L'attitude (西環)

自從港鐵通車至堅尼地城之後，嗰頭開咗好多食肆，當中仲有唔少新派嘅咖啡店。

位於堅尼地城站附近嘅L’attitude，以卡通人物為主題，由櫥窗到餐廳內嘅佈置，都有好多熊仔(Remi)同兔仔(Tokki)嘅裝飾，除此之外仲有唔少cushion同公仔可以比客人影相添。

食物方面由前菜到甜品都有好多選擇，我哋一行二人，叫咗兩個主菜，一個小食同一份甜品share食。

奄列蕃茄蛋意大利麵 :
鍾意食蕃茄嘅我見到餐牌上呢味奄列蕃茄意大利麵就忍唔住想試吓。

奄列加埋蕃茄汁後，顏色鮮艷，切開後即時冒出大量蒸氣，香氣十足，仲包住白汁意粉同煙肉，賣相相當吸引。 奄列整得夠滑，蛋香一流，加埋蕃茄汁，味道更好。至於意粉，整得非常creamy, 又唔會有好重芝士味，絕對適合唔多好芝士嘅我。

明太子雜菌PIZZA :

明太子永遠係我嘅最愛，一有機會就必定會食。同好多日式西餐廳一樣，呢度嘅pizza係薄批，所以唔會太膩，每一塊pizza上都有大量明太子，加埋雜菌同蟹籽，味道好夾，好好味。

田園蜜汁雞翼 :

一份有六隻雞翼，上菜時香噴噴，配埋沙律菜，賣相吸引。除此之外，雞翼上嘅香茅，加埋蜜汁，入口真係超吸惹味。

Puyooma 軟雪糕-特濃牛奶 :

幾時都話，女人個胃有特別間隔，即使正餐食到幾飽，都會食到甜品。 

呢個Puyooma雪糕，只係見到餐牌上面嘅相都已經非常吸引，以雞仔(Puyooma)來做主題嘅佢，有三種味道選擇，分別係特濃牛奶，朱古力同埋扭紋。 

特濃牛奶味軟雪糕加上芒果醬，上面再加超巨型嘅黃色棉花糖，加埋其他裝飾，表情趣緻又可愛，令我地忍唔住相機食先。牛奶味軟雪糕奶味香濃，加埋輕輕既芒果醬，味道好夾，可以一邊食雪糕一邊食棉花糖，真係令我諗返起細個嘅情景。 

呢度嘅食物同甜品又好味又可愛，仲可以同各樣公仔影相，真係適合女仕們約埋三五知己一齊黎呀。

openrice link: https://www.openrice.com/zh/hongkong/r-lattitude-%E8%A5%BF%E7%92%B0-%E8%A5%BF%E5%BC%8F-%E9%9B%AA%E7%B3%95-%E4%B9%B3%E9%85%AA-r520157

地址: 西環堅尼地城卑路乍街68號Imperial Kennedy地下2號鋪

スーパー丼 Superdon (銅鑼灣)

每次經過銅鑼灣駱克道見到呢間餐廳時都覺得佢個名好特別，門口亦都長期有好多人排隊，令到我好好奇想試下究竟佢d丼有幾super。

黎到Superdon，就梗係食丼架啦，餐牌上除左有指定既丼之外，仲可以揀「自選海鮮丼」。意思即係根據自己喜好黎揀丼既海鮮材料，再按所揀既去收費，最少揀三款。

係諗緊叫咩野食之前，先叫個枝豆食下先。

枝豆 :

豆殼帶有微微的鹹味，輕輕一咬，枝豆就迅速滑入口中，豆嘅味道淡淡地，不過相當爽口。  

唔想動腦筋既我地都懶得揀「自選海鮮丼」，索性揀餐牌上現成既算。

一個SET除左有丼之外，仲有麵豉湯同埋沙律。

麵豉湯 : 

麵豉湯可以話係日本菜中唔可缺少既食物之一，呢度既湯唔單止有頗重既海帶味，仲加左塊豆腐皮，加埋其他配料，入口有口感，味度都相當濃郁。

沙律 : 

新鮮既蔬菜加入西柚碎同西柚汁，入口酸酸地，係一味令人開胃既前菜。 

丼方面我地揀左三文魚親子丼同埋滑蛋吉列豚肉丼。

三文魚親子丼 :

油脂分佈平均嘅三文魚，非常新鮮，入口鮮甜肥美，配埋子薑，三文魚籽同Wasabi，整體味道十分夾。

滑蛋吉列豚肉丼 :

滑蛋豬不嬲都係我嘅至愛，半生熟嘅蛋加埋炸得剛剛好嘅吉列豚肉，只係賣相已經好吸引，豬扒厚身大件，咬落去外皮半硬半軟，肉質又鬆化又有口感，加埋滑蛋，味道帶有濃郁嘅蛋香味，真係天衣無縫嘅配合。  

呢度既丼雖然價錢唔平，但係賣相真係非常精美，材料亦都好新鮮，餐廳真係無改錯名，真係名符其實既Superdon呀。

Openrice link: https://www.openrice.com/zh/hongkong/r-%E3%82%B9%E3%83%BC%E3%83%91%E3%83%BC%E4%B8%BC-%E9%8A%85%E9%91%BC%E7%81%A3-%E6%97%A5%E6%9C%AC%E8%8F%9C-%E5%A3%BD%E5%8F%B8-%E5%88%BA%E8%BA%AB-r524870

地址: 銅鑼灣駱克道501號地舖

Mela Italian & Spanish Cuisine (觀塘)

香港地寸金尺土，唔少餐廳近年都選擇搬入工廠大廈，租金較便宜之餘面積仲相對較大，可以發揮既空間自然較多，所以唔好以為工廈既餐廳質素會比較低，其實當中有唔少出名既地方架。

位於巧明街鴻圖中心既Mela Italian & Spanish Cuisine，由牛頭角地鐵站行去只需要幾分鐘時間，相當方便。

大約1年幾前去過舊址，試盡各式各樣既意大利同西班牙美食之後對呢度念念不忘，今日難得早放工，就打算黎呢頭等朋友放工，順便帶佢黎呢度試下。

雖然set dinner相當抵食，但係想試多啲唔同菜式嘅我哋，當然選擇a la carte。

藜麥、蘋果、紅菜頭、松子仁沙律配香橙油醋汁 :

藜麥營養價值豐富，纖維又高，呢味前菜仲用左營養價值更高嘅紅藜麥，賣相好靚，當中材料有蘋果、紅菜頭、松子仁同埋藜麥。

紅菜頭嘅味道唔係人人都啱，廚師運用香橙油醋汁去蓋過咗紅菜頭獨特嘅味道，入口酸酸甜甜，味道清新，非常醒胃。

蘋果嘅果肉都俾紅菜頭汁染到紅色，不過口感爽甜，加埋松子仁同埋紅藜麥，非常有咬口，絕對係健康之選。

西班牙辣肉腸炒捲葉甘藍、提子乾 :

呢味小食我都係第一次食。

捲葉甘藍又名羽衣甘藍，營養價值高，亦可以抗癌。 

嫩綠嘅菜加入有鹹香味嘅辣肉腸炒成，食落煙煙韌韌，口感十足，值得一試。

意大利煙腩豬面肉白菌芝士蛋汁手製全蛋闊條麵 :

呢度嘅卡邦尼用左煙腩豬面肉整成，非常正宗，入口夠creamy，加埋煮至al dente嘅自家製全蛋意大利闊條麵，食落不但煙韌而且爽口彈牙，每條麵掛到足夠嘅醬汁，以$165呢個價錢來講算係性價比高。

西班牙式燒豬肋排（十吋） :

足足有成10吋長嘅燒豬肋扒，入口外脆內軟，醃得夠入味之餘仲燒得剛剛好，能夠保留原有嘅肉汁，唔會過乾。

碟旁仲配有蘋果醬，味道酸酸地，不過個人認為豬肋排本身已經好夠味，唔點醬已經好好味。

呢度可以同時食到意大利同西班牙美食，服務良好，環境寧靜又乾淨企理，都幾適合朋友傾計或者情侶約會。

openrice link: https://www.openrice.com/zh/hongkong/r-mela-italian-spanish-cuisine-%E8%A7%80%E5%A1%98-%E8%A5%BF%E7%8F%AD%E7%89%99%E8%8F%9C-r526222

地址: 觀塘巧明街94號鴻圖中心地下5D號舖

Chip In Fish & Chips (西貢)

香港真係唔係好多地方食到傳統英式Fish and Chips，早前係網上見到西貢開左間Fish & Chips專門店，老闆娘仲要係英國生活多年後回流返香港，令我深信食物一定有返咁上下水準。

小店位於西貢敬民街，近巴士總站，雖然主打外賣生意，但係都有幾張檯係店內同店外俾客人。

炸魚薯條有分大同細兩個size。魚只有大西洋鱈魚一個選擇，落左order後，店員就會係開放式廚房內即時烹調，雖然店方無以傳統英國模式去用白報紙包住魚同薯條，但係炸魚入口相當鬆脆，肉質鮮嫩又夠大塊，相信粉漿係以傳統方法加入啤酒整成。

薯條方面係英式既粗薯條，做法相當正宗，不過個人認為若果可以落少d鹽既話，味道會更加好。

一份炸魚薯條可以揀一種醬汁，分別有茄汁、他他醬同埋醋，而咖哩汁就要加錢。係我眼中，食魚柳配他他醬同埋英式薯條配茄汁係必須，缺少任何一樣都唔得，如果可以Free兩款醬，咁就真係完美喇。

openrice link: https://www.openrice.com/zh/hongkong/r-chip-in-fish-chips-%E8%A5%BF%E8%B2%A2-%E8%8B%B1%E5%9C%8B%E8%8F%9C-%E6%BC%A2%E5%A0%A1%E5%8C%85-r117781

地址: 西貢敬民街9號高勝樓地下11號舖

一起果醬 (西貢)

中秋過後，天氣開始變得清涼，亦都係郊遊既好時機。是日星期日，天氣又好，一於同朋友兩個入黎西貢行下。

「一起果醬」都算出名，係尖沙咀同西貢各有分店，而西貢分店都相當有特色，帶俾人好舒服既感覺。 座位有分室外同室內，雖然天氣清涼，坐室外都應該幾舒服，不過為免俾等位既客人望住，我地都係選擇坐室內。

因為之前都去過尖沙咀分店好幾次，所以都大約知道想食d咩。

九宮格多士 :
餐廳叫「一起果醬」，黎到又點可以唔食果醬呢？ 所以呢味「九宮格多士」係每次黎都必定會叫既。雖然食材只有多士同埋果醬，但係感覺非常特別，烘脆左既多士分開九小格，每格都有唔同味道既自家製果醬，每種裡面都有D果肉粒，口感唔錯，色彩繽紛，賣相都好吸引，就好似細個寫毛筆字既九宮格咁。唯一美中不足既就係唔知果九種果醬分別係咩味，如果可以用張牛油紙托住塊多 士，上面寫住各種果醬既種類，就真係完美啦。

果醬雞翼 :

蜜糖雞翼平時就食得多，但係果醬雞翼都係第一次試。煎雞翼外皮微脆，雞肉嫩滑，上面塗滿半溶既士多啤梨果醬，食既時候多左一份果醬既甜味，感覺好清新。 

Cream Tea Set :

Cream Tea係英式茶點之一，將佢直譯為中文，你可能以為係有cream既茶，但其實佢係傳統英式下午茶既組合之一，有英式鬆餅、clotted cream、果醬同埋茶一杯。

一個set共有3件鬆餅，外層焗到金黃色，每件一開二之後, 一邊塗clotted cream，一邊塗熱帶風情果醬，入口唔單止暖，仲相當鬆化添。

全天英式早餐 :

英式早餐有芝士炒蛋、煙肉、牛仔早餐腸、紐輪堡腸、扒蕃茄、炒蘑菇、焗豆、厚多士同芒果果醬，每樣食物都有d，的的骰骰，非常精緻，值得一讚既係茄汁豆係熱既，唔係好多地方會整返熱俾你食。如果果醬可以另外裝俾客人，佢地鍾意落幾多就幾多，咁就更好啦。

特調果醬綠茶 :

綠茶味道淡，加埋丁香香橙味既果醬入口相當清新，適合喜歡清清地的朋友。 

呢度環境休閒舒服，有多款口味果醬同小食供客人享用，份量雖然唔多，但配埋果茶，可以坐足個幾鐘，假日黎嘆返下真係一種享受。

openrice link: https://www.openrice.com/zh/hongkong/r-%E4%B8%80%E8%B5%B7%E6%9E%9C%E9%86%AC-%E8%A5%BF%E8%B2%A2-%E8%A5%BF%E5%BC%8F-all-day-breakfast-r152408

地址: 西貢市場街9號地下

品坊 (佐敦)

好記得細個時考試成績好，爸爸媽媽都會帶我去食自助餐獎勵我，雖然長大後無細個咁恨食，但係間唔中食下都幾開心呀。

一向鍾意周圍搵平靚正野食既我，俾我係Openrice搵到個酒店晚市自助餐六折優惠，主題仲要係「即開生蠔、蟹、海鮮自助晚餐」，原價$555，折後只需$333，就可以係一小時四十五分鐘內任食各式各樣既食物。 

「品坊」位於佐敦諾富特酒店1樓，地鐵站行去相當方便，自助晚餐分兩個時段，分別係6:00-7:45同埋8:15-10:00，唔想飽到訓唔著既我，當然選擇早既時段啦。 

到達後第一時間就係睇下有咩好野食，始終胃部容量有限，為左可以食晒本身想食既野，點都要好好計劃下。

沙律入口清新，加埋沙律汁，入口酸酸地，作為自助餐既前菜，都係一個唔錯既選擇。呢度既沙律吧配料都算齊全，除左有各式各樣既水果之外，仲有希臘沙律、泰式青木瓜沙律、中華沙律、燒南瓜沙律、煙火腿意式沙律同埋意式雜錦冷盤等。

食完沙律後，係時候食海鮮同埋刺身喇，呢個係回本位黎架嘛。

刺身種類多，油脂分佈相當平均，入口夠新鮮，相當唔錯。

海鮮有海蝦、龍蝦仔、青口、蟹腳等等，選擇非常豐富，全部都鮮甜味美。除此之外，海鮮亦都經常添加，唔會有供應不足既情況，大家亦都唔需要搶吃。

餐廳每晚都會有兩款唔同既生蠔供食客享用，今晚有法國fine de claire同埋澳洲coffin bay。Fine de claire味道溫和，蠔肉爽滑，碘味同海水味較淡。至於coffin bay， 帶有好重海水味，肉質亦都厚實飽滿。一次過可以品嚐唔同款式既即開靚生蠔，咁既價錢算係唔錯。

熟食方面都有好多選擇，最令我難忘既有西班牙海鮮飯，咖哩炒蟹同埋天多利三文魚。

食完以上既食物後，係時候用第二個胃食甜品喇。除左有我最喜愛既Häagen-Dazs雪糕外，仲有各式各樣既蛋糕、布丁同慕絲等等，只係布丁同焦糖燉蛋已經有多款味道，樣樣野都的的骰骰，非常吸引眼球，不過可惜胃部容量有限，未能每樣都試d，真係有d可惜。不過咁多款甜品當中我最喜愛既係黑白朱古力蛋糕同埋白朱古力士多啤梨蛋糕，組合極具創意，味道清新而且甜度適中。 

食左咁多野，真係有點兒辛苦，好彩餐廳有提供咖啡、茶同埋detox飲品，等我可以飲返杯熱檸茶，幫助消化，唔會飽到行唔到出門口，亦都為豐富既晚餐劃上完美既句號。 

400蚊有找既自助晚餐，除左有海鮮、生蠔同魚生外，仲有咁多甜品食，呢個價錢黎講算係幾抵食架喇。

openrice link: https://www.openrice.com/zh/hongkong/r-%E5%93%81%E5%9D%8A-%E4%BD%90%E6%95%A6-%E5%A4%9A%E5%9C%8B%E8%8F%9C-%E8%87%AA%E5%8A%A9%E9%A4%90-r22297

地址: 佐敦彌敦道348號香港九龍諾富特酒店1樓

新斗記 (尖沙咀)

移民多年既親戚回港探我地，當然帶佢地食好野啦，我第一時間就諗起全港有成6間分店既新斗記喇。

為左方便大家，我揀左尖沙咀分店。餐廳位於九龍中心3樓，佈置以紫色為主，餐具仲用左舊日大排檔既公雞碗，相當有懷舊風味，帶俾人一種傳統中式餐廳既感覺。

呢度其中一樣招牌菜係乳豬，咁出名，我地又點可以唔試下呢？

火山石燒乳豬（例）:

乳豬皮顏色呈深紅，沙眼均勻幼細，塊皮燒得超脆，帶微溫，唔單止薄而鬆化，而且仲無咩肥膏，入口每咬一下都聽到卜卜聲，加埋嫩滑既豬肉，好有口感，配埋海鮮醬食，味道簡直一流。

秘製生炒上肉排 :
色彩繽紛既咕嚕肉，只係賣相已經非常吸引，外層酥脆既半肥瘦肉排，食落唔會太硬，有口感之餘亦唔會太油膩，加埋酸酸甜甜既醬汁相當開胃。而伴碟既紅椒同青椒亦為菜色帶來一種刺激口味。

椒鹽鮮魷 :

鮮魷雖然份量唔多，但係炸粉唔厚，外層炸得鬆化，食落爽口彈牙，椒鹽令鮮魷食落更香口，唔駛點汁都已經好好味，如果份量可以多返少少就更加好啦。

干煸四季豆 :

干煸四季豆煸得恰到好處，味道濃度剛好，入口有輕微辣味，四季豆夠乾身之餘仲帶有清脆既口感，配埋肉碎，送飯食簡直一流呀。

芒果布丁 :

一個晚餐又點可以無甜品呢？大大碗既芒果布丁，芒果味相當香濃，加埋花奶食，入口香滑，布丁口感唔會太硬，如果可以再加多d芒果肉，又或者加粒車厘茄係布丁上，賣相會更加吸引。

總括黎講，今次用餐體驗非常唔錯。高質既食材再加上貼心的服務，誠意推介俾想搵一個適合家庭聚會既地方既朋友。

openrice link: https://www.openrice.com/zh/hongkong/r-%E6%96%B0%E6%96%97%E8%A8%98-%E5%B0%96%E6%B2%99%E5%92%80-%E7%B2%B5%E8%8F%9C-%E5%BB%A3%E6%9D%B1-%E7%87%92%E8%87%98-r185208

地址: 尖沙咀亞士厘道29-39號九龍中心3樓