Espuma(中環)

Espuma係香港有好幾間分店，差唔多間間都去過，貪佢餐牌耐唔耐會轉下，推出下新菜式，好有新鮮感。

餐廳位於中環M88 既十七樓，我地剛好坐係窗旁，由呢度望落去可以見到中環比較寧靜既一角，感覺好舒服。

餐廳裡面既座位寬敞，裝修都好有格調，可能因為係商業區，星期五夜晚都唔會太多人，所以都坐得幾舒服。

雖然餐牌內有個二人餐揀，但係鍾意flexible d既我地，最後都係揀左a la carte。

黑白芝麻吞拿魚卷: 

自從上次食完呢個小食之後就對佢念念不忘，今次諗都唔諗就決定要再叫黎食啦。呢味吞拿魚卷係以吞拿魚沾上黑白芝麻然後慢慢烤，食落淋淋地，好鬆軟，入口仲好有芝麻既香味，配埋加左wasabi既沙律醬食味道同口感真係好特別。

海鮮蕃茄清湯: 

呢個湯非常特別，上菜時湯同埋配料係分開上架。碗內既配料有車厘茄、青口、蜆同蝦。上菜後，店員就會將壺內既湯倒入碗內。個湯望落非常清，有D似中湯，入口亦都非常清甜，有別於一般西湯，非常開胃。

紙包焗石斑柳及雜菜配黑水欖汁: 

呢個主菜等候需時，做法係用紙包住石斑同大量新鮮蔬菜再放入焗爐焗，石斑柳好厚身，外皮脆脆地，上菜時熱辣辣，有一陣陣香噴噴既牛油味，蔬菜吸左石斑既味道後真係特別好味，令人一口一口咁食到停唔到。

烤風乾蕃茄及菠菜釀豬柳卷配蘋果蓉: 

風乾蕃茄用黎整意粉就聽得多，但係用黎煮肉就真係第一次聽。豬柳夾左菠菜同風乾蕃茄後捲成既豬柳卷，賣相有少少似壽司，具有創意之餘味道仲好夾，一D都唔乾身，點埋蘋果蓉食，甜甜地，清新得黎又唔油膩。

咖啡拼盤: 

印象中呢個甜品上次黎既時候都仲未有，應該係最近新加既。既然餐廳既咖啡豆係用 Novell 呢個品牌，咁用佢黎整甜品都唔出奇呀。呢個咖啡拼盤，碟上圓圓地既係咖啡蛋糕，咖啡味好濃，入口好香滑，鍾意飲咖啡既朋友一定會鍾意。碟中間有兩粒好似朱古力既東西，其實係咖啡mousse黎既，配埋啡白色既meringue同埋雜莓，賣相非常吸引，成幅畫咁，好靚好吸引。

Caffe Latte: 

呢杯 latte 一上檯就見到兩個好靚既心型拉花，睇得出咖啡師好有心機去整，咖啡入口好香滑，奶同咖啡既比例剛剛好，唔會太重奶味蓋過左咖啡味，亦唔會太苦，食完咁豐富既晚餐飲返杯咖啡，真係特別舒服。

花生咖啡: 

榛子咖啡呀綠茶咖啡等等既特式咖啡就成日聽，但係花生咖啡就真係第一次，對佢感到非常新奇，所以見到餐牌上有呢款咁新奇既飲品都忍唔住要試下。咖啡送到黎已經聞到淡淡花生香氣，係香濃既咖啡上加入打起左既cream，上面再灑上花生碎同花生粒後，賣相真係非常吸引。將cream攪入咖啡後，飲落非常順滑，亦都帶有陣陣突出既花生香味，感覺好特別，值得一試。

中環既 Espuma 裝修幾有格調，真係帶俾人一種好悠閒既感覺， 食物款式多而且質素高，三五知己一齊黎食野傾計真係唔錯!!

openrice link: https://www.openrice.com/zh/hongkong/r-espuma-%E4%B8%AD%E7%92%B0-%E5%A4%9A%E5%9C%8B%E8%8F%9C-%E7%94%9C%E5%93%81-%E7%B3%96%E6%B0%B4-r431970

地址:中環威靈頓街2-8號威靈頓廣場M88 17樓

ATUM Restaurant(尖沙咀)

好耐無同好姊妹見面，難得今日放早一於食餐好架啦。朋友去過銅鑼灣Atum Dessert 食過好似一幅畫既甜品後，話想黎呢度試下佢既主菜。

餐廳位於K11既一樓，地點有d隱蔽，要花一段時間先搵到。餐廳入面都算闊落，檯同檯之間都有足夠空間，私隱度頗高。

餐廳既食物以西式為主，落左order後，店員為我地送上烘過既提子麵包，暖暖地夠軟身，配上牛油真係唔錯。

頭盤我地揀左紅菜頭三文魚，三文魚用紅菜頭醃完後呈橙紅色，好新鮮，配菜有薄切青瓜、蜜柑啫喱同蜜桔，賣相非常精緻，顏色亦非常鮮艷，好吸引，店員仲建議我地將三文魚伴埋青瓜一齊食，自己試過後都覺得非常特別。

第一個主菜我地叫左火炙帶子risotto，用火炙到半熟既帶子，加入紫薑、椰菜花同埋墨魚汁既risotto，賣相黑媽媽，但係入口都幾creamy，帶子亦都好鮮甜，不過risotto煮得比一般正宗意大利既淋，煮既時間可以縮短少少。

另一個主菜我地叫左紅酒肉桂燴鴨脾。除左有紅酒燴過既鴨胸之外，仲有去左骨既鴨脾，真係好適合懶吐骨既我地。伴碟既有燒過既梨，無論賣相定顏色都非常吸引。最值得一讚既係好重南瓜味既南瓜蓉，用黎點肉同梨就最好不過啦，好味程度足以令我將剩餘既南瓜蓉當湯飲添。

甜品我地叫左蜜糖雪糕，用蜜糖自家製既雪糕真係第一次試，入口軟滑得黎又唔會太甜，伴埋自家製既士多啤梨啫喱同埋meringue，一淡一濃既味道，真係幾特別。

飲品方面， 我地叫左青瓜薄荷青檸梳打同埋接木骨花氈酒蘋果汁。

青瓜薄荷青檸梳打係用將少量青瓜打入青檸梳打，再加上薄荷葉同薄切青瓜整成， 青瓜味較輕而薄荷味較重，比例剛剛好，入口令人好醒神，好好飲。

接木骨花氈酒蘋果汁入口有鮮甜蘋果味，氈酒帶黎微微酒味，唔會太濃容易入口。食完咁豐富既晚餐後，飲返杯真係份外清新。

呢個環境寧靜，食物味道好又有創意，又唔會俾人催埋單，係約埋三五知己聚舊既好地方。

openrice link: https://www.openrice.com/zh/hongkong/r-atum-restaurant-%E5%B0%96%E6%B2%99%E5%92%80-%E8%A5%BF%E5%BC%8F-%E6%B5%B7%E9%AE%AE-r470070

地址: 尖沙咀河內道18號K11購物藝術館1樓101B號舖

ZUC.CCH.ERO(銅鑼灣)

自從有左面書同智能手機之後，「相機食先」呢種文化就越來越流行。可能因為咁，甜品已經唔再只著重味道，賣相同創意都相當重要。

位於銅鑼灣耀華街既 ZUC.CCH.ERO，主打具創意而精緻既甜品，最近見朋友係面書post 完後騙左唔少like，令到我都好有興趣黎試下。

餐牌上選擇唔算多，大約十樣左右。我地揀左 Planet earth 同 Namida 淚。

Planet earth 造型好精緻，真係一個迷你地球咁，放係曲奇碎上面，上面再襯托用棉花糖整成既一舊雲，只係賣相都值99分。

上檯後，我地可以自行係棉花糖上噴上焦糖或蜜瓜藥水，令到棉花糖溶化。切開地球後，入面係茉莉花茶mousse，再配以血橙啫喱，入口非常軟滑，酸酸甜甜，幾得意。

Namida 淚既外型係用糖造成既「淚」，客人可以親眼睇住店員將一舊糖慢慢變成一滴「淚」，真係少d功夫都唔得。

「淚」裡面有綠茶雪糕、益力多冰、梅酒啫喱同小丸子。食既時候要敲碎外層，伴埋入面既配料一齊食，店員仲好心提醒我地唔好加太多「淚」，否則會好甜，唔係好鹹，唔同口感同味道既配料一齊食，真係唔錯。

雖然呢度既甜品比一般貴，但係勝在精緻同有特色，間唔中試下新野都ok 呀！

openrice link: https://www.openrice.com/zh/hongkong/r-zuc-cch-ero-%E9%8A%85%E9%91%BC%E7%81%A3-%E8%A5%BF%E5%BC%8F-%E9%9B%AA%E7%B3%95-%E4%B9%B3%E9%85%AA-r470942

地址: 銅鑼灣耀華街3號百樂中心18樓1802-3室

Le Paradis Restaurant & Cafe(尖沙咀)

法國菜俾到你一種咩既感覺呢? 食物精緻? 上菜時間長，一餐飯食3個鐘?

位於加連威老道嘉威大廈既 Le Paradis Restaurant & Cafe，交通方便，餐廳係以私房菜形式，環境唔錯，座位有分室內同室外揀，我地見今日唔係好熱，所以都揀左室外坐。

所謂既室外座位，其實就係餐廳既露台位置，大家唔駛驚熱，因為係有風扇既，所以都坐得幾舒服。

晚餐時段有得揀 set dinner 同埋 a la carte，想試多D唔同野既我地，當然揀 a la carte 啦。

牛油果鮮蝦沙律配香橙檸檬汁: 

唔知幾時開始喜歡食牛油果既我，見到餐牌上面呢個沙律就知道係非點不可啦。牛油果本身就係沙律主要材料之一，佢既口感同埋顏色，加埋沙律菜同埋酸酸甜甜既香橙檸檬汁，帶出一種好清新既感覺，除此之外，仲有四大隻爽口彈牙既蝦，D蝦仲要係暖暖地既添，所有食材既配搭，令到沙律色彩繽紛，真係令人越食越開胃。

三文魚他他配香脆蒜蓉包: 

蕃茄、紫洋蔥、香草加埋三文魚打碎而成既三文魚他他，香滑得黎亦帶微辣，齋食既話味道會比較重，不過配埋香脆蒜蓉包既話，味道剛剛好，係一味唔錯既頭盤。

黑松露蘑菇湯:

呢個蘑菇湯係用打碎左既蘑菇加入黑松露整成既，入口好有蘑菇碎質感，黑松露濃度剛剛好。如果想賣相更加吸引，可以係湯上面加幾片蘑菇，咁就更加靚啦。

慢煮水飼豬架伴蜜糖芥茉汁:

慢煮 ﹣Sous Vide，最近真係好流行，上面書時都見到唔少朋友係屋企自己整，其實做法一D都唔難，只係將食材放入真空袋進行真空處理，再放入水度，煮至最適合既溫度。呢個煮法可以避免破壞食物營養纖維，用黎煮肉類就至啱架啦。

利用慢煮呢個方法去整呢個豬架，肉質真係有別於平時食到果D，真係比平時嫩滑，一D都唔乾，肉汁仲好鮮甜，唯一美中不足既係有一定程度既肥膏，雖然呢part係好多人眼中係成舊肉最好味既地方，但係怕肥既我真係唔敢食。

法式龍蝦意大利飯:

意大利飯係我喜歡餸菜之一，呢個法式龍蝦意大利飯，賣相好靚，龍蝦好大隻，肉質新鮮彈牙，亦都好鮮甜。煙韌既意大利飯吸收左海鮮精華，鮮甜美味。

朱古力心太軟: 

心太軟用左76%Belgium Dark Chocolate黎整既，加埋一球雲呢拿雪糕，一冷一熱既感覺，一苦一甜既口感，味道同口感真係好特別。

Creme Brulee: 

呢份Cream Brulee既份量係呢個價錢黎講真係算係幾多，眼闊肚窄既我地最後真係食唔晒。燉蛋既蛋味非常香濃，亦都好滑，面頭既焦糖都做得夠薄脆，唔會太甜，非常好味。

呢度既環境同食物都唔錯，價錢亦都幾合理，成餐飯食左兩個幾鐘，可以慢慢傾計談心，真係幾適合情侶約會。

openrice link: https://www.openrice.com/zh/hongkong/r-le-paradis-restaurant-cafe-%E5%B0%96%E6%B2%99%E5%92%80-%E6%B3%95%E5%9C%8B%E8%8F%9C-r139746

地址: 尖沙咀加連威老道41C嘉威大廈4樓A室

金撈老鴨湯刺身火鍋專門店(佐敦)

如果講其中一樣香港人四季皆宜既節目，就一定係打邊爐啦。無論春夏秋冬，總會有人約打邊爐。

位於佐敦文昌街既金撈老鴨湯刺身火鍋專門店，地點唔多就腳，亦都唔易搵，不過出名在係以滋補養生既招牌老鴨湯作主打，補而不燥，適合一年四季進補。除此之外，火爆雞煲及海龍王湯亦係誠意之作。

好唔容易先至黎到餐廳，坐低之後，店員先為我地落左湯底先。其他火鍋配料就再慢慢揀。

湯底係火鍋黎講算係主菜黎，一個好味既湯底，就算係落平凡既配料，都會好好味。我地揀左蕃茄薯仔湯同埋沙爹湯，雖然雙拼係要加10蚊，但係可以一次過試晒兩個湯，都係值得既。

蕃茄薯仔湯蕃茄味濃，裡面仲有好多薯仔同蕃茄，真係好足料，相反沙爹湯底就無任何配料，但係都好香。

叫完湯底就梗混左醬先啦，同其他火鍋店一樣，都有個醬料盤俾我地自己落，而值得一讚既係每樣野都有個蓋寫清楚係乜，咁就唔駛估估下啦。

牛柏葉: 呢度有黑柏葉同牛柏葉揀，我地叫左平d既牛柏葉，一份已經好多，放落湯淥一陣就食得，入口仲好爽好鮮味。

鹿兒島黑豚腩肉: 鹿兒島黑豚腩肉賣相似係一個倒轉左既碗咁，放落蕃茄湯度慢慢慢淥都唔會韌，蕃茄湯加埋肉味真係好味呀。

廣島蠔好大隻，淥完都唔會縮得好細粒，入口鮮甜美味，蠔質嫩滑 ，好好味。

手打鮮蝦滑: 單係形狀就睇得出係手打, 口味比想像中更鮮濃, 蝦味重，亦都好彈牙, 一D粉既感覺都無, 認真唔錯。

自家製水餃: 皮薄餡靚既水餃，菜同肉既比例剛剛好，放入蕃茄薯仔湯底度吸入湯既精華後，真係好好味。

四寶丸: 四寶丸分別係牛丸、豬肉丸、蝦丸同墨魚丸，每粒都好滑，而且新鮮彈牙。

響鈴: 響鈴上菜時熱熱地，應該係新鮮炸好架，一份有8條，如果人少既話可能份量會比較多。

油麥菜: 打邊爐最後梗係要點返d蔬菜黎幫助消化啦，呢度既油麥菜色澤翠綠又新鮮，吸晒湯底既精華後真係好好味。

埋單後店員為我地送上珍寶珠，真可愛，不過打完邊爐，食返d甜野，清清個口，真係舒服d既。

openrice link: https://www.openrice.com/zh/hongkong/r-%E9%87%91%E6%92%88%E8%80%81%E9%B4%A8%E6%B9%AF%E5%88%BA%E8%BA%AB%E7%81%AB%E9%8D%8B%E5%B0%88%E9%96%80%E5%BA%97-%E4%BD%90%E6%95%A6-%E6%B8%AF%E5%BC%8F-%E7%81%AB%E9%8D%8B-r193068

地址: 佐敦文昌街25-47號文昌樓地下41及43號舖