泰象泰國越南餐廳(鴨脷洲)

是日聖誕節前夕，適逢假日，就梗係同朋友出去玩架啦，由於呢個星期晚上某主題公園免費入場，入場人數眾多，影完相出黎都成9點鐘，所以就係附近食晚飯喇。

由於唔知會玩到幾多點，我地無預先訂檯，可能因為到餐廳嘅時候已經好夜，所以唔駛等位。坐低之後我地好快就揀好嘢食喇。 

酸辣鳳爪沙律 :
頭盤我地叫咗個鳳爪沙律，鳳爪都算幾多，入口酸酸地，帶微辣，而且係無骨嘅，咁就唔駛吐骨啦，好方便。被酸辣汁浸過嘅沙律菜，入口酸酸地，非常醒胃，值得一讚。 

紅咖喱雞配蒜蓉包 :
主菜我地叫咗紅咖喱雞，另配一客蒜蓉包。

紅咖喱雞份量都算多，兩個人share食剛剛好，配埋熱辣辣嘅蒜蓉包，點住咖喱汁食，真係好有泰式風味。 

冬蔭功湯(細) :
食泰國野又點少得飲返個冬蔭功湯呀，呢度嘅冬蔭功湯有三個size，分別係大、中同埋細，由於我地人少，即使中同埋大有幾抵都好，都只能叫個細。

細嘅冬蔭功湯大約有三大碗，香料十足，配料有好多蝦同菇，上檯時仲夠熱，入口又香又辣，非常好味。

呢度嘅食物相當唔錯，服務都幾好，只係地點偏遠，去完黃竹坑嘅主題公園玩之後黎食飯，都係一個唔錯嘅選擇。 

openrice link: https://www.openrice.com/zh/hongkong/r-%E6%B3%B0%E8%B1%A1%E6%B3%B0%E5%9C%8B%E8%B6%8A%E5%8D%97%E9%A4%90%E5%BB%B3-%E9%B4%A8%E8%84%B7%E6%B4%B2-%E6%B3%B0%E5%9C%8B%E8%8F%9C-%E5%92%96%E5%96%B1-r475313

地址: 鴨脷洲鴨脷洲大街57-63號利是大廈地下

麻辣派對(銅鑼灣)

呢個星期寒流襲港，食返d辣嘢暖下個身就最好不過啦。 

臨近聖誕，工作開始無咁忙碌，比較準時放工，打算同朋友一齊去食係銅鑼灣有兩間分店嘅「麻辣派對」。

因為要去百貨公司買聖誕禮物俾朋友，所以揀咗黎呢間比較就腳嘅金百利廣場分店。

餐廳環境相當夢幻，幽暗嘅燈光帶俾人一份神秘感。剛好又主打辣嘢，真係名副其實嘅「麻辣派對」。

手拍青瓜 :
青瓜又爽又脆，入口微辣，令人一口一口咁食，非常開胃。

口水雞 :
啖啖肉嘅雞件，肉質非常嫩滑，亦都唔算多脂肪。秘製嘅麻辣醬汁紅油比例剛好，入口又麻又辣。雞肉吸收晒d醬汁後，非常入味。

古法咕嚕肉 :
雖然話就話黎「麻辣派對」好應該試盡所有辣嘢，但係一次過食咁多辣嘢又好似over咗少少，所以都想揀返樣唔辣嘅嘢食下。

呢味「古法咕嚕肉」好明顯唔係川菜，不過咕嚕肉外脆內軟，甜酸汁味道調較得算幾好，酸酸甜甜咁，幾開胃。 

水煮魚 :
超級鍾意食水煮魚嘅我，難得食川菜又點可以唔叫呢？呢度嘅水煮系列有四種口味任君選擇，分別係水煮味型、酸菜味型、鮮椒味型及蕃茄味型。

至於魚，就有三款揀，有江團、黑魚同埋桂花魚。而辣度就有走辣、減辣、原辣同埋加辣。

唔多鍾意吐骨嘅我揀左「水煮江團」。

水煮魚一上枱時香味撲鼻，見到成煲辣椒都已經流哂口水。江團入口超滑，肉質鮮嫩，亦唔多骨，配料方面亦都有芽菜、蒟蒻同埋水晶粉係底，水晶粉好滑，吸收晒d辣味真係食得超過癮。

總括黎講呢度嘅食物相當正宗，亦都可以揀唔同嘅辣度，適合唔同口味嘅朋友，如果想試多d唔同嘅菜式，真係要叫多d人黎一齊食呀。 

openrice link: https://www.openrice.com/zh/hongkong/r-%E9%BA%BB%E8%BE%A3%E6%B4%BE%E5%B0%8D-%E9%8A%85%E9%91%BC%E7%81%A3-%E5%B7%9D%E8%8F%9C-%E5%9B%9B%E5%B7%9D-r494429

地址: 銅鑼灣記利佐治街1號金百利廣場4樓R1號舖

Gioia Charcoal Grill & Oyster Bar (西環)

踏入十二月，周圍都充滿聖誕氣氛，位於西環嘅Gioia Charcoal Grill & Oyster Bar亦都唔例外。

餐廳離地鐵站只需五分鐘路程，相當方便。

餐廳氣氛舒服，光度適中，佈置都相當有聖誕氣氛，如果平安夜同情人黎食飯，一定好浪漫啫。

坐低後都未點菜，店員已經為我地送上麵包條喇。

Daily special oyster :
最近唔知點解咁鍾意食生蠔，係呢度見到只需$10/隻嘅生蠔，價錢非常吸引，所以都叫咗半打share食。

是日生蠔係法式生蠔，蠔肉飽滿，清甜爽口，雖然入口海水味重，但係配埋檸檬汁同埋茄汁，鹹味會減輕，味道適中，以$10/隻黎講，算係非常抵食。

瑞典海鮮多士 :
蝦同各樣海鮮加入沙律醬後放上烘過既法包上，入口鹹鹹地，幾有口感，廚師用左沙律黎伴碟，令到整體顏色唔會太寡。可惜每人只分得一小塊多士，如果唔係因為要留肚食其他野，一人食一份都仲可以呀。

西子蟹肉南瓜忌廉湯 :
南瓜湯味道濃郁，入口好creamy，用料恰當，加埋蟹肉，口感豐富，海鮮味相當鮮甜，配埋麵包條食，真係完美既組合。

輕烤日本刺身帶子黑松露意大利粉 :
意粉食落煙韌有口感，醬汁好足夠，每條意粉都沾到，黑松露又香又濃，加埋爽口彈牙嘅刺身帶子，真係好有口感。

蘋果金寶 :
即叫即焗嘅蘋果金寶，製作需時，蘋果酸酸甜甜，crumble又夠脆，配埋雲呢拿雪糕食，好好味，以$78黎講份量都算幾多，可以兩個人share食。

呢度食物好味，環境同服務都唔錯，最令人開心嘅係佢嘅聖誕佈置，真係適合開party或者同情人慶祝聖誕嘅地方。

openrice link: https://www.openrice.com/zh/hongkong/r-gioia-charcoal-grill-oyster-bar-%E8%A5%BF%E7%92%B0-%E5%A4%9A%E5%9C%8B%E8%8F%9C-%E6%B5%B7%E9%AE%AE-r495014

地址:  西環堅尼地城吉席街55-57號美新大廈地下A-C舖

Season Oyster & Wine Bar (銅鑼灣)

時間過得真係快，眨下眼又到年尾，好快就係一年一度既聖誕節喇，到咗呢d日子，又點少得開party交換禮物同食好嘢呀？

今年公司嘅team party揀咗去位於銅鑼灣嘅Season Oyster & Wine Bar，地點相當方便，由地鐵站行過去都係十分鐘左右。

餐廳面積唔算大，大約可以容納到二十至三十人到，裝飾亦都相對簡單，除左以酒莊酒箱木為主之外，牆上都掛咗好多幅畫，格調一流。

我地一行五人，叫咗各式各樣既食物，為免「相機食先」引起同事們嘅不滿，我只可影部份嘅食物。

精選生蠔 :
一份生蠔有12隻，盛惠$148，可惜無得揀當中嘅組合。是日精選係Irish Rock，海水味偏濃，海水鹹味充滿口腔。肉質方面亦都厚實飽滿，蠔肉爽滑，係呢個價錢黎講算係唔錯。

白酒煮紐西蘭青口 :
白酒加左蒜頭做湯底，再加入青口去煮。湯底酒味濃，亦都唔鹹，全部青口亦都開晒殻，非常新鮮。

炸日本廣島蠔 :
炸廣島蠔一向都係我嘅最愛，呢度嘅蠔即叫即炸，入口熱辣辣仲好多汁，炸粉唔算厚，吉列層好脆好好味。

黑松露牛肝菌薄餅 :
用蕃茄醬黎做薄餅就試得多啦，用黑松露醬黎整都係第一次試。

薄餅上鋪上一層薄薄嘅黑松露醬，上面再放上牛肝菌，做法非常新穎，入口亦都有一陣陣香濃嘅牛肝菌味，最值得一讚嘅係廚師係上菜前已經幫我地切開五小塊，咁分嘅時候就方便得多啦。

呢度嘅食物同服務唔錯，價錢亦相當親民，聖誕佳節同一大班朋友都係唔錯嘅選擇。

openrice link: https://www.openrice.com/zh/hongkong/r-season-oyster-wine-bar-%E9%8A%85%E9%91%BC%E7%81%A3-%E8%A5%BF%E5%BC%8F-%E9%85%92-r524187

地址: 銅鑼灣信德街14號地舖

蒲東小館 (油麻地)

臨近聖誕節，就梗係多節目㗎啦。 

是日同朋友行街，行到攰，咁岩經過位於油麻地彌敦道嘅「蒲東小館」，見佢新開，就打算入嚟試吓啦。 

黎到食上海菜，就梗係要飲返杯豆漿啦。豆漿可以揀凍同埋熱，依家天氣涼涼地，當然係飲返杯熱豆漿啦。 

呢度嘅熱豆漿，甜度適中，溫度剛剛好，入口唔會太熱，唔使攤好耐就可以入到口，值得一讚。 

餐牌除咗有以上嘅食物之外，仲有一味標榜零脂肪嘅特色脆皮鹹雞，仲講明係江浙自家後園飼養走地雞。  

雖然以$78來講，呢個份量比較少，但係入口鹹鹹地，冇咩肥肉，味道算唔錯。 

酸辣湯有分一碗同埋例牌，鍾意飲呢個湯嘅我哋，叫咗一個例牌黎share。 例牌嘅份量都算好多，有成五至六碗，算係物超所值。 酸辣湯入口酸酸地，配料都好足，如果可以整得再辣少少，咁就更加好啦。 

鮮肉小籠包一份有四件，入面嘅湯汁唔單止夠多而且好鮮甜，皮薄得黎亦都唔會咁易穿。 

鍋貼煎得香脆亦都唔會太燶，入口帶點煙韌，餡料仲有少少肉汁，咬一啖，餃子汁就會流出嚟，唔錯。 

高力豆沙算係我全餐飯入面最期待嘅甜品。 高力豆沙係由炸蛋白同埋豆沙整成嘅，炸蛋白整得非常鬆軟，大個得黎亦都幾實淨，中間嘅豆沙亦都唔會太甜，配埋面頭嘅糖霜，入口非常好味。 

呢度嘅食物同服務都唔錯，喺油尖旺呢區黎講，價錢算適中，適合一大班人一齊黎，咁就可以叫多啲嘢一齊食啦！ 

openrice link: https://www.openrice.com/zh/hongkong/r-%E8%92%B2%E6%9D%B1%E5%B0%8F%E9%A4%A8-%E6%B2%B9%E9%BA%BB%E5%9C%B0-%E6%BB%AC%E8%8F%9C-%E4%B8%8A%E6%B5%B7-r549601

地址: 油麻地彌敦道555號九龍行地下3號舖

CHEF STAGE de Eddy Chu (尖沙咀)

早前同朋友去過CHEF STAGE de Eddy Chu同埋西餐大排檔，都對呢兩間餐廳既食物念念不忘，最近見到呢度晚上八點半後入座可享全單85折優惠，就趁住去完大型百貨公司大減價購物後同朋友黎食飯啦。

呢間餐廳叫CHEF STAGE de Eddy Chu，顧名思義，就梗係由老闆兼總廚既Eddy Chu坐鎮主理架啦。

晚上八點半左右黎到，餐廳都唔算太多人，唔會好嘈。

乳酪鮮蝦芒果雜菜沙律 :

沙律菜非常新鮮，鮮蝦肉質彈牙，加埋芒果同入口即爆又帶少少荔枝味嘅珍珠真係相當有口感。有別於一般嘅沙律，呢度冇用到沙律醬，反而用咗乳酪，咁嘅做法味道會差唔多，但係脂肪含量肯定低啲。

大大隻蝦多士 :

有別於其他地方食到既迷你蝦多士，呢度既蝦多士真係超級巨型，麵包上面加入蝦之後沾上炸粉炸成既蝦多士，上檯時熱辣辣，入口外酥內軟，啖啖都食到蝦肉，好彈牙，沾埋帶有少少冬蔭公味既醬汁，感覺非常新奇。伴碟有少量既沙律，食完油膩既蝦多士食返少少沙律，真係份外清新。

白酒煮活蜆 :

白酒加左蒜頭做湯底，再加入大大粒既蜆肉去煮。湯底雖然偏鹹，唔建議大家飲，但係蜆肉並無脫殻，唔需要係湯底度搵蜆肉食。

黑松露蘑菇湯 :

蘑菇打碎後加入黑松露煲成嘅湯，香氣撲鼻，味道相當濃郁，入口時食到細細粒嘅蘑菇碎，非常有咬口。

忌廉鮑魚冬蔭海鮮湯 :

估唔到係西餐廳都會試到冬蔭公海鮮湯，呢個湯雖然係泰式，但係加入咗cream之後都有少少西式風味。最大驚喜係配料方面有鮑魚、帶子同埋蝦，鮑魚唔單止大隻，而且仲好爽口添。

雜菜薯仔煙豬腩燴法國鴨髀 :

鴨髀入口軟身，醃得都算幾入味，配菜有大量雜菜、紅蘿蔔、蘑菇同埋車厘茄等等，令到成個主菜顏色非常鮮艷，相當吸引。

紐西蘭蟶子配米酒白汁扁意粉 :

米酒加埋白汁整成嘅意粉，入口相當creamy，配料有車厘茄、蘑菇同埋蟶子。可能因為碟意粉顏色比較單調，所以廚師用咗蟹籽喺面頭做裝飾，令到碟意粉顏色更加鮮艷，賣相更吸引。

呢間餐廳非常之有情調，食物同服務質素都唔錯，都幾適合情侶黎食飯談心。

openrice link: https://www.openrice.com/zh/hongkong/r-chef-stage-de-eddy-chu-%E5%B0%96%E6%B2%99%E5%92%80-%E8%A5%BF%E5%BC%8F-%E9%85%92-r434117

地址: 尖沙咀亞士厘道17-19號19樓

Mee...Lemongrass (銅鑼灣)

成日放工後去銅鑼灣既我，經過呢間餐廳已經好幾次，難得今日早放工，就打算黎試下。

傍晚七點左右黎到，餐廳仲未係太多人，呢度環境相當開揚，視野唔局限於餐廳裡面，枱同枱之間既距離，係今時今日既香港黎講都唔算太少架喇。

我地一行兩人，唔太大食，叫左兩個小食，一個主菜同埋一個甜品。

無骨酸辣鳳爪沙律 :

無骨既鳳爪最適合懶吐骨既我地，酸度剛剛好，非常開胃。鳳爪份量亦都唔少，入口不但夠凍而且仲爽口彈牙，令人越食越開胃。

軟殼蟹米紙卷6件 :

好喜歡軟殼蟹既我，見到呢味小食就好想叫喇。米紙除左包著軟殼蟹之外，仲有牛油果、芒果同埋三色椒，顏色非常鮮艷，賣相好吸引，配埋伴碟既酸甜汁，口感相當清爽。

喇沙 - 大蝦,蜆肉,蟹柳,魚蛋,豆卜,雞蛋,魷魚 :

喇沙係呢度既招牌菜，湯底極度香濃既佢，椰奶味頗重，賣相呈橙黃色，入口微微既咖喱辣味，材料有大蝦、蜆肉、蟹柳、魚蛋、豆卜、雞蛋同埋魷魚。麵條索晒湯底既味度後，非常爽口，好好味。

馬來脆雪山 :

見隔離檯叫左呢個「馬來脆雪山」，賣相相當震撼，攪到我都忍唔住叫黎放上網呃like。

「馬來脆雪山」整個製作過程客人都可以隔住玻璃見到，做法亦都好簡單，只係係脆餅上加入煉奶同花生碎整成，味道有d似龍鬚糖，入口香脆，係一味幾特別既甜品。

openrice link: https://www.openrice.com/zh/hongkong/r-mee-lemongrass-%E9%8A%85%E9%91%BC%E7%81%A3-%E9%A6%AC%E4%BE%86%E8%A5%BF%E4%BA%9E%E8%8F%9C-%E6%B2%99%E5%BE%8B-r532850

地址: 銅鑼灣告士打道311號皇室堡地庫B11號鋪

麥田廚房 (銅鑼灣)

一年一度既生日又到喇，是日假日，去主題公園玩完之後，晚上朋友就帶左我黎呢度食飯。

餐廳位於銅鑼灣邊寧頓街隆堡柏寧頓酒店2樓，地點旺中帶靜，雖然適逢某大型百貨公司大減價，但係附近都唔見得特別嘈吵。

餐廳大約可以容納到40人左右，環境尚算寧靜，燈光柔和，非常適合情侶約會或者三五知己相聚。

若果有家庭聚會又或者商業會議，餐廳都可以改變間隔，安排到高私隱度既VIP房俾客人。

玻璃櫃內放滿俄羅斯既套娃公仔，令成間餐廳充滿左俄羅斯風味。

除左佈置之外，餐紙都印有俄羅斯公仔，事不宜遲，依加就同大家講下今晚既食物啦。

上海派招牌羅宋湯 :
羅宋湯係呢度既招牌菜，我地又點可以唔叫呢?

呢度既羅宋湯有紅菜頭、甘筍、薯仔同椰菜等等既蔬菜，除此之外仲用左放過夜既牛坑腩，可能因為咁，味道特別濃郁，入口微辣，配埋脆口既蒜蓉包，真係完美既配搭！

傳統迷你蝦多士(6件) :
用鮮蝦同蔬菜打成膠再炸成既蝦多士，火喉剛剛好，咬落都幾彈牙，點埋沙律醬食，真係格外好味，唯一美中不足既係比較油，建議店方可以先用隔油紙印走表面既油先上菜，令怕肥既客人心理上好過d。

扒大蝦茄汁炒意粉 :
蕃茄味相當香濃既意粉，入口酸酸甜甜，相當開胃，意粉亦都爽口彈牙，完全做到al dente，加埋大大隻同啖啖肉既扒大蝦真係極有口感。

基輔炸雞卷, 牛油薯蓉 :
人手剁碎既免治雞肉加入牛油搓勻，再醮上燕麥同麵包糠炸熟既基輔炸雞卷，表皮酥脆，切開後噴出陣陣香氣，令人急不及待一件一件咁放入口中。

人手剁碎既雞肉果然唔同d。入口非常彈牙，好有口感。切開雞卷後肉汁慢慢滲落墊底既薯蓉度，真係好好味。

除此之外伴碟仲有清爽既沙律，可以將整體既油膩感減低。

朱古力布朗尼 :
十一月份生日既壽星仔女，只要係晚市惠顧以及面書打卡，就可獲贈朱古力布朗尼一份。

係呢度真係不得不讚店員醒目同合作，事關朋友事前並唔知有呢個優惠，訂檯時已向店方要求自動送上呢個甜品，當店方同我地講係面書打卡有「特別優惠」而又被問到係咩優惠時都可以保持神秘，唔會破壞左朋友當初想俾我既驚喜，真係心思細密。

呢度無論食物、環境同埋服務都非常好，真係帶俾我一個難忘既晚上。


openrice link: https://www.openrice.com/zh/hongkong/r-%E9%BA%A5%E7%94%B0%E5%BB%9A%E6%88%BF-%E9%8A%85%E9%91%BC%E7%81%A3-%E5%A4%9A%E5%9C%8B%E8%8F%9C-r161765

地址: 銅鑼灣邊寧頓街13-15號2樓