Oppa Coffee Bar Restaurant (尖沙咀）

金巴利街出名係香港既韓國街，周圍都係韓國餐廳，而呢間 Oppa Coffee Bar Restaurant 就係其中一間。

餐廳唔算大，大約可以容納到二十人，環境好有韓國色彩，格調舒服，店員都係韓國人，但有一個都識講普通話。

餐廳主打係「火焰芝士系列」，可惜我唔鍾意食芝士，無試到佢著名既「泡菜蛋漿熔岩炒飯」。

我地一行兩人，唔食得太多，諗住叫味韓式炸雞同埋一個麵share就算。

韓式炸雞我地揀左甜辣無骨炸雞，有分一份同半份揀，兩者都另配薯條，不過只係相差三十蚊。雖然叫一份真係好超值，但係唔想浪費食物，所以都係叫半份就算喇。炸雞係無骨既，好方便，唔需要吐骨，醬汁酸酸甜甜好開胃，鍾意食辣既我，覺得美中不足既係唔夠辣，可以再辣 d。

另外我地都叫左一個泡菜拉麵，配料有年糕，魚糕，泡菜同埋蛋，非常豐富，上檯時係用煲仔，好有韓式風味，泡菜湯底辣辣地好開胃，拉麵吸收左佢既精華，加埋蛋汁，真係格外好味，加埋泡菜同魚糕，好有口感。

飲品我地分別叫左有氣菠蘿汁同埋韓國檸七，兩樣都係罐裝飲品，如果有餐廳自家製既飲料會更加好。

總括黎講呢到食物同環境都唔錯，建議店方係餐牌上加返d小食，咁人少既話都可以試多d野啦。

Openrice link: https://www.openrice.com/zh/hongkong/r-oppa-coffee-bar-restaurant-%E5%B0%96%E6%B2%99%E5%92%80-%E9%9F%93%E5%9C%8B%E8%8F%9C-r437337

地址: 尖沙咀金巴利街1號F地下

Knutsford Steak Chop & Oyster Bar(尖沙咀)

難得一連放3日假，就梗係同朋友出去聚舊啦，知道金巴利道有呢間環境同食物都無得頂既餐廳，就打算同朋友一齊黎試下，等我地可以一路食好野一路傾計。

餐廳環境寧靜，播住音樂，令人感覺好舒服。裝潢亦都好高貴，環境非常浪漫，都幾適合情侶約會。

我地揀左2個小食做頭盤，以上呢味係黑豚風腿絲欖油蒜香蘑菇。蘑菇係全粒上，用左摻左蒜香既橄欖油炒既蘑菇香味十足，食落又唔會太油。

第二個小食我地揀左煙三文魚柳芒果刁草酸籽玫瑰卷。三文魚同芒果醬呢個配搭，入口非常清爽，配合埋面頭打碎左既酸瓜，食落酸酸地，好開胃。

主菜我地叫左兩個，以上呢個係大海蝦風乾蝦鮮茄蓉意粉。意粉條條分明，軟硬度適中，熟度剛剛好，完全做到al dente。至於個醬汁，蕃茄味好香好重，食落仲有好多蕃茄粒同蕃茄蓉，好有口感。至於配料，蝦總共有4隻，大大隻之餘蝦身仲切埋穀，咁客人食既時候就可以保持儀態，真係非常細心，呢點真係值得一讚。 

第二個主菜我地叫左聖路易斯醬燒乳豚厚肉排，亦即係baby back ribs。呢味菜有分兩個size，分別係半份同一份，我地人少，所以都係叫左半份。

上菜時係以鐵板上既，店員將醬汁淋上鐵板時都發出沙沙聲，顏色鮮艷，賣相非常吸引。Ribs亦都非常嫩，醬汁味道香濃，食住脆薯條，點住茄汁，好好味。

最後埋單每人都係300蚊鬆少少，環境浪漫，食物質素高，服務又一流，咁既價格，都算合理呀。

openrice link: https://www.openrice.com/zh/hongkong/r-knutsford-steak-chop-oyster-bar-%E5%B0%96%E6%B2%99%E5%92%80-%E7%BE%8E%E5%9C%8B%E8%8F%9C-r10115

地址: 尖沙咀諾士佛臺15號金巴利廣場3樓

香港郵意明信片航海主題咖啡廳(灣仔)

香港郵意呢間餐廳，聽就聽過好多次喇，但係今次都係第一次去，因為驚無位，所以預先係openrice book定檯，晚飯時段食滿$350仲有心太軟送添。

位於安樂里既香港郵意明信片航海主題咖啡廳，地點比較隱蔽，唔係咁易搵到。

餐廳以藍白航海為主調，門口仲有個紅郵筒，好有英式風格。

話明係以郵政為主題，咁當然周圍都見到好多明信片同精品喇。呢D明信片真係賣架，仲要係店方自家製，設計好特別，價錢亦都非常合理添。

餐廳廚房係半open kitchen，可以望到裡面既運作，幾得意架。

餐廳係以自助形式，要自己執檯，咁樣店方就可以節省人手，同時間客人就唔駛俾加一。

餐牌有兩版，設計簡單易明，我地點左兩份主菜，分別係珍寶全日早餐，同埋卡邦尼意粉。

卡邦尼意粉:
煙肉碎份量十足，卡邦尼汁亦都好creamy，加埋軟硬適中既意粉，真係完美既配搭。

珍寶全日早餐:
一間小型既咖啡店，估唔到只係全日早餐都有3個選擇。我地揀左珍寶全日早餐，價錢雖然比普通全日早餐係貴30蚊，但係真係大份好多，有腸仔、煙肉、三文魚、紫薯餅、牛角包、炒蛋、粟米同埋茄汁豆。

最值得讚既係腸仔一D都唔油，仲好惹味，除此之外炒蛋亦都整得好滑，牛角包上檯時亦都熱辣辣，仲好香添。唯一美中不足既係茄汁豆同埋粟米無整熱，如果可以整返熱俾客人就更加好啦，不過呢樣係香港並唔常見。

甜品我地叫左個70%朱古力火鍋。朱古力火鍋好多地方都食到，而點水果同埋雪糕就正常不過。呢度既朱古力火鍋，朱古力味好香濃，食得出唔係cheap牌子，每份除左跟一大碟水果同雪糕之外，仲有牛角包，真係豐富啦。

呈藍色既飲品並唔常見，以上呢杯「藍調」係用左椰子香奶同愛爾蘭酒調成，椰奶味好香濃，一路聽住中學年代既流行曲一路睇書，飲住呢杯帶椰香味既blue latte,真係非常寫意。

openrice link: https://www.openrice.com/zh/hongkong/r-%E9%A6%99%E6%B8%AF%E9%83%B5%E6%84%8F%E6%98%8E%E4%BF%A1%E7%89%87%E8%88%AA%E6%B5%B7%E4%B8%BB%E9%A1%8C%E5%92%96%E5%95%A1%E5%BB%B3-%E7%81%A3%E4%BB%94-%E5%A4%9A%E5%9C%8B%E8%8F%9C-all-day-breakfast-r493881

地址: 灣仔安樂里地下D舖

Dodam Chicken (銅鑼灣)

係香港，韓式烤雞店開到成巷成市，梗有一間係左近。放左四日假之後今日依然holiday mood，放工後相約好姊妹去銅鑼灣行街，順便試下呢間新開無耐既Dodam Chicken。

餐廳位於利舞臺，地鐵站一上去就係，非常方便。

餐廳大部分職員都係韓國人，坐低之後佢地仲同我地介紹招牌菜同埋份量，方便我地揀食咩，唔駛驚叫得太多。

招牌年糕：
用左傳統韓式辣醬加入洋蔥同紅蘿蔔等配菜炒成，賣相顏色吸引，味道有少少辣，年糕都幾有咬口，食落好開胃。

韓式燒烤味無骨焗雞：
無骨焗雞每件都好細件，一份有好多件，再配埋生菜同醃蘿蔔。燒烤味亦都好惹味，一啖一件真係食到停唔到口。

Apple cider & Mango smoothies:
 

Apple cider 好重青蘋果味，唔會太甜，味道好清新，可以掃走之前雞同年糕殘留既味道。

Mango smoothies 芒果味十足，飲落好creamy，鍾意芒果同奶類製品既人一定啱飲。

加埋一每人平均都係200 蚊鬆d，係銅鑼灣要搵個坐得舒舒服服又唔會俾人催埋單既地方，呢到算唔錯架喇。

openrice link: https://www.openrice.com/zh/hongkong/r-dodam-chicken-%E9%8A%85%E9%91%BC%E7%81%A3-%E9%9F%93%E5%9C%8B%E8%8F%9C-%E9%9F%93%E5%BC%8F%E7%82%B8%E9%9B%9E-r516304

地址: 銅鑼灣波斯富街99號利舞臺廣場18A號舖

柏景餐廳(尖沙咀)

柏景餐廳位於皇家太平洋酒店，Sino club 會員可於生日月份享有自助餐買一送一優惠。

是日係復活節，餐廳更以復活兔同朱古力蛋為主題，非常吸引。

海鮮吧有長腳蟹、翡翠螺、凍蝦、蟹鉗、青口等等，非常新鮮，最好味既係龍蝦同青口。熟食方面有意粉、點心、片皮鴨、燒烤同一系列既肉類，無論賣相定係味道都非常吸引。

甜品對好多女生黎講係主菜黎既，賣相好吸引，雖然每件都整到細細件，但係因為種類太多，個肚裝唔落，不過最吸引既當然係Movenpick雪糕，加埋pancake同埋topping，真係好吸引。除此之外，apple crumble亦都焗到剛剛夠火喉，豆腐花亦都非常滑。

成人晚餐連加一一位大約係600蚊，買一送一之後平均一位都係300蚊，咁既價錢，有咁高質素既食物，都算好超值，真係一試無妨。

openrice link: https://www.openrice.com/zh/hongkong/r-%E6%9F%8F%E6%99%AF%E9%A4%90%E5%BB%B3-%E5%B0%96%E6%B2%99%E5%92%80-%E8%A5%BF%E5%BC%8F-%E8%87%AA%E5%8A%A9%E9%A4%90-r2919

地址: 尖沙咀廣東道33號中港城皇家太平洋酒店園景翼2樓

Classified(赤柱)

都有一段時間無黎赤柱喇，今日趁係假日，天氣又好，就打算黎赤柱，順便去下個市集度行下。

傍晚黎到位於赤柱廣場既Classified，其實呢間餐廳係香港好多地方都有分店，可惜我從來未試過，今次都係第一次。

餐牌既design有點兒似報紙，不過簡單得黎都幾有風格。

朋友之前黎過，話呢度既薯條好好味，我試過之後都覺得佢好有英式風味，上菜時仲係熱辣辣添架。

Pizza 有三款，我地揀左西班牙辣肉腸甜椒蔥餅。賣相都算唔錯，可惜芝士份量有點兒過多，辣肉腸就過少，有改進既空間。

黑松露蘑菇意大利飯: 超喜歡黑松露既我，特別喜歡帶有香濃黑松露既意大利飯。意大利飯食落唔會太淋，一入口有濃濃蘑菇味，不其然令人食多幾口呀。

呢度環境非常好，係餐廳度望出去個景真係好靚，晚餐又唔係好多人，可以係度慢慢坐，同朋友一齊傾計，又唔會被人催埋單，星期六日放假黎呢度relax就最好不過啦。

openrice link: https://www.openrice.com/zh/hongkong/r-classified-%E8%A5%BF%E8%B2%A2-%E8%A5%BF%E5%BC%8F-%E7%84%A1%E8%82%89%E9%A4%90%E5%96%AE-r48842

地址: 西貢沙咀街5號地下