味真越 (鴨脷洲)

南港島線都開左一段時間都未搭過，今日難得黎利東呢頭探朋友，都想周圍睇下有咩好食。

「味真越」為於利東站出口既鴨脷洲大街，附近多為住宅，似做街坊生意，價錢亦都非常平民。

青木瓜沙律：
份量比想像中多，蔬菜非常新鮮，食落好爽口。

酸辣無骨鳳爪：
無骨既鳳爪最適合懶吐骨既我地，入口酸酸地，非常開胃，不過就一d都唔辣。

蝦餅：
蝦餅蝦肉好有鮮味，入口唔會好油，配埋自家製既醬汁，酸酸甜甜，非常好味。

豬肉串：
賣相同我想像中有少少差別，無論賣相定係味道都好似德國腸，配埋自家製既醬汁，真係令人食到停唔到口。

香茅豬扒撈檬：
豬扒煎得夠金黃，亦都好有香茅味，加入生菜同甘筍絲，撈埋花生碎同自家製既汁，真係份外好味。

每人配上一杯特式飲品，為我們既晚餐劃上句號。

openrice link: https://www.openrice.com/zh/hongkong/r-%E5%91%B3%E7%9C%9F%E8%B6%8A-%E9%B4%A8%E8%84%B7%E6%B4%B2-%E8%B6%8A%E5%8D%97%E8%8F%9C-r515129

地址: 鴨脷洲鴨脷洲大街150號怡慶大廈地下4號舖

秋田火鍋海鮮丼浜燒專門店 (灣仔)

因為工作關係要黎灣仔開會，開完會都成12點，所以諗住同同事食埋飯先返公司。

可能因為時間尚早，好多人都未放lunch，所以都唔駛點等位。

餐廳既佈置非常得意，好有日式風情，座位亦都好高私隱度，見客或者同情人相聚就最好不過。

lunch set 唔算平，我地揀左泡菜豚肉鍋同吞拿魚雜錦魚生丼，餐牌設計都幾精緻。

泡菜豚肉鍋：
豚肉同蔬菜吸晒泡菜濃湯既精華後，真係格外好味，除左呢個鍋之外，個餐仲有白飯、味噌湯、沙律、蒸蛋同甜品。味噌湯落足料，有好多日式豆腐同昆布。落左柚子汁既沙律亦令我地食到好開胃。

蒸蛋非常滑，仲落左好多日式魚蛋，非常滿足。

吞拿魚雜錦魚生丼：
一上檯就已經覺得佢好吸引，顏色鮮豔，有各式各樣既魚生，有蝦、蛋、吞拿魚、三文魚同青瓜，樣樣都好新鮮，飯方面係日本飯再加醋，整體配搭非常好。

甜品方面，係雪糕黎既，有朱古力味同綠茶味揀，以我估計應該係維記。

雖然百幾蚊食個飯有d貴，但係有好野食環境又好，間唔中食下都幾好呀。

openrice link: https://www.openrice.com/zh/hongkong/r-%E7%A7%8B%E7%94%B0%E7%81%AB%E9%8D%8B%E6%B5%B7%E9%AE%AE%E4%B8%BC%E6%B5%9C%E7%87%92%E5%B0%88%E9%96%80%E5%BA%97-%E7%81%A3%E4%BB%94-%E6%97%A5%E6%9C%AC%E8%8F%9C-%E7%81%AB%E9%8D%8B-r524658

地址: 灣仔皇后大道東202號QRE Plaza 10樓

Bingo & Cook (銅鑼灣)

Bingo & Cook呢個名聽就聽過好多次喇，但係就一直無試過。今日同朋友聚舊，一於提議黎呢度試下。
 

餐廳位於銅鑼灣駱克駅2樓，地鐵站行幾步就到，非常方便。餐廳大部分都係韓國人，不過佢地D英文都好好，溝通絕對無問題。

廚房係開放式既，咁樣客人就可以望到裡面既運作，都係特色黎既。環境方面，感覺都幾舒服，可能因為我地訂左位，所以被安排坐近窗口既卡位，有好多位放隨身物品之餘仲坐得好舒服，仲可以望到銅鑼灣旺中帶靜既駱克道添。

海鮮蔥餅: 
平時食韓國野，泡菜煎餅就食得多啦，海鮮蔥餅都係第一次聽，鍾意試新野既我地當然唔執輸啦。蔥餅上有蝦，蜆，魷魚粒，青椒，紅椒，蔥同埋辣椒，煎得好夠火喉，食落脆脆地得黎仲一D都唔油膩。

韓式炒年糕: 
同一般韓式餐廳食到既有少少唔同，呢個炒年糕有好多唔同既配料，仲有埋拉麵添，賣相真係有D似部隊鍋。所有食材吸晒泡菜湯既精華後真係格外好味呀，味道酸酸辣辣咁，真係令人越食越開胃。

韓式炸雞配甜辣醬(全份): 
韓式炸雞可以揀跟醬油，甜辣醬又或者係原味，份量方面可以揀全份或者半份，另外會再配上四種醬汁俾你地自己點，附上四種不同口味的醬汁俾你地自己點，以我估計應該係蜜糖芥末，辣醬，白沙拉醬同埋韓式醬油。貪超值既我地揀左一整份既韓式炸雞配甜辣醬。炸雞配埋甜辣醬，入口一D都唔乾身同熱氣，仲好香口添，真係幾好味，不過因為要吐骨，所以食起黎真係有D攰，加上都幾漏，所以都係叫無骨既好D。除左炸雞之外，仲有新薯同埋粟米做配菜，整體配搭真係唔錯。

呢度環境同食物都唔錯，最重要既就係唔會俾人催埋單，份量方面，3個人食真係剛剛好，埋單每人都係$142到，都唔錯呀。 

openrice link: https://www.openrice.com/zh/hongkong/r-bingo-cook-%E9%8A%85%E9%91%BC%E7%81%A3-%E9%9F%93%E5%9C%8B%E8%8F%9C-r465359

地址: 銅鑼灣駱克道487-489號駱克駅2樓

Day and Nite by Master Kama (旺角)

幾星期前去過銅鑼灣分店後，POST 左唔少相上面書等人LIKE後，朋友們都嚷著叫我同佢地再去多次。

同上次唔同既係，今次揀左黎旺角分店，呢間分店既主題係Day n Nite- 日與夜，同銅鑼灣既風格有D唔同。餐廳主打藍白色，亦都放左唔少龍蝦既毛公仔。地點方面亦都好易搵，係旺角地鐵站Ｅ２出口行５分鐘就到，非常方便。

正因為上次個龍蝦包俾我係面書上騙左唔少LIKE，今次我都想食多次呢個包，不過，同行既朋友就對呢個價值$428 既龍蝦匯更加有興趣喇。

龍蝦匯可以話係店中最超值既龍蝦套餐！當中包括波士頓龍蝦包，薯條，烤蒜蓉牛油龍蝦同龍蝦湯雜錦海鮮烏冬，一次過滿足晒四個願望。

龍蝦包: 非常大個既龍蝦包，兩個人share食就最啱不過，包裡面夾住好多龍蝦同埋醬，龍蝦肉大隻之餘仲好厚肉，令我地感覺到龍蝦係主菜，麵包係配菜。

薯條方面，係雙色薯條黎既，即係用普通薯仔同埋蕃薯整成既，橙色同埋黃色既配搭，賣相真係好吸引。

烤蒜蓉牛油龍蝦: 龍蝦烤得剛剛好，蒜蓉味亦都好適中，龍蝦肉大隻之餘仲好厚肉，真係令人越食越開胃。

龍蝦湯雜錦海鮮烏冬: 龍蝦湯雜錦海鮮湯可以揀跟飯或者烏冬，我地就選擇左烏冬。龍蝦湯好濃味，亦都有好多海鮮料，烏冬吸晒龍蝦湯既精華後，入口都好有海鮮甜味，上菜時仲係熱辣辣，真係值得一讚。

openrice link: https://www.openrice.com/zh/hongkong/r-day-and-nite-by-master-kama-%E6%97%BA%E8%A7%92-%E6%97%A5%E6%9C%AC%E8%8F%9C-%E6%B5%B7%E9%AE%AE-r503371

地址:  旺角山東街50號1-2樓

新海灣 (澳門)

黎澳門一日遊，點都要食返餐葡國菜，經一位澳門朋友熱烈推介呢間餐廳之後，都打算黎試下。

免費提供的麵包:
坐低之後，店員就為我地送上餐牌同埋麵包，麵包雖然係免費提供，但係細食加上下午已經食左好多小食既我，真係唔係好敢食，怕食唔落黎緊想食既美食，不過同行既朋友試過話麵包真係相當鬆軟呀。

葡式炒蜆: 
呢個炒蜆真係非常好味。d蜆好新鮮，D殼炒起後全部都開晒，入口鮮甜得黎又食到果種鹹鹹地既海水味。

馬介休球:
呢味菜係段件叫既，想食幾多就叫幾多隻，可能因為呢個原因，所以賣相一般，可以改善一下。做法方面，其實係用薯茸釀入馬介休之後再拎去炸，入口外脆內暖，食落又唔會話好漏。

海鮮飯: 
上檯時真係會令人「嘩」一聲，因為賣相真係好吸引，顏色又鮮艷，海鮮飯裡面有各式各樣既海鮮，好似龍蝦呀，蜆呀等等，湯底味道亦都好濃，似係帶有少少蕃茄味既海鮮湯，加埋D飯落去真係會令人食到停唔到口。不過，呢個海鮮飯雖然話係二人份量，但係其實3-4個人食都還可以。

原本都想叫樣甜品試下既我地，最後都因為太飽所以食唔落喇。不過想讚既係，餐廳水準真係非常高，服務又好，連我都會再推介俾D會黎澳門玩既朋友呀。

openrice link: https://www.openrice.com/zh/macau/r-%E6%96%B0%E6%B5%B7%E7%81%A3-%E5%AE%8B%E7%8E%89%E7%94%9F%E5%BB%A3%E5%A0%B4-%E7%9A%87%E6%9C%9D-%E8%91%A1%E5%9C%8B%E8%8F%9C-r154160

地址: 宋玉生廣場(皇朝)倫敦街88號環宇豪庭地舖

瑪嘉烈蛋撻店 (澳門)

仲記得好多年前，香港曾經都有過葡撻專門店，可惜開左唔係好耐就已經被淘汰喇。

今日難得山長水遠由香港黎到澳門，點都要試返件葡撻呀。

 

好唔容易先至黎到瑪嘉烈蛋撻店，澳門唯一既一間，見到幾十人係度排緊隊，都知唔試就真係走寶啦。原來咁多人排隊係等緊新鮮出爐既葡撻，大家記住要先去買票，之後先去排隊等，否則可能會空歡喜一場架。

瑪嘉烈蛋撻店既葡撻特點在於撻皮同雞蛋餡料形成強烈對比，表面既焦糖更提高蛋撻既香味。因為係新鮮出爐時，所以個皮熱得黎之餘內餡亦都相當鬆軟，非常好味。

openrice link: https://www.openrice.com/zh/macau/r-%E7%91%AA%E5%98%89%E7%83%88%E8%9B%8B%E6%92%BB%E5%BA%97-%E6%96%B0%E9%A6%AC%E8%B7%AF-%E8%91%A1%E5%9C%8B%E8%8F%9C-r23791

地址: 新馬路馬統領街金利來大廈17B地舖

世記咖啡(澳門)

知道「世記」既厚蛋豬扒包出名，所以都想黎試下。「世記」位於新馬路賣草地里，地點有點兒隱蔽，要問人先搵到。雖然係咁，但係我地一到時真係排晒大隊，真係要等一段時間。 

厚蛋豬扒包顧名思義就係麵包夾住厚蛋同豬扒，有別於其他地方既豬扒包係，呢度既豬扒係煎唔係炸，感覺上無咁肥，加埋厚蛋咁夾住食，口感一流，可惜口細既人真係未必可以一口就咬得晒2層麵包，蛋同埋豬扒，食起黎真係有D攰。

openrice link: https://www.openrice.com/zh/macau/r-%E4%B8%96%E8%A8%98%E5%92%96%E5%95%A1-%E6%96%B0%E9%A6%AC%E8%B7%AF-%E6%B8%AF%E5%BC%8F-%E9%BA%B5%E5%8C%85%E5%BA%97-r100528

地址: 新馬路賣草地里7-15號長信大廈地下

勝利茶餐室 (澳門)

晨早流流從香港出發至澳門，行完早上既景點都已經係午飯時間，黎到澳門，就梗係要食豬扒包啦。之前上網見過，「勝利」既豬扒包簡直係名不虛傳。

因為係即叫即整既緣故，豬扒包等候需時，大約係10-15分鐘到。個包賣相相當吸引，烘過之後咬落外脆內軟，夾住塊新鮮炸起既巨型吉列豬扒，咬落勁有肉汁，整體感覺非常好。

openrice link: https://www.openrice.com/zh/macau/r-%E5%8B%9D%E5%88%A9%E8%8C%B6%E9%A4%90%E5%AE%A4-%E6%96%B0%E9%A6%AC%E8%B7%AF-%E7%B2%B5%E8%8F%9C-%E5%BB%A3%E6%9D%B1-%E7%B2%89%E9%BA%B5-%E7%B1%B3%E7%B7%9A-r24550

地址: 新馬路營地大街94號

Schnee German Restaurant (筲箕灣)

上年年尾黎過schnee，不過係銅鑼灣分店，自此之後對佢念念不忘，最近意外地發現原來筲箕灣都有分店，又近我同朋友既公司，就打算放工後黎試下啦。

入到黎餐廳，見到坐位好少，得30個左右，細過銅鑼灣分店好多，真係好彩有book 到檯，否則真係可能空歡喜一場。

餐廳既佈置都好有德國風味，最值得欣賞既係佢地個open kitchen，可以俾客人見到裡面既運作，都幾得意架。

揀左好耐，終於揀到我地想食既野喇。

黑松露介子意大利雲吞伴輕怡菠菜忌廉汁:
其實呢味菜上次黎都有叫，食過翻尋味。菠菜汁做得creamy得黎又唔膩，加埋黑松露之後又無蓋到個菠菜味。雲吞方面，雖然係用芝士做餡，但係味道一D都唔濃，平時唔多鍾意食芝士既我都接受到，整體既配合，真係令人食完一粒又一粒呀。

傳統西班牙烤乳豬配香脆薯絲: 
烤乳豬D皮非常薄，入口非常香脆，肉質鬆軟鹹香，脂肪亦都比想像中少，伴碟既原來係薯條，仲以為係有椰菜絲呀沙律呀果D添。整體黎講都算唔錯，不過如果可以加返少少沙律既話，感覺會清新D同無咁膩。

香燒紐倫堡粗豬肉腸:
德國腸係我既至愛，雖然知鹽份高，好無益，不過為食起上黎都會想食。呢份豬肉腸，唔算好鹹，一份共有兩大條，每一大條係以3小條連住既。碟既中間更加以調過味既薯仔黎伴碟，好好味。

榛子焦糖燉蛋: 
焦糖燉蛋平時就食得多，但係榛子味既就真係第一次。係幼滑的法國忌廉中混入芳香濃郁的榛子，真係帶出一種又特別又令人回味既味道。燉蛋上面更加放上幾粒藍莓做裝飾，真係令人「相機食先」。

整體黎講，今餐晚餐無論食物同環境都唔錯，唯一美中不足既就係等候食物需時，想食好野既話，真係要俾D耐性呀。 

openrice link: https://www.openrice.com/zh/hongkong/r-schnee-german-restaurant-%E7%AD%B2%E7%AE%95%E7%81%A3-%E8%A5%BF%E5%BC%8F-r432089

地址: 筲箕灣筲箕灣東大街28-40A號東興大廈地下1號舖

香料咖哩皇(尖沙咀)

其實都黎過重慶大廈食咖哩好幾次架喇，不過距離對上一次黎都應該有兩年既時間喇，其實每一次黎呢個地方我都有D驚，因為一定會俾一大班印度人圍住我叫我去佢地餐廳度食，仲慘過係街度俾地產經紀同埋信用卡SALES SELL。

因為朋友一早就揀左呢間餐廳，所以無論其他人點遊說我地去佢地餐廳度試，都無影響我地。重慶大廈裡面仲有分好幾個zone，分別係A, B, 同C，要上樓就要分別搭3部唔同既升降機，所以我覺得佢地彼此都唔通既。由於佢地只有兩部升降機，一部去單數樓層一部雙數樓層，而剛好係食飯時間，所以等左好耐先上到樓。

店內充滿著印度既氣氛同風格，亦都有好多印度畫作同擺設。

餐前小食: 餐前小食係落單後就會拎俾你，唔駛加錢既，小食係烤脆餅，食落非常脆口，味道都幾辣下，除此之外，仲有配一D綠色醬料，其實係咩黎就真係唔知，只知應該係有少少薄荷。

炭烤香燒雞: 用鐵板上既香燒雞，上檯時發出吱吱聲，仲出緊煙，熱辣辣之餘仲好香。雞肉醃成燈色，非常嫩滑，調味又適中。唧埋D檸檬汁係雞肉上，香味會更加突出，非常好味。

印度咖哩海鮮蝦+ 印度烤餅

印度咖哩雞+ 印度烤餅

咖哩我地叫左蝦同埋雞，咖哩汁好香好滑，用naan黎點就最適合架啦。見menu naan 一份只係15蚊，諗住份量應該多極有限，所以叫左兩份，點知原來一份都有成3塊咁多架，不過，用佢黎點咖哩汁既話，非常開胃，好快就食晒架喇。

Mango Lassi:  Lassi係著名印度飲料之一，相信好多印度菜餐廳都有，味道有D似芒果奶昔再加少少乳酪，但係相信都加左少少印度香料。

openrice link: https://www.openrice.com/zh/hongkong/r-%E9%A6%99%E6%96%99%E5%92%96%E5%93%A9%E7%9A%87-%E5%B0%96%E6%B2%99%E5%92%80-%E5%8D%B0%E5%BA%A6%E8%8F%9C-%E5%92%96%E5%96%B1-r504935

地址: 尖沙咀彌敦道36-44號重慶大廈4樓C-2室