一起果醬 （尖沙咀）

「一起果醬」以自家製果醬為主題，提供各式各樣配有果醬嘅菜式，現時香港共有兩間分店，分別係佐敦同埋西貢。

位於佐敦松山道嘅分店，地點旺中帶靜，平日晚飯時間都唔會太多人，好適合同朋友坐低傾計食飯。

由於之前已經嚟過好幾次，都大約知道有乜嘢食，唔使睇餐牌好耐都知想食乜。

我哋一行兩人，唔想叫兩個套餐，所以揀咗散叫，咁就可以試多啲唔同嘅嘢食。

煙三文魚沙律配熱情果油醋汁：
沙律比想像中大份，煙三文魚都算多，味道唔會太鹹，配埋芒果粒同埋熱情果油醋汁，入口酸酸地，食落都幾開胃。

玫瑰蘋果醬單骨雞翼:
單骨雞翼食起嚟非常方便，加入玫瑰蘋果醬整成後，外皮微脆，雞肉嫩滑，味道甜甜地，冇咩油膩感，感覺好清新。

炸魚手指配芒果芥茉醬：
炸魚手指配他他醬就食得多啦，配芒果芥茉漿都係第一次，味道酸酸地，用黎做小食都唔錯。

果醬九宮格多士: 
呢份九宮格多士係每次黎都必定叫嘅。厚多士烘脆後再輕輕分成九小格，每格都有一款自家製嘅果醬，賣相色彩繽紛，好吸引，部分果醬裡面仲有D果肉粒，甜甜地，口感唔錯，可以用黎做甜品。

龍蝦汁海鮮意大利飯：

意大利飯以兩隻蝦同兩隻青口襯托，賣相非常吸引。飯方面都軟硬適中，加埋帶子食，好有口感，配埋味道香濃嘅龍蝦汁食，非常好味。

冰綠茶：

夏日炎炎，飲番杯冰凍嘅綠茶消暑就最好不過啦。呢度嘅凍綠茶，無添加糖，咁就唔怕會肥啦。

濃縮咖啡伴雪糕：

濃縮咖啡同埋雪糕係分開上嘅,上菜後，要自己將熱辣辣嘅濃縮咖啡倒入冰凍嘅雪糕裏面，初時可以當淋左咖啡汁嘅雪糕食，雪糕慢慢溶解後，就可以當牛奶咖啡飲，非常有特色。

埋單每人都係＄200鬆啲，可以坐成個幾鐘頭，周圍又唔會好嘈，可以慢慢同朋友傾計，咁嘅價錢，都算好超值。

Openrice link: 

https://www.openrice.com/zh/hongkong/r-一起果醬-尖沙咀-西式-all-day-breakfast-r452856 

地址：尖沙咀松山道15-17號地下D舖 

名館（銅鑼灣）

外國朋友回港，就梗係帶佢去食下中菜啦。 位於銅鑼灣希慎廣場嘅「名館」，裝潢新穎，燈光明亮，早到嘅話仲可以坐到窗口位，由高處望落去銅鑼灣嘅夜景。

落單之後，當然係嘆返啖熱茶啦，不竟茶錢都成$15/位。呢度嘅茶係蕎麥茶，味道非常香，帶穀物烤香嘅味道，好清爽。

陳醋手拍青瓜 :

青瓜又爽又脆，入口酸酸地，令人一口一口咁食，非常開胃。 

厚切叉燒皇 :

呢度嘅叉燒係招牌菜之一，蜜汁香濃，油脂分佈同色澤都相當均衡，入口軟淋淋而有微燶嘅味道，食起黎啖啖肉，十分有水準。 

大良鮮奶脆網卷 :

外皮鬆脆嘅網卷包著香滑嘅鮮奶，外層色澤金黃，入口熱辣辣之餘質感仲軟綿綿，口感唔會好油膩，非常美味。 

菌皇醬蒸鐵棍淮山 :

平時唔多食淮山嘅我，唔係朋友想叫我都未必會叫。呢個蒸淮山真係令我有驚喜，入口又脆又爽，配埋味道濃郁又有雜菌，蝦米同瑤柱嘅菌皇醬，味道鹹鹹地，幾有口感。 

翡翠淮山炒素遼參 :

翠玉瓜，彩椒同埋素遼參加入調味料後炒成，顏色鮮艷，賣相吸引，入口非常脆身，非常好味，值得一讚。 

金黃球泡飯 :

泡飯以小火爐烘著上檯，咁樣湯底就可以保持溫度，真係非常欣賞廚師嘅細心。 

湯中間有個圓球狀外脆內軟嘅東西，賣相非常精緻，切開後裡面有類似煲仔飯嘅飯焦，混入有蠶豆、粟米、冬菇粒、肉碎、番茄、芹菜等等嘅湯底後，吸收左湯嘅精華，味道相當香甜濃郁，非常飽肚。 

養肝參燉鷓鴣:

燉湯以茶壺形式上，再配兩隻迷你杯，湯嘅材料好足，味道濃郁，入味夠火喉。

平日晚上唔算多人，唔會俾人催埋單，可以同多年無見嘅朋友係銅鑼灣夜景下共聚晚餐，真係相當難忘。

openrice link: https://www.openrice.com/zh/hongkong/r-%E5%90%8D%E9%A4%A8-%E9%8A%85%E9%91%BC%E7%81%A3-%E5%A4%9A%E5%9C%8B%E8%8F%9C-%E9%BB%9E%E5%BF%83-r478614

地址: 銅鑼灣軒尼詩道500號希慎廣場14樓1401號舖

鮮一夜火鍋 (荃灣）

邊個話出面34度熱就唔可以打邊爐架？開住冷氣打咪唔熱囉。

是日假日，同朋友行完荃灣一帶之後想搵個地方可以坐耐d傾下計，最後揀咗黎大鴻輝中心嘅「鮮一夜火鍋 」。

一夜皇御套餐$268一位，有任食火鍋兩個半鐘頭，仲有紅燒花膠翅、掌上明珠配糖心靚鮑魚、五色刺身拼盤，同埋即炒奇妙雞煲。

火鍋方面，有多個湯底選擇，仲有海鮮拼盤，安格斯肥牛，各式各樣火鍋配料，啤酒汽水仲要係任飲添。

落單之後，店員好快就為我地送上花膠翅同埋靚鮑魚。

花膠翅好香濃，非常足料，花膠都算幾大塊，咬落去都頗有膠質。

原隻鴨掌配上濃郁嘅鮑汁，加埋有咬口嘅鮑魚，唔錯。

 

好快我哋嘅雞煲就到喇。雞煲可以揀唔同嘅辣度，我哋叫咗小辣，雞嘅份量一啲都唔少，加咗蒜頭同莞茜煮之後仲散發出香噴噴嘅味道。

食到半路，係時候叫湯底及火鍋配料，準備打邊爐喇。

有別於其他鋪頭，呢度食完雞煲後，店員會換上全新嘅煲俾客人打邊爐，我哋叫咗莞茜皮蛋鍋，清清地，都幾好味。

醬料方面，呢度嘅款式都好多，仲有比較罕見嘅桂林醬添。

係呢個時候，五色刺身拼盤就到喇。刺身分別有三文魚、帶子、c赤蝦、希靈魚同埋北寄貝，全部都好新鮮，而且仲係厚切添。

食完刺身後，係時候打邊爐啦。

航母海鮮拼盤 :

呢個拼盤每日都提供七款時令海鮮，每樣都非常新鮮。

基圍蝦 :

肉質鮮甜彈牙

安格斯肥牛 :

肉味濃郁，因為切得好薄，所以淥一淥就熟。

響鈴 : 

即叫即炸既響鈴，輕輕放入湯內淥過後，外軟內脆，吸收咗湯底嘅精華後真係格外好味。

手打豬肉丸 :

入口新鮮好味而且爽口彈牙。

麻辣鱈魚湯包 :

一咬入口即刻唧出湯汁，食果時一定要好小心，唯一美中不足嘅係佢一d都唔辣。

鮮蝦水餃 :

皮薄餡靚，仲要大大隻，非常好食。

食完咁多野，梗係要飲返d野架啦。呢度所有汽水都係任飲，怕肥嘅話仲可以揀coke zero添。食完咁多濃味嘅野，可以食返碗雪糕做甜品添呀。

 openrice link: https://www.openrice.com/zh/hongkong/r-鮮一夜火鍋-荃灣-港式-雞煲-r548018

地址: 荃灣眾安街55號大鴻輝中心21樓B室