今晚同好友相聚，朋友想試新野，我見早前去過尖沙咀既Chef Stage de Eddy Chu, 就想試埋同一個老闆開而位於銅鑼灣既「西餐大排檔」，由地鐵站行過黎都係幾分鐘，非常方便。
餐廳門口既招牌用左霓虹燈光，具有懷舊感覺，裡面既裝修簡單，帶俾客人舒適既感覺。
放工後七點左右到餐廳，好彩仲未要等位，坐低後我地先叫飲品，分別叫左爆珠紅豆冰同埋Margarita （瑪嘉烈特 ）。
爆珠紅豆冰係一般中式紅豆冰裡加入帶乳酸味既爆珠，不論口感同味道都好特別，真係好欣賞大廚既創意。
Margarita 係以橙汁、檸檬汁同tequila溝成，賣相精緻，入口酸酸甜甜，酒味都唔重，都算開胃。
小食我地叫左冬蔭公蝦多士同黑毛豬熱脆包。
冬蔭公蝦多士 :
有別於其他地方食到既迷你蝦多士，呢度既蝦多士真係超級巨型，係麵包上面加入蝦之後沾上炸粉炸成既蝦多士，上檯時熱辣辣，入口外脆內軟，啖啖都會食到蝦肉，好彈牙，沾埋帶有少少冬蔭公味既醬汁，感覺非常新奇。係食完油膩既蝦多士食埋伴碟既沙律，真係份外清新。
黑毛豬熱脆包 :
烘得外脆內軟既麵包內加入黑毛豬，再配埋加左wasabi既醬汁，感覺相當刺激。黑毛豬選用西班牙橡果黑毛豬肋條肉，入口富肉汁，香濃馥郁。最值得一讚既係廚師已經幫我地切成三少份，方便我地進食。配菜方面有新鮮而且清甜既菠蘿肉，可以中和返多油既蝦多士同埋熱脆包。
海鮮肉骨茶:
平時唔多喜歡肉骨茶既我，覺得佢好大陣藥材味，呢度既「海鮮肉骨茶」同出面飲到既好唔同，真係相當有驚喜，食材有魚、蝦同埋鮑魚，用料非常豐富，呢個Fusion組合都係第一次試，海鮮肉質既鮮味加埋輕輕既藥材味，入口好清甜。
黑松露蘑菇湯:
蘑菇打碎後加入黑松露煲成既湯，香氣撲鼻，味道相當濃郁，入口時食到細細粒既蘑菇碎，非常有咬口。
燒西班牙黑毛豬肉眼蓋:
黑毛豬一客兩件，賣相有點兒似牛扒，肉質呈粉紅色，表面燒到微脆，厚身得黎又唔會好肥，入口時肉質鮮嫩而且好淋，仲有豐富既肉汁，可見火喉控制得岩岩好，唔會燒到好乾。伴碟既有蕃薯蓉、燒蕃茄、蘆筍、菠蘿同埋basil，蕃薯蓉黎做伴碟真係唔多見，食落甜甜地，都幾特別，配埋菠蘿，口感更加爽口清甜。
蝦肉醬蘑菇意粉 :
鍾意食意粉但唔食牛肉既我，呢個意粉真係適合我，因為佢既肉醬係用蝦整成既。蝦肉整成肉醬之後加埋蕃茄醬同埋爽口既蝦，入口酸酸地，好開胃。意粉唔會太淋，韌度適中，爽口彈牙，好好味。
原隻菠蘿雪葩:
用原隻菠蘿黎做器皿既雪葩，賣相精緻，菠蘿味酸酸甜甜，質地細軟，口感又似雪糕又似沙冰，好好食，呢味低卡低脂既甜品，食多少少都唔怕啦。
呢度既菜式非常新穎，食物有水準，環境亦都相當舒適，真係一個幾適合約會既地方。
