石屋咖啡冰室 (九龍城)

其實香港真係有唔少歷史遺留落黎既名勝古蹟，位於九龍城既石屋家園，於十九世紀末為何家村既所在地，建有屋宇兩排，附近有一村落名叫茘枝園，住有三數戶人家。

一路都有睇開某介紹香港食玩網頁，前排見到介紹呢間cafe好似幾有特色，就襯星期六放假黎試下啦。

石屋係一幢三級歷史建築物，冰室既裝潢亦都有70年代既感覺，實在係個影相既好地方，可以影下相放上網呃下like，呢度仲有間兩層石屋咖啡冰室，都幾有特色，環境寧靜舒適，仲可以揀坐室外或者室內添。

今日試左個all day breakfast，有炒蛋太陽蛋二揀一，歐陸雞肉腸同焗豆，麵包方面可以揀牛角包或者多士，鍾意食牛角包既我就梗係揀牛角包啦。

Cappaucinno 整得好香滑，一D都唔馬虎，炒蛋整得好滑，雞肉腸一D都唔油，至於焗豆係凍既，無左傳統英式早餐有熱焗豆既風味，如果可以整返熱俾客人就更加好啦。

食完野之後仲可以順便周圍參觀下，睇下舊時既香港係點，真係幾有趣架。

openrice link: http://www.openrice.com/zh/hongkong/r-%E7%9F%B3%E5%B1%8B%E5%92%96%E5%95%A1%E5%86%B0%E5%AE%A4-%E4%B9%9D%E9%BE%8D%E5%9F%8E-%E8%A5%BF%E5%BC%8F-r469613

地址:  九龍城聯合道133號石屋家園

彌敦左岸 (尖沙咀)

第一次聽到「彌敦左岸」呢間酒吧餐廳，以為係係彌敦道，原來唔係架，係係尖沙咀赫德道既。

酒吧分兩層，上層佔地好大，環境暗暗地，好有英式酒吧既FEEL，偏入既位置仲有live band，可惜今晚無人表演，唔知幾時先會有呢?

去完洗手間出黎之後，就見到好大張桌球檯，但係見無人玩，加上自己又唔係玩得叻，都唔係咁敢玩。

呢間酒吧餐廳除左有酒飲之外，仲有好多野食，有沙律、餐湯、意大利飯、意粉、薄餅等等。

蟹肉香芒木瓜沙律:
沙律賣相好靚，色彩繽紛，睇到都好開胃，份量都好多，材料方面有蟹肉，芒果，沙律菜同木瓜等等。蟹肉味道鮮甜，配埋新鮮既芒果同埋爽脆既沙律菜，味道非常清新。最值得一讚既係D沙律無咩點落沙律汁，好合我口味。

法式龍蝦湯:
龍蝦湯顏色呈橙紅色，未飲都聞到好香既龍蝦味，飲落後口感creamy，龍蝦味香濃，仲有爽口彈牙的龍蝦肉在內，好好味。旁邊既蒜茸包都唔錯，蒜香味好香，麵包烘得剛剛好。

香燒西班牙黑毛豬肋骨配芝士酸辣汁:
豬肋骨賣相好靚，份量都幾多，上檯後店員都好用心地幫我地切開，豬肋骨既醬汁係用芝士同酸辣汁整成，醃得都幾入味，食落甜甜辣辣，味道都幾特別，肉質方面都幾嫩滑。粗薯條方面脆香可口，不過就真係要趁熱食呀，因為凍左無咁好味架。

焗原隻龍蝦米多配燒粟米，薯條及韓式泡菜:
呢味菜賣相相當吸引，龍蝦切開後再加埋彩椒，洋蔥，蘑菇，芝士同白汁去焗，店員仲提議我地將龍蝦同泡菜伴埋一齊食，就聽佢講試下啦，醬汁食落又真係惹味D喎。龍蝦雖然加左醬汁，但係食落一樣咁鮮甜。至於粟米方面就無咩特別。

呢到環境唔錯，食物又精緻美味，如果有埋live band 又係度玩埋桌球，一班朋友落黎食飯傾計既話，咁既價錢都唔算貴既。

openrice link: http://www.openrice.com/zh/hongkong/r-%E5%BD%8C%E6%95%A6%E5%B7%A6%E5%B2%B8-%E5%B0%96%E6%B2%99%E5%92%80-%E8%A5%BF%E5%BC%8F-%E6%B5%B7%E9%AE%AE-r463855

地址: 尖沙咀赫德道5-9號德裕中心B1層

老三火鍋 (旺角)

幾個舊同學聚舊，想去打邊爐，有人介紹黎呢度打，咁咪試下囉。

秘製老鴨鍋: 坐低之後例牌揀左湯底先，咁多個湯底真係唔知揀咩好，店員話呢個秘製老鴨鍋係招牌菜，咪揀呢個囉。

呢個老鴨鍋有半隻/一隻鴨揀，我地人唔多，所以揀左半隻，湯底有淡淡既葯材味，裡面有紅棗片，素翅，蘿蔔，杞子等等，加埋鴨的甜味，湯滾左而未落配料既時候我地都試左半碗，都幾好味。

手切肥牛: 因本人唔食牛，所以同行朋友叫左一碟細本地手切肥牛，牛切得薄，賣相唔錯，脂肪均勻，好新鮮，碌一碌就食得。

蟹子鮮蝦滑+ 蟹子墨魚滑: 蝦滑加左蟹子，好特別，食落好爽口，都好重蝦味，送黎既時候仲會幫你將蟹子撈勻，都算細心,，墨魚滑就幾好，煙煙韌韌，係湯底中碌左好耐口感都無變。

黃沙豬膶: 其實豬膶好有益，因為含有大量鐵質，女仕食多d可以補充返每月流失嘅血量！呢度D黃沙豬膶爽口唔會太鞋，唔錯。

鮮蝦雲吞: 鮮蝦雲吞都幾大粒，餡料有蝦肉同豬肉，食落鮮味爽口。

四寶丸: 四寶丸有牛肉丸， 蝦丸，鯪魚球和墨魚丸，每款丸類都係手打，牛丸有點實，可能碌得耐得滯，墨魚丸外色十分之雪白，肉質鬆軟爽口，蝦丸口感最特別，食落內暖外爽。

什菇拼盤: 什菇拼盤有金菇，雞脾菇同埋冬菇，冬菇吸左湯汁幾好味，食落新鮮爽口。

炸腐皮卷: 炸腐皮卷附上甜酸汁，可以當熟食亦都可以當火鍋配料，個人就鍾意當火鍋配料，腐皮卷一放入鍋內十幾秒後拎起，吸左湯汁後仍然脆脆地，唔錯。

招牌水餃: 細細粒好鬼得意，餃皮很薄，雖然包著左D豬肉，但係可惜蔥味過濃，除左蔥味之外真係食唔到任何味道，唔係太合本人既口味。

呢間火鍋店都算幾有特色，除左一般火鍋配料之外仲有唔少小食，最特別既係泰式蝦餅，下次有機會真係要試下。 

openrice link: http://www.openrice.com/zh/hongkong/r-%E8%80%81%E4%B8%89%E7%81%AB%E9%8D%8B-%E6%97%BA%E8%A7%92-%E6%B8%AF%E5%BC%8F-%E7%81%AB%E9%8D%8B-r112493

地址: 旺角旺角道33號3/F樓全層

Tom N Toms Coffee (沙田)

韓國既咖啡文化發展漸漸成熟，近年唔少港人都開始學習當地既選豆同烘焙技術，TOM N TOMS無論係韓國抑或其他地方既分店，設計上都大致相同，簡約舒適。香港店位於沙田新城市廣場，餐牌上顯示除了飲品之外，食品主要分三類：捲餅、吐司和薄餅，好可惜捲餅依家暫時未有提供。

Cappuccino:
熱飲既瓦杯印有咖啡店既logo，咖啡算香滑，完全無苦澀感。

 

甘薯拿鐵:
甘薯拿鐵其實係無咖啡既成份架，味道飲落似係蕃薯奶昔，甜薯味道天然，口感相當香滑，唔似係就咁用攪拌機打碎D蕃薯再加牛奶整成。

蜂蜜奶油吐司(跟餐):
麵包塗左微甜既蜂蜜之後再去烘，烘完之後再係吐司上面唧左成小山丘既忌廉，上面仲灑左少少肉桂粉，賣相非常之靚，麵包烘得外脆內軟，尤其係條邊，不過如果食晒D忌廉都幾肥下。

墨西哥雞肉薄餅 (跟餐):
呢個薄餅係即叫即製，所以製作需時。同一般市面食到既薄餅唔同之處係呢款薄餅係用墨西哥薄餅 (Tortilla) 整成，唔係好似大型薄餅專門店食到果D，所以唔會太易飽。薄餅味道唔錯，除左芝士同雞肉之外仲有唔少粟米，芝士份量都幾多，拉絲力非常強，唔係咁易切開，對於唔太好芝士既我，落少D芝士會更加好味。

朱古力華夫:朱古力華夫無咩特別，都係普通Waffle上面加D cream，再唧D 朱古力醬咁，不過佢既朱古力醬味道相當香濃，令人會不停咁食。

今次黎因為仲係佢地既試業期，未有得食佢地既捲餅 (pretzel)，希望下次有得試啦。。  

openrice link: http://www.openrice.com/zh/hongkong/r-tom-n-toms-coffee-%E6%B2%99%E7%94%B0-%E8%A5%BF%E5%BC%8F-r487606

地址: 沙田沙田正街18號新城市廣場一期1樓158號舖