Season Plus 嘅生蠔一向都好出名，近期疫情緩和，朋友介紹我黎位於旺角嘅「串串燒」，可以食生蠔之餘仲可以食下串燒。
精選生蠔六隻 ：
超鍾意食生蠔嘅我地，見到餐牌上生蠔最平＄9一隻，又點會錯過呀。
生蠔海水味偏淡，不過肉質creamy肥美，加入檸檬汁亦見到蠔肉會收縮，裙邊會郁動，咁證明左生蠔真係非常新鮮。
除左生蠔之外，我地仲叫左一個套餐，另加其他串燒。
套餐包一個沙律，兩款串燒，及兩杯1公升杯裝飲品。
沙律我地揀左蟹籽蟹柳沙律，份量比想像中嘅多，沙律菜相當新鮮，配上蟹柳及蟹籽以及適量嘅沙律醬後，入口相當清新。
飲品方面我地揀左檸檬可樂同埋柚子茶，美中不足嘅係佢地無無糖可樂提供，一公升有糖嘅肥仔水真係唔敢飲太多。
兩款串燒方面我地揀左燒生蝦同燒冬菇 ，
生蝦算大隻，入口仲好爽甜，至於冬菇，食落一d都唔乾，唔錯。
我地另外亦都叫左其他串燒：
台灣腸：
本人非常喜歡食腸仔，雖然知無益，但間唔中食下都可以嘅。
呢度台灣腸入口一d都唔鹹，仲好彈牙添，配埋秘製醬汁食，真係好好味。
玉子肉鬆燒：
玉子燒上加左好多肉鬆，賣相有別於平時食到嘅，入口蛋皮層次分明，熟嘅程度剛剛好，所以口感軟綿綿，水份十足。
吉列炸蠔四隻：
呢度嘅蠔即叫即炸，入口熱辣辣仲好多汁，炸粉唔算厚，吉列層好脆好好味。
味椒鹽炸雞軟骨：
炸雞軟骨炸粉唔會過厚，食落唔油膩，入口脆卜卜，令人一口一口咁食過不停。
味椒鹽燒雞翼 ：
燒雞翼入口唔會好油，味道香口，雞翼外脆內嫩。
牛油燒粟米：
燒粟米味道鮮甜多汁，唔錯。
孜然蒜蓉茄子：
茄子加左蒜茸去燒，非常惹味，令人一啖一啖食過不停。
不知不覺係呢度食左兩個鐘，一邊傾計一邊嘆下生蠔同埋串燒，真係唔錯嘅享受。
地址： 旺角彌敦道733號振宜大廈地庫
