同人燒 (尖沙咀)

朋友月尾生日，因為佢下星期要出 trip，所以今日就同佢提早慶祝， 朋友想食放題， 但又唔想打邊爐或日本野，見佐敦開左間新既串燒放題，就打算帶佢黎試下。 

呢度既串燒放題價錢係$238，可以食足2.5 小時，包飲包食都算幾抵食。

呢度既醬汁係自家製架，選擇雖然好多，但係我依然喜歡原汁原味多D，不過我都有試個檸檬蜜糖汁，味道相當香甜清新，檸檬同蜜糖兩種味道都相當夾，唔錯。

平時出去BBQ都間唔中有燒下薯片，但係薯仔切片再拎去燒又真係第一次，不過因為本人功力有限，一係燒得唔夠火喉一係燒到燶晒，有點兒失望。

雞翼:

雞翼係用叉燒醬醃既，都算幾入味，自己加左少少蜜糖之口食落好香甜，令人食得津津有味。可能因為難熟既關係，餐廳係廚房整到半熟先至拎黎俾客人，咁客人就唔駛等咁耐先有得食，有好有唔好啦，有D客人鍾意自己由生燒到熟架嘛。

雞肉串:
雞肉串咬落好多肉汁，食落好有口感，啖啖肉，值得一讚。

青口:
青口味道OK，都幾大隻，但係如果可以加少少蒜茸就會更加好啦。

娃娃菜: 
烤過既娃娃菜味道依然清甜爽口，加埋佢地既自家製既汁都幾好味。

燒粟米: 
味道鮮甜多汁，唔錯。

牛油粟米: 
細細兜好可愛，可過建議店方牛油分開上，咁唔多喜歡牛油既客人就唔洗浪費啦。

茄子: 
蒜茸落得過多，份量都好多，建議蒜茸同每份既份量至少可以減半，如果唔係食完一份茄子真係可以唔駛食其他野。

起初真係以為所謂既甜品係「香蕉」，「菠蘿」，「是日精選生果」同埋「朱古力棉花糖」，不過原來好戲在後頭。

朱古力棉花糖其實係用餅乾夾住棉花糖，再塗上薄薄既朱古力醬。放上爐到烤之後，棉花糖好快就熔，放入口食真係好好味，好似去左BBQ咁。

點解話好戲在後頭呢，原來真正既甜品係埋單時先俾你揀，有香蕉冰卷，白明月冰卷，小巨蛋，若葉果子同埋日式紅豆和果子揀，每人只可揀一件，我地大家都係揀左香蕉冰卷，香蕉味好重，不過就無想像中咁「冰」。

埋單加埋一每人都係$260 左右，坐足兩個幾鐘，食到咁飽，間唔中黎下都OK既。

openrice link: http://www.openrice.com/zh/hongkong/r-%E5%90%8C%E4%BA%BA%E7%87%92-%E5%B0%96%E6%B2%99%E5%92%80-%E5%A4%9A%E5%9C%8B%E8%8F%9C-%E6%97%A5%E5%BC%8F%E6%94%BE%E9%A1%8C-r495161

地址: 尖沙咀山林道29-31廣利樓1樓及地下4號鋪

達人包車 (銅鑼灣)

早前去過尖沙咀既達人包車，最新知道佢係銅鑼灣區開左分店，仲有優惠，所以就同朋友一齊黎試下啦。

同朋友行左陣街先黎食飯，呢度既座位好似俾尖沙咀既多，8點幾鐘都唔駛點等位。係食物未到既時候，我地唯有食住D 前菜先。

芒果汁飲料 + 西柚果汁飲料:
西柚果汁飲料係用果汁沖製而成既，裡面有好大片既西柚，平時都好少見到，飲完後覺得味道甜甜地酸酸地，好開胃又解渴，幾好味。至於芒果汁飲料味道比較甜，味道都幾濃郁，兩者之間我比較喜歡西柚果汁。






年糕鍋: 
年糕鍋有分清湯同埋辣味既，喜歡食辣既我地叫左有辣味既。

年糕鍋入面咩都有咁滯，份量十足，有齊韓國年糕，餃子，韓國魚蛋，麵，香腸，青口等等，鍋裡面既餸菜輕煮一陣就有得食，湯底就帶韓式既微辣口味，味道香辣惹味，年糕同麵都好煙韌，魚蛋就好彈牙，青口鮮甜，最值得讚既係佢既餃子，如果湯底可以再辣少少就更加好架啦，唯一美中不足既係蔬菜唔夠多，多一D會更加好。





蜜糖炸雞:
一份炸雞原本係要成$180，但係落單果時店員同我地講依加做緊promotion，如果叫個主菜既話只要加$1就可以要半份炸雞，咁如果半份要$1，一份要$180，咁就梗係要半份啦，反正一份都唔會食得晒架啦。

其實炸雞比人感覺係比較肥，不過呢度既炸雞都唔算油，雞既外層沾滿蜜糖，另外再加左少少檸檬汁再炸成既，甜度剛好，口感脆脆地甜甜地，雞肉軟嫩多汁，食落好開胃，令人一件接一件咁食，如果D雞可以去骨既話，食起黎會更方便，女仕們又唔駛驚會失儀。

伴碟既仲有薯角，炸得好香脆，上碟時仲係熱辣辣，好好味。旁邊仲配埋沙律，咁食完炸雞再食返D沙律感覺上無咁肥膩。

openrice link: http://www.openrice.com/zh/hongkong/r-%E9%81%94%E4%BA%BA%E5%8C%85%E8%BB%8A-%E9%8A%85%E9%91%BC%E7%81%A3-%E9%9F%93%E5%9C%8B%E8%8F%9C-%E9%9F%93%E5%BC%8F%E7%82%B8%E9%9B%9E-r490825 

地址: 銅鑼灣駱克道491-499號京都廣場3樓

風車 (大圍)

作為沙田人，位於大圍既「風車」其實都黎過好幾次，不過都係星期六日既午飯時段黎多，今日因為屋企人去左街，要自己搵食，所以就同住美林既朋友一齊黎呢度試下佢既晚餐。

晚餐同午餐無論氣氛同埋食物種類都好唔同，晚餐感覺上好有情調，而食物亦都多左好多選擇，以西班牙菜為主，除左set dinner之外，仲可以揀a la carte。

有選擇困難既我地，最後都係揀set dinner，貪唔駛煩，仲有齊頭盤，餐湯，main course同埋餐飲。

落完order後，店員就為我地送上免費既餐前小食: 西班牙蕃茄包，每人一片，設計精緻，睇得出花左唔少心思。薄薄脆脆既蕃茄包上鋪上蕃茄，食落幾清甜，幾開胃。

無幾耐之後，頭盤就到啦: 

牛油果帶子配芒果莎莎:係薄薄脆脆既迷你多士上面鋪上一層牛油果醬後再放上帶子，再係上面放上芒果莎莎，的的骰骰，好可愛，味道方面亦都好夾，唔錯。

蟹肉青蘋果沙律配脆多士: 做法同上面既有D相似，只係放左唔同既食材上迷你多士度，今次唔係放牛油果同帶子啦，係放左伴有蟹肉，青蘋果同沙律醬既沙律，上面再放D火箭菜，沙律醬份量唔會太多，唔駛怕肥，幾好。

食完頭盤之後，湯就上檯啦，我地揀左是日餐湯(南瓜湯) 同埋西班牙凍蕃茄湯各一。

西班牙凍蕃茄湯/ 南瓜湯: 
西班牙凍蕃茄湯都係第一次試，飲落有D稀，同埋都幾凍下，唔係太慣飲凍既湯。味道方面都幾重蕃茄味，亦都感覺到有少少蕃茄蓉係裡面，似係用攪拌機將成個蕃茄打爛整成既。

南瓜湯方面相當重南瓜味，飲落好滑，值得一讚。兩款湯之中我比較喜歡呢款。

西班牙脆皮乳豬配紅椒汁:
脆皮乳豬既皮名副其實既好香脆，鹹味剛剛好，無骨之餘乳豬肉食落仲好鬆軟，旁邊仲配有紅椒汁，用黎點脆皮乳豬可以令佢有點甜甜地辣辣地既味，伴碟仲有薯角同菜，薯角焗得相當脆，值得一讚。

西班牙香腸配帕爾瑪火腿及豬腩仔燴飯: 
燴飯一般黎講都會係比較多汁，呢個飯都唔例外，帶有蕃茄味既飯裡面加入左parma ham，腸仔同埋豬腩仔整成，食落都幾香口，腸仔都幾爽口彈牙，唯一美中不足既係parma ham比較少，2個人分既話每人分到既唔係太多。

餐飲方面我地揀左熱咖啡同埋凍檸茶，咖啡好香濃，奶亦都係整熱左，咁客人落完奶之後杯咖啡就唔會變凍。至於凍檸茶，賣相非常精緻，好吸引。

原來晚餐同午餐黎食飯個氣氛同食物係咁唔同既，如果唔係因為地點唔太方便區外人，真係可以帶多D朋友黎試呀。

openrice link: http://www.openrice.com/zh/hongkong/r-%E9%A2%A8%E8%BB%8A-%E5%A4%A7%E5%9C%8D-%E8%A5%BF%E5%BC%8F-r483479

地址: 大圍積存街50號葵偉樓地舖

弘 (灣仔)

難得長假期同好姊妹去行街睇戲食飯，點都要食返D好野既。

「弘」就係灣仔街市附近，雖然話係灣仔，但係其實就係近銅鑼灣多D，搭地鐵黎既話最好係銅鑼灣站出。

最近好多朋友黎到「弘」食野，亦都upload左唔少得意既相上facebook，鍾意「相機食先」既我，當然趁放假帶埋好姊妹黎食飯啦。是日晚上7點黎到，已經好多人係門口等緊位，好彩有訂位，如果唔係真係唔知要等幾耐。

熱情果香檳: 因為天氣熱，所以坐低後都想飲返杯野，見到2杯無酒精香檳都係68蚊，就諗住試下，味道相當香甜，仲有一片桃放下杯邊做裝飾，見到都開心呀。

極丼:
極丼係海鮮丼既其中一款，配飯，漬物同埋麵豉湯，丼裡面有吞拿魚腩，帆立貝，海膽，油甘魚同埋赤蝦，鍾意每樣野都試D既朋友千企唔可以錯過。賣相方面，睇起上來也非常之有美感，吞拿魚腩非常肥美，帆立貝新鮮爽彈，海膽味道一D都唔腥，令人非常滿足。

龍蝦二段丼:
「二段丼」呢個term我都係最新先聽，所謂既二段丼，故名思義，係有兩層既魚生飯，上下都放滿魚生。呢個龍蝦二段丼，上層係放左龍蝦，廚師真係好有心思地將飯釀左係部分龍蝦裡面。至於二段丼既下層就係混左吞拿魚碎，青瓜同日本飯，中間再配有溫泉蛋，食起上黎只要將所有野混埋一齊食就得，真係好得意呀。
龍蝦頭湯:
同其他丼一樣，呢個丼都係配麵豉湯既，不過亦都可以加$58轉龍蝦頭麵豉湯，做法係係二段丼上檯後，相機又食完後將你既龍蝦頭拎走再攞去滾湯，可能因為人多既關係，所以等候需時，不過都係值得既，因為滾出黎既湯有龍蝦味之餘仲有龍蝦肉，真係令人一啖一啖不停咁飲。

埋單每人都要350蚊左右，第一次試二段丼，感覺真係好新奇，整體味道方面認真唔錯，份量方面絕對夠2個女仔食，不過如果男仕既話，可能「極丼」份量未必夠，要食二段丼先得啦。

openrice link: http://www.openrice.com/zh/hongkong/r-%E5%BC%98-chirashi-%E7%81%A3%E4%BB%94-%E6%97%A5%E6%9C%AC%E8%8F%9C-r470956

地址: 灣仔灣仔道221A地下

伊賀日本燒肉料理 (尖沙咀)

是日屋企人生日，為左同佢慶祝，我地黎左位於尖沙咀赫德道既伊賀日本燒肉料理食晚飯。

其實以往只做日式放題既餐廳，近年都加入埋燒肉既元素，吸引多D人黎食，亦都可以乘機加價。

餐廳既通風系統做得都幾好，入到去唔會話好大煙咁，間格方面都會唔錯，令到客人有一定程度既私隱。

先講食物，同好多放題餐廳一樣，坐低後好快就送上剌身船一隻，等你地可以試下有咩鍾意食，可以之後再點，同時間，亦都可以配合到好多香港人鍾意「相機食先」呢個習慣。

魚生都算新鮮，我地仲叫左足足3轉。咁多種類入面，甜蝦同三文魚最鮮甜，賣相亦都好靚，顏色鮮艷，三文魚切得好厚，甜蝦都啖啖肉，蟹棒亦都好爽口，完全唔似係平野，非常滿足。

同剌身一樣，入座時都會送上拼盤一碟，咩都有D咁，咁之後你地鍾意食咩就叫咩。肉類醃得都算入味，食起黎唔會好油，最值得一讚既係連雞翼都有食2款咁多，仲會碎上，女仕們就唔怕食到無儀態啦。

腸仔方面都好好味，唔係只係俾雞肉腸你，可惜真係切得太細份，唔係好夠喉。

蟹籽沙律方面，食落好清新，蟹籽分量都好多，沙律醬又唔會太多，唔錯。

前菜方面，自己一向都好喜歡食，味道好好，非常開胃，八爪魚仲要好大隻，至於螺肉，如果可以辣多少少就更加好啦，唯一美中不足既地方係無中華沙律，有既話就真係完美啦。

以上既沙律係麻醬，食落好清新爽口，幾開胃，我地仲有encore添。

炸物方面炸得好香口，不過就有點兒油，建議係下面加多張隔油紙。

埋單果時仲會送上movenpick雪糕，味道仲可以自己揀，真開心。

openrice link: http://www.openrice.com/zh/hongkong/r-%E4%BC%8A%E8%B3%80%E6%97%A5%E6%9C%AC%E7%87%92%E8%82%89%E6%96%99%E7%90%86-%E5%B0%96%E6%B2%99%E5%92%80-%E6%97%A5%E6%9C%AC%E8%8F%9C-%E6%97%A5%E5%BC%8F%E6%94%BE%E9%A1%8C-r478796

地址: 尖沙咀赫德道4號The Hart 3樓

Container Factory Restaurant & Bar (尖沙咀)

真係唔知點解最近呢一兩年香港開左咁多間韓國餐廳，而好多都係韓國人係度打工既。位於尖沙咀柯士甸路既Container Factory Restaurant & Bar，由佐敦站行去都要10分鐘，門口都幾搶眼，望落真係有點兒似一個貨櫃，都幾有特色。

餐廳真係成個貨櫃咁，架上仲有工業用既頭盔，店內裝修都幾靚，所以我地係食物未到時都係度影左唔少相。

都唔知從幾時開始我食親韓國野都鍾意叫部隊鍋同埋炸/烤雞，今日都唔例外。

部隊鍋:
部隊鍋有2個size，分別係大同細，2個人既話其實叫細都OK架啦。部隊鍋裡面咩都有咁滯，份量十足，連香腸都有成2款，除此之外仲有午餐肉，泡菜，韓式餃子，年糕同埋拉麵，真係估佢唔到。辣度對於鍾意食辣既我簡直係剛剛好，味道香辣惹味，非常正宗，有少少似某韓式即食麵既湯底咁，鍋裡面既餸菜輕煮一陣就有得食，D蔬菜浸係個鍋到一陣先食，超入味，年糕都好煙韌，真係好味到無得彈呀。但係同行既朋友唔係點食辣就覺得有點兒過辣，所以唔食得辣既話最好落order時叫佢少辣。

蜜糖牛油焗雞蜜糖牛油焗雞:
炸雞比較肥，所以有得揀我都係揀焗雞，蜜糖牛油焗雞送黎既時候好香牛油味，雞既外層沾滿蜜糖，焗起後就成為焦糖，口感脆脆地甜甜地，食落好開胃，令人一件接一件咁食。

Jaws Attack:
呢杯jaws attack係cocktail 黎既，酒精成份唔係好多，似係果汁加少少汽水再加D酒咁，味道普通，不過賣相真係好可愛，有條鯊魚插左係隻超級巨型既杯度，真係唔「相機食先」都唔得啦。

Overall黎講食物，服務同環境都唔錯，唯一美中不足既係張檯有點兒過細，放完個部隊鍋之後真係無咩位啦。

openrice: http://www.openrice.com/zh/hongkong/r-container-factory-restaurant-bar-%E5%B0%96%E6%B2%99%E5%92%80-%E9%9F%93%E5%9C%8B%E8%8F%9C-%E9%9F%93%E5%BC%8F%E7%82%B8%E9%9B%9E-r494972

地址: 尖沙咀柯士甸路20號地舖