Shine (尖沙咀)

是日好友生日，當然要同佢慶祝啦，佢好鍾意食西餐，所以我特登揀左呢間係尖沙咀有多達1000篇好評嘅餐廳，睇下係咪真係好似各位網友講到咁好食先。

我地一行兩人，叫左一個沙律，兩個小食同埋一個主菜share食。

煙鴨胸無花果沙律:

煙鴨胸無花果沙律以平底圓盤端上，無花果好甜，份量亦都比想像中多，略煎嘅煙鴨胸帶有煙燻香氣，非常厚身，肉質嫩滑彈牙，配上新鮮嘅沙律菜同黑醋食，非常開胃。

西班牙蒜味蝦配多士：

加左蒜頭去炒嘅蝦入口微辣，肉質爽口彈牙，份量都算幾多，配埋帶香草味嘅多士食，味道一流。

香辣椰汁燴藍青口：

青口份量都幾多，大小剛剛好，香辣椰汁味道香濃，入口微辣，非常惹味。

食晒d青口後仲可以用上面個小食淨返嘅多士點汁食添。

北海道帶子明太子意粉配三文魚子：

北海道帶子厚身，入口軟身唔會韌，味道鮮甜，配上加入左三文魚子同埋微辣嘅忌廉明太子汁，味道非常濃郁，醬汁亦都好多，令到每一條意粉都能掛上醬汁，非常好味，真係令人一啖一啖食過不停。

食完咁多野都好飽，食唔到甜品啦，不過一向嘴刁嘅朋友都對呢餐晚餐非常滿意，網友們果然無介紹錯呀。

 openrice link: https://www.openrice.com/zh/hongkong/r-shine-尖沙咀-西式-酒-r513390

地址：尖沙咀北京道12A號太子集團中心6樓

Greyhound Cafe (沙田）

住左係沙田咁多年，即使最近新城市廣場比較混亂，都唔會阻到我係附近活動嘅。

今日放工後約左同住沙田嘅朋友試下呢間係泰國過江龍嘅餐廳，Greyhound Café啦。

Greyhound 係香港一直大受港人及遊客歡迎，主打泰式fusion 菜，當中仲有唔少出名嘅小食添。

招牌脆炸單骨雞翼：

同一般嘅炸雞翼唔同，Greyhound嘅雞翼係以泰式魚露醃制，並採用生炸方式以保留最原始嘅泰式風味，非常香口，外皮脆卜卜，咬落仲有少少肉汁，單骨嘅做法亦都令客人非常方便進食，值得一讚。

意式鮮蝦雞肉米紙卷：

米紙卷係傳統越南街頭小食之一，呢度每一個米紙卷都包左以豬皮、雞肉同埋越南大蝦，用生菜包住食，再配上越式酸甜醬，好開胃好好食。

泰式炒通菜：

通菜合時無根，炒煮時火候剛剛好，軟硬適中，馬拉盞味香，鹹味無過火。

冬蔭公湯配意式雲吞：

食泰國嘢又點少得飲冬蔭公湯呢？鍾意食辣野既我，冬蔭公係我去到泰式餐廳必叫既菜式之一。

泰式冬蔭公配手工製意式雲吞呢個fusion菜真係第一次聽，點可以唔試下呢？。

呈橙紅色嘅冬蔭公湯，上菜時熱辣辣，香料十足，仲散發出陣陣香味，配料方面除左有意式雲吞之外，仲有河蝦同菇，入口又酸又辣，好開胃。

鮮蝦炒金邊粉：

羅望子醬加上超吸彈牙嘅鮮蝦炒成嘅金邊粉，再根據喜好加少少旁邊嘅花生碎同埋辣椒粉，非常惹味。

Iced tea (greyhound style) ：

食左咁多重口味嘅野，當然要叫返d凍飲啦。見到餐牌上呢杯招牌飲品，又點可以錯過呢？

有別於一般出面飲到嘅凍檸茶，呢度嘅冰塊係用檸檬茶製成，所以就算飲左食個鐘頭，d冰渦晒，檸茶味道仍然濃厚，唔會越飲越淡。

芒果糯米飯：

芒果糯米飯以白糯米整成，賣相誘人，糯米飯軟熟帶微溫，配上鮮椰奶同超甜芒果，味道相當豐富，有嚼口，甜度剛剛好，亦都為我地嘅晚餐劃上完美句號。

openrice link: https://www.openrice.com/zh/hongkong/r-greyhound-cafe-沙田-泰國菜-無肉餐單-r516469

地址：沙田沙田正街18號新城市廣場一期1樓103A舖

Outdark (旺角)

最近身邊實在發生左好多事，要約朋友出街真係有難度，今日難得約左朋友，一行三人決定癲返晚，去食非常邪惡嘅韓式炸雞。

Outdark位於旺角鬧市中，餐廳門口有幅情人鎖牆，情侶可以俾$5買個鎖留下message 掛係度，一齊鎖住大家個心架。除此之外仲可以寄postcard俾未來嘅自己，只要將postcard放入餐廳內嘅郵箱，佢地就會係一年後寄返俾你架啦，真係好特別呀。

呢間餐廳主打芝士料理，不過由於本人唔好芝士，所以都係叫返d平平凡凡嘅野食。雖然知道炸雞又肥又無益，但係耐唔耐食下都唔算過份嘅。

雙拼炸雞：

炸雞可以揀半份，一份，又或者雙拼，味道有五款，分別係原味，醬油，甜辣，香蒜蜜糖同埋辛辣，有選擇困難嘅女仕們，當然揀左雙拼啦，味道方面就揀左原味同埋甜辣。

每一份炸雞都會拼薯條，薯角同薯格，炸雞外皮好薄，肉質鮮嫩又無骨，食落啖啖肉，非常滋味，甜辣味方面更具韓式風味，唔講都唔知原來自己仲係香港。

每份炸雞都配四款醬汁，分別係燒烤醬、蜜糖芥末、蜜糖同埋甜辣醬，不過個人認為唔洗點醬已經好夠味啦。

海鮮炒粉絲：

韓國粗身粉絲爽口彈牙，加入左醬汁、蜆肉、蝦肉同魷魚炒過後又香又入味，好好味！

海雲台泡菜煎餅:

煎餅最怕就係多油，呢度嘅泡菜煎餅整起黎不但唔油，食落仲外脆內軟，辣味又夠濃郁，有令人一件接一件吃的衝動，最值得一讚嘅係個餅唔係整個上，而係廚師切開一件件後再鋪到靚靚上檯架。

Outdark Ade- Grapefruit:

呢排真係無咩mood飲酒，所以揀左餐牌上嘅non-alcoholic drink。呢杯grapefruit Ade係餐廳自己調製，味道唔會太甜，用黎送炸雞簡直一流呀。

openrice link: https://www.openrice.com/zh/hongkong/r-outdark-旺角-韓國菜-r457435

地址：旺角彌敦道613號飛達商業中心2樓