近日因為新型冠狀病毒嘅緣故，少左出街食飯，連朋友都少見。
今日難得同男朋友見面，我地揀左間環境唔錯又可以坐得耐嘅餐廳食晚飯。
Amplifier Restaurant 位於旺角花園街鴻威大廈，主打西餐，逢星期四同六都會有live band，氣氛非常好。
由於二人餐份量較多，價錢又唔平，我地決定揀a la carte，叫左一份小食拼盤，一個主菜，兩個湯，一份甜品同埋兩杯咖啡。
特色小食拼盤:
小食拼盤有水牛城雞翼、豬肋骨、洋蔥圈、魷魚圈、沙律菜同埋軟殼蟹。
水牛城雞翼：
水牛城雞翼賣相好得，顏色紅紅地，醬汁又酸又辣又夠多，食落都幾開胃。最重要嘅係D雞翼係焗而唔係炸，比較上健康D。
豬肋骨：
用美式煙燻醬醃過後嘅豬肋骨，醬汁完全融入，入口不但肉味濃，而且唔乾，雖然等候需時，但係都非常值得。
沙律菜：
加左醋嘅沙律菜，入口酸酸地，非常開胃。
龍蝦汁海鮮意大利麵：
意大利麵以蝦、青口同魷魚襯托，意粉條條分明，軟硬度適中，熟度剛剛好，完全做到al dente，加埋肉質非常鮮嫩嘅青口食，好有口感，配埋味道香濃嘅龍蝦汁食，非常好味。
湯方面我地分別叫左泡沫龍蝦湯同埋牛肝菌忌廉湯，而我就特別喜歡佢個龍蝦湯。
龍蝦湯顏色偏淡，不過聞落好香龍蝦味，飲落好creamy，味道濃而不過鹹，唯一美中不足嘅係入面無料，如果可以加少少龍蝦肉，咁就完美啦。
個湯亦都配有新鮮烤焗嘅蒜蓉包，雖然等候需時，但係入口熱辣辣仲好香脆，值得一讚。
甜品方面我地叫左「焗蘋果酥配雪糕」，
即叫即焗嘅蘋果酥，製作需時，蘋果酸酸甜甜，crumble又夠脆，配埋雲呢拿雪糕食，好好味，真係令人一啖一啖咁食過不停。
最後叫左杯Cappuccino 同Americano ，一邊嘆咖啡一邊欣賞只有星期四同六晚上先有嘅live band，為我地難得可以外出用膳嘅晚餐劃上完美句號。
地址：旺角花園街3-5號鴻威大廈1樓B號舖
