Tram View Cafe (半山)

係香港住左咁多年嘅我，從來都無坐過纜車上山頂架，最近有朋友黎香港玩，叫我陪佢上去，咁我都做返一日遊客吧。

搭纜車嘅時間剛好係中午，要搵野食，最近上網得知係纜車站開左一間望到纜車景色嘅café，可以近距離影到纜車相，打卡呃like簡直一流，就一於帶佢黎試下啦。

餐廳位於半山䌫車徑，中環同金鐘站行過去都係大約5－7分鐘時間，除左有得食之外，仲有香港特色精品賣架。

餐廳座位有分室外同室內，客人可以係counter到落完單後再搵位，食物準備好時就可以去counter到拎啦。

呢度景色咁靚，如果想黎BBQ嘅話仲可以包場添架。

餐廳食物款式唔多，主打冰滴同手沖咖啡，all day breakfast同burger，十分喜歡all day breakfast嘅我地叫左兩份，另配咖啡同埋一份薯條。

第一份all day breakfast 有：

香濃蕃茄雜菜湯通粉／煙肉／黑松露炒蛋／薯餅／茄汁豆／牛角包

第二份就有：

吉列大魚柳／黑松露炒蛋／香腸／茄汁豆／牛角包

蕃茄雜菜湯茄味香濃，入口微辣，非常惹味，黑松露炒蛋炒得香滑，唔會太油，薯餅更加係外脆內軟。

唯一美中不足嘅係茄汁豆無整熱，如果可以整返熱先上碟嘅咁就完美啦。

薯條配黑松露醬：

波浪形嘅薯條即叫即整，口感一流，入口唔會過油，咬落香脆軟綿，配上自家製黑松露醬，香味四溢，非常好味！

每份餐我地加左＄15要熱飲，分別叫左Rose Latte 同埋Mocha。Rose latte 以玻璃杯送上，賣相非常吸引，玫瑰味相當濃厚，真係令人回味呀。

呢間café雖然食物款式唔多，但係勝在環境好，影相放上網要呃like毫無難度，天氣清涼嘅日子仲可以係室外嘅座位坐成個下午，真係一種享受。

openrice link: https://www.openrice.com/zh/hongkong/r-tram-view-cafe-半山-西式-r538462 

地址：半山䌫車徑2號地舖

Camellia (尖沙咀)

K11 Musea開左一段時間，都未有機會黎行下，臨近聖誕，工作無咁忙碌，今日放工後約左朋友黎食飯行街，由於唔係好熟呢個商場，之前都做過research睇下呢度有咩好野食。

「Camellia」為香港知名餐飲集團The Food Story全新概念餐廳，以氣質聞名嘅「山茶花」作主題，旨為客人奉上精緻嘅日系西式美饌。

餐廳以粉紅色同花朵作主調，令賓客彷如置身於巴黎花園中用餐，另設有半私人用餐區，等客人同閨密好友們盡情享受私人聚餐。

餐牌上選擇都算幾多，有飯有麵有意粉有三文治，大部分都算輕盈，非常適合注重身型嘅女仕們。

烤鹿兒島赤雞配糙米:
雖然賣相平凡，但係烤鹿兒島赤雞入口香嫰，淋上燒汁，加入法邊豆同意大利青瓜，再以糙米伴碟，有營健康，味道亦都唔錯。

手撕南國元氣雞素麵:
手撕雞雞味濃郁，加入冷麵汁同金針菇後，整體感覺相當清新，唔會過鹹，配菜亦都有新鮮熱辣嘅炸蕃薯，非常好味。

山茶花拿鐵:
呈粉紅色嘅「山茶花拿鐵」係呢度嘅招牌飲品，賣相非常吸睛，好有少女味，配上心心圖案的拉花，真係好浪漫呀，令我地忍唔住「相機食先」。

法式西多士:
甜品永遠都係女仕們嘅主菜，由於怕肥，所以只係叫左一份share。
法式西多士外層係薄脆脆焦糖，咬落去軟綿綿，仲有味道香濃嘅蛋漿，配上焦化牛油雪糕食，入口有少少似crème brulee，令我地一啖一啖咁食過不停。

呢度環境清靜，食物又唔錯，係朋友們聚會嘅好地方。

地址: 尖沙咀梳士巴利道18號Victoria Dockside K11 Musea 地下033號舖

Openrice link: https://www.openrice.com/zh/hongkong/r-camellia-%E5%B0%96%E6%B2%99%E5%92%80-%E8%A5%BF%E5%BC%8F-%E8%A5%BF%E5%BC%8F%E7%B3%95%E9%BB%9E-r641360

小魚兒 (尖沙咀）

尖沙咀金馬倫道開左一間主打川菜烤魚嘅餐廳，見網上評價唔錯，就一於同朋友放工後黎試下啦。

「小魚兒」位於一樓，無升降機，要行樓梯，同老人家黎可能會有d唔方便，不過對於做開運動嘅我地當然無問題啦。

餐廳不論佈置或者餐具都係以「小魚兒」做主題，非常特別呀。

既然呢度咁出名食烤魚，我地黎到又點可以唔試下呢？

怕骨嘅我地揀左要比目魚柳，貪佢係全魚肉，雖然價錢比其他魚貴，但係都係值得嘅。

烤魚有好多款口味揀，有冬蔭功海鮮、養生花膠蟲草、鳳梨香辣豆花、老壇酸菜等等，我地揀左一向喜愛嘅「老壇酸菜豆花」，辣度揀左中辣。

烤魚上檯時散發出陣陣麻香味，煲裡面有好多酸菜、豆花同魚柳，魚柳入口超滑，肉質鮮嫩，豆花入口微甜，湯底辣度剛剛好，食落幾開胃。

配料方面我地揀左蟹子蟹粉丸、萵筍、土豆同埋圓薯粉，圓薯粉煙靭又彈牙，吸收晒d辣味真係食得超過癮。

埋單每人唔洗＄300，食到咁豐富高質嘅烤魚，都算係性價比高。

地址：尖沙咀金馬倫道16號金馬大廈1樓

openrice link: https://www.openrice.com/zh/hongkong/r-小魚兒-尖沙咀-京川滬-火鍋-r625580

王家沙花樣年華 (太古）

「花樣年華 」係字典上嘅解釋係用花黎形容女子容貌美麗或比喻美好嘅事物/好似花一樣嘅年紀 ，充滿活力同青春 。咁「王家沙花樣年華」又可以做出點樣嘅菜式呢？

位於太古城中心嘅「王家沙花樣年華」，主打上海菜，所以我地叫嘅菜式都係以上海菜為主。

招牌蟹粉小籠包: 小籠包一份有五件，皮薄得黎亦都唔會咁易穿，入面粒肉亦都好多湯汁，味道亦都好鮮甜。

正宗酸辣湯：
酸辣湯有分一碗同埋例牌，我地一行兩人，只係叫左一碗share。酸辣湯入口酸酸地，配料都好足，味道相當正宗。

溫泉蛋賽螃蟹:
「賽螃蟹」都算係一度非常出名嘅偽裝上海菜式。雖然明知賽螃蟹係無蟹，但每次食上海菜都一定要叫。蛋白加入魚肉炒至似片片雪白蟹肉之後加上炸過嘅瑤柱絲 , 入口非常嫩滑 , 鮮味亦都相當突出 。

重慶酸菜魚:
全晚最精彩嘅餸就係呢個「重慶酸菜魚」喇，個煲裡面有酸菜、水晶粉、同埋好多胡椒粒伴着新鮮嘅魚片。魚片好新鮮亦都好滑，骨唔算多，味道方面，入口都帶點麻，食落都幾開胃。

可能因為遲左放工，晚飯時間人流都唔算太多，食物質素高，環境又唔算嘈，可以慢慢坐同朋友傾計，中間仲有侍應主動幫我地加茶，服務都算唔錯。

地址：太古太古城道18號太古城中心2期1 樓101號舖

openrice link: https://www.openrice.com/zh/hongkong/r-王家沙花樣年華-太古-滬菜-上海-r574085

火鍋撚 (西環)

踏入十一月，秋風起，天氣漸涼，又係打邊爐嘅好時機啦！

是日去完會展睇展覽之後黎到位於西環嘅「火鍋撚」打邊爐，餐廳門口有個兵馬俑企係度歡迎客人，裝潢古色古香，卡位都坐得好舒適。

餐廳有大量醬油配料供應：辣椒、炸蒜、蒜蓉、芝麻醬、芫荽、蔥等等真係講得出嘅都有架。

朋友早前去過其他分店，所以今次落單就由佢黎負責啦。

湯底我地揀左雙拼，加多＄30可以試多一個湯，都唔算好過份嘅。我地揀左一品酸菜白肉鍋+祖傳秘製麻辣鍋。

酸菜白肉鍋材料包括豬肉片、黃芽白絲、蕃茄同埋薯粉，入口酸酸地，好醒胃，用黎做打邊爐湯底簡直一流！

一向喜歡食辣嘅我地亦都揀左祖傳秘製麻辣鍋，辣度揀左中辣。材料有殼龍眼、紅棗、枸杞子、黨蔘、川芎、當歸、小豆寇、草果、橘陳皮、甘草、南薑、辛荑、月桂、玉桂葉同埋凍豆腐，中辣辣度剛剛好，入口又麻又辣。

由於我地只有兩個人，配料揀唔到太多，好彩餐廳大部分食物都可以揀雙拼，咁我地就可以揀多幾款唔同嘅野食啦。

蟹籽手打蝦丸／流心鹹蛋黃豬肉丸：

打邊爐又點少得手工丸呀！ 呢度嘅丸全部都係新鮮手造，用原隻鮮蝦整成既手打蝦丸，粒粒大細平均，入口新鮮好味而且彈牙。豬肉丸更加特別，中間加入左流心鹹蛋，一咬落去d流心久餡就流出黎，好好味，簡直令人回味。

至尊水餃皇／白菜豬肉餃子：

每款餃子有三粒，大大隻，漲卜卜，非常足料，皮薄餡靚，非常飽滿，食落鮮味爽口。

黑松露墨魚滑／手打靚蝦滑：

黑松露墨魚滑嘅黑松露味香氣四溢，口感彈牙，非常適合喜歡黑松露嘅朋友。至於蝦滑，
係用原隻鮮蝦整成，重蝦味之餘食落仲好爽口。

日本蟹柳：

蟹柳一向都係我打邊爐嘅至愛，貪佢淥一陣就有得食，呢度既蟹柳夠甜，唔會淥一淥就散晒，應該係貴價貨。

香甜粟米件/鮮冬菇:

打邊爐當然唔可以只係食肉，點都要叫d蔬菜嘅，我地選擇左粟米同埋鮮冬菇。鮮冬菇同粟米煲過接近一小時後，吸收左香濃嘅湯真係格外好味。

稻庭烏冬:

烏冬份量都幾多，放落湯度煮一陣就食得喇，配埋兩款口味嘅湯底食，味道簡直係一流。

打完邊爐仲有甜品送，分別係腐竹糖水沙冰和芋圓糖水。

腐竹糖水沙冰器皿非常特別，用黎打卡簡直一流，至於芋圓糖水以茶盅盛著，芋圓又煙煙韌韌好美味，為我地嘅晚餐劃上完美句號。

地址：西環石塘咀皇后大道西554-560號日富里百好大廈地下1號舖

Openrice link: https://www.openrice.com/zh/hongkong/r-火鍋撚-西環-港式-火鍋-r592952