最近因為疫情關係，經常留係屋企，真係悶到傻左。今日趁住拍拖第N個月紀念，兩個一齊去食餐好。
無意中係網上發現呢間位於棉登徑嘅日式餐廳，食物特別之餘環境亦都唔錯，就打算黎試下啦。
餐廳除左提供一般日式料理之外，仲有各式各樣高質嘅海鮮，部分仲有店員係你面前燒埋俾你食添架。
刺身三盛+ 甜蝦刺身：
刺身三盛有章紅魚、三文魚同帶子，全部都係厚切，無腥味好鮮，又無筋，立下一個好印象。
三文魚肥美甘香，章紅魚肉爽鮮甜，甜蝦方面亦都啖啖肉。
焱丸號壽司：
呢味係餐廳嘅招牌菜，我地又點可以唔叫呀。
上菜時真係「哇」一聲，簡直係同餐牌上張相一模一樣架，唔「相機食先」就真係對唔住自己呀。
壽司配料 有三文魚子、帶子沙律、吞拿魚蓉、蟹肉、海膽同埋玉子絲，份量係平時嘅幾倍，非常誇張，食左好多先至見到d壽司飯，簡直可以用「多到滿瀉」呢四個字去形容，料多過飯，真係好滿足呀。
海膽帆立貝燒 +三文魚籽帆立殼燒+ 白蜆磯燒：
店員全程幫忙燒，完全係可以坐係度等食。
帆立貝加入蔬菜同菇一齊燒後再配合醬汁一齊食，兩款帆立貝都燒得好好味，帶子非常嫩滑，入口非常juicy，口感相當豐富。
蜆肉方面亦都大大粒，入口一d都唔乾身，非常好味。
蟹味噌甲羅燒+ 黑松露蟹肉甲羅燒：
甲羅燒有鵪鶉蛋、蟹肉、蟹膏同蟹子等等嘅材料，非常豐富，煮到開始變稀就可以食架啦，如果想令整體無咁膩，仲可以加啲青瓜絲添。
蟹肉好新鮮，每啖蟹膏都好鮮甜，加左黑松露後味道更加濃郁，配上粒粒蟹子食，入口脆卜卜，非常有咬口。
北海道海鮮炒飯：
雜錦海鮮有魷魚、蟹肉同蟹子，加入日本珍珠米去炒，粒粒分明，入口非常爽，一d都唔油，真係無得頂呀！
牛油炒野菜：
椰菜加入紅蘿蔔絲同菇用牛油炒香，野菜味道清淡，菇菌軟熟且清香，味道唔錯。
巨峰提子乳酸+ 白桃梳打：
飲品價錢雖然偏貴，但係都相當大杯，味道亦都唔會太甜，為我地咁特別嘅晚餐劃上完美句號。
地址：尖沙咀棉登徑23號華楓大廈地下5&6號舖
