韓宮 (紅磡)

今日市區成37度，游水過後同朋友黎到黃埔食飯，我倆都突然之間想食韓國菜，所以係開飯網搵到呢間係正地鐵站出口既韓宮。

呢度既店員大部分都係韓國人，佢地只識講韓文同埋英文，但係正正因為咁，令到我覺得呢度既食物會相當地道。

落單之後店員就為我地送上韓式小食，總共有五款，我最喜歡既係薯仔，醃得好入味。

本身我地想叫韓式粉絲，但係餐牌上見到有牛肉，而我又唔食，就諗住叫泡菜紫菜卷，可惜可能因為我地遲去，所以已經沽清。最後我地叫左泡菜辣湯，石鍋雞肉飯同埋煎餃子。 

泡菜辣湯 : 

唔睇英文餐牌都唔知原來個湯係跟飯，令到我地叫既份量有點兒過多。泡菜辣湯既味道非常正宗，賣相呈紅色，起初都驚會太辣，好彩最後辣度仍然可以接受，如果伴埋飯一齊食，問題應該唔會太大。  

石鍋雞肉飯 : 

石鍋飯裏面有好多配料，除左雞肉之外，仲有韓式紫菜、蘿蔔條、雞蛋同菜，非常豐富。個飯同辣椒醬係分開上，好欣賞店方既細心，咁樣客人就可以因應自己既喜好黎加辣醬啦。 

煎餃子 : 

一份有成8件，大大隻仲要即叫即整，最值得一讚既係入口唔油，味道香濃，唔駛點醬已經好好味喇。 

openrice link: https://www.openrice.com/zh/hongkong/r-%E9%9F%93%E5%AE%AE-%E7%B4%85%E7%A3%A1-%E9%9F%93%E5%9C%8B%E8%8F%9C-%E9%9F%93%E7%87%92-r165933

地址: 紅磡黃埔新村民兆街16號地舖

阿元來了 (西營盤)

阿元來了係西營盤開左成兩年，最近仲係觀塘開埋分店，但係一直都無幫襯過，今日難得準時放工，就一於同朋友黎試下。

傍晚七點幾黎到西營盤第三街，離遠望到某餐廳門外企左好多人，了解過後原來就係我地要黎既地方，「阿元來了」。

雖然要等成10幾張檯，但係因為每位用餐限時30分鐘，所以turnover rate高，唔係等左好耐就可以入去喇。

食物選擇方面都算多，飯麵小食前菜湯甜品飲品咩都齊，足足有成幾十款咁多。

魯肉飯:

呢度既魯肉飯真係非常正宗，魯肉滿滿地鋪係碗飯上面，肥膏唔算多，入口淋之餘仲好入味，令人越食越開胃，不過份量比想像中少，男仕未必夠食。

香菇肉羹麵: 

肉羹既質地非常杰身，口感有點兒似碗仔翅，入口有一陣冬菇同芫茜既香味，味道濃得黎又唔會好鹹。羹裡面既肉團大大粒，亦都好彈牙，配埋沾滿湯羹既味道同滑身既麵條，真係好好味。

淡水魚丸湯:

帶有麻油味既湯底，入口有點兒油同鹹，但係魚丸都相當大粒而且彈牙，都算唔錯。

飲品方面，甜度都冰度都可以自己揀，珍珠奶茶既珍珠非常彈牙，而且分量十足，入口非常清涼，簡直係夏天消暑解熱既涼品。

呢度無論食物同埋餐廳既佈置都好有台式風味，唯一美中不足既就係座位非常窄同埋無開飯網其他食家食到既蚵仔煎，究竟係暫停供應，定還是改左餐牌呢?

openrice link: https://www.openrice.com/zh/hongkong/r-%E9%98%BF%E5%85%83%E4%BE%86%E4%BA%86-%E8%A5%BF%E7%92%B0-%E5%8F%B0%E7%81%A3%E8%8F%9C-%E5%8F%B0%E5%BC%8F%E9%A3%B2%E5%93%81-r433525 

地址: 西環西營盤第三街73號地舖 

Flâneur (佐敦)

對食有要求既我唔單止要求食物要好味，仲會著重餐廳既環境同服務添。

位於佐敦官涌街既Flâneur，法文係解閒逛者，旺中帶靜既地點，係平日既晚上，往往帶俾人一種好悠閒既感覺。餐廳座位唔多，裝修好有氣氛，亦都相當浪漫，坐得都好舒服，係約埋三五知己或者係情人談心既好地方。

坐低之後我地先叫飲品，唔飲酒既我地，除左Mocktail之外，就只有汽水同果汁兩個選擇。係咁浪漫既環境底下飲汽水，真係有點兒失霸氣，可惜Mocktail又唔太多合口味，所以最後都係揀左菠蘿汁。

菠蘿汁只係賣相已經非常吸引，上檯時真係好難唔令人「相機食先」。味道方面亦都非常鮮甜，夏日炎炎飲返一杯，真係可以消暑。

我地一行兩人，叫左兩個頭盤，一份主菜同埋一份小食。

法國鵝肝拼盤：

「Fois gras」(鵝肝)係法國既獨門佳餚，呢度既鵝肝肥潤，夠厚身，外脆內軟滑，入口即溶，配埋蒜蓉法包同埋似係自家製既鵝肝醬，真係完美既配搭，d咩膽固醇呀，卡路里呀，都一一拋諸腦後。

脆蟹肉薯丸：

脆蟹肉薯丸即叫即整，上檯時仲係熱辣辣，入口外脆內軟，混左蟹肉後既薯丸，好有層次感，一d漏既感覺都無，配埋微辣既蛋黃醬食，味道一流。

烤海鮮拼盤：

呢份海鮮拼盤賣相精緻，亦都好大碟，裡面有原條烤魚、生蠔、扇貝、海蝦同軟殼蟹，真係適合喜歡食海鮮既我地呀。

呢度既海鮮全部都好新鮮，入口鮮甜，原條烤魚唔算多骨，軟殼蟹炸得剛剛好，入口香脆，又唔會太油，非常有口感。生蠔方面比想像中大隻，肉嫩爽口仲帶淡淡既海水味，唔錯。

烤美國豬背骨：

美國豬背骨有分半份同一份揀，想試多d唔同食物既我地就叫左半份。呢味豬背骨整得超入味，醬汁微辣香濃，做到骨肉分離既口感。廚師亦都選擇用粟米代替薯條做配菜，咁樣就唔會太滯啦。

埋單每人都係300蚊左右，以咁既環境同埋食物質素，認真超值啊。

openrice link: https://www.openrice.com/zh/hongkong/r-flaneur-%E4%BD%90%E6%95%A6-%E5%A4%9A%E5%9C%8B%E8%8F%9C-r533559

地址: 佐敦官涌街5號地舖

Le Soleil (尖沙咀)

早前同某電訊公司簽左兩年電話合約，其中一樣附送既禮物係Le Soleil 下午茶餐三位用，今日趁係假日，就同屋企人一齊黎嘆下午茶啦。

餐廳位於尖沙咀帝苑酒店內既空中花園，環境優雅舒適，亦都相當寧靜，絕對係同情人好友談心既好地方。呢度除左供應傳統越南菜外，仲因應香港人口味加入創新法式越南菜餚。

餐廳最近同LC 合作，憑惠顧都可以半價換購指定LC產品。亦都可能係呢個原因，是日下午茶用既器皿大部分都係以佢為主既。

下午茶餐盛惠388/2位，有別於典型英式下午茶，呢度並無三文治同鬆餅，而換上既係越式小食同甜品。

小食既種類好多，有越式春卷、櫻花蝦撻、香芒蝦片、豬肉米紙卷同香茅蝦串配鮮果沙律。甜品方面有迷你拿破崙、椰青果凍、香芒椰子糕、越南拉椰糕、香芒黑糯米同埋蝴蝶酥。

呢度既食材相當新鮮，而所有食物亦都係即叫即整，味道同賣相都相當有水準，最值得一讚既係個椰青果凍，用椰青水整成既果凍放係香濃既芒果汁同西米上，味道同感覺都非常夾，夏日炎炎既天氣下食，絕對可以消暑。

飲品方面，除左一般既咖啡或茶之外，仲有各式各樣既越式特飲可以選擇。我揀既係青檸梳打，叫左少甜既特飲，甜度剛剛好，入口非常清新。

以原價200蚊一位黎講，有酒店級既小食同甜品，配合埋咁好既服務同埋環境，絕對係超值。

Openrice link: https://www.openrice.com/zh/hongkong/r-le-soleil-%E5%B0%96%E6%B2%99%E5%92%80-%E8%B6%8A%E5%8D%97%E8%8F%9C-%E7%84%A1%E8%82%89%E9%A4%90%E5%96%AE-r21187 

地址: 尖沙咀麼地道69號帝苑酒店3樓

Cafe REVOL (佐敦)

位於佐敦德成街既咖啡館 Cafe REVOL，係佐敦恆豐酒店附近，大家唔駛驚搵唔到，因為佢門口有一個水泥牆身既牌印住咖啡店既名，非常顯眼。

咖啡店四周的環境寧靜，座位有分室內同室外，不過大熱天時我地梗係prefer坐室內啦。

餐廳係以半自助式經營，水杯，餐具都係全部DIY，揀好座位之後，就埋去counter落單。呢度提供既食物有好多，有意粉、三文治、小食同甜品，當然唔少得各式各樣既冷熱飲品啦。

朋友早前黎過，見到佢係面書上既All Day Breakfast實在太吸引，所以我今次黎都要試下。

價錢只需$118既All Day Breakfast， 賣相吸引，顏色好鮮艷，食材亦都好豐富，有腸仔、煙肉、太陽蛋、煙三文魚、茄汁豆、沙律同埋多士。

加左黑醋汁既沙律，新鮮得黎入口都好清新，食落非常開胃。香腸有兩款，入口唔算好肥膩，唔似係混左好多肥肉果d，多士亦都烘得夠香脆，食既時候仲係熱辣辣，鍾意芝士既朋友仲可以用忌廉芝士黎塗多士，唯一美中不足既係d茄汁豆唔夠熱，再熱D會更加好。

黑松露雜菌意粉: 

呢味意粉相信係即叫即製既，上檯時熱辣辣，香味十足，意粉軟硬適中，質感帶煙韌而且彈牙，完全做到al dente 既效果。醬汁拌入大大片又爽口既鮮菌、蘑菇碎同埋黑松露粉，入口非常creamy，食落仲帶少少香草味添。最值得一讚既係醬汁份量適中，唔會過多或者太少，令到每一條意粉都沾到個醬汁，美味十足。

其實黎得咖啡店，就梗係想慢慢坐架啦，呢度咖啡既選擇都好多，食完主菜之後，我地都叫左一杯抹茶鮮奶同埋玫瑰鮮奶咖啡，等我地可以繼續傾下計，上下網，度過一個悠閒既晚上。

抹茶鮮奶既抹茶味好重，非常香濃，上面仲有個小熊拉花，賣相靚到真係令人唔多捨得飲。

加入左玫瑰糖既玫瑰鮮奶咖啡，玫瑰味適中，好有花香既味道，值得一讚。

又食又飲埋單每人都係百零蚊，可以坐左全晚，仲有免費WIFI，真係適合年青一族黎啦。

openrice link: https://www.openrice.com/zh/hongkong/r-cafe-revol-%E4%BD%90%E6%95%A6-%E8%A5%BF%E5%BC%8F-%E6%B2%99%E5%BE%8B-r506166

地址:佐敦德成街4-16號富裕臺地下5號舖

民泰四七 (紅磡)

自從港鐵黃埔站通車之後，黎黃埔就非常方便，正正因為係咁，黃埔既食肆就越開越多，可惜大部份都係連鎖食店無咩特色，要搵間特別既餐廳都唔係咁容易。

近黃埔新邨民泰街既「民泰四七」，主打西班牙fusion菜，中西合壁，set lunch由53到98蚊不等，有湯有主菜有飲品，非常超值。

是日餐湯係西蘭花忌廉湯，西蘭花加入忌廉再打碎，淡淡既西蘭花味配合埋滑滑既忌廉，整體配搭好夾，如果可以整得再杰身少少咁就完美喇。

西班牙海鮮鍋飯:
加入左各式各樣海鮮炒成既飯，上檯時香氣十足，賣相呈橙色，非常吸引，海鮮有大蝦、青口同蜆，非常新鮮，入口鮮甜，米飯吸收左海鮮汁既精華後，鮮味濃郁，好好味。

墨西哥焗豬扒飯:

茄汁焗豬扒飯永遠係我既最愛，見到餐牌上有呢個選擇，豪不猶疑就要叫喇。焗豬扒飯呢味菜聽落好似好易整，但係其實要整得好味一d都唔容易架，呢度既豬扒整得非常鬆軟，蕃茄汁味濃，每粒飯都沾到蕃茄汁，食落好開胃。

美國頂級穀飼肉眼牛扒配薯菜:

落單既時候職員建議五成熟，因為呢種肉五成熟已經好熟，呢個set lunch以98蚊黎講，有咁大塊牛扒，真係幾抵食。牛扒肉身夠淋，入口幾juicy，配埋新鮮炸起既薯條，認真唔錯。

每個set lunch加十蚊就會有個特色甜品，是日甜品係雞蛋仔，加左紫薯醬既雞蛋仔，感覺上非常西式，以十蚊黎講，真係非常超值。

西班牙油炸鬼:

自從年幾前試過正宗既西班牙油炸鬼後，就對佢念念不忘，一有機會就要試。呢度既西班牙油炸鬼即叫即炸，淋過糖霜後賣相非常吸引，上檯時仲係熱辣辣，除左有典型既朱古力醬外，仲有士多啤梨忌廉醬，入口似係用著名雪糕牌子整成，非常好味，可惜60蚊得5條，有點兒貴。

每個set lunch都會包美式咖啡一杯，亦都可以選擇加12蚊轉特色咖啡，今日我地試左latte、rose latte同cappuccino，每杯都以玻璃杯上，配埋特色既拉花，令到我地都忍唔住「相機食先」，最值得一讚既係rose latte，加入左玫瑰糖既latte，玫瑰味適中，而且好香口，簡直係無得頂。

食左咁多野，埋單每人都係120蚊，以假日黎講，算係非常超值。

openrice link: https://www.openrice.com/zh/hongkong/r-%E6%B0%91%E6%B3%B0%E5%9B%9B%E4%B8%83-%E7%B4%85%E7%A3%A1-%E8%A5%BF%E5%BC%8F-all-day-breakfast-r527292

地址: 紅磡民泰街47號安榮樓地舖

Oggi (天后)

早前報紙報導有超值龍蝦意大利飯配蟹皇忌廉汁，晚飯時間都只係99蚊，相當吸引，所以一於約埋朋友黎試下。

位於水星街既Oggi，介乎天后同炮台山兩個站中間，相當方便。

放工後七點幾黎到，仲未需要等位。餐廳門口係用人造草來做嘅，裏面環境寧靜，係傾計嘅好地方。

龍蝦意大利飯配原隻龍蝦：

賣相非常吸引，用龍蝦汁整過嘅意大利飯，顏色呈橙色，好重龍蝦味，非常香口。口感方面，意大利飯微硬，做法非常正宗。

鮮蜆香辣蒜茸意粉：

用蒜茸炒過既蜆肉，非常香口，加埋意粉去炒，味道比想像中辣，不過都好惹味，怕辣既朋友要小心d。

朱古力心太軟配雪糕：

呢個甜品即叫即製，等候需時。切開後朱古力醬流出，非常吸引。重重朱古力味既心太軟，配埋酸酸甜甜既檸檬雪葩，感覺非常清新。

埋單每人都係150 蚊到，可以食原隻龍蝦，仲可以坐足成晚，真係非常超值。

openrice link: https://www.openrice.com/zh/hongkong/r-oggi-%E5%A4%A9%E5%90%8E-%E5%A4%9A%E5%9C%8B%E8%8F%9C-r532470

地址: 天后水星街9號地下B舖

民華餐廳 (柴灣)

前排係網上見到有介紹食蕃茄通既地方，超鍾意食蕃茄既我，個list上面既餐廳都幾乎去過晒，而民華餐廳就未去過。

民華餐廳係香港共有3間分店，分別係東涌、旺角同柴灣。

呢度午餐既選擇唔算多，唔食蒸飯同點心，就只有常餐揀。不過，有別於其他茶餐廳既係呢度既常餐有好多唔同既組合架，大家可以由A, B, C 每項揀一樣野食，A係通粉，B係炒蛋配火腿/腸仔/午餐肉，又或者煎蛋兩隻，C係麵包或者多士。每份餐都跟一杯飲品。

今日揀左蕃茄火腿通粉，腸仔煎蛋，多士同埋熱華田。

蕃茄火腿通粉顏色鮮艷，賣相好吸引，蕃茄味亦都好香濃，加埋香滑既炒蛋同埋腸仔之後真係格外好味，配埋熱華田，真係一個完美既配搭。可惜本人食量有限，未能試佢既牛油多士，下次可以試下。

openrice link: https://www.openrice.com/zh/hongkong/r-%E6%B0%91%E8%8F%AF%E9%A4%90%E5%BB%B3-%E6%9F%B4%E7%81%A3-%E6%B8%AF%E5%BC%8F-r483584

地址: 柴灣環翠道11號興華廣場1樓101-102號舖