是日返到公司，都未開始做野，就已經見到新聞話天文台會係十二點至兩點改掛八號風球。好唔容易先過到一個上午，終於可以回家渡過難得嘅「風假」。
去到屋企附近嘅超市，貨架上空空如也，屋企又無咩存貨，晚餐就唯有去附近商場解決吧。
傍晚六點幾去到新城市廣場，唔知係因為最近嘅政治環境定係點，商場真係唔多食肆開，最後搵到位於七樓嘅「丼吉日式吉列豬排專門店」。
聽餐廳名都知呢度出名嘅係吉列豬排，我地又點可以唔試下呢？
我地一行三人，叫左兩個餐同埋一個沙律。
落單後，店員就俾左芝麻，碗同棒我地，等我地磨過後加豬扒醬，磨嘅時候散出陣陣香味，真係令我地未食野都已經流晒口水呀。
特上刺身沙律：
呢份沙律份量都算多，刺身足料之餘仲好鮮甜。 刺身有三文魚、油甘魚、帶子同埋飛魚籽，全部都切到細細粒，容易入口，粒粒都相當肥美，加埋新鮮爽脆嘅沙律菜，配上酸酸地嘅柚子汁，味道真係非常夾，食落好開胃。
滑蛋吉列豬扒定食：
滑蛋豬不嬲都係我嘅至愛，半生熟嘅蛋加埋炸得剛剛好嘅吉列豚肉，只係賣相已經好吸引，豬扒厚身大件，咬落去外皮半硬半軟，肉質又鬆化又有口感，加埋滑蛋，味道帶有濃郁嘅蛋香味，真係天衣無縫嘅配合。
滑蛋吉列豬扒可以跟丼或者定食，想食多d配料嘅我地揀左要定食，除左有白飯之外，仲有海蜇，椰菜同埋麵豉湯添。
呢度嘅麵豉湯加入左蜆同海帶去煲，麵豉味香濃，入口有口感，味度亦都相當濃郁。
最值得一提嘅係呢度嘅白飯同椰菜係可以免費任添架，非常適合胃口大嘅朋友。
吉列精選定食：
有別於上面提及嘅定食，呢份「吉列精選定食」係更加豐富架，除左有麵豉湯，白飯，椰菜同埋海蜇之外，仲有日式冷豆腐，刺身，同埋一杯飲品。
日式冷豆腐：
呢個豆腐往往都係百吃不厭，非常嫩滑，加入麻醬之後入口仲好香，係熱辣辣既夏天食返個凍冰冰既麻醬凍豆腐黎做前菜，真係好開胃好舒服。
刺身：
刺身分別有甜蝦、三文魚同埋油甘魚，切得算厚，賣相唔錯，顏色鮮艷，入口都相當鮮甜。
吉列精選：
吉列精選分別有豬柳、大蝦、生蠔同埋帶子。
豬柳炸得好脆，咬落非常多汁，沾上即磨芝麻豬扒汁，一d都唔覺乾，味道即時提升，非常好味。
大蝦非常大隻，拍得住一隻男仕手板咁長，入口非常爽。
生蠔同帶子外皮好脆，內裡爽口綿滑，入口非常juicy，配上他他醬食，整體配搭非常夾。
巨峰梳打：
巨峰梳打味道酸酸甜甜，提子味重，完全無藥水味，入口凍涼解渴，食完咁多熱氣野飲返杯，真係非常爽。
食完之後店員為我地送上生果做飯後果，為我地豐富嘅晚餐劃上完美句號。
呢度人均消費約為＄260，雖然有d貴，但係炸物同刺身嘅質素真係非常高，環境同服務都唔錯，都算值得嘅。
地址：沙田沙田正街18號新城市廣場一期7樓707號舖
