學聚會要黎呢度真係有D難度。

落單無耐店員就俾左D免費既前菜俾我地食，係印度薄餅黎既，D薄餅食落脆卜卜有點兒微辣，連埋4款唔同既醬汁，有酸有鹹有辣，不過個人覺得唔點醬仲好味。

我地叫左一份印度烤雞，佢有分一隻同半隻，我地唔大食，所以都係叫左半隻。烤雞落左好多香料，幾好味。

另外我地都叫左一份咖哩雞，佢有分有椰汁同無椰汁，我地因為怕肥所以揀左無椰汁。一份咖哩雞其實份量都好多，咖哩味非常香濃，而且一D都唔辣。我地都點左兩份Naan黎送，一份naan只係18蚊，但就有成3塊咁多，真係幾抵食，仲要整到熱辣辣先俾我地。

總括黎講呢度既裝潢亦都好特別，食物非常正宗，亦都有好多羊肉供應，鍾意食羊既朋友呢度真係一個唔錯既選擇。

openrice link: http://www.openrice.com/zh/hongkong/r-chor-bazare-indian-cuisine-%E5%A4%A7%E5%9D%91-%E5%8D%B0%E5%BA%A6%E8%8F%9C-%E5%92%96%E5%96%B1-r154167

地址: 大坑新村街14號地下

Moreish & Malt(觀塘)

星期六去觀塘行街，唔係去APM就多數去駱駝漆度行，最近係openrice 發現呢間餐廳，都想黎試下。

地鐵站行過去都要成10分鐘，不過好彩天氣好又涼涼地，唔經唔覺又行到啦。

餐廳由外面睇好有外國feel，同太古坊對面某間bar既格局相當相似，餐廳入面都算寬敞，坐得都算舒服。

假日既brunch menu有main course同一杯飲品，都係100蚊鬆D，如果想轉飲特式咖啡，都係加15蚊，都算合理。唯一美中不足既係無湯飲，如果加埋既就會更加好。

香辣吞拿魚藜麥沙律: 

沙律菜非常新鮮，賣相都相當吸引，沙律用左煎香左亦帶微辣既吞拿魚，加埋南瓜粒食，味道好夾，黑醋亦都唔會過濃，非常開胃。

紐西蘭肉眼扒，炒蛋，多士: 

雖然本人唔食牛，但係朋友們都覺得肉眼扒肉嫩多汁，而我亦都覺得炒蛋非常嫩滑，唔似某大型美式漢堡包專門店咁整得過熟。

大蝦扁麵，碎蝦乾白酒汁: 

扁麵吸左香濃既白酒味, 味道十分可口, 配料仲有大蝦同碎蝦乾，唔知係咪因為咁所以食落都特別爽口。

煙燻肉意粉，泡菜忌廉蛋黃汁: 

用泡菜黎整意粉都係第一次試，意粉俾想像中少泡菜味，應該係因為加左少少忌廉蛋黃汁，所以意粉既汁先無泡菜既橙色，同時間有creamy既口感。

雞肉意粉闊麵，忌廉汁: 

意粉採用左闊條麵，有別於以上果兩款，雞肉條都落得幾多，而且都幾大條，意粉汁creamy之餘仲帶少少芝士味，值得一讚。

飲品方面我地無叫普通既咖啡或茶，大家都加左$15去轉特飲，我地分別叫左熱朱古力，flat white, cappaucino 同埋latte，每杯都有好靚既拉花，真係見到都忍唔住「相機食先」。

法式甜多士: 

其實呢個法式甜多士係set brunch 黎架，但係個人認為轉去甜品menu會更加好，anyway，咁樣食法式多士都係第一次，從來唔知可以咁樣整黎食，都算係見識下。多士係用厚多士整既，點少少類似蛋醬既野焗成既，中間加少少cream cheese，上面加少少藍莓醬，再加雲呢拿雪糕整成。呢份甜品一個人食都幾漏下，share食每人食少少就夠架啦。

總括黎講呢度環境同食物都唔錯，坐得都算幾舒服，星期六日同朋友黎食飯傾計都算幾適合。

openrice link: http://www.openrice.com/zh/hongkong/r-moreish-malt-%E8%A7%80%E5%A1%98-%E8%A5%BF%E5%BC%8F-%E6%B2%99%E5%BE%8B-r480817

地址: 觀塘鴻圖道48號地下B號舖

魔膳工房(觀塘)

位於觀塘工廈既西餐廳，環境都算寬敞舒適，食物種類都幾多。

 餐廳設有沙律巴，食套餐既話加$38就可以享用。

其實除左沙律之外，仲有啫喱糖同埋生果，非常吸引。沙律菜都幾新鮮，就連醬都有好幾款，不過建議可以加多幾款唔同既沙律汁，咁會無咁肥呀嗎。

餐湯我地叫左一紅一白，白湯係粟米忌廉湯，非常creamy，亦都好重粟米味，值得一讚。可惜雜菜湯飲得出落左好多茄膏，味道有D奇怪，有改進既空間。

主菜我地叫左卡邦尼，意粉雖然好creamy，亦都有好多配料，但係唔夠蛋味，建議可以加隻溫泉蛋，咁樣賣相同味道都會更加好。

另一個主菜叫左燒豬肋骨，真係好大份，真係想像唔到其實係一人餐。燒豬肋骨好入味，薯角亦都焗得好脆。

餐飲我地叫左一杯咖啡一杯檸茶，咖啡好香，好好味，不過埋單時先發現原來係要加5蚊架，只係我地無留意餐牌。

我地係度坐左成個幾鐘，都唔會催我地埋單，食物同環境都幾好，想約朋友食飯傾計黎呢度都唔錯。

openrice link: http://www.openrice.com/zh/hongkong/r-%E9%AD%94%E8%86%B3%E5%B7%A5%E6%88%BF-%E8%A7%80%E5%A1%98-%E8%A5%BF%E5%BC%8F-%E8%87%AA%E5%8A%A9%E9%A4%90-r450520

地址: 觀塘開源道77號業發大廈一期2樓D室