江南庭敘(九龍灣)

為於九龍灣高銀金融國際中心，最近開左間新既火鍋店。 可能因為位於商業大廈入面，晚市無咩人，唔駛等位之餘環境仲好舒適，店員服務亦都非常之好。

餐廳非常潮，餐牌係用平板電腦既，不過落單就要叫店員過黎落。

係我地揀緊野食既時候，店員已經拎左D醬料俾我地喇。

湯底我地揀左蕃茄排骨鍋，蕃茄味好濃好好味，仲有好多料，D野食未熟果時真係忍唔住飲左碗湯。

水餃: 一份有成12隻，係自家包製架，皮薄餡靚，一口一粒，非常好食。

精選豬拼盤: 豬拼盤有豬面青，豬膶 ，豬脷 同豬肩肉，每樣都有D，其實都夠食架喇，D肉又新鮮而且一D都唔肥，用料都好靚。

玉子豆腐: 豆腐夠滑，但煮得耐都唔易爛，食落蛋味夠濃，唔似一般街市買到

四寶丸: 四寶丸有蝦丸，墨魚丸，豬肉丸同牛肉丸，分別放落一個有12格既碟度， 超可愛。四寶丸全部都係手打，仲要即叫即打，入口新鮮好味而且彈牙， 豬肉丸同墨魚丸仲好爽口添。

稻庭烏冬:烏冬用個杯裝住，賣相非常靚，份量都幾多，放落湯度煮一陣就食得喇，配埋蕃茄湯底食，味道簡直係一流。

2個人叫左以上既野真係差唔多，雖然唔係叫左好多款，但係份量都唔少，食完之後店員仲送埋個生果拼盤俾我地，為我地今日既晚餐畫上句號。

openrice link: https://www.openrice.com/zh/hongkong/r-%E6%B1%9F%E5%8D%97%E5%BA%AD%E6%95%98-%E4%B9%9D%E9%BE%8D%E7%81%A3-%E6%B8%AF%E5%BC%8F-%E7%81%AB%E9%8D%8B-r513250

地址: 九龍灣啟祥道17號高銀金融國際中心1樓

別府駅前料理 (銅鑼灣)

位於銅鑼灣既別府，星期六8點幾都唔係好多人，唔駛等位。

我地一行兩人叫左一個鰻魚炒飯，一份芥末燒魚餅，同埋一件千島海鮮薄餅。

芥末燒魚餅一份有3件，入口一d都唔油，每件魚餅上都有少少芥末同埋味粉，好好味，不過一人食得1.5 塊真係少左d。

鰻魚炒飯份量比想像中少，味道較濃，配料比較少，絕對有改進既空間。

三文魚千島海鮮薄餅整得好脆，配料好多，個汁幾開胃，整體配搭唔錯。

最後埋單每人都係80 蚊到，食物ok 又唔駛等位又可以坐到好耐，都算唔錯。 

openrice link: https://www.openrice.com/zh/hongkong/r-%E5%88%A5%E5%BA%9C%E9%A7%85%E5%89%8D%E6%96%99%E7%90%86-%E9%8A%85%E9%91%BC%E7%81%A3-%E6%97%A5%E6%9C%AC%E8%8F%9C-r10461

地址: 銅鑼灣百德新街22-36號翡翠明珠廣場1樓3號舖

首爾家韓國料理(銅鑼灣)

早前去過呢間酒店既一間餐廳，無意中發現有呢間首爾家韓國料理，所以打算黎試下既。

呢間餐廳有個好處，就係可以用table map，咁樣返返下工book檯都唔怕俾人知啦。

餐廳位於隆堡柏寧頓酒店，環境唔錯，不過不竟餐廳有燒烤食，所以點都會有陣燒烤味既。

點菜之後，店員們就為我地送上8款前菜喇。

前菜共有八款，有昆布啦，泡菜啦，薯仔啦等等，我最愛既當然係泡菜，辣度適中，令我地越食越開胃。

韓式煎餃子: 一份餃子共有8隻，配有餃子汁，不過我都係覺得唔點汁仲好味。餃子皮薄陷靚，煎得好有火喉，一D都唔油，值得一讚。

辣炒年糕: 年糕口感唔錯，唔會太硬亦都唔會太軟，仲加左少少菜一齊去炒，不過個汁唔夠辣，可以再整得辣少少。

韓式部隊鍋: 上菜時仲係熱辣辣既部隊鍋，真係好大煲，裡面有拉麵啦，年糕啦，腸仔，午餐肉同埋菜，湯底帶微辣，都幾好味，不過可以再辣少少，至於年糕方面，係用年糕片既，所以都唔怕同時叫辣炒年糕，因為係完全唔同既。

食完野之後，店員就為我地送上2片橙，食完D濃味既野食返D生果，可以消滯，認真貼心。

食咁多野最後埋單都只係四百幾蚊，咁既食物質素同服務，真係唔錯架喇。

openrice link: https://www.openrice.com/zh/hongkong/r-%E9%A6%96%E7%88%BE%E5%AE%B6%E9%9F%93%E5%9C%8B%E6%96%99%E7%90%86-%E9%8A%85%E9%91%BC%E7%81%A3-%E9%9F%93%E5%9C%8B%E8%8F%9C-%E9%9F%93%E5%BC%8F%E7%82%B8%E9%9B%9E-r161639

地址: 銅鑼灣邊寧頓街13-15號隆堡柏寧頓酒店1樓

FRITES Belgium on Tap (中環)

呢間主打食比利時菜既餐廳，全香港有四間分店，燈光柔和，環境寧靜，裝潢帶俾人一種20世紀初既歐洲風格。

話明係frites，咁即係出名食薯條啦，咁無理由唔試既。

Fish and Frites: 炸魚整得好脆，粉漿整得夠厚，無論賣相定係味道都好有英式風味，旁邊仲配有他他醬，兩者既配搭真係完美。薯條方面，係英式既粗薯條，上菜時仲係熱辣辣，食落都相當香脆，所以一定要趁熱食。設計餐單既廚師亦都相當細心，知道食咁多炸野好易滯，所以都特登用味道清新既沙律黎做配菜，咁樣就會更有胃口去食埋其他野啦。

Rosemary roast chicken: 隻雞應該係即叫即燒架，所以等候需時，配汁用左忌廉，粟米同埋芥末整成，非常creamy，配埋燒雞一齊食個味道非常之夾。配菜方面有熟既車厘茄，薯角同埋蕃茄，賣相非常之靚。

餐廳服務非常好，食物種類又多，可以坐到好耐，加上仲設有「兒童天地」，咁大人可以食野傾計，小朋友又可以玩唔駛阻住大人，大家開心，你話幾好呢? 

 openrice link: https://www.openrice.com/zh/hongkong/r-frites-belgium-on-tap-%E4%B8%AD%E7%92%B0-%E6%AF%94%E5%88%A9%E6%99%82%E8%8F%9C-r449638

地址: 中環威靈頓街198號The Wellington 1樓

Chez Bistro (銅鑼灣)

位於銅鑼灣百樂中心既Chez Bistro，地點旺中帶靜，環境非常好，食物都唔錯，都算係約會既好地方。

雖然有set dinner揀，但係選擇有限，所以最後都係a la carte。

餐湯叫左荷蘭白菌忌廉湯 + 蜆肉周打湯。白菌忌廉湯好creamy，蘑菇味好出，亦都飲得出係用蘑菇打成蓉。

蜆肉周打湯魚味好濃，配埋熱辣辣又鬆軟既麵包真係完美既配搭。麵包有兩款，一款係牛油麵包，第二款係mixed berries，兩款都好好味。

炭燒老虎大蝦有機意大利飯配自家製蝦汁

意大利飯份量唔多，適合女生們多D，賣相非常吸引，隻蝦真係幾大隻，食落爽口彈牙，個汁好濃好好味，不過係蝦汁定係龍蝦汁我就真係唔識分喇。意大利飯方面煮得比正宗意式既冧，不過咁樣會更加適合香港人口味。

煎焗法國黃皮春雞卷大蝦配蒜片百里香汁

春雞燒得剛剛好，伴碟有薯仔片同車厘茄，不過個人認為用薯蓉會更加襯。隻春雞裡面有隻蝦，咁既煮法真係第一次見，睇得出廚師都花左唔少心思去設計餐單。

法式窩夫配楓樹糖漿，鮮果及雪糕

窩夫整得幾脆， 除左cream之外仲有配兩種汁，有caramel 同埋syrup，不過我唔好太甜，所以都係揀左用雪糕送。雪糕食得出唔係cheap野，如果無估錯既應該係movenpick，不過如果可以揀味道既話就更加好啦。

除此之外仲有少少生果伴碟，令到賣相更加靚，攪到我地都忍唔住「相機食先」。

食完大餐之後點都要飲返杯熱飲，咁先可以坐多陣同傾多陣計。

今晚食左咁多野，每個人都係300蚊多D，咁既環境，咁既食物，算唔錯架喇。

openrice link: https://www.openrice.com/zh/hongkong/r-chez-bistro-%E9%8A%85%E9%91%BC%E7%81%A3-%E8%A5%BF%E5%BC%8F-r514115

地址: 銅鑼灣耀華街3號百樂中心21樓

泰之味(上環)

是日年初五，放工打算同朋友們一行3人去西營盤食開年飯，點知好多店鋪都唔開，我地唯有周圍行下，最後行到去上環市政大廈既熟食中心，揀左食泰國野。

泰式鳳爪整得好入味，辣度剛剛好，好有泰式風味。

咖喱有紅/黃/青揀，而配料又有牛/雞/豬/海鮮揀，好多唔同配搭。紅咖哩雞多汁但係雞比較少，可以另配飯或者麵包，用麵包點咖哩食真係幾好味。

炒金邊粉雖然無咩料，但係唔係好油，算係咁。

烤蝦餅上菜時熱辣辣，點埋汁食真係令人越食越開胃。 

openrice link: https://www.openrice.com/zh/hongkong/r-%E6%B3%B0%E4%B9%8B%E5%91%B3-%E4%B8%8A%E7%92%B0-%E6%B3%B0%E5%9C%8B%E8%8F%9C-r17862

地址:  上環皇后大道中345號上環市政大廈2樓熟食中心CF23號舖